Sunday School: Doktrina ng Ebanghelyo
Aralin 7: ‘[Siya] Rin ang Kumuha ng Ating mga Sakit, at Nagdala ng Ating mga Karamdaman’

Aralin 7

“[Siya] Rin ang Kumuha ng Ating mga Sakit, at Nagdala ng Ating mga Karamdaman”

Marcos 1–2; 4:35–41; 5; Lucas 7:11–17

Layunin

Tulungan ang mga miyembro ng klase na maunawaan ang ilan sa mga dahilan kung bakit nagsagawa ng mga himala ang Tagapagligtas.

Paghahanda

  1. Basahin, pagnilay-nilayin, at ipanalangin ang sumusunod na mga banal na kasulatan:

    1. Marcos 1:14–15, 21–45. Si Jesus ay naglakbay sa buong Galilea na nagtuturo ng ebanghelyo, nagtataboy ng mga demonyo, at nagpapagaling ng maysakit. Itinaboy niya ang isang karumal-dumal na espiritu mula sa isang tao, pinagaling ang biyenan na babae ni Simon Pedro, at pinagaling ang isang ketongin.

    2. Marcos 2:1–12. Pinatawad ni Jesus ang mga kasalanan ng isang tao at pinagaling ang isang lalaking lumpo.

    3. Marcos 4:35–41; 5:1–20; Lucas 7:11–17. Pinayapa ni Jesus ang maunos na dagat, itinaboy ang isang pulutong ng mga demonyo, at binuhay mula sa mga patay ang anak na lalaki ng balo ng Nain.

    4. Marcos 5:21–43. Pinagaling ni Jesus ang babaing inaagasan at binuhay mula sa mga patay ang anak na babae ni Jairo.

  2. Karagdagang pagbabasa: Mateo 8–9; Lucas 4:33–44; 5:12–32; 8:22–56; Alma 7:11–12; Mormon 9:7–20; Moroni 7:27–29, 33–37; Gabay sa mga Banal na Kasulatan, “Himala,” 74.

  3. Kung ang mga larawang Pagpapatigil sa Bagyo (34730 893; Pakete ng Larawan ng Sining ng Ebanghelyo 214) at Binabasbasan ni Jesus ang Anak na Babae ni Jairo (34730 893; Pakete ng Larawan ng Sining ng Ebanghelyo 215) ay makukuha, gamitin ang mga ito sa aralin.

  4. Mungkahi sa pagtuturo: Kailangang malaman ng mga miyembro ng klase kung bakit mahalaga sa panahon ngayon ang mga turo sa mga banal na kasulatan. Habang inihahanda ninyo ang bawat aralin, may panalanging isaalang-alang kung ano ang magagawa ninyo upang himukin ang mga miyembro ng klase na iakma sa kanilang pamumuhay ang mga alituntunin ng ebanghelyo. (Tingnan sa Pagtuturo—Walang Higit na Dakilang Tungkulin, 136; Yunit E, Paksa 21, “Pagtulong sa mga Miyembro ng Klase na Ipamuhay ang mga Alituntunin ng Aralin,” 144–146.)

Mungkahing Pagbubuo ng Aralin

Gawaing Pantawag-pansin

Kung naaangkop, gamitin ang sumusunod na gawain o ang sariling gawa ninyo upang simulan ang aralin.

Gawaing Pantawag-pansin

  • Ano ang himala? (Isang hindi pangkaraniwang pangyayari na sanhi ng banal o espirituwal na kapangyarihan; tingnan sa Gabay sa mga Banal na Kasulatan, “Himala,” 74.)

  • Ano ang isa sa mga himala ng Tagapagligtas na nais sana ninyong masaksihan? Bakit? (Maaari ninyong naising isulat sa pisara ang ilan sa mga himala ni Cristo upang tulungan ang mga miyembro ng klase na sagutin ang tanong na ito.)

