Sunday School: Doktrina ng Ebanghelyo
Aralin 26: ‘Ako’y Ipinanganak Dahil Dito’

Aralin 26

“Ako’y Ipinanganak Dahil Dito”

Mateo 26:47–27:66; Marcos 14:43–15:39; Lucas 22:47–23:56; Juan 18–19

Layunin

Tulungan ang mga miyembro ng klase na madama ang pagmamahal sa kanila ng Tagapagligtas at mapag-ibayo ang kanilang pagmamahal sa kanya at ang kanilang pasasalamat sa kanyang nagbabayad-salang sakripisyo.

Paghahanda

  1. Basahin, pagnilay-nilayin, at ipanalangin ang sumusunod na mga banal na kasulatan:

    1. Mateo 26:47–75; Marcos 14:43–72; Lucas 22:47–71; Juan 18:1–27. Pagkatapos na pagkatapos ng kanyang pagdurusa sa Getsemani, si Jesus ay ipinagkanulo ni Judas, na dumating na kasama ang mga punong saserdote, Fariseo, at kawal. Ipinaubaya ni Jesus ang kanyang sarili sa mga humuli sa kanya, sila na kumuha sa kanya mula sa halamanan at nagpasailalim sa kanya sa paglilitis ng mga Judio. Una siyang tinanong ni Ana, isang dating mataas na saserdote, at pagkatapos ay si Caifas, na manugang ni Anas na pumalit sa kanya. Dinuraan si Jesus ng mga punong saserdote at matatanda na naroon, inalipusta siya, iginapos siya, at pinaratangan siya ng kalapastanganan sa Diyos, isang pagkakasalang ang kaparusahan ay kamatayan. Sa labas ng palasyo ni Caifas ay ikinaila ni Pedro na kakilala niya si Jesus.

    2. Mateo 27:1–26; Marcos 15:1–15; Lucas 23:1–25; Juan 18:28–19:16. Dahil walang kapangyarihan ang mga punong saserdote at matatanda na hatulan si Jesus ng kamatayan, siya ay ipinadala upang litisin ni Poncio Pilato, ang gobernador ng Roma sa Judea (Gabay sa mga Banal na Kasulatan, “Pilato,” 214). Sa harapan ni Pilato ay pinaratangan si Jesus na kaaway ni Cesar. Nang malamang si Jesus ay mula sa Galilea, siya ay ipinadala ni Pilato kay Herodes, isang gobernador sa Galilea. Tumanggi si Herodes na hatulan si Jesus at ipinabalik siya kay Pilato, na pumayag sa kahilingan ng mga tao na ipako sa krus si Jesus.

    3. Mateo 27:27–66; Marcos 15:16–39; Lucas 23:26–56; Juan 19:17–42. Si Jesus ay hinampas at ipinako sa krus. Sa krus ay naranasan niya ang pinakamatinding pagdurusa habang iniaalay niya ang kanyang sarili bilang isang sakripisyo para sa sangkatauhan.

  2. Karagdagang pagbabasa: Isaias 53; Marcos 15:39–47; Juan 3:16; 15:13; 1 Nephi 11:32–33; 19:7–9; 2 Nephi 9:21–22; Gabay sa mga Banal na Kasulatan, “Pagpapako sa Krus,” 191–192.

  3. Ihanda ang pitong sinulatang papel na inilarawan sa pahina 138–139 (o maghandang isulat ang mga pangungusap sa pisara).

  4. Kung makukuha ang sumusunod na mga materyal, gamitin ang mga ito sa aralin:

    1. Ang mga larawan na Ang Pagkakanulo kay Jesus (34730 893; Pakete ng Larawan ng Sining ng Ebanghelyo 228); Ang Pagkakaila ni Pedro (34730 893; Pakete ng Larawan ng Sining ng Ebanghelyo 229); at Ang Pagpapako sa Krus (34730 893; Pakete ng Larawan ng Sining ng Ebanghelyo 230).

