“Ako ang Ilaw ng Sanglibutan”

Layunin

Palakasin ang mga patotoo ng mga miyembro ng klase na si Jesucristo ang ating Tagapagligtas at sa pamamagitan ng pagsunod sa kanya ay magkakaroon tayo ng tunay na kalayaan.

Paghahanda

Basahin, pagnilay-nilayin, at ipanalangin ang sumusunod na mga banal na kasulatan:
1. Juan 7. Dumalo si Jesus sa Pista ng mga Tabernakulo at nagturo sa templo. Naniniwala ang ilang tao na siya ang Cristo, samantalang iniisip naman ng iba na siya ay isang manlilinlang.
2. Juan 8:1–11. Isang babae na nahuling nangangalunya ang dinala kay Jesus. Siya ay pinakitaan niya ng habag.
3. Juan 8:12–36. Ipinahayag ni Jesus na, “Ako ang ilaw ng sanglibutan.” Tinuruan niya ang naniniwalang mga Judio na ang pagsunod sa kanya ang magpapalaya sa kanila sa espirituwal na pagkaalipin.
Mungkahi sa pagtuturo: Laging pagbalik-aralan ang inyong aralin ng mga isang linggo man lamang bago ituro. Kapag binabasa ninyo ang mga piling banal na kasulatan nang maaga, makatatanggap kayo ng mga ideya at impresyon sa buong linggo na makatutulong sa inyo na maituro ang aralin. Habang pinagninilay-nilayan ninyo ang aralin sa buong linggo, manalangin na patnubayan kayo ng Espiritu at manampalataya na pagpapalain kayo ng Panginoon. (Tingnan sa Pagtuturo—Walang Higit na Dakilang Tungkulin, Yunit C, Paksa, “Kailan Ihahanda ang Aralin”, 58–60 at Yunit C, Paksa 2, “Pag-uukol ng Panahon Upang Maghanda ng mga Aralin,” 61.)

Mungkahing Pagbubuo ng Aralin

Gawaing Pantawag-pansin

Kung naaangkop, gamitin ang sumusunod na gawain o ang sariling gawa ninyo upang simulan ang aralin.

Gawing madilim ang silid hangga’t maaari sa pamamagitan ng pagpatay ng mga ilaw at pagsara ng mga kurtina o blinds. Hilingin sa isang miyembro ng klase na basahin nang malakas ang Doktrina at mga Tipan 93:1–2. Kapag nabasa (o sinubukang basahin) na ng miyembro ng klase ang mga talatang ito tanungin siya ng:

Gawaing Pantawag-pansin

Mahirap bang basahin ang mga talatang ito? Paano mapadadali ang pagbabasa nito? (Dagdag na liwanag.)

Sindihan ang mga ilaw at hawiin ang mga kurtina o blinds. Hilingan ang miyembro ng klase na basahing muli ang Doktrina at mga Tipan 93:1–2. Ipaliwanag na ang ilaw ay ginamit saan mang bahagi ng mga banal na kasulatan bilang simbolo ni Jesucristo. Ginamit mismo ni Jesus ang sagisag na ito noong nagtuturo siya sa templo. Tatalakayin sa araling ito kung sa papaanong paraan naging isang ilaw si Jesucristo para sa atin.

Kung hindi ninyo mapadidilim nang husto ang silid, sa halip ay magdrowing ng isang parola sa pisara (o ipakita ang larawan ng isang parola). Ipaliwanag na ang layunin ng isang parola ay bigyang-babala ang mga barko sa nagbabantang panganib at gabayan ang mga ito tungo sa kaligtasan. Pagkatapos ay ipaliwanag na ang ilaw ay isa sa mga simbolo na ginamit ni Jesus sa pagtuturo tungkol sa kanyang misyon at sa kanyang kaugnayan sa atin. Tatalakayin ng araling ito kung paanong si Jesus ay naging isang ilaw na nagtuturo sa atin ng daan patungo sa espirituwal na kaligtasan.

