“Shapita 24: Amona udi Umonangana ne Tatuende wa Mfumu Lamoni,” Miyuki ya mu Mukanda wa Molomo (1997), 69–70
“Shapita 24,” Miyuki ya mu Mukanda wa Molomo, 69–70
Shapita 24
Amona udi Umonangana ne Tatuende wa Mfumu Lamoni
Mfumu Lamoni wakasua bua se Amona amanya tatuende. Mukalenga wakadimuija Amona bua kayi to, bualu tatuende wa Lamoni neamushipa.
Mukalenga wakambila Amona bua aya ku bulaba bua Midoni, kuvua muanabu Alona muela mu nzubu wa lukanu. Mfumu Lamoni wakaya ne Amona.
Bumuakadibu mu luendu, bakasambakena ne tatuende wa Mfumu Lamoni, wakadi mfumu wa malaba onsu. Wakakonka Lamoni kuvuaye uya ne Muena Nefi wa mashimi.
Mfumu Lamoni wakambila tatuende bua Amona ne bua muanabu wakadi mu lukanu. Tatuende wa Lamoni wakatuma ne tshiji Lamoni bua ashipa Amona ne bua kayi ku Midoni to.
Lamoni wakabenga bua kushipa Amona ne kuambaye se yeya ne Amona badi baya bua kulekesha Alona. Tatuende wa Lamoni wakadi ne tshiji ne wakalopola muela wende bua kushipa Lamoni.
Amona wakadi muimana kumpala ulama Lamoni. Nunku tatuende wa Lamoni wakakeba kushipa Amona, kadi yeya wakadisungidila nkayende ne wakatapa tatuende wa Lamoni ku diboko.
Pakamona tatuende wa Lamoni se Amona udi mua kumushipa, wakajinga kupesha Amona nkatshi-nkatshi wa bukalenga buende pikalaye mumulekela ne moyo.
Amona wakamuambila se uvua musue Alona ne bena diende balopoka mu nzubu wa lukanu ne Lamoni ikala mukumbana bua kulama bukalenge buende.
Tatuende wa Lamoni wakajandula se Amona kakasua kumuenzela bibi to. Wakakema bua mushindu uvua Amona munanga muanende. Wakabikila Amona bua amulongesha lumu luimpa.
Amona ne Mfumu Lamoni bakaya ku Midoni. Lamoni wakakula ne mfumu koku, ne Alona ne bena diende bakapatuka mu nzubu wa lukanu.
Amona wakabungama bua mushindu wakadibu bakengeshibua mu lutatu. Bavua batatshishibua bikole kadi bakadi ne lutulu.