    2. “To This End Was I Born,” isang labing-anim na minutong yugto ng New Testament Video Presentations (53914).

  5. Mungkahi sa pagtuturo: Kapag ang mga guro at miyembro ng klase ay mapitagan, inaanyayahan nila ang Espiritu na dumalo. Ang mga miyembro ng klase ay dapat na “malayang magtalakayan, malayang magsalita, malayang makisali sa mga gawain sa klase, subalit walang miyembro ng klase na may karapatang gambalain ang isa pang estudyante sa pamamagitan ng panggigitgit o pagsasalita ng mga bagay na walang kabuluhan o walang gaanong saysay” (David O. McKay, Gospel Ideals [1954], 224). Magpakita ng halimbawa ng pagpipitagan sa Diyos at paggalang sa bawat miyembro ng klase.

Mungkahing Pagbubuo ng Aralin

Gawaing Pantawag-pansin

Kung naaangkop, gamitin ang sumusunod na gawain o ang sariling gawa ninyo upang simulan ang aralin.

Ipabuklat sa mga miyembro ng klase ang “Ang Jerusalem sa Panahon ni Jesus” (mapa 5 sa Gabay sa mga Banal na Kasulatan).

Ipaliwanag na ang araling ito ay nakatuon sa Pagpapako sa Krus ng Tagapagligtas at sa mga pangyayari noong mga oras bago ito sumapit. Ang mga pangyayaring ito ay naganap sa mga lugar na matatagpuan sa mapa. Tulungan ang mga miyembro ng klase na hanapin ang sumusunod na mga lugar: (1) ang Halamanan ng Getsemani, (2) ang bahay ni Caifas, (3) ang looban ng mga Gentil, (4) Moog ng Antonia, (ang bahay ni Pilato), at (5) ang Burol ng Golgota (Kalbaryo).

Kapag nahanap na ng mga miyembro ng klase ang Burol ng Golgota, ipaliwanag na doon ipinako sa krus si Jesus. Ipakita ang larawan ng Pagpapako sa Krus. Hilingan ang mga miyembro ng klase na isipin nila ang isang maliit na bata na nakatingin sa larawan at nagtatanong na, “Bakit kinailangang mamatay si Jesus?” Anyayahan ang mga miyembro ng klase na mag-ukol ng panahon sa oras ng aralin upang pagnilay-nilayan ang sasabihin nila sa bata. Sabihin sa kanila na tatalakayin ninyo ang tanong sa bandang huli ng araling ito.

Talakayan at Pagsasagawa ng Banal na Kasulatan

Habang itinuturo ninyo ang sumusunod na mga talata ng banal na kasulatan, tulungan ang mga miyembro ng klase na maunawaan ang pagmamahal na ipinakita ng Tagapagligtas para sa kanila nang hayaan niya ang kanyang sarili na mapagmalupitan at maipako sa krus.

1. Si Jesus ay ipinagkanulo, inaresto, at pinaratangan ng kalapastanganan sa Diyos; ikinaila ni Pedro si Jesus nang tatlong ulit.

Talakayin ang Mateo 26:47–75; Marcos 14:43–72; Lucas 22:47–71; at Juan 18:1–27. Anyayahan ang mga miyembro ng klase na basahin nang malakas ang mga piling talata. Maaari ninyong naising ibuod ang pangyayaring ito tulad ng nakabanghay sa 1a ng bahaging “Paghahanda.” Ipakita ang larawan ni Jesus na ipinagkakanulo sa Getsemani.

  • Paano tumugon si Pedro sa mga kalalakihang dumating sa Halamanan ng Getsemani upang kunin si Jesus? (Tingnan sa Juan 18:10.) Paano tumugon si Jesus sa mga taong ito? (Tingnan sa Lucas 22:51–53; Juan 18:11–12.) Bakit hinayaan ni Jesus na maisama nila siya? (Tingnan sa Mateo 26:53–54; Juan 10:17–18. Ipaliwanag na kalooban ng Ama sa Langit na ibigay ni Jesus ang kanyang buhay para sa atin.)