Talakayan at Pagsasagawa ng Banal na Kasulatan

Habang itinuturo ninyo ang sumusunod na mga pangyayari sa banal na kasulatan, magbigay ng patotoo tungkol kay Jesucristo kapag nadarama ninyong ito ay naaangkop. Himukin din ang mga miyembro ng klase na magbigay ng patotoo tungkol kay Jesucristo kapag nadama nilang kailangan nilang magbahagi.

1. Dumalo si Jesus sa Pista ng mga Tabernakulo at nagturo sa templo.

Talakayin ang Juan 7. Anyayahan ang mga miyembro ng klase na basahin nang malakas ang mga piling talata. Ipaliwanag na ang Pista ng mga Tabernakulo ay taunang kapistahan ng mga Judio na idinaraos mga anim na buwan matapos ang Pista ng Paskua. Tumatagal ito ng walong araw at inaalaala ang mga pagbabasbas ng Panginoon sa mga anak ni Israel sa kanilang mga paglalakbay sa ilang. Ipinagdiriwang din nito ang buong taong ani at palatandaan ito ng pagtatapos ng panahon ng tag-ani. Ang kapistahang ito ay itinuturing ng mga Judio na pinakamalaki at pinakamasaya sa lahat ng kanilang mga kapistahan. (Tingnan sa Levitico 23:34–43.)

Bigyang-diin na naglakbay si Jesus mula sa Galilea patungo sa Jerusalem upang makadalo sa kapistahang ito sa templo (Juan 7:1–10).

Ano ang sinabi ng mga tao sa piging tungkol kay Jesus habang hinihintay nila ang kanyang pagdating? (Tingnan sa Juan 7:12.) Bakit namangha ang mga tao nang magsimulang magturo si Jesus? (Tingnan sa Juan 7:14–15.)
Ano ang sinabi ni Jesus sa mga tao sa templo tungkol sa kanyang mga aral? (Tingnan sa Juan 7:16.) Ano ang itinagubilin niyang gawin ng mga tao upang magkaroon sila ng patotoo tungkol sa kanyang mga aral? (Tingnan sa Juan 7:17.) Paano natin maisasagawa ang tagubiling ito sa ating buhay?

Sinabi ni Elder John K. Carmack ng Pitumpu na: “Ipinaliwanag ni Jesus na, ‘Kung ang sinomang tao ay nagiibig gumawa ng kaniyang kalooban, ay makikilala niya ang turo, kung ito’y sa Dios, o kung ako’y nagsasalita na mula sa aking sarili’ (Juan 7:17). Sa madaling salita, habang sinusubukan natin ito ay malalaman natin na ito’y totoo. Nangangailangan ito ng pananampalataya na sumubok, subalit ito ay magdudulot ng espirituwal na katibayan. Sa disipulo na susubok mag-eksperimento ay darating ang matibay na paniniwala, kaalaman, at liwanag” (sa Conference Report, Okt. 1988, 32; o Ensign, Nob. 1988, 26).

Anyayahan ang mga miyembro ng klase na isalaysay kung paano pinalakas ang kanilang patotoo tungkol sa isang alituntunin ng ebanghelyo nang dahil sa ito ay ipinamuhay nila (maaari ninyong naising ibahagi ang isang karanasan ninyo). Bigyang-diin na ang kabaligtaran ng pangako sa Juan 7:17 ay totoo rin: kung hindi natin ipamumuhay ang mga alituntunin ng ebanghelyo, ang ating mga patotoo ay manghihina.
Habang nagtuturo si Jesus ay patuloy na nahahati ang mga tao sa kanilang mga opinyon tungkol sa kanya. Ano ang ilan sa mga dahilan kung bakit naniwala ang mga tao na siya ang Cristo? (Tingnan sa Juan 7:31, 37–41.) Ano ang ilan sa mga dahilan kung bakit hindi naniwala ang mga tao na siya ang Cristo? (Tingnan sa Juan 7:27, 41–42, 52.) Paano nalaman ng mga tao sa isang bansa kung saan nanggaling si Jesus? (Kilala nila ang kanyang pamilya at ang kanyang pinagmulang bayan.) Paano nila hindi nalaman sa isang banda kung saan siya nanggaling? (Tingnan sa Juan 7:28–29; 8:14, 19, 23–29. Hindi nila naunawaan na isinugo siya ng Ama sa Langit.)
Paano natin mapatatatag ang ating mga patotoo tungkol sa misyon ni Jesucristo?

