មេរៀនទី ១២ ឯកសារគ្រូបង្រៀន ៖ យើងត្រូវការការកើតជាថ្មីខាងវិញ្ញាណ

« មេរៀនទី ១២ ឯកសារគ្រូបង្រៀន ៖ យើងត្រូវការការកើតជាថ្មីខាងវិញ្ញាណ » ការបង្រៀន និងគោលលទ្ធិនៃព្រះគម្ពីរមរមន ឯកសារគ្រូបង្រៀន ( ឆ្នាំ ២០២១ )

« មេរៀនទី ១២ ឯកសារគ្រូបង្រៀន » ការបង្រៀន និងគោលលទ្ធិនៃព្រះគម្ពីរមរមន ឯកសារគ្រូបង្រៀន

មេរៀនទី ១២ ឯកសារគ្រូបង្រៀន

យើងត្រូវការការកើតជាថ្មីខាងវិញ្ញាណ

នៅក្នុងស្ថានភាពធ្លាក់របស់យើង នោះយើងមិនស័ក្ដិសមនឹងរស់នៅក្នុងវត្តមានរបស់ព្រះឡើយ ។ ដោយសារតែព្រះយេស៊ូវគ្រីស្ទ និងតាមរយៈព្រះចេស្ដាដ៏ធួនរបស់ទ្រង់ នោះយើងអាចកើតជាថ្មីខាងវិញ្ញាណជាបុត្រាបុត្រីក្នុងសេចក្ដីសញ្ញារបស់ទ្រង់ ហើយស័ក្ដិសមនឹងសិរីល្អសេឡេស្ទាល ។ នៅក្នុងមេរៀននេះ សិស្សនឹងមានឱកាសយល់កាន់តែស៊ីជម្រៅពីការកើតជាថ្មីខាងវិញ្ញាណ ហើយពន្យល់ពីរបៀបដែលព្រះយេស៊ូវគ្រីស្ទអាចផ្លាស់ប្ដូរដួងចិត្តរបស់យើងបាន ។ សិស្សក៏នឹងប្ដេជ្ញាផងដែរចំពោះអ្វីដែលពួកគេអាចធ្វើបាន ដើម្បីរស់នៅតាមគោលលទ្ធិនៃព្រះគ្រីស្ទឲ្យកាន់តែប្រសើរ ដើម្បីធ្វើឲ្យការប្រែចិត្តជឿរបស់ពួកគេកាន់តែស៊ីជម្រៅ ។

យោបល់សម្រាប់ការបង្រៀន

ការអភិវឌ្ឍការបង្រៀន និងការរៀនសូត្ររបស់យើង

ជួយសិស្សឲ្យមានទំនួលខុសត្រូវលើការរៀនសូត្រផ្ទាល់ខ្លួនរបស់ពួកគេ ។ « ការរៀនសូត្រត្រូវតែបានធ្វើឡើងដោយ [ សិស្ស ] ។ ហេតុដូច្នេះហើយ គឺ [ សិស្ស ] ដែលត្រូវធ្វើសកម្មភាព » ( Teaching the Gospel: A Handbook for CES Teachers and Leaders [ ឆ្នាំ ១៩៩៤ ] ទំព័រ ១៤ ) ។ ស៊ីស្ទើរ វើរជីនៀ អេច ភាស អតីតទីប្រឹក្សាក្នុងគណៈប្រធានយុវនារីទូទៅបានអង្កេតឃើញថា « គ្រូដ៏ចំណានម្នាក់មិនគិតថា ‹ តើខ្ញុំគួរធ្វើអ្វីទៅនៅក្នុងថ្នាក់ថ្ងៃនេះ ? › ប៉ុន្តែសួរថា ‹ តើសិស្សរបស់ខ្ញុំនឹងធ្វើអ្វីនៅក្នុងថ្នាក់ថ្ងៃនេះ ? › មិនមែន ‹ តើខ្ញុំនឹងបង្រៀនពីអ្វីនៅថ្ងៃនេះ › តែគួរតែសួរថា ‹ តើខ្ញុំនឹងជួយសិស្សខ្ញុំរកឃើញអ្វី ដែលពួកគេត្រូវការដឹងយ៉ាងដូចម្ដេចទៅ ? ›[ Teaching the Gospel: A Handbook for CES Teachers and Leaders ទំព័រ ១៣ ] » ( « The Ordinary Classroom—a Powerful Place for Steady and Continued Growth » Ensign ខែ វិច្ឆិកា ឆ្នាំ ១៩៩៦ ទំព័រ ១២ ) ។

