“Shapita 22: Bukenji bua Alama ku Amoniha,” Miyuki ya mu Mukanda wa Molomo (1997), 58–63
“Shapita 22,” Miyuki ya mu Mukanda wa Molomo, 58–63
Shapita 22
Bukenji bua Alama mu Amoniha
Alama wakanyingalala bua bubi bua Bena Nefi, nunku wakasua bua kujimija diba diende dionsu mu kuyisha kua lumu luimpa. Wakasungula Nefiha bua kumupingana bu mulumbuluishi munena.
Alama wakalongesha lumu luimpa mu bulaba bujima. Pakasuaye kuyisha mu Amoniha, bantu kabakasua kumuteleja to. Bakamuipata pambelu pa tshimenga.
Alama wakabungama bualu bantu ba ku Amoniha bavua bantu babi bikola. Wakalekela ne kuya ku tshimenga tshikuabu.
Muanjelu wakamuenekela Alama ne kumukankamikaye. Muanjelu wakamuambila bua alukila ku Amoniha bua ayisha kabidi. Alama wakalukila lukasa.
Alama wakadi ne nzala. Bu muakadiye ubuela mu tshimenga, wakalomba muntu tshiakudia. Muanjelu uvua muambila muntu awu bua se Alama nealue, ne Alama wakadi muambi wa Nzambi.
Muntu awu, Amuleke, wakaya ne Alama ku nzubu wende ne kumudishaye. Alama wakashala ne Amuleke ne dîku diende bua matuku abungi. Wakasakidila Nzambi bua dîku dia Amuleke ne kubabeneshaye.
Alama wakambila Amuleke bua dibikila diende dia kulongesha bantu ba ku Amoniha. Amuleke wakaya ne Alama bua kulongesha bantu. Nyuma wa Tshijila wakabambuluisha.
Alama wakambila bantu bua bakudimuna mitshima yabu, tshianana Nzambi udi ubabutula. Wakabambila ne Yezu Kilisto udi ne bua kulua ne kupandisha aba badi ne ditabuija mu yeya ne bakudimuna mitshima.
Bantu ba ku Amoniha bakalua ne tshiji. Bakasua kuela Alama mu buloko, kadi Mukalenga wakamulama.
Nunku Amuleke wakabangisha kuyisha. Bantu babungi bavua bamanya Amuleke; yeya kavua muenyi bu Alama nansha. Wakabambila bua muanjelu uvuaye mumona.
Amuleke wakamba ne Alama wakadi muambi wa Nzambi ne wakula bulelela. Bantu bakapapuka bua kumvua bujadiki bua Amuleke.
Bamue bantu bakalua ne tshiji, nangananga muntu umue wa tshikisu ubikidibua se Zezeloma. Bakateta bua kukuata Amuleke ku meyi ne nkonku, kadi wakabambila ne mmumanye bulongolodi buabu.
Zezeloma uvua musue kunyanga bionsu bivua bimpa. Uvua ukeba malu, ne pashisha bantu bavua bamupesha makuta bua alongolola malu adiye mufuka.
Zezeloma kavua ne mushindu wa kukuata Amuleke ku meyi to, nunku wakamupesha makuta bua amba ne Nzambi kenaku to. Amuleke uvua mumanye ne Nzambi udi ne moyo ne wakamba se Zezeloma uvua mumanye tshiotshi atshi kadi uvua munanga makuta bikola kupita Nzambi.
Amuleke wakalongesha Zezeloma bua Yezu ne bua dibika dia ku lufu ne moyo wa tshiendelela. Bantu bakakema. Zezeloma wakabanga kukanka ne bowa.
Zezeloma uvua mumanye ne Alama ne Amuleka bakadi ne bukola bua Nzambi bualu bakamanya meji ende. Zezeloma wakela makonka ne kutelejaye muvua Alama umulongesha lumu luimpa.
Bamue bantu bakitaba Alama ne Amuleke ne kubangabu kukudimuna mitshima ne kulonga mifundu.
Kadi bantu babungi bakasua kushipa Alama ne Amuleke. Bakasuika bantu babidi aba ne kuya nabu kudi mulumbuluishi munena.
Zêzeloma wakanyingalala bualu uvua muntu mubi ne uvua mulongesha bantu mafi. Wakasengelela bantu bua balekela Alama ne Amuleke baya.
Zêzeloma ne bakuabu bantu bakitaba malongesha a Alama ne Amuleke, ba kipatshibua pambelu pa tshimenga. Bantu babi bakabasa mabue.
Nunku bantu babi bakakunguija ba mamu ne bana bakadi bitabuija ne kubelabu, bobu ne mifundu yabu mu kapia.
Bakenzeja Alama ne Amuleke bua kubandila ba mamu ne bana bafue mu kapia. Amuleke wakasua kuenzejibua mu bukola bua Nzambi bua kubasungila.
Kadi Alama wakambila Amuleka ne kavua ne bua kuimanyika lufu, bualu bantu bavua bafua mu kapia badi ne bua kuikala ne Nzambi katataka, ne bantu babi nebanyokibua.
Mulumbuluishi munena wakakuma Alama ne Amuleke mapi njila yabungi, ne ubaseka bualu kabavua basungile ba mamu ne bana bavua bosheka to. Ne wakabela mu nzubu wa lukanu.
Bantu babi bakuabu bakalua mu nzubu wa lukanu ne kupenda Alama ne Amuleke mu mishindu yabungi, mu kubaladika ne nzala ne kubela mata.
Mulumbuluishi munena wakamba se yeya neitabuija pikala Alama ne Amuleke bobu benzejibua mu bukola bua Nzambi bua kudisungila nkayabu. Wakabakuma mapi kabidi.
Alama ne Amuleke bimana kûlu. Alama wakasambila ne kulomba Nzambi bua abapesha bukola kupitshila ku ditabuija diabu mu Kilisto.
Bukola bua Nzambi bua kuuja Alama ne Amuleke, ne bakakosa mionji ivua mibasuika. Bantu babi bakadi ne bowa ne kuteta mua kunyema kadi bakakuluka.
Buloba buakanyungana, ne bimanu bia nzubu wa lukanu biakakulukila bantu babi. Mukalenga wakalama Alama ne Amuleke, kabakakumibua to.
Bantu ba mu Amoniha bakalua bua kumona tshivua tshifika. Pakamonabu Alama ne Amuleke bendela pambelu pa nzubu wa lukanu mupuka, bakapeta bowa ne kunyemabu.
Mukalenga wakambila Alama ne Amuleke bua baya ku Sidoma. Bakapeta bantu bakane koku. Zêzeloma wakadi kabidi koku ne muikala usama bikola.
Zêzeloma wakadi ne disanka bua kumona Alama ne Amuleke. Wakadi usamisha moyo bualu uvua wela meji se badi mua kuikala bashipibua bua biakenzaye. Wakabalomba bua bamondope.
Zêzeloma wakitabuijila Yezu Kilisto ne kukudimunaye mutshima ku mibi yende. Pakasambila Alama buende, Zêzeloma wakondopibua musangu umue.
Zêzeloma wakatambuishibua ne kubangisha kuyisha lumu luimpa. Bantu bakuabu babungi bakatambuishibua pabu.
Bantu babi ba ku Amoniha bakadi bashipibua kudi masalayi a Bena Lamana, bu muakadi Alama muakula ku Nyuma.