“Shapita 4: Bitata bia Tshiamua tshia Kalabi,” Miyuki ya mu Mukanda wa Molomo (1997), 8–12
“Shapita 4,” Miyuki ya mu Mukanda wa Molomo, 8–12
Shapita 4
Bitata bia Tshiamua tshia Kalabi
Lehi wambila Nefi bua se Mukalenga mmusue bua yeya ne bana babu ba balume bapingana mu Yelushalema. Badi ne tshia bua kukangata bitata bia tshiamua tshia kalabi kudi muntu uvua ne dina dia Labana.
Bitata bia tshiamua tshia kalabi bivua bikala miandiku ya mushinga. Bidi biakula pa bulondanganyi bua bankambua ba Lehi, ne mêyi a Nzambi avuaye mubulula kudi bambi.
Lamana ne Lemuele kabakananga kupingana bua kupeta Bitata bia tshiamua tshia kalabi to. Bakamba se ebu budi bualu bukola bua kuenza. Kabavua ne ditabuija mu Mukalenga to.
Nefi wakajinga bua kutumikila Mukalenga. Uvua mumanya se Mukalenga neamuambuluisha yeya ne bana babu ba baluma bua kupeta bitata bia tshiamua tshia kalabi kudi Labana.
Lamana, Lemuele, Sama, ne Nefi bakapingana mu Yelushalema bua kupeta bitata bia tshiamua tshia kalabi.
Lamana wakaya kudi Labana ne kulombaye bitata.
Labana uvua ne tshiji kavua musue kupesha Lamana bitata bia tshiamua tshia kalabi to. Labana wakasua kushipa Lamana, kadi Lamana wakanyema.
Lamana udi wambila bana babu mâlu avua menzeka. Uvua muikala ne bowa ne musue kupingana kudi tatu wabu mu tshipela.
Nefi wakamba se kabena mua kupingana kabayi ne bitata bia tshiamua tshia kalabi to. Wakambila bana babu bua bikala ne ditabuija mu Mukalenga bua bashisha kukumbana bua kupeta bitata bia tshiamua tshia kalabi.
Nefi ne bana babu bakapingana ku nzubu kuabu kua kala mu Yelushalema, bakakunguija ngolu ne mpalata yabu pamua bua kuyishintula ku bitata.
Bakaleja Labana bubanji abu ne kumupeshabu bua kushintula ku bitata. Pakamona Labana ngolu ne mpalata, wakajinga bua bikala biende ne wakabipata pambelu.
Labana wakambila bantu bende bua kushipa bana ba Lehi. Nefi ne bana babu bakanyema ne kusokomabu muinshi mua buloba. Labana wakalama ngolu ne mpalata yabu.
Lamana ne Lemuele bavua bafikila Nefi tshiji. Bakatuta Nefi ne Sama ne mutshi.
Muanjelu wakamueneka ne kuambila Lamana ne Lemuele bua balekela. Wakabambila se Mukalenga neabambuluishe bua kupeta bitata. Wakamba kabidi se Nefi nealue mukokeshi pa bana babu.
Nefi udi wambila bana babu bua bikala ne ditabuija mu Mukalenga, kabikadi ne bowa bua Labana nansha bua bantu bende to. Nefi udi ukolesha bana babu moyi bua kupingana mu Yelushalema.
Butuku abu bana babu ne Nefi bakasokoma pambelu pa tshimanu tshia tshimenga pavua Nefi mubuela munda. Wakenda mutangila ku nzubu wa Labana.
Pakafika Nefi pabuipi ne nzubu wa Labana, wakamona muntu mukuatshika mulala panshi. Uvua muikala Labana.
Nefi wakamona muela wa Labana ne wakawangata. Nyuma wa Tshijila wakambila Nefi bua kushipa Labana, kadi Nefi kavua musue kumushipa to.
Nyuma wa Tshijila wakambila kabidi Nefi bua kushipa Labana bua Nefi kupeta bitata bia tshiamua tshia kalabi. Dîku dia Lehi divua dijinga bitata bua balonganabi lumu luimpa.
Nefi wakatumikila Nyuma wa Tshijila bua kushipa Labana. Nefi wakavuala bilamba ne biamua bia mvita bia Labana.
Nefi wakaya ku nzubu kua Labana ne wakasambakena ne Zolama muena mudimu wa Labana. Nehi uvua mufuanangana ne Labana ne uvua wakula bu yeya.
Wakambila Zolama bua amupesha bitata bia tshiamua tshia kalabi. Zolama wakela meji ne Nefi uvua Labana, nunku wa kamupesha bitata. Nefi wakambila Zolama bua amulonda.
Lamana, Lemuele, ne Sama bakamona Nefi ulue ne bakapeta bowa; bakela meji ne uvua Labana. Bakabanga kunyema, kadi bakimana pavua Nefi mubabikila.
Nunku Zolama wa kajingulula se Nefi kavua Labana to, ne wakateta kunyema. Nefi wakakuata Zolama ne wakamulaya se kakumuenzela bibi pikalaye muya ne Nefi mu tshipela.
Zolama wakitaba. Nefi ne bana babu bakangata zolama ne bitata bia tshiamua tshia kalabi, ne bakalukila kudi Lehi ne Saliya.
Bakapesha Lehi bitata bia tshiamua tshia kalabi. Yeya ne Saliya bavua ne disanka bualu bana babu bavua bikala balamibua. Bonsu buabu bavua basanka ne bakasakidila Nzambi.
Lehi udi ubala bitata bia tshiamua tshia kalabi. Bivua biakula bua Adama ne Eva ne bua mfukilu wa buloba. Bivua bikala ne mêyi a bambi babungi.
Lehi ne Nefi bavua bikala ne disanka bualu bavua batumikila Mukalenga ne bavua bikala bakumbana bua kupeta bitata bia tshiamua tshia kalabi.
Dîku dia Lehi diakambula bitata bia tshiamua tshia kalabi bua bikala nabi mu luendu luabu, bua bikala balongesha bana babu mikenji kupitshila ku bitata.