“Hanapin Muna Ninyo ang Kaniyang Kaharian”

Mateo 6–7

Layunin

Himukin ang mga miyembro ng klase na maging higit na matapat na mga disipulo ni Jesucristo.

Paghahanda

Basahin, pagnilay-nilayin, at ipanalangin ang sumusunod na mga banal na kasulatan, bilang pagpapatuloy ng Pangangaral sa Bundok:
1. Mateo 6:1–6, 16–21. Tinuruan ni Jesus ang kanyang mga disipulo na maglimos, manalangin, at mag-ayuno nang lihim at mangagtipon ng mga kayamanan sa langit sa halip na sa lupa.
2. Mateo 6:7–13, 7:7–11. Ipinakita niya sa kanyang mga disipulo kung paano manalangin at itinuro na babasbasan ng Ama sa Langit ang mga humihingi sa kanya ng kanilang kailangan.
3. Mateo 6:14–15; 7:1–6, 12. Itinuro ni Jesus sa kanyang mga disipulo na patawarin ang iba, na magbigay nang matwid na paghatol, at pakitunguhan ang iba na tulad ng nais nilang maging pakikitungo sa kanila.
4. Mateo 6:22–34; 7:13–29. Itinuro niya sa kanyang mga disipulo na pagpapalain sila sa paglilingkod nila sa Ama sa Langit at sa pagsunod sa kanyang kalooban.
Karagdagang pagbabasa: Lucas 6:37–49; 11:1–13, 34–36; 12:22–34; 16:13; 3 Nephi 13–14.
Kung makukuha ang sumusunod na mga materyal, gamitin ang mga ito sa aralin:
1. Ang larawang Sermon sa Bundok (34730 893; Pakete ng Larawan ng Sining ng Ebanghelyo 212).
Maaari ninyong naising maghanda upang awitin ang “Ang Matalino at Ang Hangal” (Aklat ng mga Awit Pambata) na kasama ang mga miyembro ng klase.
Mungkahi sa pagtuturo: Mailalarawan ng mga kuwento ang mga alituntunin ng ebanghelyo at mas makukuha nito ang pansin ng mga miyembro ng klase kaysa sa ilang ibang pamamaraan ng pagtuturo. Madalas na gumamit ng mga kuwento si Jesus upang ituro ang mahahalagang aral o upang linawin ang malalabong ideya. Habang inihahanda ninyo ang inyong mga aralin, isaalang-alang kung paano ninyo magagamit ang mga kuwentong ito upang matulungan ang mga miyembro ng klase na maunawaan ang mga alituntunin ng ebanghelyo. Kapag nagkukuwento kayo, tiyaking nauunawaan ng mga miyembro ng klase kung ito ay tunay na pangyayari o kathang-isip lamang na kuwento na nilikha ninyo upang ituro ang isang punto. (Tingnan sa Pagtuturo—Walang Higit na Dakilang Tungkulin, Yunit E, Paksa 13, “Pagkukuwento,” 119–122; at Yunit F, Paksa 5, “Ano ang Bumubuo sa Isang Magandang Kuwento?,” 157.)

Mungkahing Pagbubuo ng Aralin

Gawaing Pantawag-pansin

Kung naaangkop, gamitin ang sumusunod na gawain o ang sariling gawa ninyo upang simulan ang aralin.

Isalaysay ang sumusunod na kuwento sa inyong sariling pananalita:

Minsan ay nakipag-usap si Elder William R. Bradford ng Pitumpu sa obispo ng isang purok na may mga kabataan na nagtrabaho upang kumita ng salapi para sa isang gawain. Tinanong ng obispo si Elder Bradford kung matutulungan niya ang mga kabataan na tumanggap ng parangal sa kanilang ginawa. Nagulat ang obispo nang sabihin ni Elder Bradford na hindi niya gagawin ito. Sinabi niyang natutuwa siya na nagsikap na mabuti ang mga kabataan, ngunit hindi naman mahalaga na tumanggap sila ng parangal ng madla para sa trabahong kanilang ginawa.

Nang magpasiya ang mga kabataan na iambag ang kanilang salapi sa pangkalahatang pondo ng misyonero sa Simbahan sa halip na gamitin ito para sa gawain, ninais nilang magpakuha ng retrato na kasama si Elder Bradford habang ginagawa nila ang pagbibigay-donasyon, at nais nilang mailagay ang retrato, kalakip ang isang artikulo sa pahayagan. Muli ay ginulat sila ni Elder Bradford sa pamamagitan ng pagsasabing “hindi.” Sinabi niya sa obispo na: “Baka naman gusto mong tulungan ang iyong mga kabataan na matutuhan ang isang mas mataas na batas ng pagpaparangal. Ang pagpaparangal mula sa kaitaasan ay tahimik na ginagawa. Buong ingat at tahimik itong itinatala roon. Hayaan mong damahin nila ang kagalakan at kamtin ang yaman sa kanilang puso at kaluluwa na nagmumula sa tahimik, at hindi makasariling paglilingkod” (sa Conference Report, Okt. 1987, 90–91; o Ensign, Nob. 1987, 75).

