Aralin 23

“Kung Paanong Iniibig Ko Kayo, ay Mangag-ibigan Naman Kayo sa Isa’t Isa”

Lucas 22:1–38; Juan 13–15

Layunin

Bigyang-inspirasyon ang mga miyembro ng klase na sundan ang halimbawa ni Jesus sa pamamagitan ng pagmamahal at paglilingkod sa isa’t isa.

Paghahanda

1. Basahin, pagnilay-nilayin, at ipanalangin ang sumusunod na mga banal na kasulatan:

   1. Lucas 22:7–30. Nakipagpulong si Jesus sa kanyang Labindalawang Apostol para sa Pista ng Paskua. Pinasimulan niya ang sakramento at tinuruan ang mga Apostol na dapat nilang paglingkuran ang iba.

   2. Juan 13. Hinugasan ni Jesus ang mga paa ng mga Apostol at inutusan silang mahalin ang isa’t isa.

   3. Juan 14:1–15; 15. Itinuro ni Jesus na, “Ako ang daan, at ang katotohanan, at ang buhay.” Inihambing niya ang kanyang sarili sa isang baging at ang kanyang mga disipulo sa mga sanga ng baging. (Pansinin: ang mga talata mula sa kabanata 14 at 15 na tungkol sa Tagaaliw ay tatalakayin sa aralin 24.)

2. Karagdagang pagbabasa: Mateo 26:1–5, 14–35; Marcos 14:1–2, 10–31.

3. Kung gagamitin ninyo ang gawaing pantawag-pansin, makipag-ayos sa isang soloista o maliit na grupo ng mga nasa wastong gulang o mga bata na awitin ang “Magmahalan” (Mga Himno) sa simula ng klase. Kung hindi ito maaari, magdala ng tape ng awitin o maghandang ipaawit ito nang sabay-sabay sa mga miyembro ng klase.

4. Kung makukuha ang sumusunod na mga materyal, gamitin ang mga ito sa aralin:

   1. Ang mga larawang Ang Huling Hapunan (34730 893; Pakete ng Larawan ng Sining ng Ebanghelyo 225) at Hinuhugasan ni Jesus ang mga Paa ng mga Alagad (34730 893; Pakete ng Larawan ng Sining ng Ebanghelyo 226).

   2. Isang maliit na halaman na maglalarawan sa inyong talakayan hinggil sa Juan 15:1–8.

5. Mungkahi para sa pagtuturo: Ang pag-awit o pagpapatugtog ng isang himno o awit sa Primarya na may kaugnayan sa paksa ng aralin ay isang mabuting paraan ng pag-anyaya sa Espiritu sa oras ng aralin. Sinabi ng Panginoon, “Ang aking kaluluwa ay nagagalak sa awitin ng puso; oo, ang awit ng mabubuti ay isang panalangin sa akin, at ito ay tutugunan ng pagpapala sa kanilang mga ulo” (Doktrina at mga Tipan 25:12; tingnan din sa Mga Taga Colosas 3:16). Ang mga himno at awitin sa Primarya ay makatutulong din sa mga miyembro ng klase na matutuhan ang mga doktrina ng ebanghelyo. (Tingnan sa Pagtuturo—Walang Higit na Dakilang Tungkulin, Yunit F, Paksa 13, “May Musika Ba sa Inyong Silid-aralan?” 172–174.)

Mungkahing Pagbubuo ng Aralin

Gawaing Pantawag-pansin

Kung naaangkop, gamitin ang sumusunod na gawain o ang sariling gawa ninyo upang simulan ang aralin.

Ipaawit sa soloista o sa maliit na grupo ang “Magmahalan,” o magpatugtog ng tape o ipaawit ang himno sa mga miyembro ng klase nang sabay-sabay (tingnan sa bahaging “Paghahanda”).

Ipaliwanag na ang teksto ng himnong ito ay mula sa Juan 13:34–35. Ipabuklat sa mga miyembro ng klase ang banal na kasulatang ito at hilingan ang isa na basahin ito nang malakas. Bigyang-diin na binigkas ni Jesus ang mga salitang ito sa Huling Hapunan. Tatalakayin ng araling ito ang kautusang ito at ang iba pang mga bagay na sinabi at ginawa ni Jesus sa oras na ito ng kanyang pakikipagpulong sa kanyang mga Apostol.

