Sunday School: Doktrina ng Ebanghelyo
Aralin 38: ‘Nagpatotoo Ka sa Akin’

Aralin 38

“Nagpatotoo Ka sa Akin”

Ang Mga Gawa 21–28

Layunin

Himukin ang mga miyembro ng klase na sundan ang halimbawa ni Pablo at maging matapat na mga saksi ni Jesucristo maging sa gitna ng mga pagsubok at kahirapan.

Paghahanda

  1. Basahin, pagnilay-nilayin, at ipanalangin ang sumusunod na mga banal na kasulatan:

    1. Ang Mga Gawa 21:1–22:21. Sa kabila ng mga pagtutol ng kanyang mga kasama, na natatakot na baka siya mamatay, ay naglakbay pa rin si Pablo patungong Jerusalem. Nag-ulat siya sa mga kapatid na naroon tungkol sa kanyang paglalakbay bilang misyonero. Nagpunta siya sa templo at kinuha ng galit na lupon ng mga tao. Dinakip siya ng punong kapitan ngunit pinahintulutan siyang makapagsalita sa mga tao. Isinalaysay ni Pablo ang tungkol sa kanyang pagbabalik-loob sa ebanghelyo ni Jesucristo.

    2. Ang Mga Gawa 22:22–23:35. Tinanggihan ng mga tao si Pablo at tinangka siyang patayin. Inilayo ng punong kapitan si Pablo mula sa mga tao at inilagay siya sa isang kastilyo. Kinabukasan ay dinala ng punong kapitan si Pablo sa harapan ng Sanhedrin. Nagkaroon ng isa pang malaking pag-aalsa, at muling inilayo ng punong kapitan si Pablo at ipinadala sa kastilyo. Kinagabihan ay nagpakita ang Panginoon kay Pablo at sinabi sa kanyang tinatawag siya upang magbigay patotoo sa Roma at gayundin sa Jerusalem. Mahigit sa 40 mga Judio ang nagbalak na pumatay kay Pablo, at dinala siya kay Felix na gobernador, upang doon ay maging ligtas siya.

    3. Ang Mga Gawa 26. Makalipas ang ilang taon na pag-uusig at pagkakulong, si Pablo ay dinala sa harapan ni Haring Agripa upang magpatotoo. Hindi tinanggap ni Agripa ang patotoo ni Pablo at ipinadala siya sa Roma upang makipagkita kay Cesar.

    4. Ang Mga Gawa 27–28. Nasiraan ang barkong sinasakyan ni Pablo patungong Roma matapos ipagwalang-bahala ng kapitan ng barko ang kanyang payo. Nang makarating siya sa Roma, ikinulong siya, ngunit nangaral siya sa lahat ng mga nais makinig.

  2. Kung makukuha ang sumusunod na mga materyal, gamitin ang mga ito sa aralin:

    1. “Paul—A Chosen Vessel,” isang labing-isang minutong yugto ng New Testament Video Presentations (53914). Panoorin muna ang yugtong ito kung maaari, upang malaman ninyo kung kailan ititigil ang video para sa talakayan.

    2. Mapa ng paglalakbay ni Pablo sa Roma (mapa 8 sa Gabay sa mga Banal na Kasulatan).

  3. Mungkahi sa pagtuturo: “Mahalagang pakainin ang inyong mga tinuturuan, upang maturuan sila ng isang bagay. Sa tuwing darating sila, dapat ay may kahit isa man lamang na kaisipan, ideya, inspirasyon na mapapasakanila dahil sa pagdalo sa klase. Ito ay maaaring isang kaisipan, kaisipang pangkaraniwan lamang—sa katunayan, habang ito ay nagiging mas simple ay lalo mong nagagawa ang dapat mong isagawa” (Boyd K. Packer, Teach Ye Diligently [1975], 154).

Mungkahing Pagbubuo ng Aralin

Gawaing Pantawag-pansin

Kung naaangkop, gamitin ang sumusunod na gawain o ang sariling gawa ninyo upang simulan ang aralin.