ប្រជាជនរបស់ស្តេចបេនយ៉ាមីនដកពិសោធន៍ការកើតជាថ្មីខាងវិញ្ញាណ ។

សូមបង្ហាញសេចក្ដីថ្លែងការណ៍ដូចតទៅនេះដោយប្រធាន ដាល្លិន អេក អូក ៖ « វាមិន … គ្រប់គ្រាន់សម្រាប់យើងដើម្បី បានជឿ ដំណឹងល្អនោះទេ ។ យើងត្រូវតែធ្វើសកម្មភាព និងគិត ដើម្បីយើងបាន ប្រែចិត្តជឿ លើដំណឹងល្អ » ( « The Challenge to Become » Ensign ខែ វិច្ឆិកា ឆ្នាំ ២០០០ ទំព័រ ៣២ ) ។

តើអ្វីទៅជាភាពខុសគ្នារវាងការស្គាល់ដំណឹងល្អថាជាការពិត និងការប្រែចិត្តជឿដោយសារដំណឹងល្អ ? ( អ្នកអាចអញ្ជើញសិស្សឲ្យរំឭក ម៉ូសាយ ២៧:២៥–២៦ និង សេចក្ដីថ្លែងការណ៍នៅក្នុង Gospel Topics អំពីការប្រែចិត្តជឿនៅក្នុងផ្នែកទី ១ នៃឯកសាររៀបចំ ) ។

សូមរំឭកសិស្សថា នៅក្នុង ផ្នែកទី ១ នៃឯកសាររៀបចំ ពួកគេអានដំណើររឿងមួយអំពីការកើតជាថ្មីខាងវិញ្ញាណនៃប្រជាជនរបស់ស្ដេចបេនយ៉ាមីន ។ បើចាំបាច់ សិស្សអាចរំឭក ម៉ូសាយ ៤:២–៣ និង ម៉ូសាយ ៥:២–៧ ដោយរកមើលទំនាក់ទំនងរវាងគោលលទ្ធិនៃព្រះគ្រីស្ទ និងការប្រែចិត្តជឿ ។ អ្នកអាចសួរសំណួរខាងក្រោមនេះមួយចំនួន ឬទាំងអស់ដើម្បីជួយពង្រីកការយល់ដឹងរបស់សិស្សអំពីសេចក្ដីពិត ដែលពួកគេរកឃើញ ។

តើផ្នែកអ្វីនៃគោលលទ្ធិរបស់ព្រះគ្រីស្ទ ដែលប្រជាជនរបស់ស្ដេចបេនយ៉ាមីនបានអនុវត្ត ហើយតើវាបានមានឥទ្ធិពលលើការកើតជាថ្មីខាងវិញ្ញាណរបស់ពួកគេយ៉ាងដូចម្ដេច ? ( សូមជួយសិស្សឲ្យរកឃើញគោលការណ៍មួយដែលស្រដៀងគ្នាដូចនេះ ៖ នៅពេលយើងខិតខំរស់នៅតាមគោលលទ្ធិនៃព្រះគ្រីស្ទ នោះព្រះអង្គសង្គ្រោះនឹងផ្លាស់ប្ដូរដួងចិត្តរបស់យើង ហើយជួយយើងឲ្យបានកើតជាថ្មីខាងវិញ្ញាណ ) ។
ហេតុអ្វីវាចាំបាច់ ដើម្បីទទួលស្គាល់តួនាទីរបស់ព្រះអង្គសង្គ្រោះនៅក្នុងការកើតជាថ្មីខាងវិញ្ញាណ និងការប្រែចិត្តជឿរបស់អ្នក ?
តើអ្នកដឹងអ្វីខ្លះអំពីព្រះយេស៊ូវគ្រីស្ទដែលបំផុសគំនិតអ្នកឲ្យងាកទៅរកទ្រង់ ដើម្បីផ្លាស់ប្ដូរដួងចិត្តរបស់អ្នក ?
តើព្រះយេស៊ូវគ្រីស្ទបានផ្លាស់ប្ដូរដួងចិត្តរបស់អ្នកយ៉ាងដូចម្ដេច ? តើអ្នកមានអារម្មណ៍យ៉ាងណាទៅកាន់ទ្រង់ ពេលទ្រង់ជួយអ្នកឲ្យធ្វើការផ្លាស់ប្ដូរនោះ ? ( សូមលើកទឹកចិត្តសិស្សឲ្យចែកចាយបទពិសោធន៍នានា ដែលមិនផ្ទាល់ខ្លួនខ្លាំងពេក ឬសូមឲ្យពួកគេកត់ត្រាបទពិសោធន៍មួយនៅក្នុងសៀវភៅកំណត់ហេតុរបស់ពួកគេ ) ។
តើធាតុនីមួយៗនៃគោលលទ្ធិរបស់ព្រះគ្រីស្ទ ( សេចក្ដីជំនឿ ការប្រែចិត្ត ពិធីបុណ្យជ្រមុជទឹក អំណោយទាននៃព្រះវិញ្ញាណបរិសុទ្ធ និងការតស៊ូដល់ចុងបញ្ចប់ ) បើកទ្វារឲ្យព្រះអង្គសង្គ្រោះផ្លាស់ប្ដូរដួងចិត្តរបស់អ្នកតាមរបៀបណា ?