2. Isang babae na nahuling nangangalunya ang dinala kay Jesus.

Basahin at talakayin ang Juan 8:1–11.

Bakit dinala kay Jesus ng mga eskriba at mga Fariseo ang mapangalunyang babae? (Tingnan sa Juan 8:4–6. Nais nilang mahuli si Jesus kung susumpain niya ang babae tungo sa kamatayan nito o lalabagin Niya ang batas ni Moises.) Ano ang sinabi ni Jesus sa mga eskriba at mga Fariseo? (Tingnan sa Juan 8:7.) Bakit hindi nila binato ang babae? (Tingnan sa Juan 8:9.)
Kahit na hindi ikinatuwa ni Jesus ang kasalanan ng babae, hindi rin naman niya isinumpa ang babae sa nagawa nito (Juan 8:10–11). Ano ang matututuhan natin mula sa halimbawa ng Tagapagligtas tungkol sa kung paano tayo dapat tumugon sa mga taong nagkasala nang mabigat?

Ipinaliwanag ni Elder Marvin J. Ashton na: “Dinala ng mga eskriba at mga Fariseo sa Tagapagligtas ang isang babaeng nahuling nangangalunya. Ang kanilang layunin ay hindi upang magpakita ng pagmamahal sa babae o sa Tagapagligtas, kundi upang hiyain at linlangin si Jesus… . Hindi pinatawad ni Jesus ang pangangalunya nang gayun-gayon lamang; walang pagaalinlanganan sa Kanyang saloobin hinggil sa wasto at malinis na pag-uugali. [Ngunit] pinili Niyang magturo nang may pagmamahal—upang ipakita sa mga eskriba at mga Fariseo na kailangang paglingkuran ang isang indibiduwal tungo sa kanyang ikabubuti at upang ipakita ang nakapipinsalang puwersa ng panlilinlang at panghihiya” (sa Conference Report, Abr. 1981, 31–32; o Ensign, Mayo 1981, 24).

3. Ipinahayag ni Jesus na, “Ako ang ilaw ng sanglibutan.”

Basahin at talakayin ang Juan 8:12–36.

Noong Pista ng mga Tabernakulo, ang templo sa Jerusalem ay tinatanglawan ng ningas na nagmumula sa apat namalalaking kandelero. Ang mga ningas na ito ay nakikita sa buong lungsod. Bakit ito ang angkop na tanawin sa pagpapahayag ni Jesus na, “Ako ang ilaw ng sanglibutan”? (Juan 8:12). Ano ang ibig sabihin ng si Jesus ang ilaw ng sanlibutan? (Tingnan sa Juan 8:12; Alma 38:9; 3 Nephi 15:9; Doktrina at mga Tipan 88:6–13.)
Habang nagsisikap ang mga tao na maging tulad ni Jesus, sila rin ay nagiging ilaw ng sanlibutan, na taglay ang kanyang liwanag (Mateo 5:14; 3 Nephi 18:24). Paano natin matutulungan ang iba na makita ang liwanag na handog ni Cristo? (Tingnan sa Mateo 5:16; 28:18–20; Mga Taga Filipos 2:14–15.)
Sinabi ni Jesus sa mga tao sa templo na palagi niyang ginagawa ang mga bagay na kalugud-lugod sa kanyang Ama (Juan 8:29). Paano natin higit na maipapangako ang ating sarili sa paggawa ng mga bagay na kalugud-lugod sa Ama sa Langit?
Habang nagpapatotoo si Jesus tungkol sa kanyang Ama sa Langit, “ay maraming nagsisampalataya sa kanya” (Juan 8:30). Ano ang ipinangako ni Jesus sa mga taong ito kung magpapatuloy sila sa pagsunod sa kanya? (Tingnan sa Juan 8:31–32.) Mula sa ano tayo pinalalaya ng katotohanan? (Tingnan sa Juan 8:33–34.) Paano tayo inilalagay sa pagkaalipin ng paggawa ng kasalanan? (Tingnan sa Alma 12:11; 34:35.) Paano kayo pinalaya ng pagkaalam sa katotohanan?
Sa bandang huli ay tinawag ni Jesus ang kanyang sarili na “katotohanan” (Juan 14:6). Paano ito nakaaapekto sa inyong pang-unawa sa pangako sa Juan 8:32? Paano tayo pinalalaya ng pagkakilala sa Tagapagligtas? Paano natin siya makikilala?