Gawaing Pantawag-pansin

  • May isang tao ba sa banal na kasulatan na nadarama ninyong katulad din ninyo, dahil sa magkatulad ang inyong mga kaisipan, karanasan, o kalagayan? Bakit nadarama ninyong malapit kayo sa taong ito?

Hayaang magbigay puna ang ilang miyembro ng klase. Pagkatapos ay bigyangdiin na sa kanyang pagbabalik tanaw sa kanyang mga karanasan matapos ang Unang Pangitain, ay nadama ng Propetang Joseph Smith na ang kanyang mga karanasan ay katulad ng kay Apostol Pablo. Ipabasa sa mga miyembro ng klase ang Joseph Smith—Kasaysayan 1:23–25 upang matuklasan kung bakit.

Ipaliwanag na ang pagharap ni Apostol Pablo kay Haring Agripa ay isa sa mga kaganapan na tatalakayin sa araling ito. Sa kalagayang ito at sa kabuuan ng kanyang mga paglalakbay bilang misyonero, sa kabila ng pagtakwil at pang-uusig sa kanya, si Pablo ay nanatiling matatag sa pananampalataya at buong tapang na nagbigay ng patotoo tungkol kay Jesucristo.

Talakayan at Pagsasagawa ng Banal na Kasulatan

Habang itinuturo ninyo ang sumusunod na mga talata ng banal na kasulatan, talakayin kung paano tayo magkakaroon ng lakas ng loob at pananampalataya na kasingtatag ng kay Pablo. Himukin ang mga miyembro ng klase na magkuwento ng mga pagkakataon kung saan ay buong tapang silang nagbigay ng patotoo sa pamamagitan ng kanilang mga salita o kilos.

1. Nag-ulat si Pablo tungkol sa kanyang mga paglalakbay at hinarap ang galit na grupo ng mga tao sa Jerusalem.

Kung gagamitin ninyo ang pagpapalabas ng video na “Paul—A Chosen Vessel,” ay ipakita na ngayon ang unang bahagi nito. Itigil ang video matapos sabihin ng tagapagsalaysay na, “He fulfilled the Lord’s words that he would bear His name before kings and rulers” (habang binabanggit ang mga salitang ito, si Pablo ay may bantay na ilang sundalo sa pasilyo).

Talakayin ang Ang Mga Gawa 21:1–22:21. Anyayahan ang mga miyembro ng klase na basahin ang mga piling talata. Ipaliwanag na matapos ang tatlong matatagumpay na paglalakbay bilang misyonero na nagdala sa kanya sa buong imperyo ng Roma, si Pablo ay nagbalik sa Jerusalem, kahit na alam niyang mapanganib gawin ang gayon.

  • Bakit tinangkang pigilan si Pablo ng kanyang mga kaibigan sa pagbabalik sa Jerusalem? (Tingnan sa Ang Mga Gawa 21:10–12.) Paano tumugon si Pablo sa pag-aalala ng kanyang mga kaibigan? (Tingnan sa Ang Mga Gawa 21:13.) Paano nito ipinakita ang tapat na pangako ni Pablo kay Cristo?

  • Ano ang ginawa ni Pablo noong araw na makarating siya sa Jerusalem? (Tingnan sa Ang Mga Gawa 21:17–19.) Paano ito katulad ng ginagawa ng mga misyonero ngayon matapos silang makabalik mula sa kanilang misyon? (Iniuulat nila ang kanilang mga karanasan sa misyon sa pangulo ng istaka at mataas na kapulungan at kadalasan sa mga miyembro ng purok o sangay sa araw ng pulong-sakramento.) Paano kayo nakinabang sa pakikinig sa mga karanasan ng ibang misyonero?