សូមឲ្យសិស្សគិតអំពីការផ្លាស់ប្ដូរដួងចិត្តមួយ ដែលពួកគេចង់ដកពិសោធន៍ ហើយសួរ ៖

ជាធម្មតា តើការផ្លាស់ប្ដូរដួងចិត្តនេះកើតឡើងលឿនប៉ុណ្ណា ? ហេតុអ្វីទៅ ? ( បើចាំបាច់ សូមរំឭកសេចក្ដីថ្លែងការណ៍ដោយ អែលឌើរ ឌី ថត គ្រីស្តូហ្វឺសិន និង ប្រធាន បូនី អិល អូស្ការសុន នៅក្នុងផ្នែកទី ១ នៃឯកសាររៀបចំ ) ។

ពួកសាសន៍អាន់តៃ-នីហ្វៃ-លីហៃកប់សស្ត្រាវុធរបស់គេចោល ។

សូមពន្យល់ថា ទោះជាក្រោយពេលនរណាម្នាក់បានដកពិសោធន៍ការផ្លាស់ប្ដូរយ៉ាងធំនៅក្នុងចិត្តក៏ដោយ ក៏ភក្ដីភាពរបស់គាត់ ឬនាងអាចសាបរលាបទៅវិញបានដែរ ។ សូមបង្ហាញសេចក្ដីថ្លែងការណ៍ដូចខាងក្រោមនេះដោយអែលឌើរ ឌេល ជី រេនឡាន់ ៖

« យើងទាំងអស់គ្នាស្គាល់បុគ្គលដែលបានមានការផ្លាស់ប្ដូរយ៉ាងធំនៅក្នុងចិត្តនេះ ប៉ុន្ដែបន្ដិចម្ដងៗបានទោរទន់តាមភាពជាមនុស្សខាងសាច់ឈាម ។ ពួកគេប្រែជាលែងខ្វល់ក្នុងការថ្វាយបង្គំ និងភក្ដីភាពរបស់ពួកគេចំពោះព្រះ ដួងចិត្តរបស់ពួកគេបានរឹងទទឹង ហើយពួកគេបានធ្វើឲ្យអន្ដរាយដល់សេចក្ដីសង្គ្រោះដ៏អស់កល្បរបស់ពួកគេ ។( « Preserving the Heart’s Mighty Change » Liahona ខែ វិច្ឆិកា ឆ្នាំ ២០០៩ ទំព័រ ៩៨ )

ហេតុអ្វីបានជានរណាម្នាក់ ដែលបានដកពិសោធន៍ការផ្លាស់ប្ដូរយ៉ាងធំនៅក្នុងចិត្តហើយ បែរជាលែងខ្វល់ក្នុងការថ្វាយបង្គំ និងភក្ដីភាពរបស់គេចំពោះព្រះទៅវិញ ?

ដើម្បីផ្ដល់ការប្រៀបធៀបមួយទៅនឹងបុគ្គលដែលបានពិពណ៌នាដោយអែលឌើរ រេនឡាន់ សូមពិចារណាបង្ហាញរូបភាពខាងក្រោមនេះ ។ សូមឲ្យសិស្សពន្យល់ពីដំណើររឿងរបស់ពួកសាសន៍អាន់តៃ-នីហ្វៃ-លីហៃ ហើយរៀបរាប់ពីបុព្វហេតុដែលបានបណ្ដាលឲ្យពួកសាសន៍អាន់តៃ-នីហ្វៃ-លីហៃកប់គ្រឿងសស្រា្ដវុធសង្គ្រាមរបស់ពួកគេចោល ។

ផ្លូវដែលធ្វើឲ្យបរិសុទ្ធនៃការគោរពប្រតិបត្តិ ពលិកម្ម និងការញែកជាបរិសុទ្ធ ដោយ ដាន ប៊ើរ