Katapusan

Magpatotoo na si Jesucristo ang ating Tagapagligtas at siya lamang ang tanging makapagpapalaya sa atin mula sa pagkaalipin sa kasalanan. Himukin ang mga miyembro ng klase na sundan si Cristo, “ang ilaw ng sanglibutan,” upang sila ay magabayan niya tungo sa espirituwal na kaligtasan.

Karagdagang mga Ideya sa Pagtuturo

Ang sumusunod na materyal ay karagdagan sa mungkahing banghay ng aralin. Maaari ninyong naising gamitin ang isa o dalawa sa mga ideyang ito bilang bahagi ng aralin.

1. Tubig na buhay

Sa isa sa mga seremonyang pinangasiwaan noong Pista ng mga Tabernakulo, isang saserdote ang naglagay sa altar ng tubig na mula sa tangke ng Siloe. Ang alay na ito ay ginawa upang humingi ng ulan at tagumpay sa pananim sa susunod na taon. Sa pagtuturo ni Jesus sa templo sa huling araw ng kapistahan ay inanyayahan niya ang mga tao na inumin ang tubig na buhay (Juan 7:37–38).

Sa ano pang ibang pagkakataon binanggit ni Jesus ang tubig na buhay? (Tingnan sa Juan 4:5–15.) Ano ang “tubig na buhay”? Paano natin maiinom ito?

2. Si Jesucristo ang Jehova

Basahin at talakayin ang Juan 8:37–59.

Bakit sinabihan ni Jesus ang hindi naniniwalang mga Judio na hindi sila mga anak ni Abraham? (Tingnan sa Juan 8:39–40. Kahit na sila ay literal na inapo ni Abraham, sila ay hindi gumawa ng mabubuting gawa na tulad ni Abraham.) Bakit sinabi ni Jesus sa kanila na hindi sila mga anak ng Diyos? (Tingnan sa Juan 8:41–44.) Paano natin maipakikita sa ating mga kilos na tayo ay mga anak ng Ama sa Langit?
Bakit nagalit ang mga Judio sa mga puna ng Panginoon tungkol kay Abraham? (Tingnan sa Juan 8:51–53, 56–57. Hindi nila natanto na tinutukoy ni Jesus ang kanyang kakayahang mapagtagumpayan ang espirituwal na kamatayan [talata 51] at gayundin ang kanyang buhay bago ang buhay sa mundong ito [mga talata 56–57].) Ano ang ipinauunawa sa atin ng pangungusap ni Jesus na, “Bago ipinanganak si Abraham, ay ako nga” (Juan 8:58) tungkol sa kanya? (Tingnan sa Exodo 3:13–14. Si Jesus ang Jehova, ang Dakilang “Ako Nga,” ang Diyos nina Abraham, Isaac, at Jacob.) Bakit mahalagang malaman na si Jesus ang Jehova bago ang kanyang buhay sa lupa?