“Shapita 28: Bena Zolama ne Lameumpetoma,” Miyuki ya mu Mukanda wa Molomo (1997), 78–80
“Shapita 28,” Miyuki ya mu Mukanda wa Molomo, 78–80
Shapita 28
Bena Zolama ne Lameumpetoma
Bena Zolama bavua mu Ekelezia wa Nzambi kadi bakalua bantu babi, ne kubangabu kukukuila mpingu.
Bena Nefi bavua basua kulama Bena Zolama bua kabadisangishi kudi Bena Lamana to, nunku Alama wakaya ne bena bukenji bakuabu bua kuyisha dîyi dia Nzambi kudi Bena Zolama.
Bena bukenji aba bakakema ne kudiabakenabu bua ngikadilu uvua Bena Zolama bakukuila mu ekelezia yabu, bayibikila ne sunangonga.
Mu nkatshi-nkatshi wa ekelezia, Bena Zolama bavua bibaka tshibumba tshile, batshibikila ne Lameumpetoma. Kuvua shambala bua anu muntu umue wimana ku mutu
Bena Zolama bakashilangana ku dîmana muaba awu, bela lubila mu diûlu ne dîyi dikola bambulula disambila dimue.
Mu disambila edi, Bena Zolama bavua bamba ne Nzambi kena ne mubidi to; udi anu nyuma. Bakamba kabidi ne kakuakuikala Kilisto to.
Bena Zolama bavua bela meji se: Nzambi wakadi mubasungula anu bobu bua kusungidibua mu bukalenge bua mu diulu. Bakela tuasakidila bua kuikala bantu bende banangibua.
Panyima pa Bena Zolama bonsu basambila, bakaya pambelu ne kabakasambila anyi kuakula bua Nzambi kabidi to bua lumingu lujima.
Bena Zolama babanji bavua bananga ngolu ne mpalata, ne bakadi ne buditambishi bua bilengela bia pa buloba. Alama wakadi ne dibungama pakamonaye bubi buabu.
Alama wakasambila buende yeye ne bua bena bukenji bende; bua bapeta bukola, dikankamana, ne dilubuluka mu mudimu wabu.
Pakalombabu diambuluisha bua kupingaja Bena Zolama ku bulelela, Alama ne bena bukenji bakuabu bakuujibua ne Nyuma wa Tshijila.
Pananku bena bukenji bakaya mu masangu mashilangane bua kuyisha. Nzambi wakababenesha ne biakudia ne bia kuluata, ne bukola mu mudimu wabu.
Bena Zolama bapela kabakadi banyishibua bua kubuela munda mua ekelezia to. Bantu aba bakatuadija kuteleja bena bukenji.
Babungi bakakonka Alama tshivuabu ne mua kuenza. Alama wakabambila se; kabavua ne dijinga dia kuikala munda mua ekelezia bua kusambila anyi kutumbisha Nzambi to.
Wakabambila bua bikale ne ditabuija mu Nzambi. Nunku Amuleke wakabalongesha bua Yezu Kilisto ne bua bulongolodi bua Nzambi bua bana bende.
Bena bukenji bakaya, ne Bena Zolama bavua babitabuijila bakipatshibua pambelu pa tshimenga. Bavua bitabuija bakaya kusombela mu bulaba bua Yêshona pamua ne bantu ba Amona.
Nansha muakadi Bena Zolama ba tshikisu batatshisha bantu ba Amona, kadi bantu ba Amona bakambuluisha Bena Zolama bakana ne kubapeshabu biakudia, bia kuluata, ne bulaba.