“Shapita 32: Kapitene Moloni ne Dibendela dia Budikadidi,” Miyuki ya mu Mukanda wa Molomo (1997), 89–90
“Shapita 32,” Miyuki ya mu Mukanda wa Molomo, 89–90
Shapita 32
Kapitene Moloni ne Dibendela dia Budikadidi
Pikala Amalikia ne bua kushala Mfumu, neajinga bua kunyangakaja Ekelezia wa Nzambi ne kumbusha budikadidi bua bantu.
Pakumvua mulombodi wa masalayi a Bena Nefi, Kapitene Moloni, bulongolodi bua Amalikia bua kushalaye mfumu, wakapeta tshiji.
Moloni wakapanda tshilamba tshiende bua kuenza dibendela. Wakafunda mukenji bua kuvuluija bantu bua balama ntendelelu wabu, budishikaminyi buabu ne ditalala diabu.
Moloni wakateka dibendela pa dikaya ne kudibikila ne dibendela dia budikadidi. Nunku wakaluata ngabu wenda, ne kutuaye binu bua kusambila.
Wakalomba Nzambi bua akuba aba bavua bitabuija Yezu Kilisto, ne kusambilaye bua budishikaminyi mu bulaba, buvuaye ubikila se; buloba bua budikadidi.
Moloni wakaya munkatshi mua bantu. Unyungisha dibendela dia budikadidi, wakababikila bua balua ne bambuluisha mu kukuba kua budishikaminyi buabu.
Bantu bakalua bafuma ku nseka yonsu ya bulaba. Bakalaya bua kulama mikenji ya Nzambi ne kuluangana bua budishikaminyi.
Pakamona Amalikia Bena Nefi babungi badisangisha kudi Moloni, wakazakala. Yeya ne bavua bamulonda bakumbuka bua kuya kudisangisha ne Bena Lamana
Moloni ne masalayi ende bakateta bua kubimakija, kadi Amalikia ne bantu benda bakesa bakanyema.
Moloni wakateka dibendela dia budikadidi pa tshibumba tshionsu tshia mu bulaba bua Bena Nefi. Bena Nefi bakalama budishikaminyi buabu ne bakapeta kabidi ne ditalala.