Ipaliwanag na tatalakayin sa araling ito ang ilan sa mga himala ng Tagapagligtas at ang kanyang dahilan sa pagsasagawa ng mga ito.

Talakayan at Pagsasagawa ng Banal na Kasulatan

Habang itinuturo ninyo ang sumusunod na mga talata ng banal na kasulatan, talakayin kung paano naaangkop ang mga ito sa pang-araw-araw na pamumuhay. Bigyang-diin na si Jesus ay patuloy na gumagawa ng mga himala sa ating buhay. Himukin ang mga miyembro ng klase na magbahagi, kung naaangkop, ng mga himalang naranasan na nila. (Maaari ninyong naising paalalahanan ang mga miyembro ng klase na ang ilang mga karanasan ay napakasagrado upang ibahagi. Matutulungan sila ng Espiritu Santo na malaman kung kailan nararapat na ibahagi ang isang karanasan.)

1. Si Jesus ay naglakbay sa buong Galilea na nagtuturo ng ebanghelyo at nagsasagawa ng mga himala.

Talakayin ang Marcos 1:14–15, 21–45. Anyayahan ang mga miyembro ng klase na basahin nang malakas ang mga piling talata.

  • Habang naglalakbay si Jesus sa buong Galilea na nagtuturo ng ebanghelyo, siya ay gumawa ng maraming himala, kabilang na ang pagpapagaling ng maysakit at pagtataboy ng mga demonyo (Marcos 1:34, 39). Bakit ginawa ni Jesus ang mga ito at ang iba pang mga himala sa panahon ng kanyang ministeryo? (Maaaring maibilang sa mga sagot ang mga nakalista sa ibaba.)

    1. Upang magpakita ng pagmamahal at habag (tingnan sa Marcos 5:19; tingnan din sa 3 Nephi 17:6–7).

    2. Upang patatagin at pagtibayin ang pananampalataya (tingnan sa Mateo 9:27–30).

    3. Upang patunayan ang kanyang kabanalan at kapangyarihan (tingnan sa Marcos 1:27; 2:10–11).

    Isulat sa pisara ang mga sagot ng mga miyembro ng klase, at iwanan ang listahang ito sa pisara hanggang sa katapusan ng aralin. Habang tinatalakay ninyo ang mga himalang isinagawa ni Jesus, talakayin ang ilan sa mga layunin na natupad sa pamamagitan ng bawat himala. Idagdag sa listahan ang anumang karagdagang mga layunin na binanggit sa aralin.

  • Bakit namangha ang mga tao sa sinagoga sa Capernaum sa mga aral ni Jesus at sa kanyang kakayahang magtaboy ng masasamang espiritu? (Tingnan sa Marcos 1:22, 27.) Sa pamamagitan ng anong awtoridad nagturo si Jesus at nagsagawa ng mga himala? (Sa pamamagitan ng kapangyarihan ng pagkasaserdote, na hindi taglay ng mga eskriba.) Paano napapasaatin sa ngayon ang kapangyarihan at awtoridad na ito?

  • Sang-ayon sa Marcos 1:41, ano ang isang dahilan kung bakit pinagaling ni Jesus ang ketongin? Ituro na maraming isinagawang himala si Jesus na tuwirang nagbigay pagpapala sa isang tao lamang. Ano ang ipinakikita ng mga pangyayaring ito hinggil sa nadarama ni Jesus sa bawat isa sa atin? Paano siya nakapagpakita ng pagmamahal at pagkahabag sa inyo?

  • Paano natin maipakikita ang pagmamahal at pagkahabag na tulad ng kay Cristo sa mga taong nakapaligid sa atin? Paano nakapagpakita sa inyo ng pagmamahal at pagkahabag na tulad ng kay Cristo ang ibang tao?

2. Pinatawad ni Jesus ang mga kasalanan ng isang tao at pinagaling ang isang lalaking lumpo.

Basahin at talakayin ang Marcos 2:1–12.

