Muai Olaga

O le muai olaga e faatatau i le olaga ae tatou te le’i fananau mai i lenei lalolagi. I le muai olaga, sa tatou nonofo i le afioaga o lo tatou Tama Faalelagi o ni Ana fanau agaga. Sa le’i i ai ni o tatou tino faaletino e pei o Ia. I lenei muai olaga, sa tatou auai i se fonotaga ma isi fanau agaga a le Tama Faalelagi. I lena fonotaga, sa folasia mai ai e le Tama Faalelagi Lana fuafuaga sili o le fiafia.

Vaaiga Aoao

O le muai olaga e faatatau i le olaga ae tatou te le’i fananau mai i lenei lalolagi. I le muai olaga, sa tatou nonofo i le afioaga o le Tama Faalelagi o ni Ana fanau agaga. Sa le’i i ai ni o tatou tino faaletino.

I lenei muai olaga, sa tatou auai i se fonotaga ma isi fanau agaga a le Tama Faalelagi. I lena fonotaga, sa folasia mai ai e le Tama Faalelagi Lana fuafuaga sili o le fiafia (tagai i le Aperaamo 3:22–26).

Ina ia ogatasi ma le fuafuaga o le fiafia, na osifeagaiga ai Iesu Keriso o le muai olaga, le Alo Ulumatua o le Tama i le agaga, e avea ma Faaola (tagai i le Mose 4:2; Aperaamo 3:27). O e na mulimuli i le Tama Faalelagi ma Iesu Keriso na faataga e o mai i le lalolagi ia latou maua ni aafiaga i le olaga faitino ma alualu ai i luma e agai atu i le ola e faavavau. O Lusifelo, o se tasi o atalii agaga o le Atua, sa faatuiese i le fuafuaga ma na “saili e faaumatia le faitalia a le tagata” (Mose 4:3). Sa avea o ia ma Satani, ma na tuliesea o ia ma e na mulimuli ia te ia mai le lagi ma taofia ai faamanuiaga o le mauaina o se tino faaletino ma oo i aafiaga o le olaga faitino (tagai i le Mose 4:4; Aperaamo 3:27–28).

I lo tatou olaga atoa i le muai olaga, sa tatou atiina ae ai o tatou faasinomaga ma faateleina o tatou gafatia faaleagaga. I le faamanuiaina la i le meaalofa o le faitalia, na tatou faia ai ni faaiuga taua, e pei o le faaiuga e mulimuli i le fuafuaga a le Tama Faalelagi. Onei faaiuga na aafia ai o tatou olaga i lena taimi ma le taimi nei. Sa tatou tuputupu ae i le atamai ma aoaoina ia alofa i le upumoni, ma sa tatou saunia e o mai i le lalolagi, lea o le a mafai ai ona faaauau pea ona tatou alualu i luma.

Tusifaamaumau Ou Lagona Uunai