Gawaing Pantawag-pansin

Anong mga aral ang matututuhan natin mula sa sagot ni Elder Bradford sa mga kabataan?

Ituro na ang isang aral na ating matututuhan ay dapat nating gawin ang mabubuting bagay dahil mahal natin ang Diyos at nais nating bigyan siya ng kasiyahan, hindi dahil sa nais nating tumanggap ng parangal mula sa ibang tao. Ito ang isa sa mga katangian ng isang tunay na disipulo ni Jesucristo.

Isulat sa pisara ang Tunay na mga Disipulo. Habang tinatalakay ninyo ang Pangangaral sa Bundok, isulat ang mga katangian ng tunay na disipulo na itinuro ng Tagapagligtas sa sermong ito.

Talakayan at Pagsasagawa ng Banal na Kasulatan

Habang itinuturo ninyo ang sumusunod na mga talata ng banal na kasulatan, himukin ang bawat miyembro ng klase na isaalang-alang ang kailangan nilang gawin upang maging higit na masigasig at matapat na disipulo ni Cristo. Himukin ang mga miyembro ng klase na magbahagi ng pansariling mga karanasan na may kaugnayan sa mga alituntunin ng pagiging tunay na disipulo.

1. Ginagawa ng tunay na mga disipulo ang tamang mga bagay sa tamang dahilan.

Basahin at talakayin ang Mateo 6:1–6, 16–21.

Bakit tinuligsa ni Jesus ang ilang tao sa paggawa ng mabubuting bagay na tulad ng pagbibigay ng limos (sa mahihirap), pananalangin, at pag-aayuno? (Tingnan sa Mateo 6:1–2, 5, 16. Ginagawa nila ang mga bagay na ito sa maling dahilan.) Tinawag ni Jesus ang mga taong ito na mga mapagpaimbabaw. Ano ang taong mapagpaimbabaw? (Isang taong nagkukunwaring nagtataglay ng ilang katangian ngunit sa katunayan ay wala naman ito sa kanya; isang taong nagsisikap na magmukhang mabuti ngunit hindi naman. Ang salitang Griyego ng mapagpaimbabaw ay maaari ring isalin bilang mapagkunwari. Tingnan sa Mateo 15:8; Lucas 11:39.)
Ano ang magiging gantimpala ng mga taong gumagawa ng mabubuting bagay para lamang makita ng iba? (Tingnan sa Mateo 6:2, 5, 16.) Anong mga bagay ang maaaring gawin natin para lamang makita ng iba sa halip na bigyang kasiyahan ang Diyos? Paano natin mapadadalisay ang ating mga pakay sa paglilingkod at paggawa ng iba pang mabubuting gawa?
Sa sermong ito, ano ang itinuro ni Jesus tungkol sa dapat nating pahalagahan sa lahat? (Tingnan sa Mateo 6:19–21.) Ano ang ibig sabihin ng “mangagtipon ng mga kayamanan sa langit”? Ano ang ilan sa mga makalangit na kayamanan na maaari nating hangarin? (Tingnan sa Doktrina at mga Tipan 18:14–16 at Doktrina at mga Tipan 130:18–19 para sa dalawang halimbawa.)
Ano ang ibig sabihin ng “kung saan naroon ang iyong kayamanan, doon naman doroon ang iyong puso”? Paano natin malalaman kung ano ang ating pinahahalagahan? (Ang isang paraan ay timbangin kung gaanong panahon, salapi, at kaisipan ang ginugugol natin sa isang bagay.) Ano ang pinahahalagahan ng mga tao sa ngayon? Hilingin sa mga miyembro ng klase na isipin ang mga bagay na kanilang pinahahalagahan at tahimik na isaalangalang kung ano ang ipinahihiwatig ng mga kayamanang ito tungkol sa kung saan naroon ang kanilang puso.

2. Sinusunod ng tunay na mga disipulo ang halimbawa ng panalangin ng Tagapagligtas.

Basahin at talakayin ang Mateo 6:7–13; 7:7–11. Ituro na ang Mateo 6:9–13 ay kilala bilang ang Panalangin ng Panginoon.

