Sunday School: Doktrina ng Ebanghelyo
Aralin 21: ‘Ano ang Magiging Tanda ng Iyong Pagparito?’

Aralin 21

“Ano ang Magiging Tanda ng Iyong Pagparito?”

Mateo 24

Layunin

Tulungan ang mga miyembro ng klase na makilala ang mga palatandaan na mangyayari bago sumapit ang Ikalawang Pagparito ng Tagapagligtas at himukin ang mga miyembro na ihanda ang kanilang sarili para sa dakilang pangyayaring ito.

Paghahanda

  1. Basahin, pagnilay-nilayin, at ipanalangin ang sumusunod na mga banal na kasulatan:

    1. Mateo 24:1–5, 9–13, 15–22. Nagpropesiya si Jesus tungkol sa nalalapit na pagkawasak ng Jerusalem.

    2. Mateo 24:6–8, 14, 23–51. Inilarawan ni Jesus ang mga palatandaan na mangyayari bago sumapit ang kanyang Ikalawang Pagparito at itinuro kung paano makapaghahanda ang kanyang mga hinirang para sa kanyang pagparito.

  2. Karagdagang pagbabasa: Marcos 13; Lucas 21:5–36; Doktrina at mga Tipan 45:15–55.

  3. Kung makukuha ang larawang Ang Ikalawang Pagparito (34730 893; Pakete ng Larawan ng Sining ng Ebanghelyo 238), gamitin ito sa aralin.

  4. Mungkahi para sa pagtuturo: Ang tawag upang magturo ay hindi nangangailangan na alam ninyo ang lahat ng bagay tungkol sa ebanghelyo, kung kaya hindi kayo dapat mahiya kung magtatanong ang isang miyembro ng klase ng katanungan na hindi ninyo masasagot. Sa halip na magbigay ng kasagutan na gawa-gawa lamang, aminin na hindi ninyo alam ang sagot at sabihing sisikapin ninyong humanap ng kasagutan.

Mungkahing Pagbubuo ng Aralin

Gawaing Pantawag-pansin

Kung naaangkop, gamitin ang sumusunod na gawain o ang sariling gawa ninyo upang simulan ang aralin.

Patanawin ang mga miyembro ng klase sa isang bintana at patingnan ang kalangitan. Kung walang bintana sa silid-aralan, tanungin ang mga miyembro ng klase kung ano ang klima nang dumating sila sa simbahan. Pagkatapos ay hulaan ang isang bagay na hindi mangyayari na may kinalaman sa klima. Halimbawa, kung maaliwalas ang kalangitan at mainit sa labas, hulaan na uulan sa loob ng ilang oras. Kung malamig at umuulan sa labas at tila magpapatuloy ang pag-ulan, hulaan na magiging mainit at tuyo ang kapaligiran sa labas sa loob ng limang minuto.

Tanungin ang mga miyembro ng klase kung ano ang masasabi nila tungkol sa naging hula ninyo. Pagkatapos nilang magbigay puna, itanong ang mga sumunod:

Gawaing Pantawag-pansin

  • Ano ang inyong hula hinggil sa panahon sa susunod na mga oras? Ano ang dahilan ninyo upang bigkasin ang gayong hula?

  • Paano maaaring makaimpluwensiya sa mga bagay na ating ginagawa ang mga palatandaan ng paparating na kalagayan ng panahon? (Ang mga sagot ay maaaring kabilangan ng madalas tayong naghahanda batay sa mga palatandaang ito. Halimbawa, maaari tayong magplano ng mga gawain sa labas ng bahay kapag tila magiging maganda ang panahon, o maaaring gumawa tayo ng natatanging mga paghahanda para mapaghandaan ang isang malakas na bagyo.)

Bigyang-diin na ang paghula sa panahon ay isang situwasyon na kung saan ay umaasa tayo sa mga palatandaan upang matulungan tayong maghanda para sa darating na mga pangyayari. Kung babantayan natin ang mga palatandaan ay mababawasan ang pagkakataon na mahuli tayong hindi handa. Gayundin naman, ang pagbabantay natin sa mga palatandaan ng Ikalawang Pagparito ni Jesucristo ang makatutulong sa atin upang makapaghanda para sa dakilang kaganapang iyon. Tinatalakay ng araling ito ang ilan sa mga palatandaan na ipinropesiya ni Jesus na magaganap bago ang kanyang Ikalawang Pagparito. (Maaari ninyong naising bigyang-diin na ang hula ay tumutukoy sa isang bagay na maaaring mangyari, samantalang ang propesiya ay tumutukoy sa isang bagay na talagang mangyayari. Ang isang hula tungkol sa panahon ay maaaring magkamali, ngunit ang mga propesiya sa mga banal na kasulatan tungkol sa Ikalawang Pagparito ay matutupad na lahat.)

