Ola Mama

O le ola mama o le mamā a’ia’i mai feusua’iga. O i latou o e nofomama e ola mama i o latou mafaufauga, upu, ma gaoioiga. O le ola mama o lona uiga o le le faia o soo se sootaga feusuai a’o le’i faaipoipo. O lona uiga foi o le faamaoni atoatoa i le tane po o le avā i le aluga o le faaipoipoga.

Vaaiga Lautele

O sootaga vavalalata faaletino i le va o le tane ma le avā e matagofie ma paia. Ua faauuina e le Atua mo le foafoaga o fanau ma mo le faaalia o le alofa i totonu o le faaipoipoga.

I le lalolagi i aso nei, ua taitai ai e Satani le toatele o tagata ia talitonu o sootaga feusuai i fafo atu o le faaipoipoga e taliaina. Ae i le silafaga a le Atua, o se agasala matuiā lea. O se soona fai faatautala o le mana na Ia tuuina mai ia i tatou e foafoa ai le ola. Na aoao mai le perofeta o Alema e faapea, o agasala tau feusuaiga e sili atu ona matuiā nai lo isi lava agasala vagana ai le fasioti tagata ma le faafitia o le Agaga Paia (tagai i le Alema 39:3–5).

O nisi taimi e taumafai ai tagata e faamalie i latou lava e faapea, o sootaga feusuai i fafo atu o le faaipoipoga e taliaina pe afai ua alolofa tagata e faia i le tasi ma le isi. E le sa’o lena mea. O le solia o le tulafono o le ola mama ma le uunaia o se isi tagata ia faia o lea, e le o se fa’aaliga o le alofa. O tagata ua alofa le tasi i le isi, o le a le lamatiaina lava le fiafia ma le saogalemu o le tasi ma le isi i le faafesuiaia mo le tuinanau le tumau a le tagata lava ia.

A lava le alofa o le tagata mo le tasi ma le isi e tausia ai le tulafono o le ola mama, e faateleina lo laua alofa, faatuatuaina, ma le tautinoga, e iu ai i le fiafia ma le lotogatasi sili atu. O le eseesega, o mafutaga e atinae i luga o feusuaiga le mama, e vave ona le toe manaomia. O i latou e faia feusuaiga le mama e masani ona lagona le fefe, ta’usalaina, ma le mā. O le lototiga, fuā, ma le ita e vave lava ona suitulaga i soo se lagona lelei lea sa i ai i le la mafutaga.

Ua tuuina mai e lo tatou Tama Faalelagi ia i tatou le tulafono o le ola mama mo lo tatou puipuiga. O le usiusitai i lenei tulafono e taua i le filemu patino ma le malosi o le tagata ma i le fiafia i le aiga. O i latou o e tausisia lo latou mama i feusuaiga o le a aloese i manu’a faaleagaga ma faalelagona lea e oo mai i taimi uma mai le faia o sootaga vavalalata faalefeusuai i fafo atu o le faaipoipoga. O i latou o e tausia i latou lava ia mama i feusuaiga, o le a nofouta i le taitaiga, malosi, mafanafana, ma le puipuiga a le Agaga Paia ma o le a faia se tulaga manaomia taua mo le mauaina o se pepa faataga o le malumalu ma auai i sauniga o le malumalu.

Tusifaamaumau Ou Lagona Uunai

Agasala Feusuai

E ta’usalaina e le Alii ma Ana perofeta le le mama i feusuaiga? Na aoao mai le perofeta o Alema e faapea, o agasala tau feusuaiga e sili atu ona matuiā nai lo isi lava agasala vagana ai le fasioti tagata ma le faafitia o le Agaga Paia (tagai i le Alema 39:3–5). O sootaga uma tau i feusuaiga i fafo atu o le faaipoipoga e solia ai le tulafono o le ola mama ma e lamatia ai faaletino ma faaleagaga i latou o e faia.

O Tulafono e Sefulu o loo aofia ai le poloaiga e aua tatou te mulilua, o le feusuaiga lea i le va o se alii ua faaipoipoina ma se tagata e ese mai i lana ava pe i le va o se tamaitai ua faaipoipoina ma se isi e ese mai i lana tane (tagai i le Esoto 20:14). Fai mai le Aposetolo o Paulo, o le “ finagalo o le Atua” ia faapea ona tatou “faamamao ma le faitaaga,” o le feusuaiga lea i le va o se tagata e lei faaipoipoina ma se isi lava tagata (1 Tesalonia 4:3). Ua saunoa soo mai pea perofeta o aso e gata ai e faasaga i nei asagala ma e faasaga i le mausa leaga o sauaga o feusuaiga faatautala.

