Sunday School: Doktrina ng Ebanghelyo
Aralin 42: ‘Dalisay na Relihion’

Aralin 42

“Dalisay na Relihion”

Santiago

Layunin

Tulungan ang mga miyembro ng klase na maunawaan ang mga katangian na dapat nating taglayin upang maipamuhay nang lubusan ang ating relihiyon.

Paghahanda

  1. Basahin, pagnilay-nilayin, at ipanalangin ang mga sumusunod na banal na kasulatan:

    1. Santiago 1:1–4; 5:10–11. Itinuro ni Santiago na dapat nating pagtiisan nang buong tiyaga ang kahirapan.

    2. Santiago 1:5–7; 4:8. Itinuro ni Santiago na dapat tayong manalangin sa Diyos nang may pananampalataya.

    3. Santiago 1:19–20, 26; 3:2–18. Itinuro ni Santiago na dapat nating pigilan ang ating mga dila at “magmakupad sa pagkagalit.”

    4. Santiago 1:22–25, 27; 2:14–26; 4:17. Itinuro ni Santiago na dapat tayong maging “tagatupad … ng salita,” na ipinakikita ang ating pananampalataya sa pamamagitan ng ating mga gawa.

  2. Karagdagang Pagbabasa: Gabay sa mga Banal na Kasulatan, “Santiago, Kapatid ng Panginoon” 225–226.

  3. Mungkahi sa pagtuturo: “Ituro na mayroong personal na komunikasyon mula sa Diyos at patungo sa Diyos. Tulungan ang bawat indibiduwal na maunawaan kung paano manalangin nang karapat-dapat at kung paano makatatanggap at makakikilala ng mga sagot mula sa Diyos” (Richard G. Scott, “Four Fundamentals for Those Who Teach and Inspire Youth,” sa CES Old Testament Symposium Speeches, 1987 [1987], 3).

Mungkahing Pagbubuo ng Aralin

Gawaing Pantawag-pansin

Kung naaangkop, gamitin ang sumusunod na gawain o ang sariling gawa ninyo upang simulan ang aralin.

Isulat sa pisara ang Dalisay na Relihiyon, at itanong ang mga sumusunod:

Gawaing Pantawag-pansin

  • Ano ang ibig sabihin ng salitang dalisay? (Maaaring kabilang sa mga sagot ang tunay, totoo, kumpleto, at perpekto.) Ano ang ibig sabihin ng relihiyon? (Maaaring kabilang sa mga sagot ang paglilingkod at pagsamba sa Diyos, isang sistema ng mga pinaniniwalaan at kaugalian, at tapat na pangako o debosyon sa isang partikular na paraan ng pamumuhay.)

  • Paano ninyo ipaliliwanag ang dalisay na relihiyon?

Hilingan ang isang miyembro ng klase na basahin ang Santiago 1:27. Ipaliwanag na tinatalakay ng araling ito kung paano natin maisasagawa ang mga turo ni Santiago upang matulungan tayong ipamuhay ang “dalisay na relihion” at maging “walang dungis sa harapan ng ating Dios.”

Talakayan at Pagsasagawa ng Banal na Kasulatan

Habang tinatalakay ninyo ang mga turo sa aklat ni Santiago, ilista ang mga ito sa pisara sa ilalim ng pamagat na Dalisay na relihiyon. Talakayin kung paano makatutulong sa atin ang bawat konsepto na itinuro ni Santiago upang maipamuhay ang isang dalisay na relihiyon.

Ipaliwanag na ang sumulat ng aklat ni Santiago ay karaniwang iniisip na siyang kapatid na lalaki ni Jesucristo. Pagkatapos na mabuhay na mag-uli si Jesucristo, si Santiago ay naglingkod bilang Apostol at isang mahalagang pinuno ng sinaunang Simbahan (Mga Gawa 12:17; 15:13–20).

1. Dapat nating pagtiisan nang may pagtitiyaga ang kahirapan.

Basahin at talakayin ang Santiago 1:1–4; 5:10–11.

