Sunday School: Doktrina ng Ebanghelyo
Aralin 2: ‘Dinadakila ng Aking Kaluluwa ang Panginoon’

Aralin 2

“Dinadakila ng Aking Kaluluwa ang Panginoon”

Lucas 1; Mateo 1

Layunin

Tulungan ang mga miyembro ng klase na magkaroon ng mas malaking pananampalataya kay Jesucristo sa pamamagitan ng pag-aaral ng buhay nina Elisabet, Zacarias, Juan Bautista, Maria, at Jose.

Paghahanda

  1. Basahin, pagnilay-nilayin, at ipanalangin ang sumusunod na mga banal na kasulatan:

    1. Lucas 1:5–25, 57–80. Nagpakita si anghel Gabriel kay Zacarias at sinabi, bilang sagot sa panalangin, na ang asawa ni Zacarias na si Elisabet, ay magluluwal ng isang anak na lalaki. Ang anak na ito, na pangangalanang Juan, ang maghahanda sa mga tao para sa pagdating ng Panginoon. Nagalinlangan si Zacarias sa mga salita ni Gabriel at siya ay napipi. Naglihi si Elisabet kahit na matanda na siya, at si Juan ay isinilang. Nagpamalas si Zacarias ng panibagong lakas ng pananampalataya habang siya ay nagpopropesiya tungkol sa misyon ni Juan.

    2. Lucas 1:26–56; Mateo 1:18–25. Sinabi ni anghel Gabriel kay Maria na siya ang magiging ina ng Anak ng Diyos. Sina Maria at Elisabet ay nangagalak sa balitang darating ang Tagapagligtas. Nalaman ni Jose na si Maria ang magsisilang sa Tagapagligtas.

  2. Kung makukuha ang sumusunod na mga larawan, gamitin ang mga ito sa aralin: Nangangaral sa Ilang si Juan (34730 893; Pakete ng Larawan ng Sining ng Ebanghelyo 207) at The Annunciation: The Angel Gabriel Appears to Mary (Gospel Art Picture Kit 241).

  3. Mungkahi sa pagtuturo: Kapag ang tao ay nagtuturo sa pamamagitan ng kapangyarihan ng Espiritu Santo, “ang kapangyarihan ng Espiritu Santo ang nagdadala nito sa puso ng mga anak ng tao” (2 Nephi 33:1). Ang pagkadama sa impluwensiya ng Espiritu ay nagpapalakas sa patotoo ng mga miyembro ng klase, sa kanilang pagmamahal sa Panginoon at sa bawat isa, at sa kanilang pangakong mamuhay nang matwid. May panalanging isaalang-alang kung ano ang magagawa ninyo upang maanyayahan ang Espiritu sa bawat aralin. (Tingnan sa mga pahina v–vi ng manwal na ito at sa Pagtuturo—Walang Higit na Dakilang Tungkulin, (33043 893) Yunit A, Paksa 9, “Magturo sa Pamamagitan ng Espiritu,” 17–18; at Yunit E, Paksa 2, “Pagtuturo sa Pamamagitan ng Espiritu,” 96–97.)

Mungkahing Pagbubuo ng Aralin

Gawaing Pantawag-pansin

Kung naaangkop, gamitin ang sumusunod na gawain o ang sariling gawa ninyo upang simulan ang aralin.

Itanong sa mga miyembro ng klase ang sumusunod na mga katanungan:

Gawaing Pantawag-pansin

  • Kung makakadaupang-palad ninyo ang sinuman sa Bagong Tipan maliban kay Jesus, sino ang nanaisin ninyong makilala? Bakit gugustuhin ninyong makilala ang taong iyon?

Matapos sagutin ng ilang miyembro ng klase ang mga tanong, ipaliwanag na madalas ay gusto natin ang mga taong matwid dahil sinusunod nila ang Tagapagligtas at nagpapatotoo sila tungkol sa kanya. Habang higit nating nakikilala ang mga taong ito ay mas nakikilala rin natin si Jesucristo. Tinatalakay ng araling ito ang ilang tao na nagpakita ng mabubuting halimbawa na makatutulong sa atin upang higit na mapalapit sa kanya.