នៅពេលសិស្សចែកចាយអ្វីដែលពួកគេដឹងអំពីពួកសាសន៍អាន់តៃ-នីហ្វៃ-លីហៃ នោះអ្នកអាចប្រើវគ្គបទគម្ពីរមួយចំនួនដូចតទៅនេះ ដើម្បីជួយសិស្សឲ្យរកឃើញជម្រៅនៃការផ្លាស់ប្ដូរ និងការប្រែចិត្តជឿរបស់ប្រជាជនលើព្រះយេស៊ូវគ្រីស្ទ ៖ អាលម៉ា ២៣:៦–៧; អាលម៉ា ២៤:៩–១១, ១៥; និង អាលម៉ា ២៧:២៧ ។

តើអ្វីទៅដែលរារាំងពួកសាសន៍អាន់តៃ-នីហ្វៃ-លីហៃ មិនឲ្យឈប់ខ្វល់ក្នុងការថ្វាយបង្គំ និងភក្ដីភាពរបស់ពួកគេចំពោះព្រះ ?
តើមានមេរៀនអ្វីខ្លះចេញពីវគ្គបទគម្ពីរទាំងនេះ ដែលអាចជួយអ្នកឲ្យអភិវឌ្ឍកិច្ចខិតខំរបស់អ្នកដើម្បី « មានចិត្តរឹងប៉ឹងនៅក្នុងសេចក្ដីជំនឿជឿដល់ព្រះគ្រីស្ទ គឺរហូតដល់ចុងបំផុត » ( អាលម៉ា ២៧:២៧ ) ?

អ្នកអាចអញ្ជើញសិស្សឲ្យសញ្ជឹងគិតថា តើមានគ្រឿងសស្ត្រាវុធនៃការបះបោរអ្វីខ្លះ ដែលអាចរារាំងពួកគេមិនឲ្យដកពិសោធន៍ការផ្លាស់ប្ដូរយ៉ាងធំនៅក្នុងចិត្តរបស់ពួកគេផ្ទាល់បាន ។

ដើម្បីជួយសិស្សឲ្យអនុវត្តអ្វីដែលពួកគេបានរៀននៅក្នុងមេរៀននេះ និងជំពូកនេះ សូមរៀបចំសិស្សជាក្រុមតូចៗ ហើយចាត់ឲ្យមានអ្នកដឹកនាំការពិភាក្សាម្នាក់សម្រាប់ក្រុមនីមួយៗ ។ សូមប្រគល់សំណៅចែកខាងក្រោមនេះដល់ក្រុមនីមួយៗ ហើយធ្វើឲ្យប្រាកដថា សិស្សមានពេលគ្រប់គ្រាន់ដើម្បីធ្វើការពិភាក្សាដ៏មានអត្ថន័យមួយ ។ នៅពេលដែលពេលវេលាអនុញ្ញាត សូមឲ្យសិស្សចែកចាយដល់សិស្សក្នុងថ្នាក់នូវអ្វីដែលពួកគេបានពិភាក្សា ។

ការពិភាក្សាក្រុមតូចស្ដីពីការកើតជាថ្មីខាងវិញ្ញាណ

ការបង្រៀន និងគោលលទ្ធិនៃព្រះគម្ពីរមរមន ឯកសារគ្រូបង្រៀន—មេរៀនទី ១២

កំណត់ចំណាំសម្រាប់អ្នកដឹកនាំការពិភាក្សា ៖ សូមដឹកនាំការពិភាក្សាមួយអំពីស្ថានភាពខាងក្រោមនេះជាមួយនឹងសមាជិកក្រុមរបស់អ្នក ។ សូមលើកទឹកចិត្តសមាជិកក្រុមរបស់អ្នកទាំងអស់ឲ្យចូលរួម ។ ប៉ុន្ដែ គ្មាននរណាម្នាក់គួរមានសម្ពាធថាត្រូវតែចែករំលែកយោបល់របស់ពួកគេនោះទេ ។

