មេរៀនទី ១៦ ឯកសារគ្រូបង្រៀន ៖ ព្រះយេស៊ូវគ្រីស្ទផ្ដល់ការងារបម្រើម្ដងម្នាក់ៗ

« មេរៀនទី ១៦ ឯកសារគ្រូបង្រៀន ៖ ព្រះយេស៊ូវគ្រីស្ទផ្ដល់ការងារបម្រើម្ដងម្នាក់ៗ » ការបង្រៀន និងគោលលទ្ធិនៃព្រះគម្ពីរមរមន ឯកសារគ្រូបង្រៀន ( ឆ្នាំ ២០២១ )

« មេរៀនទី ១៦ ឯកសារគ្រូបង្រៀន » ការបង្រៀន និងគោលលទ្ធិនៃព្រះគម្ពីរមរមន ឯកសារគ្រូបង្រៀន

មេរៀនទី ១៦ ឯកសារគ្រូបង្រៀន

ព្រះយេស៊ូវគ្រីស្ទផ្ដល់ការងារបម្រើម្ដងម្នាក់ៗ

ការបង្ហាញព្រះកាយរបស់ព្រះយេស៊ូវគ្រីស្ទដល់ពួកសាសន៍នីហ្វៃ និងពួកសាសន៍លេមិន ផ្ដល់ជាសាក្សីដ៏មានអានុភាពអំពីភាពជាព្រះរបស់ទ្រង់ ។ នៅពេលព្រះយេស៊ូវបានធ្វើការងារបម្រើម្ដងម្នាក់ៗ នោះទ្រង់បានធ្វើជាគំរូអំពីការមានសន្ដានចិត្តល្អ និងសេចក្ដីមេត្តាករុណា ។ នៅក្នុងមេរៀននេះ សិស្សនឹងត្រូវបានអញ្ជើញឲ្យកំណត់ពីរបៀបខុសៗគ្នា ដែលពួកគេអាចមករកព្រះគ្រីស្ទ ហើយទទួលបានសាក្សីផ្ទាល់ខ្លួនដ៏ជ្រាលជ្រៅមួយថា ទ្រង់គឺជាព្រះអង្គសង្គ្រោះរបស់ពួកគេ ។ សិស្សក៏នឹងពិចារណាពីអ្វីដែលពួកគេអាចធ្វើបាន ដើម្បីធ្វើតាមរបៀបដែលព្រះអង្គសង្គ្រោះផ្ដល់ការងារបម្រើផងដែរ ។

យោបល់សម្រាប់ការបង្រៀន

ព្រះគ្រីស្ទដែលបានមានព្រះជន្មរស់ឡើងវិញ បង្ហាញព្រះកាយដល់ពួកសាសន៍នីហ្វៃ និងពួកសាសន៍លេមិន ហើយអញ្ជើញពួកគេឲ្យពាល់ស្នាមរបួសនៅលើព្រះហស្ដ និងព្រះបាទារបស់ទ្រង់ ។

អ្នកអាចចាប់ផ្ដើមមេរៀននេះដោយការបង្ហាញរូបភាពដែលភ្ជាប់មកនេះ ហើយសូមឲ្យសិស្សម្នាក់តំណាលពីព្រឹត្តិការណ៍ ដែលបាននាំទៅដល់ការបង្ហាញព្រះកាយរបស់ព្រះយេស៊ូវគ្រីស្ទទៅកាន់ពួកសាសន៍នីហ្វៃ និងពួកសាសន៍លេមិន ។

សូមអញ្ជើញឲ្យសិស្សរំឭក សម្ដីដកស្រង់ដោយអែលឌើរ ជែហ្វ្រី អ័រ ហូឡិន នៅក្នុងផ្នែកទី ១ នៃឯកសាររៀបចំ ហើយសួរពួកគេថា ហេតុអ្វីបានជាការបង្ហាញព្រះកាយរបស់ព្រះយេស៊ូវគ្រីស្ទនៅក្នុងចំណោមប្រជាជននេះ គឺជាព្រឹត្តិការណ៍ដ៏សំខាន់បំផុតនៅក្នុងព្រះគម្ពីរមរមន ។