  • Pinaratangan si Jesus ng mga punong saserdote at matatanda ng mga Judio ng kalapastanganan sa Diyos, isang krimen na ang kaparusahan ay kamatayan (Marcos 14:64). Ano ang kalapastanganan sa Diyos? (Kawalang pitagan sa Diyos o pagsasabing kapantay ang Diyos.) Ano ang sinabi ni Jesus na inakala ng mga punong saserdote at matatanda na kalapastanganan sa Diyos? (Tingnan sa Marcos 14:60–63.)

  • Habang inilalayo sa halamanan si Jesus, ang karamihan sa kanyang mga disipulo ay “iniwan siya … at nagsitakas” (Mateo 26:56). Gayunman, patuloy pa ring sumunod sa kanya sina Pedro at Juan (Mateo 26:58; Juan 18:15; ipinapalagay na ang hindi nabanggit na disipulo sa Juan 18:15 ay si Juan). Ano ang ginawa ni Pedro nang sabihin ng mga taong nasa labas ng palasyo ni Caifas na kilala niya si Jesus? (Tingnan sa Mateo 26:69–74.) Ano ang ginawa ni Pedro nang matanto niyang ikinaila niya si Jesus nang tatlong ulit? (Tingnan sa Mateo 26:75; tingnan din ang mga talata 33–35.)

Ipakita ang larawan ni Pedro na ikinakaila si Jesus.

  • Tulad ni Pedro, paano ikinakaila kung minsan ng ilan sa atin ang ating pananampalataya? Ano ang matututuhan natin mula sa buhay ni Pedro matapos niyang ikaila ang Panginoon?

    Sinabi ni Pangulong Gordon B. Hinckley:

    “Naaawa ako kay Pedro. Marami sa atin ang katulad na katulad niya. Sumusumpa tayo na magiging matapat tayo; pinaninindigan natin ang ating determinasyon na magiging matapang; sinasabi natin, kung minsan kahit sa madla, na anuman ang mangyari ay gagawin natin ang tama, na paninindigan natin ang tama, na magiging matapat tayo sa ating sarili at sa iba.

    “Pagkatapos ay nagsisimulang dumating ang mga pagsubok. Kung minsan ang mga ito ay mula sa pakikihalubilo natin sa ating kapwa. Kung minsan ang mga ito ay ang pagkahilig natin sa mga bagay. Kung minsan ang mga ito ay ang mga maling ambisyon. Nagiging mahina ang paninindigan. Lumalambot ang disiplina sa sarili. Nabibigyang daan ang tukso. At pagkatapos ay matinding kalungkutan, na sinusundan ng panunumbat sa sarili at mapait na luha ng panghihinayang… .

    “ … Kung mayroon mang mga tao sa Simbahan na sa pamamagitan ng salita o gawa ay itinatuwa ang pananampalataya, idinadalangin ko na magtamo kayo ng kapanatagan at pagpapasiya mula sa halimbawa ni Pedro, na, kahit na araw-araw na nakasama si Jesus, sa oras ng panganib ay pansamantalang ikinaila ang Panginoon at gayundin ang kanyang patotoo na tinaglay niya sa kanyang puso. Gayunman ay pinaglabanan niya ito at naging matatag na tagapagtanggol at makapangyarihang tagapamagitan. Gayundin naman na may paraan upang makabalik ang sinumang tao at idagdag ang kanyang lakas at pananampalataya sa lakas at pananampalataya ng iba sa pagtatatag ng kaharian ng Diyos” (“And Peter Went Out and Wept Bitterly,” Ensign, Mar. 1995, 2–4, 6).

