Sunday School: Doktrina ng Ebanghelyo
Aralin 6: ‘At Pagdaka’y Iniwan Nila ang mga Lambat’

Aralin 6

“At Pagdaka’y Iniwan Nila ang mga Lambat”

Lucas 4:14–32; 5; 6:12–16; Mateo 10

Layunin

Tulungan ang mga miyembro ng klase na maunawaan na ang mga Apostol ay tinawag upang maging natatanging saksi ni Jesucristo at pinagpapala tayo kapag itinataguyod at sinusunod natin sila.

Paghahanda

  1. Basahin, pagnilay-nilayin, at ipanalangin ang sumusunod na mga banal na kasulatan:

    1. Lucas 4:14–32. Nagturo si Jesus sa isang sinagoga sa Nazaret at nagpatotoo na siya ang Mesiyas na ipinropesiya ni Isaias. Galit na galit na tinanggihan siya ng mga tao.

    2. Lucas 5:1–11, 27–28; 6:12–16. Tinawag ni Jesus ang kanyang Labindalawang Apostol.

    3. Mateo 10. Inordenan at tinagubilinan ni Jesus ang Labindalawang Apostol at isinugo sila upang ipangaral ang ebanghelyo.

  2. Karagdagang pagbabasa: Isaias 61:1–2; Mateo 4:18–22; Marcos 1:16–20; 3:13–19; 6:7–13; Lucas 9:1–6; 12:1–12; Doktrina at mga Tipan 107:23–24, 33–35, 39, 58; ‘Gabay sa mga Banal na Kasulatan, “Apostol,” 13. ’

  3. Kung makukuha ang sumusunod na mga larawan, gamitin ang mga ito sa aralin: Pagtawag sa mga Mangingisda (34730 893; Pakete ng Larawan ng Sining ng Ebanghelyo 209) o Si Jesus at ang mga Mangingisda (34730 893; Pakete ng Larawan ng Sining ng Ebanghelyo 210); Inoordenan ni Cristo ang mga Apostol (34730 893; Pakete ng Larawan ng Sining ng Ebanghelyo 211); at isang larawan ng kasalukuyang Korum ng Labindalawang Apostol (mula sa pinakahuling isyu ng Ensign o Liahona na nauukol sa komperensiya).

  4. Mungkahi sa pagtuturo: Alamin at gamitin ang mga pangalan ng mga miyembro ng klase. Kapag ganito ang ginagawa ninyo, makikita ng mga miyembro ng klase na nagmamalasakit kayo sa kanila bilang mga indibiduwal. Ang malaman ang mga pangalan ng mga miyembro ng klase ay makatutulong din sa inyo na makahimok ng paglahok dahil magagawa ninyong ibaling ang mga tanong sa tiyak na tao. (Tingnan sa Pagtuturo—Walang Higit na Dakilang Tungkulin, Yunit E, Paksa 16, “Paggamit ng mga Tanong Upang Pumukaw ng Pag-iisip,” 128–130.)

Mungkahing Pagbubuo ng Aralin

Gawaing Pantawag-pansin

Kung naaangkop, gamitin ang sumusunod na gawain o ang sariling gawa ninyo upang simulan ang aralin.

Ipabasa sa isang miyembro ng klase ang unang bahagi ng Mosias 27:31 (hanggang sa “kikilalanin na siya ay Diyos”). Ipaliwanag na sa Ikalawang Pagparito ni Jesucristo ay kikilalanin siya ng lahat bilang Tagapagligtas. Hindi ito nangyari noong kanyang unang pagparito. Pinag-aralan ng mga Judio ang mga propesiya tungkol sa pagdating ng Tagapagligtas sa loob ng daan-daang taon, subalit marami sa mga nakarinig kay Jesus ang nabigong makilala siya bilang siyang Tagapagligtas. Dahil hindi pinalaya ni Jesus ang mga Judio mula sa pamumuno ng Roma, na tulad ng inasahan nilang gagawin ng Mesiyas, marami sa kanila ang nagtakwil sa kanya at sa kanyang mensahe.

Ituro na tatalakayin ng unang bahagi ng araling ito kung ano ang nangyari noong unang ipahayag ni Jesus na siya ang matagal nang hinihintay na Mesiyas. Tatalakayin naman ng iba pang mga bahagi ng aralin ang pagtawag ni Jesus ng mga Apostol upang tulungan siya sa pagpapalaganap ng kanyang mensahe.

Talakayan at Pagsasagawa ng Banal na Kasulatan

Habang itinuturo ninyo ang sumusunod na mga talata ng banal na kasulatan, talakayin ang mga biyayang nagmumula sa pagkakilala na si Jesucristo ang Tagapagligtas at sa pagsunod sa mga Apostol.