សូមសិស្សឲ្យរំឭក នីហ្វៃទី៣ ១១:១៣–១៧ ដោយរកមើលមេរៀនដែលយើងអាចរៀនបាន ចេញពីដំណើររឿងអំពីការប្រាស្រ័យទាក់ទងរបស់ព្រះគ្រីស្ទជាមួយនឹងប្រជាជននេះ ។ សូមពិចារណាថា តើអ្នកអាចសួរសំណួរមួយណានៃសំណួរខាងក្រោមនេះ ដើម្បីជួយសិស្សរបស់អ្នកឲ្យយល់ និងអនុវត្តតាមអ្វីដែលពួកគេរៀន ៖

តើយើងរៀនអ្វីខ្លះមកពីខគម្ពីរទាំងនេះ អំពីបុគ្គលិកលក្ខណៈរបស់ព្រះយេស៊ូវគ្រីស្ទ ?
តើអ្នកអាចមានអារម្មណ៍យ៉ាងណា ប្រសិនបើអ្នកត្រូវបានអញ្ជើញឲ្យពាល់ស្នាមរបួសនៅលើព្រះហស្ដ និងព្រះបាទារបស់ព្រះអង្គសង្គ្រោះនោះ ?
តើយើងអាចរៀនអ្វីខ្លះអំពីព្រះអង្គសង្គ្រោះ ចេញមកពីការអញ្ជើញរបស់ទ្រង់ឲ្យប្រជាជនមកពាល់ស្នាមរបួសនៅលើព្រះហស្ដ និងព្រះបាទារបស់ទ្រង់ម្ដងម្នាក់ៗ ? ( ប្រសិនបើចាំបាច់ សូមរំឭកសិស្សថា មនុស្សចំនួន ២,៥០០ នាក់បានមានវត្តមាន ) ។
តើបទពិសោធន៍នេះអាចតំណាងឲ្យអ្វី ដែលព្រះយេស៊ូវគ្រីស្ទអញ្ជើញយើងម្នាក់ៗឲ្យធ្វើដោយរបៀបណា ? ( ដោយប្រើចម្លើយរបស់សិស្ស សូមកំណត់សេចក្ដីពិតមួយដែលស្រដៀងគ្នាដូចតទៅនេះ ៖ ព្រះយេស៊ូវគ្រីស្ទអញ្ជើញយើងឲ្យមករកទ្រង់ ហើយទទួលបានទីបន្ទាល់ផ្ទាល់ខ្លួនថា ទ្រង់គឺជាព្រះអង្គសង្គ្រោះរបស់យើង ) ។
តើយើងអាចធ្វើអ្វីខ្លះ ដើម្បីមករកព្រះគ្រីស្ទ ហើយទទួលបានទីបន្ទាល់ផ្ទាល់ខ្លួនរបស់យើងថា ទ្រង់គឺជាព្រះអង្គសង្គ្រោះរបស់យើង ? ( សម្រាប់ការយល់ដឹងបន្ថែមទៀត វាអាចមានប្រយោជន៍ដើម្បីឲ្យសិស្សរំឭក សេចក្ដីថ្លែងការណ៍របស់អែលឌើរ វ៉លធើរ អែហ្វ ហ្គុងស្សាឡែស្ស នៅក្នុងផ្នែកទី ១ នៃឯកសាររៀបចំ ) ។