2. Hinatulan si Jesus na mapako sa krus.

Basahin at talakayin ang mga piling talata mula sa Mateo 27:1–26; Marcos 15:1–15; Lucas 23:1–25; at Juan 18:28–19:16. Maaari ninyong naising ibuod ang pangyayaring ito tulad ng nakabalangkas sa 1b ng bahaging “Paghahanda.”

  • Nang malaman ni Pilato na si Jesus ay taga Galilea, siya ay ipinadala niya kay Herodes, na gobernador sa Galilea (Lucas 23:6–7). Bakit “lubhang nagalak” si Herodes na makita si Jesus? (Tingnan sa Lucas 23:8.) Paano tumugon ang Tagapagligtas sa mga tanong ni Herodes? (Tingnan sa Lucas 23:9; ihambing ang talatang ito sa propesiya sa Isaias 53:7.)

  • Matapos paratangan at hamakin ni Herodes at ng kanyang mga tauhan si Jesus, siya ay ipinabalik nila kay Pilato (Lucas 23:11). Ano ang hatol na ibinigay ni Pilato kay Jesus? (Tingnan sa Lucas 23:13–17; tingnan din sa Lucas 23:4.) Bakit hinatulan ni Pilato si Jesus na mapako sa krus? (Tingnan sa Mateo 27:15–24; Marcos 15:6–15; Lucas 23:18–25; Juan 19:1–16.) Paano ba tayo tulad ni Pilato, na nagsisikap kung minsan na maiwasan ang pananagutan sa mahihirap na desisyon?

  • Sa isa sa mga tanong ni Pilato kung hari ba si Jesus ay sinabi ni Jesus na, “Ako’y ipinanganak dahil dito, dahil dito ako naparito sa sanglibutan, upang bigyang patotoo ang katotohanan” (Juan 18:37). Sa paanong mga paraan isang Hari si Jesus? (Tingnan sa Mga Awit 24:10; Isaias 44:6; Apocalipsis 11:15; 15:3; 2 Nephi 10:14.) Ano ang ibig sabihin ng ang kanyang “kaharian ay hindi rito [sa daigdig]”? (Juan 18:36).

3. Si Jesus ay hinampas at ipinako sa krus.

Basahin at talakayin ang mga piling talata mula sa Mateo 27:27–66; Marcos 15:16–39; Lucas 23:26–56; at Juan 19:17–42. Ipakita ang larawan ng Pagpapako sa Krus.

Itinala ng mga banal na kasulatan ang pitong pangungusap na binigkas ni Jesus samantalang nasa krus. Basahin at talakayin ang mga talatang nakalista sa ibaba. Habang tinatalakay ninyo ang mga ito, ipakita ang papel na sinulatan ng mga pangungusap o isulat ang mga pangungusap sa pisara.

  1. Lucas 23:34. “Ama, patawarin mo sila; sapagka’t hindi nila nalalaman ang kanilang ginagawa.”

    • Mula sa Pagsasalin ni Joseph Smith ay malalaman natin na noong sabihin ito ni Jesus, siya ay nananalangin para sa mga kawal Romano na nagpako sa kanya sa krus (Pagsasalin ni Joseph Smith ng Lucas 23:35). Ano ang inihahayag nito tungkol sa kanya? Ano ang makamundong paraan ng pagtugon sa mga taong nakasakit o nakasugat ng ating damdamin? Paano tayo pinagpapala kapag sinusunod natin ang halimbawa ni Jesus?

  2. Lucas 23:43. Sa nagsisising magnanakaw: “Katotohanang sinasabi ko sa iyo, Ngayon ay kakasamahin kita sa Paraiso.”

  3. Juan 19:26–27. Sa kanyang inang si Maria: “Babae, narito, ang iyong anak!” Kay Juan: “Narito, ang iyong ina!”

    • Kaninong mga pangangailangan ang iniisip ni Jesus sa oras ng kanyang pagpapakasakit? (Tingnan sa Lucas 23:43; Juan 19:26–27.) Ano ang matututuhan natin mula rito? (Kung may mga katanungan tungkol sa pangungusap ni Jesus sa Lucas 23:43, tingnan ang ikatlong karagdagang ideya sa pagtuturo.)