1. Ipinahayag ni Jesus na siya ang Mesiyas.

Talakayin ang Lucas 4:14–32. Anyayahan ang mga miyembro ng klase na basahin ang mga piling talata. Ipaliwanag na inanyayahang magbasa si Jesus ng isang talata ng banal na kasulatan at nahilingan din na magbigay ng puna tungkol dito habang dumadalo sa pagpupulong sa sinagoga sa Nazaret.

  • Ipabasa sa isang miyembro ng klase ang Lucas 4:16–19. (Ituro na ang mga talata 18–19 ay sinipi mula sa Isaias 61:1–2. Si Isaias ay tinawag na “Esaias” sa Lucas 4:17.) Tungkol saan ang mga talatang ito? (Ang mga ito ay paglalarawan ng propeta tungkol sa mga bagay na gagawin ng Mesiyas; tingnan sa aralin 1.)

  • Nang matapos basahin ni Jesus ang talata mula sa Isaias, anong patotoo ang kanyang ibinigay? (Tingnan sa Lucas 4:21. Ipinahayag niya na siya ang Mesiyas na ipinropesiya ni Isaias at siya ring hinihintay ng mga Judio sa loob ng daan-daang taon.) Paano tumugon ang mga tao sa sinagoga sa pahayag ni Jesus? (Tingnan sa Lucas 4:22–29.)

  • Bakit sa palagay ninyo nahirapan ang mga tao sa sinagoga sa pagtanggap kay Jesus bilang ang Mesiyas? (Tingnan sa Lucas 4:22. Maaaring maibilang sa mga sagot na siya ay kilala nila at nakita ang kanyang paglaki, kung kaya’t hindi nila maubos maisip kung paano siya magiging ang dakilang Mesiyas na inaasahan nilang darating.) Bakit sa palagay ninyo nahihirapan ang ilang mga tao sa ngayon na tanggapin si Jesucristo? Paano natin mapalalakas ang ating mga patotoo na si Jesus ang Tagapagligtas?

2. Tinawag ni Jesus ang kanyang Labindalawang Apostol.

Basahin at talakayin ang mga piling talata mula sa Lucas 5:1–11, 27–28; 6:12–16. Ipakita ang larawan ni Jesus at ng mga mangingisda at ang larawan ng kasalukuyang Labindalawang Apostol. Habang tinatalakay ninyo ang mga talata ng banal na kasulatan, tulungan ang mga miyembro ng klase na maunawaan na ang mga Apostol ay tinawag upang gawin nila ang ginawa mismo ni Jesus sa sinagoga sa Nazaret—ipahayag na siya ang Mesiyas, ang Tagapagligtas.

  • Ano ang ginagawa nina Simon Pedro, Santiago, at Juan noong magpunta si Jesus sa kanila? (Tingnan sa Lucas 5:1–2.) Ano ang sinabi sa kanila ni Jesus tungkol sa kung paano mababago ang kanilang buhay kung susunod sila sa kanya? (Tingnan sa Lucas 5:10.) Paano naapektuhan ang inyong buhay dahil sa inyong pasiyang sundin si Jesucristo?

  • Paano nagmistulang pagbabadya ang himala na nangyari sa mga lambat tungkol sa magiging mga karanasan nina Pedro, Santiago, at Juan bilang “mga mamamalakaya ng mga tao”? (Marcos 1:17). Sabihin sa mga miyembro ng klase na isaalang-alang ang sumusunod na mga parirala:

    1. Lucas 5:5: “Sa iyong salita ay ihuhulog ko ang mga lambat.” (Gagawa sila kung saan sila papuntahin ni Jesus.)

    2. Lucas 5:6: “Nakahuli sila ng lubhang maraming isda; at nagkampupunit ang kanilang mga lambat.” (Matatagpuan nila ang maraming tao na tatanggap sa ebanghelyo.)

    3. Lucas 5:7: “Kinawayan nila ang mga kasamahan … upang magsilapit at sila’y tulungan.” (Tatawagin nila ang iba pa upang tumulong sa gawain.)

  • Ituro na sa Lucas 5:1–11 ay tinawag ni Jesus sina Pedro, Santiago, at Juan na maging kanyang mga disipulo. Sa dakong huli ay tatawagin niya sila upang maging mga Apostol. Isulat sa pisara ang Disipulo at Apostol. Ano ang kaibahan ng isang disipulo at isang Apostol?