សូមឲ្យសិស្សរំឭកសកម្មភាព « កត់ត្រាគំនិតរបស់អ្នក » នៅក្នុងផ្នែកទី ១ នៃឯកសាររៀបចំ ។ សូមផ្ដល់ពេលពីរបីនាទីឲ្យសិស្សរំឭកអ្វីដែលពួកគេបានរៀបចំ រួចហើយសូមឲ្យសិស្សពីរបីនាក់ចែករំលែកអ្វីដែលពួកគេបានសរសេរ ។ តាមដែលពេលវេលាអនុញ្ញាត នោះអ្នកអាចអញ្ជើញសិស្សម្នាក់ ឬពីរនាក់ឲ្យប្រាប់ពីទំនុកតម្កើងមួយវគ្គ ដែលពួកគេបានជ្រើសរើស ហើយចែកចាយពីមូលហេតុដែលវាមានអត្ថន័យចំពោះពួកគេ ។ អ្នកក៏អាចច្រៀងទំនុកតម្កើងនេះជាមួយគ្នាបានផងដែរ ។

សូមពិចារណាបង្ហាញសំណួរខាងក្រោមនេះ ហើយលើកទឹកចិត្តឲ្យសិស្សសញ្ជឹងគិត និងកត់ត្រាទុកយោបល់ និងអារម្មណ៍របស់ពួកគេ ៖

តើខ្ញុំអាចធ្វើអ្វីខ្លះដើម្បីពង្រឹងទីបន្ទាល់របស់ខ្ញុំថា ព្រះយេស៊ូវគ្រីស្ទគឺជាព្រះអង្គសង្រ្គោះរបស់ខ្ញុំ ?

ព្រះយេស៊ូវគ្រីស្ទផ្ដល់ការងារបម្រើដល់ហ្វូងមនុស្សម្ដងម្នាក់ៗ ។

សូមរំឭកសិស្សថា នៅពេលជិតចុងបញ្ចប់នៃថ្ងៃទីមួយរបស់ទ្រង់នៅក្នុងចំណោមប្រជាជន នោះព្រះអង្គសង្គ្រោះបានអញ្ជើញហ្វូងមនុស្សឲ្យត្រឡប់ទៅផ្ទះរបស់ពួកគេវិញ ហើយរៀបចំខ្លួនសម្រាប់ការយាងត្រឡប់មកវិញរបស់ទ្រង់នៅថ្ងៃស្អែក ( សូមមើល នីហ្វៃទី៣ ១៧:១–៣ ) ។

ការអភិវឌ្ឍការបង្រៀន និងការរៀនសូត្ររបស់យើង

សូមលើកទឹកចិត្តសិស្សឲ្យសិក្សា និងធ្វើតាមគំរូរបស់ព្រះអង្គសង្គ្រោះ ។ ប្រធាន ឌៀថើរ អេហ្វ អុជដូហ្វ ដែលកាលនោះនៅក្នុងគណៈប្រធានទីមួយ បានថ្លែងទៅកាន់គ្រូបង្រៀនថ្នាក់សិក្ខាសាលា និងថ្នាក់វិទ្យាស្ថានថា « យុវវ័យរបស់យើងចង់ជឿ ពួកគេទន្ទឹងចង់ដឹងបន្ថែមទៀតអំពីព្រះអង្គសង្គ្រោះ » ( « A Teacher of God’s Children » Religious Educator វ៉ុល ១២ លេខ ៣ [ ឆ្នាំ ២០១១ ] ទំព័រ ៧ ) ។ របៀបមួយដែលសិស្សអាចដឹងបន្ថែមទៀតអំពីព្រះអង្គសង្គ្រោះ គឺការផ្ដោតលើគំរូដ៏ឥតខ្ចោះរបស់ទ្រង់ ។ នៅពេលសិស្សសិក្សាពីគំរូរបស់ព្រះយេស៊ូវគ្រីស្ទ សូមអញ្ជើញពួកគេឲ្យពិចារណាពីអ្វីដែលពួកគេអាចធ្វើបានដើម្បីធ្វើតាមទ្រង់ ។ អែលឌើរ នែល អេ ម៉ាក់ស្វែល ក្នុងកូរ៉ុមនៃពួកសាវកដប់ពីរនាក់បានអង្កេតឃើញថា « ការធ្វើតាមនេះនឹងបង្កើនសេចក្ដីស្រឡាញ់របស់យើងចំពោះព្រះយេស៊ូវដោយផ្ទាល់ »( « Becoming a Disciple » Ensign ខែ មិថុនា ឆ្នាំ ១៩៩៦ ទំព័រ ១២ ) ។