Talakayan at Pagsasagawa ng Banal na Kasulatan

Habang itinuturo ninyo ang sumusunod na mga talata ng banal na kasulatan, talakayin kung paano naaangkop ang mga ito sa pang-araw-araw na buhay. Himukin ang mga miyembro ng klase na magbahagi ng mga karanasan na may kaugnayan sa mga alituntunin ng banal na kasulatan. Dahil hindi madaling itanong ang bawat katanungan o talakayin ang bawat punto ng aralin, piliin nang may panalangin ang mga pinakamainam na makatutugon sa mga pangangailangan ng mga miyembro ng klase.

1. Isinilang si Juan Bautista kina Elisabet at Zacarias.

Talakayin ang Lucas 1:5–25, 57–80. Anyayahan ang mga miyembro ng klase na basahin nang malakas ang mga piling talata.

  • Paano inilalarawan sina Elisabet at Zacarias sa mga banal na kasulatan? (Tingnan sa Lucas 1:6–9.)

  • Anong biyaya ang hiniling sa panalangin nina Zacarias at Elisabet? (Tingnan sa Lucas 1:7, 13.) Paano sinagot ang panalanging ito sa dakong huli? (Tingnan sa Lucas 1:11–13, 24–25. Ituro na malamang ay maraming taon nang ipinanalangin ni Zacarias at Elisabet na magkaroon ng isang anak. Gayunman, hindi ipinagkaloob sa kanila ng Ama sa Langit ang biyayang ito hangga’t hindi dumarating ang tamang panahon upang maisakatuparan ang kanyang mga layunin.) Paano tayo mananatiling matapat at paano natin maiiwasan ang mawalan ng pag-asa kapag hindi kaagad sinagot ang ating taimtim na mga panalangin sa paraang nais natin?

  • Ano ang propesiya ni Gabriel tungkol sa misyon ni Juan? (Tingnan sa Lucas 1:14–17. Ipakita ang larawan ni Juan na nangangaral sa ilang, at ibuod ang mga propesiya ni Gabriel sa pisara. Talakayin ang kahulugan ng mga propesiyang ito, kung paano naisakatuparan ni Juan ang mga ito, at kung paano natin masusundan ang halimbawa ni Juan sa mga bagay na ito.)

    1. “Papagbabaliking-loob [ni Juan ang maraming tao] sa Panginoon na kanilang Diyos” (Lucas 1:16).

    2. “Papagbabaliking-loob [niya] ang mga puso ng mga ama sa mga anak” (Lucas 1:17).

    3. “Ang mga suwail ay [palalakarin niya sa] karunungan ng mga matuwid” (Lucas 1:17).

    4. Kanyang “ipaglalaan ang Panginoon ng isang bayang nahahanda” (Lucas 1:17).

    Paalala: Si Juan Bautista “ang bantog na nagtataglay ng Pagkasaserdoteng Aaron sa buong kasaysayan” (Gabay sa mga Banal na Kasulatan, “Juan Bautista,” 99). Maaari ninyong naising talakayin kung paano maiaangkop sa mga miyembro ng klase na nagtataglay ng Pagkasaserdoteng Aaron ang mga naunang aspeto ng misyon ni Juan.

  • Ano ang nangyari kay Zacarias nang mag-alinlangan siya sa mga salita ng anghel? (Tingnan sa Lucas 1:18–20.) Paano ipinakita ng mga kilos ni Zacarias ang panibagong lakas ng kanyang pananampalataya pagkatapos maisilang si Juan? (Tingnan sa Lucas 1:59–63. Pinangalanan nila ni Elisabet ang kanilang anak na Juan, sa gayon ay sumunod sila sa utos ng Diyos sa halip na sundin ang nakaugalian na sa kanilang lugar.)