Ano ang itinuturo sa atin ng Panalangin ng Panginoon tungkol sa kung paano tayo dapat manalangin? (Tingnan sa Mateo 6:9–13.)
Paano ipinapakita ng Panalangin ng Panginoon ang pagpipitagan at paggalang ni Jesus sa Ama sa Langit? Paano natin maipakikita ang pagpipitagan at paggalang sa Ama sa Langit kapag nananalangin tayo?

Pinuna ni Elder Dallin H. Oaks ang uri ng pananalita na dapat nating gamitin kapag nananalangin tayo: “Ang natatanging lengguwahe ng panalangin ay iba-ibang kaayusan ang sinusunod sa iba’t ibang wika, ngunit ang prinsipyo ay iyon pa rin. Dapat nating ipatungkol ang mga panalangin sa ating Ama sa Langit na gamit ang mga salitang ginagamit ng mga nagsasalita ng wikang iyon na may kaugnayan sa pagmamahal at paggalang at pagpipitagan at pagiging malapit… . Ang mga kalalakihan at kababaihan na nagnanais magpakita ng paggalang ay mag-uukol ng panahon upang matutuhan ang natatanging lengguwahe ng panalangin” (sa Conference Report, Abr. 1993, 17, 20; o Ensign, Mayo 1993, 16, 18).
Paano natin maiiwasan ang paggamit ng “walang kabuluhang paulit-ulit” kapag nananalangin tayo? (Tingnan sa Mateo 6:7.)
Dahil alam na ng Ama sa Langit kung ano ang kailangan natin bago pa man tayo manalangin (Mateo 6:8), bakit kailangan pa nating manalangin? Bakit mahalaga sa ating espirituwal na pag-unlad ang paghiling, paghahanap, at pagkatok (Mateo 7:7)? Paano tayo magiging higit na masigasig sa paghahangad ng tulong mula sa Ama sa Langit?
Paano ang dapat na maging pagkaunawa natin sa pangako ng Tagapagligtas na “ang bawat humihingi ay tumatanggap”? (Mateo 7:8.) Bakit kung minsan ay hindi natin tinatanggap ang ating hinihingi sa oras na hinihiling na ito o sa paraang nais natin? (Tingnan sa 3 Nephi 18:20.) Paano ninyo nalaman na alam ng Diyos ang pinakamainam para sa inyo?

3. Ang tunay na mga disipulo ay buong kabaitan at pantay-pantay na nakikitungo sa iba.

Basahin at talakayin ang Mateo 6:14–15; 7:1–6, 12.

Bakit sa palagay ninyo inuutusan tayo ng Tagapagligtas na patawarin ang ibang tao? Paano tayo magiging higit na mapagpatawad?
Iniwasto ng Pagsasalin ni Joseph Smith ang Mateo 7:1 upang mabasa nang ganito, “Huwag hahatol nang di makatarungan, upang huwag kayong hatulan; datapwat humatol nang makatarungan” (Pagsasalin ni Joseph Smith, Mateo 7:2). Ano ang makatarungang paghatol? Anong pinsala ang maaaring sapitin natin at ng mga taong hinahatulan natin kung di makatarungan ang ating paghatol? Paano tayo makatitiyak na makatarungan ang ating paghatol? (Tingnan sa Mateo 7:3–5; Moroni 7:14–18.)
Sinabi ni Jesus na ang taong nagsisikap na ituwid ang iba nang hindi makatarungan ay isang mapagpaimbabaw (Mateo 7:4–5). Paanong palatandaan ng pagpapaimbabaw ang hindi makatarungang paghatol?
Ang turo na nasa Mateo 7:12 ay karaniwang tinatawag na Ginintuang Aral. Anong mga karanasan ang nagpakita sa inyo ng kahalagahan ng alituntuning ito? Paano tayo ginagawang higit na mabubuting disipulo ni Jesucristo ng pagsunod sa Ginintuang Aral?

Inilarawan ni Elder Marvin J. Ashton ang isang pulong kung saan isinaalangalang ng isang grupo ng mga miyembro ng Simbahan ang katanungang ito “Paano ninyo masasabi na ang isang tao ay nagbalik-loob kay Jesucristo?”:

“Sa loob ng apatnapu’t limang minuto ang lahat ng dumalo ay nagbigay ng ilang mungkahi bilang tugon sa tanong na ito, at buong ingat na isinulat ng pinuno ang bawat sagot sa isang malaking pisara. Ang lahat ng mga puna ay pinag-isipan at naaangkop. Ngunit paglipas ng ilang sandali ay binura lahat ng magiting na gurong ito ang kanyang mga isinulat. Pagkatapos kilalanin na ang lahat ng mga puna ay naging kapaki-pakinabang at pinasasalamatan ay itinuro niya ang isang mahalagang alituntunin: ‘Ang pinakamainam at pinakamaliwanag na sukatan na tayo ay espirituwal na umuunlad at lumalapit kay Cristo ay ang paraan ng ating pakikitungo sa ibang tao.’ ”