  • Ano ang itinuro ni Santiago tungkol sa pagharap sa mga pagsubok ng ating pananampalataya? (Tingnan sa Pagsasalin ni Joseph Smith ng Santiago 1:2 na nagpapakita na ang pariralang sari-saring tukso ay binago at ginawang maraming paghihirap.) Paano makatutulong sa atin ang mga pagsubok sa pagkakaroon natin ng pagtitiis? Paano tayo nabibiyayaan kapag buong pagtitiis nating pinagtitiisan ang mga kahirapan? (Tingnan sa Santiago 1:4; Mga Taga Roma 5:3–5; Alma 36:3.)

    Isinulat ni Elder Orson F. Whitney na: “Wala tayong sakit na tinitiis, walang tayong pagsubok na dinaranas na nasasayang lamang. Nakadaragdag ito sa ating edukasyon, sa pagkakaroon ng mga katangiang tulad ng pagtitiis, pananampalataya, katatagan ng loob, at kabaang-loob. Ang lahat ng ating nararanasan at pinagtitiisan, lalo na kapag pinagtitiisan natin ito nang buong tiyaga ay nagpapatatag sa ating pagkatao, nagpapadalisay sa ating mga puso, nagpapalawak sa ating kaluluwa, at ginagawang tayong mas maawain at mapagmahal sa kapwa tao, higit na karapat-dapat na tawaging mga anak ng Diyos” (sinipi sa Spencer W. Kimball, Faith Precedes the Miracle, [1972], 98).

  • Sino ang binanggit ni Santiago na mabubuting halimbawa ng pagtitiis sa kahirapan? (Tingnan sa Santiago 5:10–11.) Paano ninyo nakita sa mga propeta ng mga huling araw ang pagtitiis na ito? Paano nakatulong sa inyo ang kanilang halimbawa?

2. Dapat tayong manalangin sa Diyos nang may pananampalataya.

Basahin at talakayin ang Santiago 1:5–7 at Santiago 4:8.

  • Anong payo ang ibinigay ni Santiago sa mga “nagkukulang ng karunungan”? (Tingnan sa Santiago 1:5–6.) Ano ang gagawin ng Ama sa Langit kung hihiling tayo nang may pananampalataya? Ano ang mga naging karanasan ninyo sa pagtanggap ng mga kasagutan sa panalangin?

  • Paano naimpluwensiyan si Propetang Joseph Smith ng payo na nasa Santiago 1:5? (Tingnan sa Joseph Smith—Kasaysayan 1:11–13.) Ano ang matututuhan natin mula sa kanyang karanasan? Paano nakaaapekto sa atin ang pasiya ni Joseph na sundin ang payo sa Santiago 1:5? (Tingnan sa Joseph Smith— Kasaysayan 1:14–20.)

    Sinabi ni Pangulong Spencer W. Kimball na: “Dahil nagpunta ang labing-apat na taong gulang na batang lalaki sa kakahuyan upang manalangin, tulad ng pagkabasa niya sa mga banal na kasulatan, … dahil ipinamuhay niya ang mgapaghahayag mula sa kaitaasan, ay nasa atin sa ngayon Ang Simbahan ni Jesucristo ng mga Banal sa mga Huling Araw. Nasa atin lahat ang biyaya na lubos ng makapagpapaligaya sa atin sa buong daigdig, dahil nagpunta sa kakahuyan ang isang batang lalaki na labing-apat na taong gulang upang manalangin” (sa Conference Report, Melbourne Australia Area Conference 1976, 23).

    Kung kabataan ang inyong tinuturuan, magpatotoo na ang paghiling sa Diyos nang may pananampalataya at ang pagtanggap ng karunungan ay hindi limitado sa edad o sa iba pang mga kalagayan. Si Joseph Smith ay 14 na taong gulang nang subukin niyang gawin ang mga salita ni Santiago at natanggap ang Unang Pangitain. Siya ay 17 taong gulang nang dalawin siya ng anghel na si Moroni at ihayag kung saan nakatago ang mga laminang ginto.

  • Paano inilarawan ni Santiago ang mga nananalangin nang walang pananampalataya? (Tingnan sa Santiago 1:6–7.) Ano ang maaari nating gawin upang palakasin ang ating pananampalataya?

