« មេរៀនទី ២០ ឯកសាររៀបចំសម្រាប់ថ្នាក់ ៖ ពរជ័យទាំងឡាយនៃសេរីភាពខាងសាសនា » ការបង្រៀន និងគោលលទ្ធិនៃព្រះគម្ពីរមរមន ឯកសារគ្រូបង្រៀន ( ឆ្នាំ ២០២១ )
« មេរៀនទី ២០ ឯកសាររៀបចំសម្រាប់ថ្នាក់ » ការបង្រៀន និងគោលលទ្ធិនៃព្រះគម្ពីរមរមន ឯកសារគ្រូបង្រៀន
មេរៀនទី ២០ ឯកសាររៀបចំសម្រាប់ថ្នាក់
ពរជ័យទាំងឡាយនៃសេរីភាពខាងសាសនា
តើសេរីភាពខាងសាសនាមានសារៈសំខាន់ខ្លាំងប៉ុណ្ណាដែរចំពោះអ្នក ? ដូចដែលបានកត់ចំណាំនៅក្នុងគេហទំព័រព័ត៌មានក្នុងសាសនាចក្រ « សេរីភាពខាងសាសនាគឺជាមូលដ្ឋាននៃសិទ្ធិមនុស្ស ដែលការពារដល់សតិសម្បជញ្ញៈរបស់មនុស្សទាំងអស់ ។ វាអនុញ្ញាតឲ្យយើងគិត បង្ហាញ និងធ្វើសកម្មភាពតាមអ្វីដែលយើងជឿយ៉ាងជ្រាលជ្រៅ ។ … [ វា ] ការពារដល់សិទ្ធិរបស់ក្រុម និងបុគ្គលទាំងអស់ រួមទាំងអ្នកដែលងាយរងគ្រោះបំផុត មិនថាពួកគេជឿលើសាសនាឬអត់នោះទេ » ( « Religious Freedom » នៅលើគេហទំព័រ newsroom.ChurchofJesusChrist.org ) ។
ដោយថ្លែងអំពីជំនាន់របស់យើង នោះអែលឌើរ រ៉ូបឺត ឌី ហ៊ែល ក្នុងកូរ៉ុមនៃពួកសាវកដប់ពីរនាក់បានធ្វើការព្រមានថា « [ សាតាំង ] កំពុងបន្ទាបបន្ថោក ប្រឆាំង និងផ្សព្វផ្សាយការភាន់ច្រឡំយ៉ាងពេញទំហឹងអំពីសេរីភាពខាងសាសនា—ថាវាជាអ្វី និងហេតុអ្វីបានជាវាសំខាន់ចំពោះជីវិតខាងវិញ្ញាណរបស់យើង និងសេចក្តីសង្គ្រោះរបស់យើង » ( « Preserving Agency, Protecting Religious Freedom » Liahona ខែ ឧសភា ឆ្នាំ ២០១៥ ទំព័រ ១១២ ) ។ នៅពេលអ្នកសិក្សារៀបចំសម្រាប់ថ្នាក់រៀន សូមពិចារណាពីអ្វីដែលព្រះគម្ពីរមរមនអាចបង្រៀនយើងអំពីសារៈសំខាន់នៃសេរីភាពខាងសាសនា ហើយពិចារណាពីអ្វីដែលអ្នកអាចធ្វើបានដើម្បីលើកស្ទួយ ថែរក្សា និងការពារវា ។
ផ្នែកទី ១
តើសេរីភាពខាងសាសនាការពារជំនឿរបស់ខ្ញុំ និងរបៀបដែលខ្ញុំជ្រើសរើសរស់នៅតាមជំនឿនោះដោយរបៀបណា ?