    Ipaliwanag na ang disipulo ay sinumang tagasunod ni Jesucristo (Gabay sa mga Banal na Kasulatan, “Disipulo,” 44–45). Ang Apostol ay isang disipulo na tinawag na maging isang natatanging saksi ni Cristo (Doktrina at mga Tipan 107:23). Ang ibig sabihin ng salitang Apostol ay “isang isinugo” (Gabay sa mga Banal na Kasulatan, “Apostol,” 13). Ang mga miyembro ng Korum ng Labindalawang Apostol ay isinusugo upang magpatotoo sa daigdig na si Jesus ang Tagapagligtas at Manunubos ng sangkatauhan.

  • Bakit mahalaga ang pagtawag ni Jesus ng mga Apostol? (Tingnan sa Mateo 9:36–38; 16:19; Marcos 3:14–15; Juan 20:19–21, 23; Mga Taga Efeso 4:11–15. Tutulungan nila si Jesus na ipangaral ang ebanghelyo at pamunuan ang Simbahan at ipagpatuloy ang awtoridad ng pagkasaserdote kapag wala na si Jesus.) Bakit mahalaga na tumawag ang Panginoon ng mga Apostol sa ngayon?

  • Paano pinili ni Jesus ang orihinal na Labindalawang Apostol? (Tingnan sa Lucas 6:12–13.) Paano inihanda ni Jesus ang kanyang sarili sa pagtawag sa kanila? Paano ito maihahambing sa paraan ng pagtawag sa mga tao sa ngayon na maging mga Apostol at maglingkod sa iba pang mga tungkulin sa Simbahan? (Ang mga pinuno ng Simbahan ay nananalangin at naghahangad ng inspirasyon na malaman kung sino ang nanaisin ng Panginoon na maglingkod sa bawat tungkulin.)

  • Ano ang sinasabi sa atin ng mga banal na kasulatan tungkol sa nakaraan at pagkatao ng mga lalaking tinawag ni Jesus na maging mga Apostol? (Tingnan sa Lucas 5:5, 8, 11, 27–28. Maaaring maibilang sa mga sagot na hindi sila nagkaroon ng pormal na pagsasanay para sa ministeryo, ngunit sila ay mapagpakumbaba, masunurin, masisipag na kalalakihan na buong-pusong magsasakripisyo ng lahat nang mayroon sila para lamang sumunod sa Panginoon.) Ano ang ipinahihiwatig nito tungkol sa kung paano nagiging karapat-dapat ang isang tao na maglingkod sa Panginoon? (Tingnan din sa Doktrina at mga Tipan 4:3, 5–6; Mga Saligan ng Pananampalataya 1:5.)

3. Inordenan at tinagubilinan ni Jesus ang Labindalawang Apostol.

Basahin at talakayin ang piling mga talata mula sa Mateo 10. Ipakita ang larawan ni Cristo na inoordenan ang mga Apostol.

  • Pagkatapos tawagin ni Jesus ang Labindalawang Apostol ay ibinigay niya sa kanila ang kapangyarihan ng pagkasaserdote at itinuro sa kanila ang kanilang mga pananagutan. Ano ang natututuhan natin tungkol sa mga kapangyarihan at pananagutan ng mga Apostol mula sa payo ni Jesus sa Mateo 10? (Isulat sa pisara ang mga sagot ng mga miyembro ng klase. Maaaring maibilang sa mga sagot ang mga nakalista sa ibaba.)

    1. May kapangyarihan silang pagalingin ang may espirituwal at pisikal na karamdaman (talata 1).

    2. Isinugo sila sa mga ligaw na tupa ng Israel upang ipangaral na ang kaharian ng langit ay malapit nang dumating (mga talata 6–7).

    3. Gagamitin nila ang kanilang kapangyarihan ng pagkasaserdote upang basbasan at pagalingin ang mga tao (talata 8).

    4. Hahanapin nila ang mga nakahandang makinig sa ebanghelyo (mga talata 11–14).

    5. Magtuturo sila ayon sa patnubay ng Espiritu (mga talata 19–20).

    6. Iuukol nila ang kanilang buong buhay sa gawain ng Tagapagligtas (talata 39).

  • Paano maihahambing ang mga kapangyarihan at tungkuling ibinigay sa orihinal na mga Apostol sa mga ibinigay sa mga Apostol sa huling araw? (Tingnan sa Doktrina at mga Tipan 107:23, 33, 35; 112:14, 19–22, 30–31.) Paano ninyo nakitang isinasakatuparan ng mga Apostol sa huling araw ang mga tungkuling ito?

  • Anong mga biyaya ang ipinapangako sa mga sumusunod sa mga Apostol? (Tingnan sa Mateo 10:40–42; tingnan din sa Doktrina at mga Tipan 124:45–46.)