  • Itinuro ni Santiago na, “Magsilapit kayo sa Dios, at siya’y lalapit sa inyo” (Santiago 4:8). Paano tayo mas inilalapit sa Dios ng taos-pusong panalangin?

3. Dapat nating pigilan ang ating dila at “magmakupad sa pagkagalit.”

Talakayin ang Santiago 1:19–20, 26; 3:2–18. Anyayahan ang mga miyembro ng klase na basahin nang malakas ang mga piling talata.

  • Itinuro ni Santiago na dapat tayong “magmaliksi sa pakikinig, magmakupad sa pananalita” (Santiago 1:19). Anong mga karanasan sa inyong buhay ang nakapagpatibay sa karunungan ng payo na ito? Paano tayo magiging higit na mabuting tagapakinig at mas maalalahaning tagapagsalita?

  • Itinuro din ni Santiago na dapat tayong “magmakupad sa pagkagalit” (Santiago 1:19). Ano ang ilang nagiging bunga ng pagsasalita o pagkilos nang galit? Anong mga karanasan sa inyong buhay ang nagpatibay sa karunungan ng payo ni Santiago? Paano natin mapaglalabanan o mapipigilan ang damdamin ng pagkagalit?

  • Itinuro ni Santiago na dapat nating pigilin ang ating dila (Santiago 1:26). Ano ang layon ng preno sa kabayo? (Upang magabayan at makontrol ang kabayo.) Paano natin maisasagawa ang payo ni Santiago na “pigilan” natin ang ating dila? (Tingnan sa Santiago 4:11. Maaaring kabilang sa mga sagot ang pag-iwas sa tsismis, kasinungalingan, pakikipag-away, pagmumura, at mga galit na salita. Sa halip, dapat nating gamitin ang ating dila na maging magalang, pagsasabi ng katotohanan, pananalangin, at paglikha ng kapayapaan.)

  • Basahin ang Santiago 3:3–5. Sa ano inihambing ni Santiago ang dila sa mga talatang ito? (Sa pangkagat sa preno ng kabayo, at sa ugit ng daong. Maaari ninyong naising ipaliwanag na ang pangkagat ay ang bakal na bahagi ng preno na ipinapasok sa bibig ng kabayo.) Ano ang matututuhan natin mula sa mga paghahambing na ito? Paano makatutulong sa atin na kontrolin ang ibang aspeto ng ating buhay ang pagkatutong kontrolin ang ating mga salita?

  • Basahin ang Santiago 3:9–13. Ano ang itinuro ni Santiago sa mga talatang ito tungkol sa pagpigil sa ating mga pananalita? (Talakayin ang mga pagsasagawa ng payong ito sa mga miyembro ng klase. Halimbawa, kung may saserdote samga miyembro ng klase, maaari ninyong talakayin ang kahalagahan ng pagpapanatiling malinis ng kanilang pananalita sa buong linggo upang maging karapat-dapat sila na magbasbas ng sakramento sa Linggo. Maaaring gawin din ang gayong pagsasagawa ng mga nagtuturo ng ebanghelyo.)

  • Paano nakatutulong sa pagkakaroon ng kapayapaan ang pagpigil sa ating dila? (Tingnan sa Santiago 3:16–18.) Bakit mahalagang bahagi ng dalisay na relihiyon ang pagpipigil sa ating mga dila?

4. Dapat tayong maging “mga tagatupad ng salita,” sa pamamagitan ng pagpapakita ng ating pananampalataya sa ating mga gawa.

Basahin at talakayin ang mga piling talata mula sa Santiago 1:22–25, 27; 2:14–26; 4:17.

  • Ano ang ibig sabihin ng maging “mga tagapakinig lamang” ng salita? (Santiago 1:22). Sa anong paraan dinadaya ng “mga tagapakinig lamang” ang kanilang sarili? (Tingnan sa Santiago 1:22–25; 4:17.) Ano ang mga pagpapala ng pagiging “mga tagatupad ng salita”?

  • Ano ang itinuro ni Santiago tungkol sa kaugnayan ng pananampalataya at mga gawa? (Tingnan sa Santiago 2:14–26.) Bakit patay ang pananampalataya na walang gawa? Paano pinalalakas ng mabubuting gawa ang ating pananampalataya kay Jesucristo?