  • Maraming Kristiyanong Judio ang nagalit kay Pablo dahil itinuro niya na ang kaligtasan ay dumating sa pamamagitan ni Jesucristo, at hindi sa batas ni Moises (Ang Mga Gawa 15:1–35). Upang mabigyang kasiyahan ang mga taong ito, hinilingan ng mga kapatid sa Jerusalem si Pablo na magpunta sa templo at sumailalim sa rituwal na paglilinis bilang tanda na sinusunod pa rin niya ang batas (Ang Mga Gawa 21:20–25). Ano ang nangyari habang nasa templo si Pablo? (Tingnan sa Ang Mga Gawa 21:26–30. Hinabol siya ng lupon ng mga tao na nagparatang na nagtuturo siya ng labag sa batas ni Moises at dinudungisan ang templo sa pamamagitan ng pagpapapasok ng hindi Judio sa loob nito.) Paano nailigtas si Pablo mula sa mga taong ito? (Tingnan sa Ang Mga Gawa 21:31–36.) Ano ang ginawa ni Pablo nang pahintulutan siya ng punong kapitan na magsalita sa mga tao? (Tingnan sa Ang Mga Gawa 21:37–22:21. Bakit nangailangan ito ng tapang?

Maaari ninyong naising simulang isulat sa pisara ang lahat ng mga naitala sa Ang Mga Gawa 21–28 tungkol sa mga pagpapakita ng tapang ni Pablo bilang saksi ni Jesucristo. Magdagdag sa listahan sa oras ng aralin kung naaangkop.

  • Kailan kayo nakapagbahagi ng inyong patotoo sa isang kalagayan na nangailangan ng tapang? Paano kayo nagkaroon ng lakas ng loob na gawin ito? Paano makatutulong sa atin ang pagkaalam sa mga ginawa ni Pablo upang magkaroon tayo ng higit na lakas ng loob na ibahagi ang ating mga patotoo sa ibang tao?

2. Si Pablo ay iniharap sa Sanhedrin.

Basahin at talakayin ang mga piling talata mula sa Ang Mga Gawa 22:22–23:35.

  • Ano ang naging reaksiyon ng mga tao sa labas ng templo sa salaysay ni Pablo tungkol sa kanyang pagbabalik-loob? (Tingnan sa Ang Mga Gawa 22:22.) Ano ang pangunahing layunin ng punong kapitan sa paglalayo kay Pablo mula sa mga lupon ng mga tao? (Tingnan sa Ang Mga Gawa 22:24.) Paano naiwasan ni Pablo ang paghampas (pagpalo) sa kanya? (Tingnan sa Ang Mga Gawa 22:25–26. Binigyang-diin niya na siya ay mamamayan ng Roma. Ito ay nagbigay sa kanya ng natatanging mga karapatan at pribilehiyo sa imperyong Romano, kung saan naging bahagi ang Jerusalem.)

  • Ano ang kauna-unahang sinabi ni Pablo nang iharap siya sa Sanhedrin (ang kapulungan ng mga Judio)? (Tingnan sa Ang Mga Gawa 23:1; tingnan din sa Ang Mga Gawa 24:16. Tingnan sa Doktrina at mga Tipan 135:4 para sa katulad na pahayag na ginawa ng Propetang si Joseph Smith.) Paano sa palagay ninyo nakatulong kay Pablo sa oras na ito ang “malinis na konsiyensiya sa harap ng Diyos”? Anyayahan ang mga miyembro ng klase na isaalang-alang ang mga pagbabagong kailangan nilang gawin sa kanilang sariling buhay upang magkaroon ng “malinis na konsiyensiya sa harap ng Diyos.”

  • Ano ang sinabi ng Panginoon nang magpakita siya kay Pablo pagkatapos siyang siyasatin ng Sanhedrin? (Tingnan sa Ang Mga Gawa 23:11.) Paano kayo natulungan ng Panginoon na “magkaroon ng lakas ng loob” sa panahon ng kahirapan?

  • Kinabukasan matapos magpakita ang Panginoon kay Pablo, mahigit sa 40 mga Judio ang nagtangkang pumatay kay Pablo, at nangagsipangakong hindi kakain o iinom hangga’t hindi sila nagtatagumpay (Ang Mga Gawa 23:12–15). Paano naprotektahan si Pablo mula sa kanilang plano? (Tingnan sa Ang Mga Gawa 23:16–35. Maaari ninyong naising bigyang-diin na ito ang ikatlong pagkakataon sa loob lamang ng ilang araw kung saan ay naligtas si Pablo mula sa kamatayan.)