Talakayan at Pagsasagawa ng Banal na Kasulatan

Habang itinuturo ninyo ang sumusunod na mga talata sa banal na kasulatan, tulungan ang mga miyembro ng klase na maunawaan na naghayag ang Panginoon ng impormasyon na makatutulong sa atin upang makapaghanda para sa kanyang Ikalawang Pagparito. Sa kabila ng mga kahirapan sa mga huling araw ay maaari nating asamin nang may kagalakan ang dakilang pangyayaring ito.

Ipaliwanag na ang kabanata 24 ng Mateo ay naglalaman ng mga propesiya ng Tagapagligtas tungkol sa pagkawasak ng Jerusalem at tungkol sa kanyang Ikalawang Pagparito. Sa paglipas ng panahon, ang mga talata sa kabanatang ito ay binago at muling inayos kung kaya minsan ay mahirap maunawaan kung aling pangyayari ang inilalarawan ng isang partikular na talata. Sa kabutihang palad, bilang bahagi ng kanyang inspiradong pagsasalin ng Biblia, nilinaw ng Propetang Joseph Smith ang dalawang propesiya at ipinanumbalik ang karagdagang impormasyon. Ang inspiradong pagsasalin ng Propeta sa Mateo 24 ay matatagpuan sa Joseph Smith—Mateo sa Mahalagang Perlas. Ipinakikita ng araling ito ang pagkakasunod ng mga talata na ginamit sa Joseph Smith—Mateo at kasama ang ilang karagdagang impormasyon na ibinigay sa pagsasaling iyon.

Ipakita ang larawan ng Ikalawang Pagparito sa buong oras ng aralin.

1. Nagpropesiya si Jesus tungkol sa nalalapit na pagkawasak ng Jerusalem.

Talakayin ang Mateo 24:1–5, 9–13, 15–22. Anyayahan ang mga miyembro ng klase na basahin ang mga piling talata. (Pansinin na sang-ayon sa Propetang Joseph Smith, ang mga talata 6–8 at 14 ay tumutukoy sa Ikalawang Pagparito ni Jesucristo. Tatalakayin ang mga ito sa kasunod na bahagi.)

  • Ilang araw bago ipinako si Jesus ay sinamahan siya ng ilan sa kanyang mga disipulo sa Bundok ng mga Olivo. Ano ang dalawang katanungan na itinanong ng mga disipulo kay Jesus? (Tingnan sa Mateo 24:3.) Ipaliwanag na ang una nilang tanong na, “Kailan magaganap ang mga bagay na ito?” ay tumutukoy sa pagkawasak ng templo at ng lungsod ng Jerusalem, na ipinropesiya ni Jesus (tingnan sa Mateo 24:1–2; tingnan din sa Lucas 19:41–44; 21:5–6). Ang ikalawa nilang tanong na, “Ano ang magiging palatandaan ng inyong pagparito, at ng katapusan ng daigdig?” ay tumutukoy sa Ikalawang Pagparito ng Tagapagligtas. Ipaliwanag na nililinaw ng pagsasalin ni Joseph Smith na ang ibig sabihin ng “katapusan ng daigdig” ay ang pagkalipol ng masasama sa Ikalawang Pagparito, at hindi ang katapusan ng pag-iral ng mundo (Joseph Smith—Mateo 1:4).

  • Anong mga palatandaan ang ipinropesiya ng Tagapagligtas na mangyayari bago ang pagkawasak ng Jerusalem? (Tingnan sa Mateo 24:4–5, 9–12.)

  • Ano ang ipinagagawa ni Jesus sa kanyang mga tagasunod upang maiwasan ang pagkalipol? (Tingnan sa Mateo 24:13, 15–18.) Bakit mahalagang hindi nasila bumalik sa kanilang mga tahanan minsang nakaalis na sila? (Tingnan sa Lucas 9:62; Doktrina at mga Tipan 133:14–15.)

Ipaliwanag na kahit na maraming Judio ang hindi naniwala na ang kanilang malaking lungsod at templo ay hindi maaaring gibain ay natupad pa rin ang mga propesiya ng Panginoon noong A.D. 70. Sa paniniwalang darating ang Mesiyas at tutulungan sila sa pakikidigma, ang mga Judio ay nag-alsa laban sa mga Romano noong A.D. 66. Makaraan ang apat na taon ay nawasak ng mga Romano ang buong lungsod. Ang mga sumunod sa payo ng Tagapagligtas at nagtago sa mga kabundukan ay nangaligtas. Ang mga hindi nakinig sa payong ito ay ikinalat at nilipol.