  • Ano ang binigyang-diin ni Santiago na dapat nating gawin upang ipamuhay ang dalisay na relihiyon? (Tingnan sa Santiago 1:27 o ipaalala sa mga miyembro ng klase ang gawaing pantawag-pansin.) Bakit sa palagay ninyo bahagi ng dalisay na relihiyon ang pagdalaw at pagtulong sa mga taong nangangailangan?

  • Ano ang maaari nating gawin upang manatiling “walang dungis ang sarili … sa sanglibutan” (Santiago 1:27; tingnan sa Doktrina at mga Tipan 59:9). Paano nakatutulong sa atin na ating mapanatiling walang dungis ang ating sarili sa sanglibutan ang pagdalo sa simbahan at pagtanggap ng sakramento?

Katapusan

Magpatotoo tungkol sa katotohanan ng mga turo ni Santiago. Bigyang-diin na maaari nating ipamuhay nang higit pang dalisay ang ating relihiyon sa pamamagitan ng pagiging matiisin sa mga pagsubok, pananalangin sa Diyos nang may pananampalataya, pagdisiplina sa ating mga sarili at paggawa ng mabubuting bagay.

Karagdagang mga Ideya sa Pagtuturo

Ang sumusunod na materyal ay karagdagan sa mungkahing banghay ng aralin. Maaari ninyong naising gamitin ang isa o higit pa sa mga ideyang ito bilang bahagi ng aralin.

1. Mga pagtatanghal ng mga miyembro ng klase

Isang linggo bago ituro ang araling ito ay hilingan ang limang miyembro ng klase na pag-aralan ang magkakaibang kabanata sa Santiago. Sa pagsisimula ng klase (pagkatapos na pagkatapos ng gawaing pantawag-pansin, kung ginamit ninyo ito), ipabahagi sa mga taong ito ang kanilang mga ideya tungkol sa mga kabanatang kanilang pinag-aralan.

2. Pagpapalabas ng video

Basahin ang Santiago 1:27 at pagkatapos ay ipalabas ang “The Body Is a Temple, isang anim na minutong yugto mula sa New Testament Video Presentations (53914). Talakayin kung ano ang itinuturo ng pagtatanghal na ito ng video tungkol sa pagpapanatiling walang dungis ng ating sarili sa sanglibutan.

3. Karagdagang talakayan tungkol sa aklat ni Santiago

  • Sa Pagsasalin ni Joseph Smith ng Santiago 1:12, ang salitang nagtitiis ay pinalitan ng salitang lumalaban. Ano ang pagkakaiba ng pagtitiis ng tukso at paglaban sa tukso? Ano ang mga pangako sa mga lumalaban sa tukso? (Tingnan sa Santiago 1:12; 4:7.)

  • Ano ang itinuro ni Santiago tungkol sa paghatol sa iba? (Tingnan sa Santiago 2:1–9.) Bakit hinuhusgahan ng ilang tao ang iba sa pamamagitan ng kanilang mga katayuan sa lupa o materyal na ari-arian? Paano natin matututuhang hindi tingnan ang panlabas na kaanyuan ng tao at sa halip ay tingnan ang kanyang puso, tulad ng ginagawa ng Diyos? (Tingnan sa I Samuel 16:7; Doktrina at mga Tipan 38:24–27.)

  • Ano ang itinuro ni Santiago tungkol sa mga epekto ng pag-iimbot at pagnanasa? (Tingnan sa Santiago 3:16; 4:1–6.) Paano natin mapaglalabanan ang damdamin ng pag-iimbot o pagnanasa? (Tingnan sa Santiago 4:7–10.)

  • Ano ang itinuro ni Santiago tungkol sa pangangasiwa sa mga maysakit? (Tingnan sa Santiago 5:14–15.) Paano kayo pinagpala o kaya ay nakita ninyong pinagpala ang iba sa pamamagitan ng kapangyarihan ng pagkasaserdote na magpagaling?

  • Binigyang-diin ni Santiago ang kahalagahan ng pagtulong sa mga taong “nalilihis sa katotohanan” (Santiago 5:19–20). Paano natin magagawa ito?