សូមបែងចែកសិស្សឲ្យធ្វើការជាក្រុមតូចៗ ។ សូមអញ្ជើញពួកគេឲ្យរំឭក នីហ្វៃទី៣ ១៧:៥–៩, ២០–២៤ ហើយពិភាក្សាពីរបៀបដែលព្រះអង្គសង្គ្រោះបានផ្ដល់ការងារបម្រើដល់ប្រជាជន ។ អំឡុងការពិភាក្សារបស់ពួកគេ សូមលើកទឹកចិត្តសិស្សឲ្យពិចារណាពីរបៀបខុសៗគ្នា ដែលពួកគេអាចបំពេញប្រយោគដូចតទៅនេះ ៖ « យើងផ្ដល់ការងារបម្រើដូចជាព្រះអង្គសង្គ្រោះ នៅពេល … » ។

ក្រោយពីសិស្សមានពេលច្រើនដើម្បីរៀនពីគ្នាហើយ សូមឲ្យពួកគេចែកចាយរបៀបមួយចំនួន ដែលពួកគេបានបំពេញប្រយោគមិនពេញលេញខាងលើនេះ ។ នៅពេលសិស្សចែកចាយប្រយោគរបស់ពួកគេ សូមពិចារណាសួរសំណួរខាងក្រោមនេះមួយចំនួន ដើម្បីជួយធ្វើឲ្យការពិភាក្សារបស់ពួកគេកាន់តែស៊ីជម្រៅ ៖

តើសេចក្ដីស្រឡាញ់ដើរតួយ៉ាងដូចម្ដេចនៅក្នុងការងារបម្រើ ? ( អ្នកអាចចង់រំឭក សម្ដីដកស្រង់ដោយប្រធាន ជីន ប៊ី ប៊ីងហាំ នៅក្នុងផ្នែកទី ២ នៃឯកសាររៀបចំ ) ។
ហេតុអ្វីអ្នកគិតថា ការងារបម្រើនាំមកនូវសេចក្តីអំណរដល់ព្រះអង្គសង្គ្រោះ ? តើនៅពេលណាដែលអ្នកបានមានអារម្មណ៍ថាមានអំណរ ខណៈពេលបម្រើនរណាម្នាក់ដែលទ័លក្រ ?
ហេតុអ្វីការមានអារម្មណ៍មេត្តាករុណាគឺជាផ្នែកមួយដ៏សំខាន់ក្នុងការធ្វើការងារបម្រើ ? តើនៅពេលណាដែលអ្នកទទួលអារម្មណ៍នៃសេចក្ដីមេត្តាករុណារបស់ព្រះអង្គសង្គ្រោះ តាមរយៈការខិតខំបម្រើរបស់បុគ្គលម្នាក់ទៀត ? តើអ្នកធ្លាប់ផ្ដល់សេចក្ដីមេត្តាករុណារបស់ព្រះអង្គសង្គ្រោះទៅកាន់មនុស្សដទៃ តាមរយៈការខិតខំធ្វើការងារបម្រើរបស់អ្នកផ្ទាល់ដោយរបៀបណា ?
តើយើងអាចជួយនរណាម្នាក់ឲ្យទទួលបានព្រះចេស្ដាព្យាបាលរបស់ព្រះអម្ចាស់ នៅពេលយើងផ្ដល់ការងារបម្រើដោយរបៀបណា ?