E faapei o isi soliga o le tulafono o le ola mama, o amioga faatauatane po o le faatauafafine o se agasala matuia. E faafeagai ma faamoemoega o feusuaiga a tagata (tagai i le Roma 1:24–32). E femilosai ai sootaga alofa ma taofia ai tagata mai le mauaina o faamanuiaga ia e mafai ona maua i le olaga faaleaiga ma sauniga faaola o le talalelei.

E le lava le na ona aloese mai feusuaiga i fafo atu o le faaipoipoga i le tulaga faatonuina a le Alii o le mama o le tagata lava ia. E manaomia e le Alii se tulaga maualuga o amioga lelei a Ona soo, e aofia ai le faamaoni atoatoa i le toalua o se tagata i mafaufauga ma amioga. I le Lauga i luga o le Mauga, sa Ia fetalai ai: “Ua outou faalogo, na fai mai i e anamua, Aua e te mulilua: A ou te fai atu a’u ia te outou, Ai se vaai atu i le fafine ina ia manao i ai, ua uma ona mulilua ma ia i lona loto” (Mataio 5:27–28). I aso e gata ai, ua Ia fetalai mai ai, “Aua e te … mulilua, … pe e te faia soo se mea faapena” (Mataupu Faavae ma Feagaiga 59:6). Ma ua Ia toe faamamafaina mai le mataupu faavae sa Ia aoaoina mai i le Lauga i luga o le Mauga: “O ia o lē e vaai atu i se fafine i le manao i ai, pe afai e mulilulua ni isi i o latou loto, o le a latou lē maua le Agaga, ae o le a latou faafitia le faatuatuaga ma o le a matataʼu” (Mataupu Faavae ma Feagaiga 63:16). O nei lapataiga e faatatau i tagata uma, e tusa lava pe ua latou faaipoipo pe nofofua.

O tagata o le Ekalesia o e ua solia agasala tau i feusuaiga e tatau ona talanoa atu i o latou epikopo po o peresitene o le paranesi, o le e mafai ona fesoasoani ia i latou i le faagasologa o le salamo (tagai i le autu o le talalelei “Salamo”).

O i latou o e o loo tauivi ma faaosoosoga faalefeusuaiga, e aofia ai lagona o le tosina atu i le itupa e tasi, e le tatau ona gauai atu i na faaosoosoga. E mafai e tagata ona filifili ia aloese ma amioga faapena ma maua le fesoasoani a le Alii a o latou tatalo mo le malosi ma galulue e faatoilalo le faafitauli.

Tausia o le Tulafono o le Ola Mama

E le afaina po o le a le malosi o le foliga mai o le faaosoosoga, o le a fesoasoani le Alii ia i tatou e tetee atu i ai pe afai tatou te filifili e mulimuli ia te Ia. Na tautino mai e le Aposetolo o Paulo, “Ua le maua outou e se tofotofoga e ese i lo tagata: a ua faamaoni le Atua, o le Na te le tuuina atu outou i le tofotofoga e sili i se mea ua outou lavatia, ae saunia foi faatasi ma le tofotofoga se mea e sao ai, ina ia outou lavā oono” (1 Korinito 10:13). O le fautuaga lenei e mafai ona fesoasoani ia i tatou e faatoilalo ai faaosoosoga fai soo ma le mautinoa i le lalolagi i aso nei:

Filifili nei e nofomama. E manaomia ona tatou faia na ona faatasi lava lenei faaiuga. E mafai ona tatou faia le faaiuga i le taimi nei, a’o lei oo mai le faaosoosoga, ma ia matuai mausali la latou faaiuga ma faatasi ai ma se tautinoga loloto ia le mafai lava ona maluelue. E mafai ona tatou filifili nei o le a tatou le faia lava soo se mea i fafo atu o le faaipoipoga e faaosofia ai lagona malolosi ia e na’o le faaipoipoga lava e ao ona faaalia ai. E mafai ona tatou filifili nei o le a tatou amiosa’o atoatoa i o tatou taitoalua.