  4. Mateo 27:46; Marcos 15:34. “Dios ko, Dios ko bakit mo ako pinabayaan?”

    • Ano ang naranasan ni Jesus sa krus na dahilan kung kaya’t nauunawaan at tinutulungan niya tayo kapag tayo ay nag-iisa? Bakit mahalagang malaman na maaaring pasanin ng Tagapagligtas hindi lamang ang ating mga kasalanan kundi maging ang ating kalungkutan, pighati, at takot?

      Sinabi ni Elder Jeffrey R. Holland na: “Dahil sa bandang huli ay kailangan niyang yapakan nang mag-isa ang alilisan ng alak [winepress], magagawa ba niyang tiisin ang pinakamalagim na sandali sa lahat, ang sindak na dulot ng pinakamatinding paghihirap? Ito ay darating hindi sa pamamagitan ng mga tinik at mga pako, kundi sa pamamagitan ng kilabot na nadarama nang dahil sa pag-iisa: … ‘Dios ko, Dios ko bakit mo ako pinabayaan?’ (Marcos 15:34). Magagawa ba niyang tiisin ang lahat ng ating kasalanan at gayundin ang ating takot at kalungkutan? Napagtiisan niya at pinagtitiisan niya at pagtitiisan pa niya” (sa Conference Report, Okt. 1989, 32; o Ensign, Nob. 1989, 26).

  5. Juan 19:28. “Nauuhaw ako.”

    • Sa kabila ng lahat ng dinanas ni Jesus, ito lamang ang kanyang tanging pagbanggit ng pisikal na kabalisahan. Ano ang ibinigay sa kanya nang sabihin niyang nauuhaw siya? (Tingnan sa Juan 19:29.)

  6. Juan 19:30. “Naganap na.”

    • Sang-ayon sa Pagsasalin ni Joseph Smith, sinabi ni Jesus na naganap na; naisakatuparan na ang kalooban ng kanyang Ama (tingnan sa Joseph Smith Translation, Matthew 27:54). Bakit kinailangang mamatay ang Tagapagligtas upang maisagawa ang kalooban ng Ama sa Langit? (Tingnan sa 2 Nephi 9:5; 3 Nephi 27:13–16. Kung ginamit ninyo ang gawaing pantawag-pansin, anyayahan ang mga miyembro ng klase na magbahagi ng kanilang mga ideya tungkol sa kung paano sagutin ang tanong ng bata.)

      Sinabi ni Pangulong Spencer W. Kimball: “Kinailangan siyang mamatay, upang mabuksan niya ang mga libingan ng lahat ng tao tulad ng pagkabukas ng kanyang sariling libingan. Kung wala ang pusikit na kadiliman ng oras ng pagpapako sa krus, ay hindi magkakaroon ng tagsibol ng paglabas mula sa libingan” (sa Conference Report, Abr. 1975, 4; o Ensign, Mayo 1975, 4).

  7. Lucas 23:46. “Ama, sa mga kamay mo ay ipinagtatagubilin ko ang aking espiritu.”

Kung gagamitin ninyo ang palabas sa video na “To This End Was I Born,” ipalabas na ito ngayon.