  • Kaninong pananampalataya ang nakatulong sa pagpapagaling sa lalaking lumpo? (Tingnan sa Marcos 2:3, 5.) Paano ipinakita ng mga taong ito ang kanilang pananampalataya? (Tingnan sa Marcos 2:1–4.) Paano natin mapaiiral ang pananampalataya para sa kapakanan ng iba? Paano nakatulong ang pananampalataya ng iba sa inyo o sa isang tao na kakilala ninyo?

  • Ano ang inisip ng ilan sa mga eskriba nang sabihin ni Jesus sa lalaking lumpo na ang kanyang mga kasalanan ay napatawad na? (Tingnan sa Marcos 2:5–7.) Paano tinugon ni Jesus ang mga eskribang ito? (Tingnan sa Marcos 2:8–11.) Ituro na kung paanong isang himala ang paggaling ng lalaki sa kanyang pagiging lumpo ay gayundin naman na himala para sa kanya ang mapatawad sa kanyang mga kasalanan. Bigyang-diin na ang himalang ito ay makakamtan ng bawat isa sa atin kapag tayo ay nagsisisi.

  • Anong higit na dakilang kapangyarihan ng pagpapagaling ang maaaring isagisag ng pisikal na pagpapagaling ng Tagapagligtas? (Tingnan sa Isaias 53:5; 2 Nephi 25:13; 3 Nephi 9:13.) Paano kayo pinagpala ng espirituwal ng kapangyarihan ni Jesus na magpagaling? Paano natin masusumpungan ang espirituwal na pagpapagaling?

3. Pinayapa ni Jesus ang dagat, itinaboy ang mga demonyo, at binuhay mula sa mga patay ang anak na lalaki ng balo ng Nain.

Basahin at talakayin ang piling mga talata mula sa Marcos 4:35–41; 5:1–20 at Lucas 7:11–17. Ipakita ang larawan ni Jesus na pinapayapa ang unos.

  • Ang mga pisikal na aspeto ng mga himala ng Tagapagligtas ay kadalasang sumasagisag sa mga espirituwal na katotohanan. Anong mga espirituwal na katotohanan ang matututuhan natin mula sa sumusunod na mga himala? (Ang mga posibleng sagot ay nasa panaklong.)

    1. Marcos 4:35–41. Pinayapa ni Jesus ang dagat. (Mabibigyan niya tayo ng kapayapaan.)

    2. Marcos 5:1–20. Itinaboy ni Jesus ang isang pulutong ng mga demonyo. (Maitataboy rin niya si Satanas at ang kanyang impluwensiya sa ating buhay.)

    3. Lucas 7:11–17. Binuhay ni Jesus ang isang kabataang lalaki mula sa mga patay. (Dahil sa kanyang Pagbabayad-sala, tayo ay mabubuhay mula sa mga patay sa Pagkabuhay na mag-uli.)

    Anyayahan ang mga miyembro ng klase na banggitin ang iba pang mga himala na isinagawa ng Tagapagligtas at ang mga espirituwal na katotohanan na matututuhan natin mula sa mga himalang iyon.

  • Anong iba pang mahahalagang bagay ang napag-alaman ninyo mula sa pagaaral ng tatlong himalang ito?

4. Pinagaling ni Jesus ang babaeng inaagasan at binuhay mula sa mga patay ang anak na babae ni Jairo.

Basahin at talakayin ang piling mga talata mula sa Marcos 5:21–43.

  • Paano ipinakita ng babaeng inaagasan ang kanyang pananampalataya? (Tingnan sa Marcos 5:25–29.) Ano ang dahilan ng kanyang paggaling? (Tingnan sa Marcos 5:34. Bigyang-diin na ang kanyang pananampalataya sa kapangyarihan ni Jesus, hindi ang paghipo sa kanyang kasuotan, ang dahilan ng kanyang paggaling.)