3. Nagpatotoo si Pablo kay Agripa, ngunit tinanggihan ang kanyang patotoo.

Basahin at talakayin ang mga piling talata mula sa Ang Mga Gawa 26. Maaari ninyong naising ibuod ang sumusunod na impormasyon mula sa Ang Mga Gawa 24–25: Si Pablo ay ipinadala kay Felix, ang gobernador, at nagpatotoo nang buong tapang sa kanyang harapan. Nanatiling nakabilanggo si Pablo sa loob ng dalawang taon samantalang umasa si Felix na tatanggap ng salapi upang palayain siya. Nang si Felix ay palitan ni Festo bilang gobernador, hiniling ng mga Judio kay Festo na ipadala si Pablo sa Jerusalem para litisin. Tumangging magpunta si Pablo, nalalaman na hindi patas ang paglilitis na isasagawa doon. Sa halip ay umapela si Pablo kay Cesar, dahil karapatan niya iyon bilang mamamayan ng Roma. Pumayag si Festo na ipadala si Pablo sa Roma, ngunit kailangan munang humarap si Pablo kay Herod Agripa, ang hinirang ng Roma na mamuno sa Judea.

Kung ginagamit ninyo ang pagpapalabas ng video, ipakita na ngayon ang ikalawang bahagi. Itigil ang video pagkatapos ng pahayag ni Pablo na “I would to God that not only thou, but also all who hear me this day, were such as I am, except these bonds” (bago pa samahan ng mga sundalo si Pablo mula sa bakuran ni Haring Agripa).

  • Ano ang hinangaan ninyo sa mga salita ni Pablo kay Haring Agripa? (Tingnan sa Ang Mga Gawa 26:2–27.) Paano tinugon ni Agripa ang mga salita ni Pablo? (Tingnan sa Ang Mga Gawa 26:28.) Ano ang maaaring humahadlang kay Agripa sa pagiging isang Kristiyano? Anong mga saloobin o iba pang mga problema ang humahadlang sa mga tao sa ngayon sa pagtanggap ng ebanghelyo ni Jesucristo?

  • Paano nagkaiba ang reaksiyon nina Festo at Agripa kay Pablo? Paano nagkatulad ang mga ito? (Tingnan sa Ang Mga Gawa 26:24, 28. Bigyang-diin na walang katanggap-tanggap sa Panginoon maliban sa pagbibigay ng buong debosyon. Kahit na para kay Agripa ay halos kapani-paniwala ang mensahe ni Pablo at kahit na tahasan namang itong tinanggihan ni Festo, kapwa sila hindi nakapasa sa pagsubok ng pananampalataya na inalok sa kanila ni Pablo.)

4. Nasiraan ang barkong sinasakyan ni Pablo patungong Roma.

Basahin at talakayin ang mga piling talata mula sa Ang Mga Gawa 27–28. Ipaliwanag na kusang-loob sanang pawawalan ni Agripa si Pablo (Ang Mga Gawa 26:32), ngunit umapela si Pablo kay Cesar at dahil dito ay ipinadala siya sa Roma. Habang tinatalakay ninyo ang paglalakbay ni Pablo patungong Roma, ipakita ang mapa at ituro ang mga lugar na pinangyarihan, tulad ng Mabubuting Daongan, kung saan pinayuhan ni Pablo ang mga kalalakihan na manatili para sa taglamig, at ang Melita, kung saan lumangoy patungo sa dalampasigan ang mga pasaherong lulan ng nasirang barko.

  • Ano ang nangyari nang tanggihan ng pinuno ng barko ang babala ni Pablo na lubhang mapanganib ang maglayag mula sa Mabubuting Daongan? (Tingnan sa Ang Mga Gawa 27:7–20.) Ano ang nag-udyok sa senturyon upang ipagwalang-bahala ang payo ni Pablo? (Tingnan sa Ang Mga Gawa 27:11–12.) Bakit kung minsan ay ipinagwawalang-bahala ng ilan sa atin ang payo ng mga pinuno ng Simbahan? Paano ninyo nalaman ang kahalagahan ng pagsunod sa payo ng mga pinuno ng Simbahan?