Idinagdag pa ni Elder Ashton na: “Ang paraan ng ating pakikitungo sa mga miyembro ng ating pamilya, sa ating mga kaibigan, sa mga kasamahan natinsa trabaho sa araw-araw ay kasing halaga ng ilan sa mga higit na kapansinpansing mga alituntunin ng ebanghelyo na ating binibigyang-diin paminsanminsan” (sa Conference Report, Abr. 1992, 25; o Ensign, Mayo 1992, 20).

4. Ang tunay na mga disipulo ay naglilingkod sa Diyos at sinusunod ang kanyang kalooban.

Basahin at talakayin ang mga piling talata mula sa Mateo 6:22–34; 7:13–29.

Bakit imposibleng pagsilbihan kapwa ang Diyos at ang kayamanan, o kamunduhan? (Tingnan sa Mateo 6:24.) Anong mga pagpapala ang ipinapangako ng Diyos sa mga naglilingkod sa kanya? (Tingnan sa Mateo 6:25–33; Doktrina at mga Tipan 11:7.)
Ipinangako ni Jesus na kung ating “hanapin muna … ang kanyang [Diyos] kaharian,” ay ibibigay sa atin ang iba pang mga bagay na kailangan natin (Mateo 6:33). Anong mga karanasan ang nakatulong sa inyo upang magkamit ng patotoo tungkol sa pangakong ito?
Paano mahihila papalayo sa kamunduhan ang ating katapatan at paglilingkod sa Diyos? Ano ang ilang mga paraan kung paano maaari tayong matuksong hanapin muna ang mga bagay ng daigdig bago hanapin ang mga bagay na nauukol sa Diyos? (Ang mga sagot ay maaaring kabilangan ng pagpapaliban sa pagbabayad ng ikapu hangga’t hindi nabibili ang mga bagay na kailangan o gusto natin o pagpapasiyang huwag nang magmisyon dahil sa paghahangad sa makamundong mga bagay.)
Noong malapit nang matapos sa kanyang pangangaral si Jesus, ano ang itinuro niya tungkol sa pagpasok sa kaharian ng langit? (Tingnan sa Mateo 7:13–14, 21–23.) Bakit mahalaga na ang daan patungo sa buhay na walang hanggan ay makipot, samantalang ang daan patungo sa kapahamakan ay malawak?
Sa dakong huli ng Pangangaral sa Bundok ay ikinuwento ni Jesus ang talinghaga ng matalinong lalaki at ng mangmang na lalaki (Mateo 7:24–27). Paano naaangkop sa atin ang talinghagang ito? Ano ang “bato” na dapat nating pagtayuan? (Tingnan sa Helaman 5:12.) Sa anong mga bagay, na maaaring maihambing sa buhangin, itinatatag ng ilang tao ang kanilang buhay?

Maaaring naisin ninyong ipaawit sa mga miyembro ng klase ang “Ang Matalino at ang Hangal” (Aklat ng mga Awit Pambata).

Katapusan

Magpatotoo tungkol sa kahalagahan ng pagsunod kay Jesucristo. Himukin ang mga miyembro ng klase na isipin kung ano ang kailangan nilang gawin upang maging mas mabubuting disipulo ni Cristo.

Karagdagang mga Ideya sa Pagtuturo

Ang sumusunod na materyal ay karagdagan sa mungkahing banghay ng aralin. Maaari ninyong naising gamitin ang isa o higit pa sa mga ideyang ito bilang bahagi ng aralin.

1. “Sa kanilang mga bunga ay mangakikilala ninyo sila” (Mateo 7:20)

Binalaan ni Jesus ang kanyang mga tagasunod tungkol sa bulaang mga propeta—mga taong nagtuturo ng maling doktrina o sinisikap na akayin ang mga tao papalayo kay Cristo (Mateo 7:15). Paano natin makikilala ang bulaan at ang tunay na mga propeta? (Tingnan sa Mateo 7:16–20; tingnan din sa Moroni 7:5, 10–11.) Paano maiaakma sa atin at gayundin sa mga propeta ang Mateo 7:20?