Talakayan at Pagsasagawa ng Banal na Kasulatan

Habang itinuturo ninyo ang sumusunod na mga talata ng banal na kasulatan, talakayin kung paano nagpakita ng kanyang pagmamahal sa kanyang mga Apostol at gayundin sa atin ang mga salita at ginawa ng Tagapagligtas noong Huling Hapunan. Tulungan ang mga miyembro ng klase na maunawaan na nais ni Jesus na sundan natin ang kanyang halimbawa ng pagmamahal at paglilingkod sa iba.

1. Pinasimulan ni Jesus ang sakramento.

Talakayin ang Lucas 22:7–30. Anyayahan ang mga miyembro ng klase na basahin nang malakas ang mga piling talata. Bigyang-diin na ang pagkain na ito ng Paskua, na pinagsaluhan ni Jesus at ng kanyang mga Apostol noong araw bago ipako sa krus si Jesus, ay kadalasang tinatawag na Huling Hapunan. Ipakita ang larawan ng Huling Hapunan.

• Nang magsama-sama sina Jesus at ang kanyang mga Apostol upang kainin ang pagkain na ito ng Paskua ay pinasimulan ni Jesus ang ordenansa ng sakramento. Ano ang sinabi niya sa mga Apostol tungkol sa layunin ng sakramento? (Tingnan sa Lucas 22:19–20. Iyon ay upang tulungan silang maalaala siya at ang kanyang nagbabayad-salang sakripisyo.) Paano nakatutulong sa inyo ang pagtanggap ng sakramento na maalaala ninyo ang Tagapagligtas?

  Sinabi ni Elder Jeffrey R. Holland na: “Simula pa noong karanasan sa silid sa itaas noong gabi bago magpunta sa Getsemani at Golgota, ang mga anak sa pangako ay napasailalim na ng tipan na gunitain ang sakripisyo ni Cristo dito sa mas bago, mas mataas, mas banal at natatanging paraan na ito… . Kung ang paggunita ang ating pangunahing tungkulin, ano ang maaaring sumagi sa ating isipan kapag ang mga payak at mahahalagang simbolo ng sakramento ay inihahandog sa atin?” (sa Conference Report, Okt. 1995, 88, 90; o Ensign, Nob. 1995, 67, 68).

  Talakayin ang mga sagot sa tanong ni Elder Holland, kabilang na ang ilan sa sumusunod na mga bagay na iminungkahi ni Elder Holland na dapat nating gunitain tungkol sa Tagapagligtas (sa Conference Report, Okt. 1995, 90–91; o Ensign, Nob. 1995, 68–69):

1. Ang kanyang pagmamahal at katatagan sa Malaking Kapulungan sa Langit.

2. Na siya ang Lumikha ng langit at lupa.

3. Ang lahat ng kanyang ginawa sa kanyang buhay bago ang buhay na ito bilang si Jehova.

4. Ang simpleng kamaharlikahan ng kanyang pagsilang.

5. Ang kanyang mga turo.

6. Ang kanyang mga himala at pagpapagaling.

7. Na “ang lahat ng bagay na mabubuti ay nagmumula kay Cristo” (Moroni 7:24).

8. Ang kalupitan, pagtanggi sa kanya, at kawalang katarungan na tiniis niya.

9. Na nagpakababa siya sa lahat ng bagay upang mapagtagumpayan ang lahat ng ito.

10. Na isinagawa niya ang kanyang mga pagpapakasakit at pinagtiisan ang kanyang mga pagdadalamhati para sa bawat isa sa atin.

• Bakit mahalaga na tanggapin natin ang sakramento tuwing linggo? Paano natin espirituwal na maihahanda ang ating sarili bago tanggapin ang sakramento?

• Sa Huling Hapunan ay muling nagtalu-talo ang mga Apostol tungkol sa “kung sino kaya sa kanila ang ibibilang na pinakadakila” (Lucas 22:24; tingnan din sa Mateo 18:1; Lucas 9:46). Sa anong mga paraan natin kung minsan hinahangad na maituring na mas nakahihigit kaysa sa iba? Paano natin mapaglalabanan ang ganitong mga damdamin?

• Ano ang itinuro ng Panginoon tungkol sa tunay na kadakilaan? (Tingnan sa Lucas 22:25–27; tingnan din sa Mateo 20:25–28.) Paano siya mismo nagiging halimbawa ng kanyang itinuturo? Paano natin masusundan ang kanyang halimbawa?