សូមមើលវីដេអូ « Preserving Religious Freedom » ( ៣:៥៩ ) ។
សេចក្ដីសង្ខេបខាងក្រោមនេះគូសបញ្ជាក់ពីសិទ្ធិមូលដ្ឋានមួយចំនួន ដែលរួមមាននៅក្នុងសេរីភាពខាងសាសនា ៖
សេរីភាពខាងសាសនាមិនត្រឹមតែមានសិទ្ធិដើម្បីថ្វាយបង្គំដោយសេរីប៉ុណ្ណោះទេ ប៉ុន្ដែថែមទាំងមានសិទ្ធិនិយាយស្តី និងធ្វើសកម្មភាពដោយផ្អែកលើជំនឿសាសនារបស់បុគ្គលម្នាក់ផងដែរ ។ …
សេរីភាពខាងសាសនាការពារសិទ្ធិរបស់មនុស្សទាំងអស់ឲ្យកាន់តាមជំនឿសាសនាផ្ទាល់ខ្លួនរបស់ពួកគេ ហើយអាចបង្ហាញជំនឿនោះដោយបើកចំហ ដោយមិនមានការភិតភ័យចំពោះការបៀតបៀន ឬការត្រូវគេបដិសេធមិនឲ្យមានសិទ្ធិពលរដ្ឋស្មើភាពគ្នានោះទេ ។ …
សេរីភាពខាងសាសនាមិនត្រឹមតែការពារបុគ្គលទាំងឡាយនោះទេ ប៉ុន្ដែវាថែមទាំងការពារស្ថាប័នសាសនាទាំងឡាយ ដែលធ្វើឲ្យមានសហគមន៍នៃសេចក្ដីជំនឿផងដែរ ។ ( « Religious Freedom: The Basics » នៅលើគេហទំព័រ ChurchofJesusChrist.org )
ក្នុងប្រវត្តិសាស្ដ្រទាំងមូល សិទ្ធិជាមូលដ្ឋានរបស់មនុស្សដើម្បីធ្វើសកម្មភាពតាមជំនឿរបស់យើង ជាញឹកញាប់ត្រូវបានគេសាកល្បង ហើយថែមទាំងត្រូវបានគេបំបិទសិទ្ធិទៀតផង ។ ឧទាហរណ៍ ក្នុងអំឡុងរជ្ជកាលស្ដេចម៉ូសាយ ការបៀតបៀនដល់សមាជិកសាសនាចក្រពីសំណាក់ពួកអ្នកដែលមិនជឿបានមានសភាពធ្ងន់ធ្ងរខ្លាំង ( សូមមើល ម៉ូសាយ ២៧:១ ) ។
ការសិក្សានៅក្នុងការរៀបចំសម្រាប់ថ្នាក់
សូមអានដំណើររឿងនេះនៅក្នុង ម៉ូសាយ ២៧:១–៤ ដោយរកមើលរបៀបដែលថ្នាក់ដឹកនាំសាសនាចក្រ និងថ្នាក់ដឹកនាំរដ្ឋាភិបាលបានធ្វើការរួមគ្នាដើម្បីបង្កើតឲ្យមានសេចក្ដីសុខសាន្ដជូនប្រជាជន ។