2. Pagpapalabas ng video

Ang ikalawang yugto ng “New Testament Customs,” isang piling bahagi mula sa New Testament Video Presentations (53914), ay nagpapaliwanag tungkol sa paggamit ng mga Judio ng mga pilakteria at tirintas. Kung ipapalabas ninyo ang yugtong ito, talakayin kung paano ang mga bagay na ito, na minsa’y ginamit upang ipakita ang pagsunod sa Diyos, ay naging mga sagisag ng paghahangad ng mga Fariseo na “makita ng mga tao” habang sila ay sumasamba (Mateo 6:5).

3. Paghanap sa tahilan na nasa ating sariling mata

Ibahagi ang sumusunod na kuwento tungkol sa kung paano tinuruan ni Propetang Joseph Smith ang isang kapatid na babae na hanapin ang tahilan sa kanyang sariling mata kapag nakasakit ng iba:

Isang babae na nagagalit sa ilang bagay na sinabi tungkol sa kanya ng isa pang miyembro ng simbahan ang nagpunta kay Propetang Joseph Smith. Sinabi ng Propeta sa kanya na kung ang mga sinabi ng lalaki ay hindi totoo, ay dapat niyang ipagwalang-bahala ang bagay na iyon, dahil ang mga katotohanan ay mangingibabaw at ang mga kasinungalingan ay hindi mananaig. Nadama ng babae na ang mga puna ay hindi totoo, ngunit hindi mapanatag ang kanyang kalooban sa pagwawalang bahala sa bagay na ito. Sa gayon ay isiniwalat ng Propeta ang kanyang paraan ng pakikitungo sa gayong mga puna:

“Kapag ang isang kaaway ay gumawa ng kuwento upang siraan siya, na madalas na ginagawa sa kanya, bago siya humatol ay tumitigil siya at ibinabalik sa kanyang alaala ang oras at lugar at pangyayaring nauugnay sa kuwento. Ipinapalagay niya na marahil nabuo ang kuwento dahil sa ilang hindi sinasadyang salitang nabanggit niya o ikinilos. Kung matutuklasan niyang nagawa nga niya ang gayon ay sinasabi niya na noon din sa kanyang puso ay pinatatawad niya ang kaaway, at nagpapasalamat na nakatanggap siya ng babala tungkol sa isang kahinaan na hindi niya batid na taglay niya.”

Sinabi ng Propeta sa kapatid na babae na dapat ay isipin niyang mabuti kung hindi sinasadya na nabigyan niya ng dahilan ang taong iyon upang sabihin ang mga bagay na sinabi nito. Pagkatapos ng matagal na pag-iisip, nagpasiya siya na nagawa nga niya ang gayon, at pinasalamatan niya ang Propeta at lumisan na. (Tingnan sa Jesse W. Crosby, sinipi sa Hyrum L. Andrus at Helen Mae Andrus, mga nagtipon sa They Knew the Prophet [1974], 144.)

4. Gawaing pangkabataan

Isulat ang lahat ng sumusunod na mga parirala mula sa Mateo 6 at 7 sa isang hiwalay na kard:

Huwag maalaman ng iyong kaliwang kamay (6:3)	Ang ginagawa ng inyong kanang kamay (6:3)
Iyong Ama na nakakikita sa lihim (6:6)	Ay gagantihan ka (6:6)
Huwag ninyong gamitin (6:7)	Ang walang kabuluhang paulit-ulit (6:7)
Ipatawad ninyo sa mga tao (6:14)	Ang kanilang mga kasalanan (6:14)
Mangagtipon kayo (6:20)	Ng mga kayamanan sa langit (6:20)
Hindi kayo makapaglilingkod (6:24)	Sa Diyos at sa mga kayamanan (6:24)
Hanapin muna ninyo (6:33)	Ang kaharian ng Diyos (6:33)
Alisin mo muna ang tahilan (7:5)	Sa iyong sariling mata (7:5)
Magsihingi kayo (7:7)	At kayo’y bibigyan (7:7)
Magsihanap kayo (7:7)	At kayo’y mangakasusumpong (7:7)
Mangag-ingat kayo (7:15)	Sa mga bulaang propeta (7:15)
Sa kanilang mga bunga (7:20)	Ay mangakikilala ninyo sila (7:20)

Ilatag nang pataob ang mga kard sa mesa o sa sahig. Hatiin ang mga miyembro ng klase sa dalawang koponan, at hayaang maghalinhinan ang dalawang koponan sa pagpili ng dalawang kard. Kung magkatugma ang mga kard, aalisin ang mga ito ng koponang iyon mula sa mesa o sahig at sila pa rin ang pipili. Kung hindi magkatugma ang mga kard, ilalagay itong muli ng koponan sa kanilang dating kinalalagyan, at ang kabilang koponan naman ang pipili. Magpatuloy hanggang sa mapagtugma ang lahat.