“Shapita 49: Molomo ne Malongesha Ende,” Miyuki ya mu Mukanda wa Molomo (1997), 138–42
“Shapita 49,” Miyuki ya mu Mukanda wa Molomo, 138–42
Shapita 49
Molomo ne Malongesha Ende
Bidimu biabungi panyima pa dikumbula dia Yezu Kilisto mu Bena Nefi, kasumbu ka bantu kakumbuka mu Ekelezia, ne kudibikilabu ne Bena Lamana.
Misangu yonsu, bisumbu bionsu bibidi biakalua ne tshikisu, bonsu Bena Nefi ne Bena Lamana.
Muntu muakana, Amalona uvua ne mifundu ya tshijila. Nyuma wa Tshijila wakamuambila bua kuyisokoka, bua ikala mikubibua.
Amalona wakambila Molomo, muana wa bidimu 10, muaba uvua miandiku misokoka. Amalona uvua mumanya se uvua mua kueyemena Molomo.
Pakakumbaja Molomo bidimu 24, wakangata bitata bia Nefi ne kufundamu mâlu a bantu bende.
Pakadi Molomo ne bidimu 11, mvita yakabangisha pankatshi pa Bena Nefi ne Bena Lamana. Bena Nefi bakatshimuna, ne ditalala diakabuela kabidi.
Kupitshila ku bubi bua Bena Nefi, Mukalenga wakumbusha bayidi basatu, nunku bishima ne londapu biakimana. Nyuma wa Tshijila kakadi ulombola bantu kabidi to.
Pavua Molomo ne bidimu 15, Yezu Kilisto wakamonangana nenda. Molomo wakalonga mâlu abungi adi atangila Mupandishi ne buimpa buende.
Molomo wakasua bua kuyisha bantu, kadi Yezu wakamuambila bua kenji to, bualu bantu bavua bena tshikisu. Mioyo yabu kayivua misua Nzambi to.
Pashisha mvita mikuabu yakabangisha. Molomo uvua muntu mula ne uvua ne Makanda, nunku Bena Nefi bakamusungula bua kulombola masalayi abu.
Bena Nefi bakaluangana ne Bena Lamana bua bidimu biabungi. Molomo wakakankamika bantu bende bua baluangana bua kukuba mêku abu ne nzubu yabu.
Bena Nefi bakalua bantu babi, nunku Mukalenga kakasua kubambuluisha to.
Molomo wakambila Bena Nefi se pikalabu kabayi bakudimuna mitshima ne batambushibua to, bobu nebipatshibua. Kadi bantu bakabenga.
Bakadisua bua makanda abu, bamba se badi mua kushipa Bena Lamana bonsu. Molomo wakabenga bua kubalombola ntanta mula bualu Bena Nefi bavua bantu babi.
Bena Lamana bakabanga kutshimuna Bena Nefi mu mvita yonsu. Molomo wakangata dipangadika dia kulombola tshiluilu kabidi.
Uvua mumanya se bantu babi ba Bena Nefi kabavua mua kutshimuna mvita to. Kabavua bakudimuna mitshima, nansha basambila bua diambuluisha divuabu nadi dijinga to.
Molomo wakangata miandiku pa kakuna, muaba uvua Amalona muyisokoka ne mufundila bantu bua bayibala dinga dituku.
Uvua mujinga bua bantu bonsu, pamue ne Bena Yuda; bamanya Yezu Kilisto, bakudimuna mitshima ne batambula, ne bateka lumu luimpa mu tshiezedi bua babeneshibua.
Nyuma wakambila Molomo bua angata tutata tukesa tua Nefi tuvua ne mâlu mamba kudi bambi bua dilua dia Kilisto bua atusangisha ku bitata bia Molomo.
Molomo wakalombola Bena Nefi mu bulaba bua Kumola, muaba wakadilongololabu bua kuluangana ne Bena Lamana kabidi.
Molomo wakakulakaja. Uvua mumanya se etshi tshivua mvita ya ndekelu. Kavua musua bua Bena Lamana bamona miandiku ya tshijila ne kuyinyangakaja to.
Nanku wakapesha muanenda Moloni bitata bia Molomo, ne kusokoka bitata biakashala pa kakuna ka Kumola.
Bena Lamana bakalua kuluisha ne kushipa bantu bonsu, kadi kuakashala Bena Nefi 24. Molomo uvua mutapika.
Molomo uvua ne dibungama bua Bena Nefi babungi bavua bafua, kadi uvua mumanya se bavua ne tshia bua kufua bualu bavua balekela Yezu.
Molomo wakateta bua kulongesha Bena Nefi bulelela. Uvua mubambila mushinga wa kuikala ne ditabuija mu Yezu Kilisto.
Uvua mubalongesha bua bikala ne ditekemena kupitshila ku Bupikudi bua Yezu Kilisto, ne kuikala ne lusa, ludi luikala dinanga dilelela dia Kilisto.
Ne Molomo uvua ufundila muanenda Moloni mikanda,uvua ulongesha penda Bena Nefi lumu luimpa.
Molomo wakafunda pa mâlu mabi makola a Bena Nefi. Wakamuambila bua ashala muene ditabuija mu Yezu Kilisto.
Bena Lamana bakashipa Molomo ne Bena Nefi bonsu, kadi Moloni wakashala kujikija kufunda miandiku.