សេរីភាពខាងសាសនាមិនត្រឹមតែការពារដល់សិទ្ធិបញ្ចេញមតិរបស់អ្នកដែលជឿលើសាសនាប៉ុណ្ណោះទេ ប៉ុន្ដែវាថែមទាំងលើកស្ទួយដល់សិទ្ធិរបស់អ្នកដែលមិនជឿលើសាសនា ឬអ្នកមានជំនឿខុសគ្នាផងដែរ ។ គំរូមួយនៃការណ៍នេះគឺនៅក្នុងដំណើររឿងរបស់កូរីហូរ ។ កូរីហូរបានរស់នៅអំឡុងរជ្ជកាលនៃពួកចៅក្រម ជាប្រព័ន្ធរដ្ឋាភិបាលមួយដែលត្រូវបានរៀបចំដើម្បីរក្សា និងការពារសេរីភាពរបស់ប្រជាជនពីពួកស្ដេចមិនសុចរិត ( សូមមើល ម៉ូសាយ ២៩ ) ។ កូរីហូរបានផ្សព្វផ្សាយ « ថា គ្មានព្រះគ្រីស្ទទេ » ( អាលម៉ា ៣០:១២ ) ។ គាត់បានអះអាងថា ពុំមានអំពើបាបទេ ហើយថាបុគ្គលម្នាក់ៗបានរីកចម្រើនឡើង ស្របតាមប្រាជ្ញាផ្ទាល់ខ្លួនរបស់គេ ។ ការបង្រៀនរបស់កូរីហូរបានដឹកនាំមនុស្សជាច្រើនឲ្យចាកចេញពីព្រះអម្ចាស់ ។ ( សូមមើល អាលម៉ា ៣០:៦, ១២–១៨ ) ។
ការសិក្សានៅក្នុងការរៀបចំសម្រាប់ថ្នាក់
សូមអាន អាលម៉ា ៣០:៧–៩, ១១ ហើយរកមូលហេតុដែលកូរីហូរមានសិទ្ធិដើម្បីបង្ហាញពីជំនឿរបស់គាត់ ។
នៅក្នុង អាលម៉ា ៣០:២៩–៥៨ យើងអានថា កូរីហូរត្រូវបាននាំមកកាន់ព្យាការីអាលម៉ា និងមេចៅក្រមនៅក្រុងសារ៉ាហិមឡា ហើយអាលម៉ាបានពោលពាក្យប្រឆាំងនឹងការបង្រៀនរបស់កូរីហូរ តាមរយៈការថ្លែងទីបន្ទាល់អំពីព្រះគ្រីស្ទ ។ គឺដូចជាកូរីហូរដែលមានសិទ្ធិបង្ហាញពីការឥតមានជំនឿលើព្រះរបស់គាត់ដែរ នោះអាលម៉ាមានសេរីភាពដើម្បីថ្លែងទីបន្ទាល់ថា ព្រះវរបិតាសួគ៌ និងព្រះយេស៊ូវគ្រីស្ទមានព្រះជន្មរស់ ។ ដោយជ្រើសរើសមិនជឿលើអាលម៉ា កូរីហូរបានទាមទារឲ្យមានទីសម្គាល់មកពីព្រះ ហើយត្រូវបានធ្វើឲ្យគ ។ ក្រោយពីព្រឹត្តិការណ៍នេះត្រូវបានផ្សព្វផ្សាយជាសាធារណៈ នោះអស់អ្នកដែលបានជឿលើកូរីហូរបានត្រឡប់មកជឿថា កូរីហូរខុសឆ្គង ហើយ « ពួកគេទាំងអស់គ្នាបានប្រែចិត្តជឿដល់ព្រះអម្ចាស់ទៀត » ( ខទី ៥៨ ) ។
ដោយថ្លែងពីសារៈសំខាន់នៃការការពារសេរីភាពខាងសាសនាសម្រាប់មនុស្សទាំងអស់ នោះព្យាការី យ៉ូសែប ស្ម៊ីធបានថ្លែងថា