  • Ipakita ang larawan ni Jesus na binabasbasan ang anak na babae ni Jairo. Paano ipinakita ni Jairo ang kanyang pananampalataya sa Tagapagligtas? (Tingnan sa Marcos 5:22–23.) Ano ang sinabi ni Jesus upang palakasin ang pananampalataya ni Jairo noong marinig ni Jairo na ang kanyang anak na babae ay patay na? (Tingnan sa Marcos 5:36.) Paano ninyo maisasagawa ang mga salitang ito sa inyong buhay?

  • Bakit sa palagay ninyo kailangang mauna muna ang pananampalataya kaysa sa mga himala? (Tingnan sa Eter 12:12, 18; Moroni 7:37; at ang sumusunod na siping-banggit.) Bakit hindi tanging ang mga himala lamang ang makapagbibigay ng matibay na pundasyon para sa pananampalataya?

    Sinabi ni Brigham Young na: “Ang mga himala, o ang mga hindi pangkaraniwang pagpapatunay na ito ng kapangyarihan ng Diyos, ay hindi para sa mga di-mananampalataya; ang mga ito ay para sa ikagagaan ng loob ng mga Banal, at upang palakasin at pagtibayin ang pananampalataya ng mga nagmamahal, may takot, at naglilingkod sa Diyos” (Discourses of Brigham Young, pinili ni John A. Widtsoe [1941], 341).

  • Bakit mahalaga sa inyo ang mga himalang isinagawa ni Jesus noong panahon ng kanyang buhay sa lupa? Bakit mahalagang malaman na patuloy pa rin siyang gumagawa ng mga himala sa ngayon? Ano ang ilang halimbawa ng makabagong mga himala?

Katapusan

Magpatotoo na ang Tagapagligtas ay makapagpapagaling kapwa ng espirituwal at pisikal na karamdaman. Ipahayag ang inyong pasasalamat sa lahat ng kanyang ginawa para sa atin. Kung naaangkop, maaari ninyong naising isalaysay ang isang himala na nagpala sa inyong buhay.

Hilingin sa mga miyembro ng klase na tahimik na pagnilay-nilayin ang mga himalang naranasan na nila. Himukin silang makilala at pasalamatan ang mga himala sa kanilang buhay.

Karagdagang mga Ideya sa Pagtuturo

Ang sumusunod na materyal ay karagdagan sa mungkahing banghay ng aralin. Maaari ninyong naising gamitin ang isa o dalawa sa mga ideyang ito bilang bahagi ng aralin.

1. Mga himala sa Lumang Tipan

Ipaliwanag na ang mga himala ay hindi bago sa mga Judio. Ang mga himala ay naisagawa na noong una ng mga propetang iginalang ng mga Judio sa Lumang Tipan. Sandaling pagbalik-aralan ang sumusunod na mga halimbawa:

  1. Binuhay mula sa mga patay ng propetang si Elijah ang isang batang lalaki (I Mga Hari 17:17–24).

  2. Pinakain ng propetang Eliseo ang isang pulutong sa pamamagitan ng kaunting pagkain (II Mga Hari 4:42–44).

  3. Pinagaling ni propetang Eliseo si Naaman, na isang ketongin (II Mga Hari 5:1–19).

  • Sa anong kapangyarihan nagsagawa ng mga himala ang mga propetang ito? (Ang pagkasaserdote, ang banal na kapangyarihan na ibinigay sa kanila ng Ama sa Langit at ni Jesucristo.)

2. “Hindi nangangailangan ng manggagamot ang mga walang sakit” (Marcos 2:17)

  • Ano ang naging reaksiyon ng mga eskriba at mga Fariseo nang makita nilang kumakain si Jesus na kasalo ang mga taong itinuturing nilang mga makasalanan? (Tingnan sa Marcos 2:15–16.) Ano ang sinabi ni Jesus sa kanila? (Tingnan sa Marcos 2:17.) Ano ang ibig sabihin nito? Sa anong mga paraan tayong lahat “nangangailangan … ng manggagamot”?