Miyuki ya mu Mifundu

Shapita 14: Abinadi ne Mfumu Noa

“Shapita 14: Abinadi ne Mfumu Noa,” Miyuki ya mu Mukanda wa Molomo (1997), 38–42

“Shapita 14,” Miyuki ya mu Mukanda wa Molomo, 38–42

Shapita 14

Abinadi ne Mfumu Noa

Zenife — Zenife uvua mfumu muakana wa tshisumbu tshia Bena Nefi. Pakakolaye bikola, muanende Noa wakashala mfumu.

Noa — Noa kakadi mfumu muimpa bu tatuende to. Uvua muntu mubi ne kakasua kutumikila mikenji ya Nzambi to.

bantu badi bafila bintu biabu kudi Mfumu Noa — Wakenzeja bantu bua bamupesha tshitupa tshia nteta, nyama, ngolu, ne mpalata yabu.

Noa musomba ku mesa a biakudia — Mfumu Noa wakenza nunku bualu wakadi muena lulengu. Wakenzeja Bena Nefi bua bamupesha bionsu bivuaye nabi dijinga bua ikala ne moyo.

bakuidi bimpa ne babi — Wakashintulula bakuidi bimpa bavua nabu tatuende ne wakabikila bakuidi babi. Bakuidi babi aba bakalongesha bantu bua kuenza mibi.

nkuasa wa bukalenga ne basalayi — Mfumu Noa uvua ne bibambalu bimpa bibaka, ne nzubu wa bukalenga munena muikala ne nkuasa wa bumfumu. Bibambalu biakadi bilaba ngolu, mpalata ne bibaka ne mitshi ya mushinga mukola.

Noa — Mfumu Noa uvua munanga bubanji buvuaye wangata kudi bantu bende. Yeya ne bakuidi bende bavua bapitshisha diba mu kunua kua mvinyo ne kuikala bantu babi.

Abinadi udi uyisha dikudimuna dia mutshima — Nzambi wakatuma muambi ubikidibua ne Abinadi kudi bantu ba Noa. Abinadi wakabadimuija se, bobu kabayi bakudimuna mitshima to, nebashale bapika ba Bena Lamana.

Noa musomba ku mesa — Pakumvua Mfumu Noa biakadi Abinadi muamba, wakapeta tshiji. Wakatuma bantu bua balua ne Abinadi ku nzubu wa bukalenga bua amushipa.

Abinadi udi wakula ne mfumu — Bakaya ne Abinadi kudi mfumu. Mfumu Noa ne bakuidi bende bakamuela nkonko yabungi. Bakateta ku mukuata ku mêyi bua amba tshintu tshibi.

Abinadi udi wakula ne mfumu — Abinadi kavua ne bowa bua kuandamuna nkonku yabu to. Uvua mumanya ne Nzambi neamuambuluisha. Bakuidi bavua bakema mandamuna a Abinadi.

Mfumu Noa mukuatshika tshiji — Mfumu Noa wakadi ne tshiji ne kutumaye bakuidi bende bua bashipa Abinadi. Abinadi wakamba ne bobu bamulenga, Nzambi neabashipa.

Nyuma wa Tshijila udi ulama Abinadi — Nyuma wa Tshijila wakalama Abinadi bua ajikija kuamba tshivua Mukalenga musue bua amba. Mpala wa Abinadi uvua ukenka. Bakuidi bavua ne bowa bua kumulenga.

Abinadi udi wakula — Kupitshila ku bukola bua Nzambi, Abinadi wakambila bantu bua bubi buabu. Wakababadila mikenji ya Nzambi.

Maliya, Yosefe ne muana mukese Yezu — Wakabambila bua Yezu Kilisto uvua ne bua kuledibua pa buloba. Yezu uvua ne bua kupepejela bantu bua bakudimuna mitshima, babika ku lufu, ne basomba ne Nzambi.

Yezu Kilisto — Abinadi wakambila bantu bua bakudimuna mitshima ne bitaba Yezu Kilisto, tshianana kaba kusungidibua to.

Abinadi mukuatshibua mu nzubu wa lukanu — Mfumu Noa ne bakuidi bende bonso bakabenga kuitaba Abinadi, anu umua wa ku bakuidi bende wakitaba. Noa wakambila bakuidi bua bashipa Abinadi. Bakamusuika ne kumukupabu mu nzubu wa lukanu.

Alama udi wakula ne Mfumu Noa — Muakuidi umue uvua muitaba Abinadi, uvua ubikidibua ne Alama. Wakalomba Mfumu Noa bua alekela Abinadi aya.

Alama udi usokoma — Mfumu wakadi ne tshiji bua Alama ne wakamuipata. Ne wakatuma basadidi bende bua bamushipa. Alama wakanyema ne kusokoma, ne basadidi kabakamupeta nansha.

Abinadi kumpala kua Noa — Panyima pa mupitshisha matuku asatu mu nzubu wa lukanu, Abinadi wakatuadibua kabidi kumpala kua Mfumu Noa. Mfumu wakambila Abinadi bua apingaja biakambaye bibi buende ne bua bantu bende.

Mfumu Noa mukuatshika tshiji — Mfumu Noa wakambila Abinadi se yeya kayi muvila bionsu bivuaye muamba, neashipibue.

Abinadi udi wakula — Abinadi wakadi mumanya ne uvua muamba bulelela. Wakadi mukumbana bua kufua pamutu pa kuvila bia kamutumina Nzambi bua kuamba.

Abinadi udi oshibua — Mfumu Noa wakatuma dîyi kudi bakuidi bende bua bashipa Abinadi. Bakamusuika, kumukumabu, ne kumoshabu too ne mua kafuaye. Kumpala kua kufuaye, Abinadi wakamba se Mfumu Noa neafue pende ku kapia.

Bena Lamana badi baluangana ne bantu ba Noa — Bena Nefi bakuabu bakakudimukila Mfumu Noa ne kusua ku mushipa. Masalayi a Bena Lamana kabidi akalua bua kuluangisha mfumu ne bamulondi bende.

Mfumu ne bamulondi badi banyema kule — Mfumu ne bamulondi bakanyema Bena Lamana, kadi Bena Lamana bakabakuata ne kubanga kubashipa. Mfumu wakambila bantu bende bua bashiya mêku abu ne batungunuka kunyema.

Bena Lamana badi bakuata bantu — Bantu baluma babungi kabakasua kumbuka to. Bakabakuata kudi Bena Lamana.

bantu badi ne tshiji bua Noa — Bantu babungi bavua banyema ne Mfumu Noa bakanyingalala. Bakasua kualukila bua kuambuluisha bakaji ne bana babu ne bantu babu.

Noa ne bakuabu bantu — Mfumu Noa kakasua bua bantu balukila kudi mêku abu to. Wakabatumina dîyi bua bashala nende.

bantu badi bosha Mfumu Noa — Bantu bakadi ne tshiji bua Mfumu Noa. Bakamosha too ne pakafuaye, anu bu mua kamba Abinadi mu Nyuma. Ne bakalukila kudi mêku abu.