ខ្ញុំត្រៀមខ្លួនដើម្បីស្លាប់ក្នុងការការពារសិទ្ធិរបស់ពួកប្រែសប៊ីធារាន ពួកបាទីស្ទ ឬមនុស្សល្អនៃនិកាយផ្សេងៗទៀត [ ដូចអស់អ្នកដែលជាសមាជិកសាសនាចក្រនេះដែរ ]; ដោយសារហេតុផលដូចគ្នានេះដែលគេអាចនឹងជាន់ឈ្លីសិទ្ធិរបស់ពួកបរិសុទ្ធថ្ងៃចុងក្រោយ នោះវានឹងជាន់ឈ្លីដល់សិទ្ធិរបស់ពួកកាតូលិករ៉ូម៉ាំង ឬនិកាយផ្សេងៗទៀតដែលមិនសូវល្បីល្បាញ ឬទន់ខ្សោយខ្លាំងដើម្បីការពារខ្លួនគេបានដែរ ។ ( Teachings of Presidents of the Church: Joseph Smith [ ឆ្នាំ ២០០៧ ] ទំព័រ ៣៤៥ )
យ៉ូសែប ស៊្មីធ ក៏បានគូសបញ្ជាក់ផងដែរថា សេរីភាពខាងសាសនាគឺជាការបង្រៀនគ្រឹះរបស់សាសនាចក្រ ៖ « យើងខ្ញុំសូមអះអាងយកសិទ្ធិក្នុងការថ្វាយបង្គំព្រះដ៏មានមហិទ្ធីឫទ្ធិ ស្របតាមការណែនាំនៃសម្បជញ្ញៈរបស់យើងខ្ញុំ ហើយសូមបណ្ដោយឲ្យមនុស្សទាំងអស់មានសិទ្ធិដូចគ្នា ចូរឲ្យគេថ្វាយបង្គំតាមរបៀបណានៅទីណា ឬអ្វីក៏ដោយដែលគេប្រាថ្នា » ( មាត្រានៃសេចក្ដីជំនឿ ១:១១ ) ។
សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយបានចេញផ្សាយសេចក្ដីថ្លែងការណ៍ដូចខាងក្រោមនេះ អំពីការធ្វើការដោយសន្ដិភាពសម្រាប់សេរីភាពខាងសាសនា ៖
នៅកន្លែងណាដែលច្បាប់រឹតបន្ដឹងសេរីភាពខាងសាសនា នោះពួកបរិសុទ្ធថ្ងៃចុងក្រោយជឿលើការគោរពតាមច្បាប់ ខណៈពេលស្វែងរកការការពារសិទ្ធិមូលដ្ឋានរបស់ពួកគេ តាមរយៈមធ្យោបាយផ្លូវច្បាប់ទាំងឡាយដែលមាននៅក្នុងប្រព័ន្ធយុត្តាធិកា ឬប្រទេសនីមួយៗ ។ ( « Religious Freedom: The Basics » នៅលើគេហទំព័រ ChurchofJesusChrist.org )
ពិភាក្សាក្នុងការរៀបចំសម្រាប់ថ្នាក់
សូមពិចារណាធ្វើការសន្ទនាជាមួយនឹងមនុស្សម្នាក់ ឬច្រើននាក់ដែលមានសេចក្ដីជំនឿផ្សេង ហើយសូមសួរពួកគេថា ហេតុអ្វីសាសនារបស់ពួកគេសំខាន់ចំពោះពួកគេ និងសួរថាតើពួកគេធ្លាប់ជួបនឹងការបៀតបៀនខាងសាសនាដែរឬទេ ។ សូមមកកាន់ថ្នាក់រៀនដោយបានត្រៀមខ្លួនចែកចាយអ្វីដែលអ្នកបានរៀន ។
ផ្នែកទី ២
តើខ្ញុំអាចធ្វើអ្វីខ្លះដើម្បីជួយលើកស្ទួយ ឬថែរក្សាសេរីភាពខាងសាសនា ?