    Sinabi ni Elder Spencer W. Kimball na: “Ang sinuman sa Simbahang ito ay hindi kailanman maliligaw ng landas kung buong katapatan at walang pagbabago nilang susundin ang mga Awtoridad ng Simbahan na itinalaga ng Panginoon sa kanyang Simbahan. Ang Simbahang ito ay hindi kailanman maliligaw ng landas; hindi kayo kailanman ililigaw ng Korum ng Labindalawa; hindi ito kailanman nangyari at hindi ito kailanman mangyayari” (sa Conference Report, Abr. 1951, 104).

Katapusan

Magpatotoo na si Jesucristo ang tunay na Mesiyas at ang Labindalawang Apostol ay mga natatanging saksi niya. Maaari ninyong naising magbahagi ng isang karanasan kung saan pinagpala ang inyong buhay ng pagsunod sa payo ng isang Apostol.

Karagdagang mga Ideya sa Pagtuturo

Ang sumusunod na materyal ay karagdagan sa mungkahing banghay ng aralin. Maaari ninyong naising gamitin ang isa o higit pa sa mga ideyang ito bilang bahagi ng aralin.

1. Ang kasalukuyang Labindalawang Apostol

Ipakita ang mga larawan ng kasalukuyang Labindalawang Apostol at tulungan ang mga miyembro ng klase na matutuhan ang kanilang mga pangalan. Maaari ninyong naising gamitin ang sumusunod na maikling pagsusulit:

Bigyan ang bawat miyembro ng klase ng lapis at isang piraso ng papel, at hilingin sa kanilang lagyan nila ng bilang ang kanilang mga papel mula 1 hanggang 12. Ipakita ang larawan ng bawat Apostol nang hindi ibinubunyag ang kanyang pangalan, at hilingin sa mga miyembro ng klase na isulat ang pangalan sa kanilang mga papel na kasunod ng angkop na bilang. Kapag naipakita na ninyong lahat ang mga larawan, balikan ang tamang mga sagot.

2. Ang orihinal na Labindalawang Apostol

Tulungan ang mga miyembro ng klase na matutuhan ang mga pangalan ng orihinal na Labindalawang Apostol (Mateo 10:2–4). Ilahad ang sumusunod na impormasyon sa sarili ninyong pananalita upang tulungan ang mga miyembro ng klase na maunawaan kung paano tinutukoy sa mga banal na kasulatan ang iba’t ibang Apostol:

Dalawang Apostol ang nagngangalang Santiago: si Santiago na anak ni Zebedeo at si Santiago na anak ni Alfeo. Dalawa ang nagngangalang Simon: si Simon Pedro at si Simon na Cananeo, na tinatawag ding Simong Masikap (“ang taong masyadong masigasig”). Dalawa ang nagngangalang Judas: si Judas (na tinatawag ding [Lebbaeus] Tadeo) at si Judas Iscariote, na nagkanulo kay Cristo. Si Mateo ay tinatawag na Levi sa Lucas 5:27–28. Si Tomas ay kilala rin bilang si Didimo, na ang ibig sabihin ay “kambal.” Ang Apostol na tinukoy na Bartolome sa mga ebanghelyo nina Mateo, Marcos, at Lucas ay ipinagpapalagay na siya ring tinutukoy na Natanael sa ebanghelyo ni Juan.

3. “Ang umiibig sa ama o sa ina ng higit kaysa akin ay hindi karapat-dapat sa akin” (Mateo 10:37)

Ipabasa sa mga miyembro ng klase ang Mateo 10:35–38.

  • Paano natutupad kung minsan ang mga talata 35 at 36 kapag sumasapi ang isang tao sa Simbahan? Bagaman nalalaman natin na nais ng Panginoon na maging mapayapa at nagkakaisa ang ating mga pamilya, bakit kaya sa palagay ninyo binigkas niya ang mga pangungusap na ito? Kanino natin dapat iukol ang ating buong katapatan? (Tingnan sa mga talata 37–38; tingnan din sa Lucas 14:33.)

4. Pagpapalabas ng video

Ang unang yugto ng “New Testament Customs,” isang piling bahagi mula sa New Testament Video Presentations (53914), ay maaaring maging kapaki-pakinabang sa araling ito. Ang yugtong ito ay kinapapalooban ng impormasyon tungkol sa kung ano ang kahulugan kay Jesus ng kanyang sariling pagpapahayag na siya ang hinirang (anointed one), o Mesiyas (Lucas 4:18); tungkol sa pagsamba sa sinagoga; at kung ano ang ibig sabihin ng ipangaral ang ebanghelyo nang walang supot ng salapi at supot ng pagkain, na tulad ng ibinilin ni Jesus na gawin ng kanyang mga Apostol (Mateo 10:9–10).