  • Paano nalaman ni Pablo na ang lahat ng mga pasahero ay makararating sa lupa nang matiwasay, kahit na masisira sa bagyo ang barko? (Tingnan sa Ang Mga Gawa 27:21–26.) Paano natupad ang propesiyang ito? (Tingnan sa Ang Mga Gawa 27:27–44.)

  • Paano ginamit ni Pablo ang kanyang kapangyarihan ng pagkasaserdote samantalang nasa isla ng Melita? (Tingnan sa Ang Mga Gawa 28:7–9.) Ano ang ipinahihiwatig ng pangyayaring ito tungkol sa layunin ng kapangyarihan ng pagkasaserdote? Paano nakatutulong ang paggalang sa pagkasaserdote sa ating paglilingkod bilang mga saksi ni Cristo?

  • Sa wakas, makalipas ang ilang buwan ay narating ni Pablo ang Roma, kung saan muli siyang ibinilanggo. Paano niya ginawang kapaki-pakinabang sa kanya ang tila hadlang na ito? (Tingnan sa Ang Mga Gawa 28:16–31. Binigyan siya ng kaukulang kalayaan, kung kaya ginugol niya ang kanyang panahon sa pagtuturo ng ebanghelyo at pagpapatotoo hinggil kay Cristo.) Ano ang matututuhan natin mula kay Pablo tungkol sa pagiging matapat na saksi ni Jesucristo? (Kung nakagawa na kayo sa pisara ng listahan ng mga pagkakataon kung kailan nagpakita ng tapang si Pablo sa pagiging matapat na saksi, tukuyin ito.)

Kung ginagamit ninyo ang pagpapalabas ng video, ipakita ang karugtong nito ngayon.

Katapusan

Ipaliwanag na ipinagpalagay ng mga manunulat ng kasaysayan na si Pablo ay namatay na martir sa Roma noong dakong A.D. 65. Sa buong buhay niya ay tinupad niya ang kanyang tungkulin bilang isang Apostol na “magsiyaon nga kayo, at gawin ninyong mga alagad ang lahat ng mga bansa” (Mateo 28:19). Tinupad din niya ang propesiya ng Panginoon na ipapangaral niya ang ebanghelyo sa “harapan ng mga Gentil at ng mga hari, at ng mga anak ni Israel” (Ang Mga Gawa 9:15). Isa siyang matapat na saksi ni Cristo sa kabila ng mga masasakit na salita at pisikal na pagsalakay, hindi makatarungang pagkakakulong, at mga kalamidad.

Magpatotoo na kung susundan natin ang halimbawa ni Pablo sa pamamagitan ng pagiging matapat na mga saksi ni Jesucristo sa lahat ng kalagayan, tayo ay bibigyan Niya ng lakas upang mapagtiisan ang ating mga pagsubok.

Karagdagang Ideya sa Pagtuturo

Ang sumusunod na materyal ay mga karagdagan sa mungkahing banghay ng aralin. Maaari ninyong naising gamitin ang ideyang ito bilang bahagi ng aralin.

Pagbabalik-aral sa buhay ni Pablo

Upang matulungan ang mga miyembro ng klase na mapahalagahan kung paano tinupad ni Pablo ang kanyang misyon sa buhay na ito upang magpatotoo hinggil kay Cristo, hayaang tunghayan nila ang salitang “Pablo” sa Gabay sa mga Banal na Kasulatan. Papiliin ang bawat miyembro ng klase ng isang pangyayari sa buhay ni Pablo nang magpatotoo siya hinggil kay Cristo. (Ang mga kaganapang hindi nakalista sa Gabay sa mga Banal na Kasulatan ay maaari ding gamitin.) Anyayahan ang bawat miyembro ng klase na ibahagi sa klase ang kanyang napili, at ilista ang lahat ng mga kaganapan sa pisara. Pagkatapos ay hayaang tunghayan ng mga miyembro ng klase ang mga mapa ng paglalakbay ni Pablo (mga mapa 6–8 sa Gabay sa mga Banal na Kasulatan) at tukuyin kung saan naganap ang bawat pangyayari. Tulungan ang mga miyembro ng klase na pagbalik-aralan ang angkop na mga banal na kasulatan kung kinakailangan upang malaman ang lugar na pinangyarihan..