2. Inilarawan ni Jesus ang mga palatandaan na magaganap bago ang Ikalawang Pagparito.

Basahin at talakayin ang mga piling talata mula sa Mateo 24:6–8, 14, 23–51. Paalalahanan ang mga miyembro ng klase na ang ikalawang tanong ng mga disipulo ay hinggil sa Ikalawang Pagparito ng Tagapagligtas. Bigyang-diin na ang pagsasalin ni Joseph Smith ng Mateo 24 ay nagsasaad na marami sa mga palatandaan na magaganap bago sumapit ang Ikalawang Pagparito ay magiging tulad ng mga pangyayaring naganap bago ang pagkawasak ng Jerusalem noong A.D. 70. Mawawasak muli ang Jerusalem bago magbalik ang Tagapagligtas.

Habang tinatalakay ninyo ang mga palatandaan at malalaking paghihirap na magaganap bago ang Ikalawang Pagparito ay ilista ang mga ito sa pisara.

  • Anong mga palatandaan ng Ikalawang Pagparito ang nabanggit sa Mateo 24:6? Anong katibayan ang nakikita ninyo na natutupad ang mga propesiyang ito? Itinuro ng Panginoon na “hindi tayo dapat magulumihanan” nang dahil sa mga digmaan at mga alingawngaw ng mga digmaan. Paano tayo makatatagpo ng kapayapaan sa ganito kaligalig na mga panahon? (Tingnan sa Mateo 11:28–30; 1 Juan 4:16–18; Doktrina at mga Tipan 6:34–36; 45:34–35; 59:23.)

    Ibinigay ni Elder M. Russell Ballard ang sumusunod na payo ng pag-asa at panghihimok:

    “Bagama’t sinasabi sa atin ng mga propesiya na magaganap ang mga bagay na ito, parami pa rin nang parami ang mga tao na nagpapakita ng malaking pagkabahala sa tila mabilis na lumaganap na kalamidad sa buong daigdig… . Aaminin natin na may sapat tayong dahilan na mabahala nang labis dahil wala tayong nakikitang kagyat na kasagutan sa tila walang kalutasang mga suliranin na kinakaharap ng mga tao sa mundo. Ngunit anuman ang tila walang kalutasang suliranin na ito, na tuluyan naman talagang magiging malala, hindi natin dapat pahintulutan ang ating sarili na mawalan ng pag-asa! …

    “ … Ang Panginoon ang namamahala. Alam niya ang katapusan mula sa simula. Binigyan niya tayo ng sapat na tagubilin na, kung susundin, ay magliligtas sa atin sa anumang krisis. Matutupad ang kanyang mga layunin, at balang-araw ay mauunawaan natin ang walang hanggang mga dahilan para sa lahat ng mga kaganapang ito. Kung gayon, kailangan tayong maging maingat ngayon at huwag mag-alala nang labis, ni hindi tayo dapat maging lubhang abala sa labis na paghahanda; kundi ang kailangan nating gawin ay sundin ang mga kautusan ng Diyos at huwag kailanman mawawalan ng pag-asa!

    “Ngunit saan natin matatagpuan ang pag-asa sa gitna ng gayong kaguluhan at malaking kapahamakan? Madali lang, ang ating nag-iisang pag-asa sa espirituwal na kaligtasan sa mga panahong ito ng kabalisahan ay ang ibaling ang ating mga isipan at ang ating mga puso kay Jesucristo… . Suot ang kalasag ng pananampalataya, ay mapagtatagumpayan natin ang marami sa ating pang-araw-araw na mga hamon at madadaig ang ating pinakamatitinding kahinaan at takot, na nalalaman na kung gagawin natin ang lahat upang masunod ang mga kautusan ng Diyos, anuman ang mangyari, tayo ay mananatiling ligtas” (sa Conference Report, Okt. 1992, 41–43; o Ensign, Nob. 1992, 31–32).

  • Anong mga palatandaan ng Ikalawang Pagparito ang inilalarawan sa Mateo 24:7? Anong katibayan ang nakikita ninyo na nagpapatunay na ang mga propesiyang ito ay nagaganap? Ano ang ipinayo sa atin ng mga propeta sa mga huling araw na gawin natin upang maging handa para sa mga natural na kalamidad na magaganap bago ang Ikalawang Pagparito?

  • Anong palatandaan ng Ikalawang Pagparito ang inilalarawan sa Mateo 24:14? Paano naisasakatuparan ang propesiyang ito sa ngayon? (Lumalaganap ang gawaing misyonero, at ang ebanghelyo ay naituturo at tinatanggap ng maraming lugar sa buong daigdig.) Ano ang maaaring gawin ng bawat isa sa atin upang makatulong sa pagsasakatuparan ng propesiyang ito?