វាអាចមានអត្ថប្រយោជន៍ដើម្បីពិចារណាពីឧទាហរណ៍មួយចំនួនអំពីសភាពជីវិតនេះ បើគ្មានសេរីភាពខាងសាសនាទេនោះ ។ សូមស្រមៃថា អ្នកកំពុងប្រឈមនឹងស្ថានភាពខាងក្រោមនេះមួយ ឬច្រើន ដែលសេរីភាពខាងសាសនាត្រូវបានដាក់កំហិត ៖
អ្នកអាចបាត់បង់ការងារ ឬតំណែងថ្នាក់ដឹកនាំរបស់អ្នកដោយសារការបង្ហាញជំនឿខាងសាសនា—ទោះបីជានៅក្រៅកន្លែងធ្វើការក្ដី ។ …
អ្នកអាចតម្រូវឲ្យលាក់បាំងសាសនារបស់អ្នក ឬធ្វើកិច្ចការនៅកន្លែងធ្វើការដែលប្រឆាំងនឹងជំនឿរបស់អ្នក ។ …
អ្នកអាចតម្រូវឲ្យធ្វើការនៅថ្ងៃឈប់សម្រាក ឬថ្ងៃបុណ្យសាសនា ទោះបីមានមនុស្សដទៃទៀតស្ម័គ្រចិត្តប្ដូរវេណជាមួយអ្នកក្ដី ។ …
កូនៗរបស់អ្នកនៅសាលារដ្ឋអាចតម្រូវឲ្យរៀនអំពីទ្រឹស្ដីខាងភេទ និងយេនឌ័រ ដែលផ្ទុយពីការបង្រៀនជាមូលដ្ឋានគ្រឹះក្នុងសាសនាចក្រ ។ …
អ្នកមិនអាចសុំកូនមកចិញ្ចឹម ឬក្លាយជាឪពុក ឬម្ដាយចិញ្ចឹមបានដោយសារតែជំនឿ ឬទស្សនៈខាងសាសនារបស់អ្នកស្ដីពីក្រុមគ្រួសារ ។
ក្នុងនាមជាម្ចាស់អាជីវកម្ម ឬអ្នកមានវិជ្ជាជីវៈម្នាក់ អ្នកអាចបាត់បង់អាជ្ញាប័ណ្ណរបស់អ្នក ឬត្រូវបានគេផាកពិន័យ ប្រសិនបើអ្នកបដិសេធមិនផ្ដល់សេវាកម្មដែលផ្ទុយពីជំនឿសាសនារបស់អ្នក ។ ( « Religious Freedom Matters: What’s at Risk » Ensign ខែ កក្កដា ឆ្នាំ ២០១៧ ទំព័រ ៣៧ )
ព្រះគម្ពីរមរមនកត់ត្រាថា នៅក្នុងឆ្នាំទី ១៩ នៃរជ្ជកាលពួកចៅក្រម នោះមានបុរសទុច្ចរិតម្នាក់ឈ្មោះ អាម៉ាលិកាយ បានសមគំនិតចង់ធ្វើជាស្ដេចលើពួកសាសន៍នីហ្វៃ ។ គាត់បានព្យាយាមរកល្បិចកលដើម្បីបំផ្លាញសាសនាចក្ររបស់ព្រះអម្ចាស់ និង « មូលដ្ឋាននៃឥស្សរភាព ដែលព្រះទ្រង់បានប្រទានឲ្យពួកគេ » ( អាលម៉ា ៤៦:១០ ) ។ អាម៉ាលិកាយបានបញ្ជោរពួកសាសន៍នីហ្វៃជាច្រើននាក់ ហើយពួកសាសន៍នីហ្វៃទាំងនេះបានចាកចេញពីសាសនាចក្រដើម្បីដើរតាមគាត់ ។ ( សូមមើល អាលម៉ា ៤៦:១–១០ ) ។
នៅពេលមរ៉ូណៃ ដែលជាមេទ័ពនៃកងពលសាសន៍នីហ្វៃ បានដឹងពីផែនការរបស់អាម៉ាលិកាយ នោះលោកបានខឹងសម្បារ ហើយដើរកេណ្ឌប្រជាជនឲ្យការពារសិទ្ធិរបស់ពួកគេ រួមទាំងសេរីភាពខាងសាសនារបស់ពួកគេផងដែរ ( សូមមើល អាលម៉ា ៤៦:១១–១៣, ១៩–២០ ) ។
ការសិក្សានៅក្នុងការរៀបចំសម្រាប់ថ្នាក់