Katapusan

Ipaliwanag na ang unang naitalang mga salita ng Tagapagligtas noon sa buhay bago pa ang buhay na ito ay “Narito ako, isugo ako” (Abraham 3:27). Kabilang sa kanyang unang naitalang mga salita sa buhay na ito ay ang “”Dapat akong maglumagak sa bahay ng aking Ama” (Lucas 2:49). Kabilang sa huling mga salitang binigkas niya sa buhay na ito ay nang sabihin niya sa Ama na ang kanyang gawain ay natapos na; natupad na ang kalooban ng Ama (tingnan sa Joseph Smith Translation, Matthew 27:54). Hindi kailanman nawala sa isipan ni Jesus ang kalooban ng kanyang Ama o ang kanyang sariling misyon. Maaari sana niyang tawagin ang hukbo ng mga anghel upang iligtas siya, ngunit hindi niya ito ginawa (Mateo 26:53–54). Sa kabila ng pagdurusa, hindi kailanman nawala ang kanyang kababaang-loob at ang kanyang kahandaang isagawa ang walang hanggang Pagbabayad-sala.

Magpatotoo tungkol sa mga katotohanang tinalakay sa aralin. Kung naaangkop, anyayahan ang mga miyembro ng klase na ibahagi ang kanilang mga patotoo.

Karagdagang mga Ideya sa Pagtuturo

Ang sumusunod na materyal ay mga karagdagan sa mungkahing banghay ng aralin. Maaari ninyong naising gamitin ang isa o higit pa sa mga ideyang ito bilang bahagi ng aralin.

1. Pagsunod sa halimbawa ng Tagapagligtas sa mga panahon ng kahirapan

Ang mga gawa ng Tagapagligtas noong huling araw ng kanyang buhay sa lupa ay nagpapakita ng kadakilaan ng kanyang pagkatao. Pagbalik-aralan ang ilan sa mga pagsubok na pinagtiisan ni Jesus noong araw na iyon. Pagkatapos ay itanong ang mga sumusunod:

  • Anong mga katangian ng pag-uugali ang makikita kay Jesus sa panahong ito ng paghihirap? (Maaaring maibilang sa mga sagot ang mas nag-alala siya sa iba kaysa sa kanyang sarili, na siya ay mapagpatawad, na masunurin siya sa kagustuhan ng Ama sa Langit, na hindi niya isinumpa ang iba dahil sa kanilang mga kahinaan, at hindi siya dumaing. Isulat sa pisara ang mga sagot ng mga miyembro ng klase. Hilingin sa mga miyembro ng klase na bumanggit ng tiyak na mga pangyayari na nagpapakita sa mga katangiang nabanggit.)

  • Anong mga katangian ang makikita sa atin sa panahon ng ating pinakamatinding paghihirap? Paano natin masusundan ang halimbawa ng Tagapagligtas sa mga panahon ng kahirapan?

2. “Nagkasala ako sa aking pagkakanulo sa dugong walang kasalanan” (Mateo 27:4)

  • Ano ang ginawa ni Judas sa pagtatangkang magsisi sa pagkakanulo niya sa Tagapagligtas? (Tingnan sa Mateo 27:3–5.) Ano ang matututuhan natin mula sa kanyang karanasan tungkol sa “kabayaran” na ibinibigay ng daigdig sa atin bilang kapalit ng ating mga kasalanan?

3. “Ngayon ay kakasamahin kita sa Paraiso” (Lucas 23:43)

Gamitin ang sumusunod na impormasyon kung kailangan ninyong ipaliwanag ang mga salita ng Tagapagligtas sa Lucas 23:43.

Sinabi ni Propetang Joseph Smith na sinabihan ni Jesus ang magnanakaw na, “Ngayon ay ipagsasama kita sa daigdig ng mga espiritu” (Teachings of the Prophet Joseph Smith, pinili ni Joseph Fielding Smith [1976], 309).

Mula sa Doktrina at mga Tipan 138:36–37 ay nalaman natin na si Jesus ay nagpunta sa daigdig ng mga espiritu sa panahon sa pagitan ng kanyang kamatayan at Pagkabuhay na Mag-uli at doon ay inihanda niya ang matatapat na mga espiritu upang ipangaral ang kanyang ebanghelyo sa mga espiritu na hindi nakatanggap ng ebanghelyo sa daigdig.