ដើម្បីជួយសិស្សឲ្យអនុវត្តអ្វីដែលពួកគេបានរៀនអំពីការងារបម្រើ សូមពិចារណាចែកចាយស្ថានភាពដូចតទៅនេះ ៖

អេឡិចហានដ្រូ គឺជាយុវមជ្ឈិមវ័យនៅលីវម្នាក់ ។ គាត់បានទទួលការអញ្ជើញមួយឲ្យផ្ដល់ការងារបម្រើដល់ ផាប្លូ និង ហូសេ ។ គាត់បាននិយាយជាមួយ ផាប្លូ ពីរបីដងពេលនៅព្រះវិហារ ប៉ុន្ដែមិនដែលបានជួប ហូសេ ទេ ។ ក្រោយពីនិយាយជាមួយនឹងប្រធានកូរ៉ុមអែលឌើរ អេឡិចហានដ្រូ ដឹងថា ផាប្លូ កំពុងពុះពារនឹងបញ្ហាសុខភាព ហើយថា ហូសេ បានប្រាប់ប៊ីស្សពថា គាត់មិនចាប់អារម្មណ៍នឹងការទៅព្រះវិហារនាពេលនេះទេ ។ អេឡិចហានដ្រូ ចង់បំពេញការហៅរបស់គាត់ ប៉ុន្ដែមិនដឹងថាត្រូវចាប់ផ្ដើមត្រង់ណាទេ ។

សូមអញ្ជើញសិស្សឲ្យមើលទៅគំរូរបស់ព្រះអង្គសង្គ្រោះ ហើយចែករំលែកការប្រឹក្សាណាមួយដែលពួកគេអាចផ្ដល់ដល់ អេឡិចហានដ្រូ បាន ។ សូមលើកទឹកចិត្តសិស្សឲ្យចែកចាយបទពិសោធន៍ផ្ទាល់ខ្លួនរបស់ពួកគេជាមួយនឹងការងារបម្រើផងដែរ ។

សូមរំឭកសិស្សថា ពេលរៀបចំមេរៀននេះ ពួកគេត្រូវបានអញ្ជើញឲ្យគិតដល់នរណាម្នាក់ដែលពួកគេអាចផ្ដល់ការងារបម្រើបាន ( សូមមើល ផ្នែកទី ២ នៃឯកសាររៀបចំ ) ។ សូមអញ្ជើញសិស្សឲ្យពិចារណាអំពីស្ថានភាពរបស់បុគ្គលនេះ ។ រួចហើយសូមផ្ដល់ពេលពីរបីនាទីឲ្យសិស្សសញ្ជឹងគិត និងកត់ត្រាចំណាប់អារម្មណ៍របស់ពួកគេអំពីសំណួរខាងក្រោមនេះ ៖

តើអ្នកនឹងធ្វើអ្វីខ្លះ ដើម្បីធ្វើតាមគំរូរបស់ព្រះអង្គសង្គ្រោះ ហើយផ្ដល់ការងារបម្រើដល់បុគ្គលនេះ ដោយមានសន្ដានចិត្តល្អ និងសេចក្ដីមេត្តាករុណា ?

សម្រាប់ពេលក្រោយ

សូមអញ្ជើញសិស្សឲ្យពិចារណាពីឧបសគ្គដែលសមាជិកសាសនាចក្រ ឬសាសនាគន់ការីប្រឈម នៅពេលពួកគេមានអារម្មណ៍ថាមិនត្រូវបានទទួលយកដោយសមាជិកផ្សេងទៀតក្នុងសាសនាចក្រ ។ សូមលើកទឹកចិត្តសិស្សរបស់អ្នកឲ្យសិក្សា ឯកសាររៀបចំសម្រាប់ថ្នាក់រៀនលើកក្រោយ ដោយរកមើលរបៀបដែលយើងអាចជួយមនុស្សដទៃឲ្យមានអារម្មណ៍ថា មានកន្លែងមួយសម្រាប់ពួកយើងទាំងអស់គ្នានៅក្នុងសាសនាចក្រនៃព្រះយេស៊ូវគ្រីស្ទ ។