2. Matapos hugasan ang kanilang mga paa, inutusan ni Jesus ang kanyang mga Apostol na mahalin nila ang isa’t isa.

Basahin at talakayin ang mga piling talata mula sa Juan 13. Ipakita ang larawan ni Jesus na hinuhugasan ang mga paa ng mga Apostol. Ipaliwanag na matapos kumain ng Huling Hapunan si Jesus at ang kanyang mga Apostol ay hinugasan ni Jesus ang mga paa ng bawat Apostol (Juan 13:4–5). Ang trabahong ito ay karaniwang ginagawa ng isang alipin kapag dumarating ang isang panauhin. Ang isang dahilan kung bakit ginawa ito ni Jesus ay upang ituro sa kanyang mga Apostol ang tungkol sa kababaang-loob at paglilingkod.

• Bakit sa palagay ninyo tumanggi si Simon Pedro nang simulan ni Jesus na hugasan ang kanyang mga paa? (Tingnan sa Juan 13:6, 8. Nadama niyang hindi nararapat kumilos bilang isang alipin ang Panginoon.) Paano tumugon si Jesus? (Tingnan sa Juan 13:8.)

• Ano ang sinabi ni Jesus sa mga Apostol na dahilan kung bakit niya hinugasan ang kanilang mga paa? (Tingnan sa Juan 13:12–17. Sinabi niya sa kanila na dapat nilang sundan ang kanyang halimbawa ng paglilingkod.) Paano nakapagdulot sa inyo ng kaligayahan ang paglilingkod sa iba?

• Ano ang matututuhan natin mula sa mga salita at gawa ni Jesus tungkol sa mga katangian ng mabubuting pinuno? Paano natin masusundan ang kanyang halimbawa kapag tayo ang nasa katayuan ng pamumuno?

• Noong Huling Hapunan ay paulit-ulit na sinabi ni Jesus sa kanyang mga disipulo na mahalin nila ang isa’t isa (Juan 13:34–35; 15:12, 17). Ano ang ilang tiyak na mga bagay na magagawa natin upang masundan ang halimbawa ng pagmamahal ni Cristo?

3. Itinuro ni Jesus na “Ako ang daan, at ang katotohanan, at ang buhay” at “Ako ang tunay na puno ng ubas.”

Talakayin ang Juan 14:1–15; 15. Anyayahan ang mga miyembro ng klase na basahin nang malakas ang mga piling talata.

• Bakit nag-alala si Tomas nang sabihin ni Jesus sa mga Apostol na, “At kung saan ako paroroon, ay nalalaman ninyo ang daan”? (Tingnan sa Juan 14:4–5.) Ano ang sinabi ni Jesus kay Tomas? (Tingnan sa Juan 14:6.) Bakit si Jesus ang tanging daan upang makarating tayo sa Ama sa Langit?

• Itinuro ni Jesus sa kanyang mga disipulo na ipakita ang kanilang pagmamahal sa iba sa pamamagitan ng paglilingkod. Ano ang sinabi niyang gawin nila upang maipakita nila ang kanilang pagmamahal sa kanya? (Tingnan sa Juan 14:15.) Paano ipinakikita ng ating pagkamasunurin ang ating pagmamahal sa Panginoon?

• Habang tinuturuan niya ang kanyang mga Apostol ay ginamit ni Jesus ang sagisag ng puno ng ubas (Juan 15:1–8). Sino ang kinakatawan ng puno ng ubas? ng magsasaka (hardinero)? ng mga sanga? (Tingnan sa Juan 15:1, 5.)

Kung nagdala kayo ng halaman sa klase ay ipakita na ito ngayon.

• Ano ang nangyayari sa dahon o sanga na pinutol mula sa halaman? Paanong ang inyong kaugnayan sa Tagapagligtas ay katulad ng kaugnayan ng isang dahon o sanga sa katawan ng halaman?

• Sa paghahambing ng Tagapagligtas, ano ang ginagawa ng hardinero sa mga sanga ng ubas na hindi nagbubunga? (Tingnan sa Juan 15:2.) Ano ang ginagawa niya sa mga sanga na nagbubunga? Ano ang maaaring kaugnayan nito sa atin?

• Itinuro ni Jesus na, “Ang nananatili sa akin, at ako’y sa kaniya, ay siyang nagbubunga ng marami: sapagka’t kung kayo’y hiwalay sa akin ay wala kayong magagawa” (Juan 15:5). Paano ninyo natuklasan na tama ito?

• Sang-ayon sa Juan 15:13, ano ang isa sa mga pinakadakilang pagpapakita ng pagmamahal? Ano ang mensahe nito sa atin tungkol sa pagmamahal sa atin ng Tagapagligtas?