  • Anong palatandaan ng Ikalawang Pagparito ng Tagapagligtas ang inilalarawan sa Mateo 24:24? Anong mga katibayan ang inyong nakikita na nagpapatunay na ang propesiyang ito ay natutupad? Paano natin maiiwasan ang madaya ng mga bulaang propeta? (Tingnan sa Mateo 7:15–20; Doktrina at mga Tipan 45:57; 46:7–8.)

  • Sa Pagsasalin ni Joseph Smith ng Mateo 24, sinasabi ni Jesus na kung pahahalagahan natin ang kanyang salita, tayo ay hindi malilinlang sa mga huling araw (Joseph Smith—Mateo 1:37). Paano natin mapahahalagahan ang salita ng Panginoon? Paano nakatulong sa inyo ang pagpapahalaga sa salita ng Panginoon upang maiwasan ang malinlang?

  • Sinabi ng Panginoon sa kanyang mga tagasunod sa Jerusalem na “[tumayo] sa dakong banal” (Mateo 24:15), at ibinigay niya ang gayunding pagpapayo sa ating panahon (Doktrina at mga Tipan 87:8; 101:22). Ano ang ilang dakong banal na kung saan ay dapat tayong tumayo? Paano makatutulong ang mga lugar na ito sa pangangalaga sa atin sa mga oras ng kahirapan sa mga huling araw?

    Sinabi ni Pangulong Ezra Taft Benson na, “Ang mga banal na kalalakihan at banal na kababaihan ay tumatayo sa banal na mga lugar, at ang banal na mga lugar na ito ay kinabibilangan ng ating mga templo, ating mga kapilya, ating mga tahanan, at ng mga istaka ng Sion, na sang-ayon sa pahayag ng Panginoon, ‘ay maaaring maging isang tanggulan, at isang kanlungan mula sa bagyo, at mula sa poot sa panahong ito [na] ibubuhos nang walang halo sa buong lupa’ (Doktrina at mga Tipan 115:6)” (“Prepare Yourselves for the Great Day of the Lord,” Brigham Young University 1981 Fireside and Devotional Speeches [1981], 68; tingnan din sa Teachings of Ezra Taft Benson [1988], 106).

  • Ano ang itinuro ni Jesus sa sumusunod na mga talata na tutulong sa atin na makapaghanda para sa kanyang Ikalawang Pagparito?

    1. Ang talinghaga ng puno ng igos (Mateo 24:32–36).

    2. Ang paghahambing ng Ikalawang Pagparito sa kapanahunan ni Noe (mga talata 37–39).

    3. Ang propesiya tungkol sa dalawang lalaki na nagtatrabaho sa bukid at ng dalawang babaing nagsisigiling sa gilingan (mga talata 40–41).

    4. Ang talinghaga ng mabuting lalaki at ng magnanakaw (mga talata 42–44).

    5. Ang talinghaga tungkol sa panginoon at sa kanyang mga alipin (mga talata 45–51).

  • Bakit mahalagang patuloy tayong magmasid at maghanda para sa pagdating ng Panginoon? Paano tayo makapagmamasid at makapaghahanda upang makilala ang Panginoon?

  • Ano ang mangyayari sa mabubuti kapag pumarito nang muli ang Tagapagligtas? (Tingnan sa Mateo 24:31; 45–47; I Mga Taga Tesalonica 4:16–18; Doktrina at mga Tipan 88:96–98.)

Katapusan

Magpatotoo na ang mga propesiya sa mga banal na kasulatan tungkol sa Ikalawang Pagparito ni Jesucristo ay magaganap lahat. Bigyang-diin na sa pamamagitan ng pag-aaral ng mga turo ng Tagapagligtas at pagsunod sa payo ng mga buhay na propeta ay magagawa nating ihanda ang ating sarili na makilala si Cristo. Kung handa tayo, ang Ikalawang Pagparito ay magiging kagila-gilalas na araw para sa atin.

Karagdagang mga Ideya sa Pagtuturo

Ang sumusunod na materyal ay karagdagan sa mungkahing banghay ng aralin. Maaari ninyong naising gamitin ang ideyang ito bilang bahagi ng aralin.

Mga palatandaan ng Ikalawang Pagparito na inihayag sa mga huling araw

Ipaliwanag na ang Propetang si Joseph Smith ay nakatanggap ng paghahayag na nag-ulit at naglinaw sa mga propesiyang ibinigay sa sinaunang mga disipulo ni Jesus. Ang paghahayag na ito ay matatagpuan sa Doktrina at mga Tipan 45. Ipahambing sa mga miyembro ng klase ang Doktrina at mga Tipan 45:15–55 sa Mateo 24. (Maaari ninyong naising bigyang-diin na ang Doktrina at mga Tipan 45:60–61 ay naglalaman ng tagubilin ng Panginoon kay Joseph Smith na simulan ang inspiradong pagsasalin ng Bagong Tipan.)