សូមអាន អាលម៉ា ៤៦:១១–១៣, ១៩–២០ ហើយរកមើលអ្វីដែលមេទ័ពមរ៉ូណៃបានធ្វើ ដើម្បីការពារប្រជាជនពីការគំរាមកំហែងដល់សេរីភាពរបស់ពួកគេ ។
ប្រជាជនបានចូលរួមបុព្វហេតុជាមួយនឹងមរ៉ូណៃ ហើយបានចុះសេចក្ដីសញ្ញាដើម្បីប្រឆាំងនឹងការគំរាមកំហែងដល់សេរីភាពរបស់ពួកគេ ( សូមមើល អាលម៉ា ៤៦:២១–២២ ) ។ ដោយពោលពីកាតព្វកិច្ចរបស់យើងដើម្បីគាំទ្រដល់សេរីភាពខាងសាសនា នោះអែលឌើរ ហែល បានបង្រៀន ៖
ក្នុងនាមជាសិស្សនៃព្រះយេស៊ូវគ្រីស្ទ យើងមានទំនួលខុសត្រូវមួយដើម្បីធ្វើការរួមគ្នាជាមួយនឹងពួកអ្នកជឿដែលមានចិត្តដូចគ្នា ដើម្បីបន្លឺសំឡេងរបស់យើងចំពោះអ្វីដែលត្រូវ ។ …
… យើងមានទំនួលខុសត្រូវក្នុងការថែរក្សាសេរីភាព និងសិទ្ធិដ៏ពិសិដ្ឋទាំងនេះសម្រាប់ខ្លួនយើង និងកូនចៅសណ្ដានក្រោយយើង ។ តើអ្នក និងខ្ញុំអាចធ្វើអ្វីបានខ្លះ ?
ទីមួយ យើងអាចទទួលដឹងឮ ។ សូមដឹងពីបញ្ហានៅក្នុងសហគមន៍របស់អ្នក ដែលអាចមានឥទ្ធិពលលើឥស្សរភាពខាងសាសនា ។
ទីពីរ នៅក្នុងសមត្ថភាពជាបុគ្គលរបស់អ្នក សូមចូលរួមជាមួយនឹងមនុស្សដទៃដែលមានការប្ដេជ្ញាចិត្តចំពោះសេរីភាពខាងសាសនាដូចជាយើងដែរ ។ សូមធ្វើការកៀកស្មាគ្នាដើម្បីការពារសេរីភាពខាងសាសនា ។
ទីបី រស់នៅជីវិតរបស់អ្នកដើម្បីធ្វើជាគំរូល្អមួយចំពោះអ្វីដែលអ្នកជឿ—ទាំងពាក្យសម្ដី និងទង្វើ ។ របៀបដែលយើងរស់នៅតាមសាសនាយើង មានសារៈសំខាន់ខ្លាំងជាងអ្វីដែលយើងថ្លែងអំពីសាសនាយើងទៅទៀត ។
ការយាងមកជាលើកទីពីររបស់ព្រះអង្គសង្គ្រោះខិតកាន់តែជិតមកដល់ហើយ ។ សូមយើងកុំពន្យារពេលក្នុងបុព្វហេតុដ៏អស្ចារ្យនេះអី ។ សូមចងចាំដល់មេទ័ពមរ៉ូណៃ ដែលបានលើកទង់ឥស្សរភាពឡើង [ សូមមើល អាលម៉ា ៤៦:១២ ] ។ … សូមយើងចងចាំដល់ការឆ្លើយតបរបស់ប្រជាជន ៖ ដោយអនុវត្តសិទ្ធិជ្រើសរើសរបស់ពួកគេ នោះពួកគេ « បាននាំគ្នារត់មក » ជាមួយនឹងសេចក្ដីសញ្ញាដើម្បីធ្វើសកម្មភាព [ អាលម៉ា ៤៦:២១ ] ។ ( « Preserving Agency, Protecting Religious Freedom » ទំព័រ ១១២, ១១៣ )
សញ្ជឹងគិតនៅក្នុងការរៀបចំសម្រាប់ថ្នាក់
តើអ្នកអាចធ្វើអ្វីខ្លះដើម្បីជួយលើកស្ទួយ និងថែរក្សាសេរីភាពខាងសាសនានៅកន្លែងដែលអ្នករស់នៅ ?