Katapusan

Magpatotoo na mahal tayo ni Jesucristo at nais niyang mahalin at paglingkuran natin ang isa’t isa. Hamunin ang mga miyembro ng klase na gunitain ang Pagbabayad-sala ni Cristo at ang kanyang pagmamahal sa atin sa oras ng sakramento tuwing linggo.

Karagdagang mga Ideya sa Pagtuturo

Ang sumusunod na materyal ay karagdagan sa mungkahing banghay ng aralin. Maaari ninyong naising gamitin ang isa o higit pa sa mga ideyang ito bilang bahagi ng aralin.

1. Pagtataglay sa ating sarili ng pangalan ni Cristo

Sa talakayan ninyo tungkol sa sakramento, maaari ninyong naising talakayin ang sumusunod na mga tanong tungkol sa pagtataglay sa ating sarili ng pangalan ni Cristo. Ang ilan sa mga iminumungkahing sagot ay hango sa pahayag na ibinigay ni Elder Dallin H. Oaks sa pangkalahatang komperensiya noong Abril 1985 (tingnan sa Conference Report, Abr. 1985, 101–5; o Ensign, Mayo 1985, 80–83).

• Kailan natin tinataglay sa ating sarili ang pangalan ni Cristo?

  1. Kapag binibinyagan tayo sa kanyang Simbahan (2 Nephi 31:13; Mosias 25:23; Moroni 6:3; Doktrina at mga Tipan 18:22–25; 20:37).

  2. Kapag sinasariwa natin ang ating tipan sa pagbibinyag sa pamamagitan ng pagtanggap ng sakramento (Moroni 4:3; 5:2; Doktrina at mga Tipan 20:77, 79).

  3. Kapag ipinapahayag natin ang ating paniniwala sa kanya.

  4. Kapag tinataglay natin sa ating sarili ang awtoridad na kumilos sa kanyang pangalan at pairalin ang awtoridad na iyon.

  5. Kapag nakikilahok tayo sa sagradong mga ordenansa ng templo.

• Ano ang ipinapangako natin kapag tinataglay natin sa ating sarili ang pangalan ni Cristo?

  1. Ipinakikita natin ang ating kahandaan na gawin ang gawain ng kanyang kaharian at ang ating determinasyon na paglingkuran siya hanggang sa wakas (Doktrina at mga Tipan 20:37; Moroni 6:3).

  2. Ipinapangako nating susundan siya nang taos-puso, susundin siya at magsisisi sa ating mga kasalanan (2 Nephi 31:13; Mosias 5:8).

• Ano ang ipinapangako sa atin ni Jesucristo kapag tinataglay natin ang kanyang pangalan? (Tayo ay nagiging kanyang mga anak na lalaki at babae, na nagtataglay ng kanyang pangalan. Ang mga tatawagin sa kanyang pangalan sa huling araw ay dadakilain; tingnan sa Mosias 5:7–9; 15:12; Alma 5:14; 3 Nephi 27:5–6; Doktrina at mga Tipan 76:55, 58, 62).

2. Pagpapalabas ng video

Ang ikalimang yugto ng “New Testament Customs,” isang piling bahagi mula sa New Testament Video Presentations (53914), ay naglalaman ng impormasyon tungkol sa mga pista noong panahon ng Bagong Tipan. Ang yugtong ito ay makatutulong sa mga miyembro ng klase na mailarawan sa kanilang isipan ang idinaos na Huling Hapunan at maunawaan ang pagtukoy sa disipulo na “nakahilig sa sinapupunan ni Jesus” (Juan 13:23).

3. Pagtatanghal ng miyembro ng klase

Ang mga paghahambing na tulad ng, “Ako ang tunay na puno ng ubas” ay maaaring mahirap maunawaan ng ilang tao, lalo na ng mga kabataan. Para sa mas personal na paglalarawan ng pagmamahal sa atin ni Jesucristo, anyayahan ang isa o dalawang miyembro ng klase na magbahagi ng karanasan kung saan nadama nila ang pagmamahal ng Tagapagligtas na nagbibigay sa kanila ng kalakasan, tulad ng pagbibigay ng lakas ng puno ng ubas sa mga dahon o mga sanga nito. Gawin ang pag-anyaya ng mga isang linggo man lamang, at himukin ang mga miyembro ng klase na hangarin ang inspirasyon ng Espiritu Santo sa pagpili ng karanasan na angkop na ibahagi.