  • Habang nagpopropesiya si Zacarias tungkol sa misyon ng kanyang anak ay nagsalita rin siya tungkol sa pagtubos, kaligtasan, kapatawaran ng mga kasalanan, magiliw na awa, at liwanag (Lucas 1:68–79). Sino ang kanyang tinutukoy noong magsalita siya ng tungkol sa mga bagay na ito? (Jesucristo.) Anyayahan ang isang miyembro ng klase na basahin ang Juan 1:6–9. Magpatotoo na tulad ni Juan Bautista ay dapat nating ituon ang ating paglilingkod sa pagtulong sa iba na lumapit kay Cristo.

  • Pagkatapos maisilang si Juan, siya ay lumaki at “lumakas sa espiritu” (Lucas 1:80). Bakit sa palagay ninyo kailangan ni Juan na lumakas sa espiritu upang matupad ang kanyang misyon? Ano ang magagawa natin upang maging malakas sa espiritu?

2. Nalaman nina Maria at Jose na si Maria ang magiging ina ng Anak ng Diyos.

Basahin at talakayin ang mga piling talata mula sa Lucas 1:26–56 at Mateo 1:18–25. Ipakita ang larawan ng Pagbati.

  • Ano ang napag-alaman ni Maria mula kay anghel Gabriel? (Tingnan sa Lucas 1:26–33.) Bakit kinailangang maging anak ng isang mortal na ina at isang imortal na Ama ang Tagapagligtas?

    Itinuro ni Elder Bruce R. McConkie ang bagay na ito tungkol kay Jesucristo:

    “Ang Diyos ang kanyang Ama, kung saan mula sa Imortal na Personaheng ito … ay minana niya ang kapangyarihan ng imortalidad, na siyang kapangyarihan na mabuhay magpakailanman; o dahil sa pinili [niyang] mamatay, ito ang kapangyarihan na magbangong muli tungo sa imortalidad, at doon mabuhay magpakailanman at hindi na muling mamamatay… .

    “ … Si Maria ang kanyang ina, na kung saan mula sa mortal na babaeng ito … ay minana niya ang kapangyarihan ng mortalidad, na siyang kapangyarihang mamatay… .

    “Nang dahil dito … sa pagsasanib ng banal at mortal sa iisang katauhan, kung kaya naisagawa ng Panginoon ang walang-katapusan at walang hanggang pagbabayad-sala. Dahil sa ang Diyos ang kanyang Ama at si Maria ang kanyang ina, kung kaya nagkaroon siya ng kapangyarihang mabuhay o mamatay, batay sa nais niya, at sa kusang pagbibigay ng kanyang buhay ay may kapangyarihan din siyang kunin itong muli. At sa gayon, sa isang paraan na hindi natin nauunawaan, ay ipinaabot ang mga epekto ng pagkabuhay na mag-uling iyon sa lahat ng tao upang ang lahat ay muling magbangon mula sa libingan” (The Promised Messiah [1978], 470–71).

  • Ano ang matututuhan natin tungkol kay Maria mula sa kanyang mga pakikipagusap sa anghel at kay Elisabet? (Tingnan sa Lucas 1:26–38, 45–49; tingnan din sa Alma 7:10. Ibuod sa pisara ang mga sagot ng mga miyembro ng klase. Kung kabataan ang inyong tinuturuan, maaari ninyong naising imungkahi na ituring nila si Maria bilang halimbawa ng isang mabuting kabataang babae.)

    1. Si Maria ay kinalugdan ng Diyos (Lucas 1:28, 30). Ano ang ibig sabihin ng makalugdan ng Diyos? Ano ang ibang bagay na inaasahan ng ilang tao na pagmumulan ng lugod? Paano nagiging mahirap na makalugdan ng Diyos kapag naghahanap tayo ng lugod mula sa ibang mga bagay na ito?

    2. Si Maria ay naging karapat-dapat upang mapasakanya ang Panginoon (Lucas 1:28). Ano ang maaari nating gawin upang maging karapat-dapat tayo sa pagpapalang ito?