Pulea o tatou mafaufauga. E leai se tasi e solia agasala tau feusuai i se taimi vave. O amioga le mama o taimi uma lava e amata ai i mafaufauga le mama. Afai tatou te faataga o tatou mafaufauga ia feosofa’i i luga o mea tufanua pe eleelea, ua tatou uia le laasaga muamua e agai atu i le ola le mama. E tatau ona tatou sosola ese vave mai tulaga e mafai ona taitai atu ai i le agasala ma tatalo mo le malosi i taimi uma e tetee atu ai i le faaosoosoga ma pulea ai o tatou mafaufauga. E mafai ona tatou faia lenei mea o se vaega o a tatou tatalo i aso taitasi.

Ia aloalosā mai ponokalafi. E le tatau ona tatou matamata, faitau, pe faalogologo i soo se mea e faatupu ai pe e faamatalaina ai le tino o le tagata po o se faiga faalefeusuaiga i se auala e faaosofia ai lagona feusuai. O ata ma tusi faaponokalafi e faigata ona toe alu ese ai ma e faataumaoia. E mafai ona latou faoa mai ia i tatou lo tatou faaaloalo mo i tatou lava ma se lagona o le matagofie o le olaga. E mafai ona latou saeia tatou i lalo ma oo atu ai i mafaufauga faatiapolo ma amioga faasaua ma le faatautala.

Afai o loo tatou nofofua ma tafafao faamasani, ia taulima ma le faaaloalo i taimi uma lau paaga tafao. O i latou o loo tafafao faamasani e le tatau lava ona latou taulimaina a latou paaga tafafao o se mea faitino e faaaogaina mo manaoga faatuinanau. E tatau ona latou fuafuaina ma le toto’a ni gaoioiga lelei e maua ai ni aoaoga ina ia le tuua ai na’o i latou e leai ni mea e faia. E tatau ona latou nonofo i eria saogalemu lea e faigofie ai ona latou pulea i latou lava. E le tatau ona latou auai i talanoaga po o gaoioiga e faaosofia ai lagona feusuai, e pei o feakisiga e faaosofia ai lagona malolosi, taooto faatasi po o le taoto i luga o se isi tagata, pe tago i vaega lilo, po o itutino sa o le tino o se isi tagata, pe o fai ni ofu pe leai foi.

Afai ua tatou faaipoipo, ia faamaoni i o tatou taitoalua i o tatou mafaufauga, upu, ma amioga. Ua fetalai mai le Alii: “Ia e alofa i lau avā ma lou loto atoa, ma ia e pipii atu ia te ia ae le o se isi. Ma o ia o lē e vaai atu i se fafine i le manao ia te ia, o le a faafiti e ia le faatuatua, ma o le a lē maua e ia le Agaga; ma afai e lē salamo o ia o le a tuli o ia i fafo” (Mataupu Faavae ma Feagaiga 42:22-23). E le tatau lava ona tatou faatafai i soo se itu lava. I le tele e mafai ai, e tatau ona tatou aloese mai le tuua na’o i tatou ma soo se tasi lava o le itupa faafeagai, ma fesili ifo ia i tatou lava, pe mata o le a fiafia o tatou taitoalua pe afai na te iloaina a tatou upu po o amioga. E tatau ona tatou manatua le fautuaga a le Aposetolo o Paulo ina ia “mamao ma mea leaga eseese uma lava” (1 Tesalonia 5:22). A tatou taumamao mai tulaga faapena, o le a leai se avanoa o faaosoosoga e tuputupu a’e ai.

Faamagaloga mo le Tagata Salamo

O le auala sili ona lelei o le amio mama atoatoa. E sese le solia o agasala tau i feusuaiga ma le manatu o le a na ona tatou salamo mulimuli ane. O lenei lava manatu o se agasala lava lea, e faaalia ai le le migao mo le Alii ma feagaiga tatou te osia ma Ia. Ae peitai, o i latou o e ua solia agasala tau i feusuaiga e mafai ona faamagaloina e le Alii pe afai latou te salamo.

O le salamo e faigata, ae e mafai ona fai (tagai i le Isaia 1:18). O le atuatuvale o le agasala e mafai ona suia i le toafilemu matagofie o le faamagaloga. Ina ia aoao i le mea e manaomia e salamo ai, tagai i le autu o le talalelei “Salamo.”