ផាប្លូ ស្រឡាញ់ការបម្រើជាអ្នកផ្សព្វផ្សាយសាសនារបស់គាត់ ហើយមានអារម្មណ៍ថា ដំណឹងល្អបានចូលជ្រាបចូលយ៉ាងជ្រាលជ្រៅទៅក្នុងដួងចិត្តរបស់គាត់ ។ គាត់បានត្រឡប់មកផ្ទះវិញពីបេសកកម្មរបស់គាត់ ពោរពេញដោយក្ដីអំណរ និងការរំពឹងទុកខ្ពស់ពីអនាគតរបស់គាត់ ។ បន្ទាប់ពីគាត់បានមកដល់ផ្ទះពីរបីសប្ដាហ៍មក គាត់ចាប់ផ្ដើមមានអារម្មណ៍ថា គេមិនត្រូវការគាត់ និងបាត់បង់គោលដៅ ។ ជាញឹកញាប់ គាត់មានអារម្មណ៍ឯកោ ។ ក្នុងកិច្ចខិតខំដើម្បីយកឈ្នះលើអារម្មណ៍ទាំងនេះ គាត់បានចូលរួមក្នុងសកម្មភាព និងគម្រោងជាច្រើនខុសៗគ្នា ។ បន្ដិចម្ដងៗ គាត់បានចាប់ផ្ដើមភ្លេចការអធិស្ឋាន និងការសិក្សាព្រះគម្ពីរផ្ទាល់ខ្លួនរបស់គាត់ ។ វត្តមានរបស់គាត់ក្នុងព្រះវិហារមិនសូវទៀងទាត់ ហើយថ្មីៗនេះ គាត់ត្រូវបានល្បួងឲ្យត្រឡប់ទៅរកទម្លាប់អាក្រក់មួយចំនួន ដែលគាត់បានមានពីមុនបេសកកម្មរបស់គាត់ ។

សំណួរពិភាក្សា ៖

តើមានសេចក្ដីពិតអ្វីខ្លះអំពីការកើតជាថ្មីខាងវិញ្ញាណ និងការផ្លាស់ប្ដូរដួងចិត្តអាចទាក់ទងខ្លាំងបំផុតទៅនឹងស្ថានភាពរបស់ផាប្លូ ?
ប្រសិនបើផាប្លូជាមិត្តរបស់អ្នក តើអ្នកនឹងចែកចាយអ្វីខ្លះជាមួយគាត់អំពីព្រះយេស៊ូវគ្រីស្ទ ដែលអាចជួយគាត់ឲ្យមានការផ្លាស់ប្ដូរដួងចិត្តឡើងវិញ ?
តើផាប្លូអាចរៀនមេរៀនអ្វីខ្លះមកពីពួកសាសន៍អាន់តៃ-នីហ្វៃ-លីហៃ ?

សូមពិចារណាផ្ដល់ពេលពីរបីនាទីឲ្យសិស្សរាយការណ៍ពីអ្វីដែលពួកគេបានរៀននៅក្នុងការពិភាក្សាក្រុមរបស់ពួកគេ ។ អ្នកក៏អាចផ្ដល់ពេលឲ្យពួកគេសញ្ជឹងគិតពីអ្វីដែលពួកគេមានអារម្មណ៍បំផុសគំនិតឲ្យធ្វើ ដោយសារតែអ្វីដែលពួកគេបានរៀន និងមានអារម្មណ៍នៅថ្ងៃនេះផងដែរ ។ សូមពិចារណាអញ្ជើញពួកគេឲ្យចែកចាយពីរបៀបដែលការយល់ដឹង និងទីបន្ទាល់របស់ពួកគេអំពីគោលលទ្ធិនៃព្រះគ្រីស្ទបានរីកចម្រើនឡើង នៅពេលពួកគេបានសិក្សាជំពូកនេះ ។

សម្រាប់ពេលក្រោយ

នៅពេលអ្នករៀបចំបញ្ចប់មេរៀននេះ អ្នកអាចបង្ហាញសេចក្ដីថ្លែងការណ៍ដូចតទៅនេះដោយប្រធាន រ័សុល អិម ណិលសុន ៖ « យើងចង់និយាយជាមួយក្មួយៗអំពីឧបសគ្គ ដ៏ធំបំផុត បុព្វហេតុ ដ៏ធំបំផុត និងកិច្ចការ ដ៏ធំបំផុត នៅលើផែនដីនេះ ។ ហើយពួកយើងចង់អញ្ជើញ ក្មួយៗ ឲ្យចូលរួម ! » ( រ័សុល អិម ណិលសុន និង វិនឌី ដបបិលយូ ណិលសុន « Hope of Israel » [ ការប្រជុំធម្មនិដ្ឋានសម្រាប់យុវវ័យទូទាំងពិភពលោក ថ្ងៃទី ៣ ខែ មិថុនា ឆ្នាំ ២០១៨ ] បន្ថែមទៅនឹង New Era និង Ensign ទំព័រ ៣ នៅលើគេហទំព័រ HopeofIsrael.ChurchofJesusChrist.org ) ។ នៅពេលសិស្សសិក្សា ឯកសាររៀបចំ សម្រាប់មេរៀនក្រោយ សូមលើកទឹកចិត្តពួកគេឲ្យពិចារណាពីតួនាទីរបស់ពួកគេនៅក្នុងបុព្វហេតុដ៏ធំបំផុតនេះ ៖ ការប្រមូលផ្ដុំអ៊ីស្រាអែល ។