    3. Si Maria ay mapagpakumbaba at masunurin sa kalooban ng Panginoon (Lucas 1:38, 48). Bakit mahalaga para sa atin ang sumunod sa kalooban ng Panginoon? Paano tayo magiging higit na mapagpakumbaba at masunurin?

    4. Si Maria ay nagalak sa kanyang Tagapagligtas (Lucas 1:47). Paano tayo magagalak sa Tagapagligtas?

  • Bakit nagalak si Elisabet at ang kanyang anak na nasa sinapupunan pa noong dumalaw si Maria? (Tingnan sa Lucas 1:39–44; tingnan din sa Lucas 1:15. Ituro na ang isa sa mga pangunahing ginagampanan ng Espiritu Santo ay ang magpatotoo tungkol kay Jesucristo.) Kung naaangkop, ikuwento kung paano kayo natulungan ng Espiritu Santo na magkaroon ng patotoo tungkol kay Jesucristo, at anyayahan ang iba na gawin din ang gayon.

  • Paano sinubok ang pagmamahal ni Jose kay Maria? (Tingnan sa Mateo 1:18.) Ano ang naging reaksiyon ni Jose nang malaman niyang nagdadalantao si Maria? (Tingnan sa Mateo 1:19. Ituro na sang-ayon sa batas ay maaaring paratangan ni Jose si Maria na sumira ito sa tipan ng kasal at sa gayon ay litisin sa publiko. Ang gayong paglilitis ay maaaring humantong sa kaparusahang kamatayan. Sa halip na gawin ito, nagpasiya siyang bigyang-laya si Maria mula sa kasunduan ng pagpapakasal.)

  • Paano tinulungan ng Ama sa Langit si Jose na matanggap ang kalagayan ni Maria at makapaghanda para sa kanyang sariling mga pananagutan? (Tingnan sa Mateo 1:20–23.) Ano ang ginawa ni Jose bilang pagtugon sa panaginip na ito? (Tingnan sa Mateo 1:24–25.) Ano ang inihahayag ng tugon na ito tungkol sa kanyang pagkatao?

Katapusan

Anyayahan ang isang miyembro ng klase na basahin ang Lucas 1:46. Ipaliwanag na sa talatang ito, ang salitang dinadakila ay nakapatungkol sa mga pagsisikap ni Maria na papurihan ang Panginoon at tulungan ang iba na makita ang kanyang kagitingan.

Katapusan

  • Paano nakatulong sa inyo ang mga halimbawa nina Elisabet, Zacarias, Juan Bautista, Maria, at Jose na makita ang kadakilaan ng Tagapagligtas at madagdagan ang inyong pananampalataya sa kanya? Paano natin matutulungan ang iba na madagdagan ang kanilang pananampalataya kay Jesucristo?

Ipahayag ang inyong pasasalamat sa mabubuting halimbawa nina Elisabet, Zacarias, Juan Bautista, Maria, at Jose. Magpatotoo tungkol sa mga katotohanang tinalakay ninyo.

Karagdagang mga Ideya sa Pagtuturo

Ang sumusunod na materyal ay karagdagan sa mungkahing banghay ng aralin. Maaari ninyong naising gamitin ang isa o dalawa sa mga ideyang ito bilang bahagi ng aralin.

1. “Upang mapagkilala mo ang katunayan tungkol sa mga bagay na itinuro sa iyo” (Lucas 1:4)

  • Ipinatungkol ni Lucas ang kanyang patotoo sa isang taong nagngangalang Teofilo (Lucas 1:3). Ano ang layunin ni Lucas sa pagsusulat ng kanyang patotoo? (Tingnan sa Lucas 1:3–4. Upang matulungan si Teofilo na malaman ang katiyakan ng mga bagay na naituro.) Paano kayo napalakas ng pakikinig sa iba na nagpapatotoo tungkol sa mga pangkaraniwang doktrina at kilalang mga pangyayari sa banal na kasulatan?