« មេរៀនទី ២៣ ឯកសារគ្រូបង្រៀន ៖ ការគោរពតាមព្រះបញ្ញតិ្តទាំងឡាយរបស់ព្រះ » ការបង្រៀន និងគោលលទ្ធិនៃព្រះគម្ពីរមរមន ឯកសារគ្រូបង្រៀន ( ឆ្នាំ ២០២១ )
« មេរៀនទី ២៣ ឯកសារគ្រូបង្រៀន » ការបង្រៀន និងគោលលទ្ធិនៃព្រះគម្ពីរមរមន ឯកសារគ្រូបង្រៀន
ឯកសារគ្រូបង្រៀន មេរៀនទី ២៣
ការគោរពតាមព្រះបញ្ញតិ្តទាំងឡាយរបស់ព្រះ
ជំពូកនេះនឹងផ្ដល់ឱកាសឲ្យសិស្សពិចារណាពីអ្វីដែលពួកគេអាចធ្វើបាន ដើម្បីបន្ដទុកចិត្តកាន់តែខ្លាំងឡើងលើព្រះអម្ចាស់ នៅពេលពួកគេប្រឈមមុខនឹងឧបសគ្គនានានៅក្នុងជីវិត ។ នៅក្នុងមេរៀននេះ សិស្សនឹងរៀនពន្យល់ពីរបៀបដែលព្រះយេស៊ូវគ្រីស្ទបានបង្ហាញការទុកព្រះទ័យយ៉ាងឥតខ្ចោះលើព្រះវរបិតាសួគ៌ តាមរយៈការកាន់តាមព្រះបញ្ញត្តិទាំងអស់របស់ទ្រង់ ។ សិស្សក៏នឹងកំណត់ពីពរជ័យនៃការគោរពប្រតិបត្តិផងដែរ ហើយពិចារណាពីអ្វីដែលពួកគេអាចធ្វើបាន ដើម្បីធ្វើតាមគំរូរបស់ព្រះយេស៊ូវគ្រីស្ទស្ដីពីការគោរពប្រតិបត្តិឲ្យបានកាន់តែពេញលេញ ។
យោបល់សម្រាប់ការបង្រៀន
ព្រះយេស៊ូវគ្រីស្ទគោរពតាមព្រះទ័យរបស់ព្រះវរបិតាសួគ៌ក្នុងគ្រប់ការណ៍ទាំងអស់ ។
សូមបង្ហាញរូបភាពព្រះយេស៊ូវគ្រីស្ទដែលភ្ជាប់មកជាមួយនេះ ឬសូមបង្ហាញវីដេអូ « Special Witness—Elder Hales » ( ២:៤៩ ) ។ នៅក្នុងវីដេអូនេះ អែលឌើរ រ៉ូបឺត ឌី ហែល ក្នុងកូរ៉ុមនៃពួកសាវកដប់ពីរនាក់ពិភាក្សាពីការគោរពប្រតិបត្តិដ៏ឥតខ្ចោះរបស់ព្រះអង្គសង្គ្រោះតាមព្រះវរបិតាសួគ៌ ។ រួចហើយសូមអញ្ជើញសិស្សឲ្យរំឭក នីហ្វៃទី២ ៣១:៦–៧, ១០; នីហ្វៃទី៣ ១១:១១; ២៧:១៣ ហើយរកមើលអ្វីដែលយើងអាចរៀនអំពីការគោរពប្រតិបត្តិចេញពីគំរូរបស់ព្រះអង្គសង្គ្រោះ ។
-
តើយើងអាចរៀនអ្វីខ្លះអំពីការគោរពប្រតិបត្តិចេញពីគំរូរបស់ព្រះយេស៊ូវគ្រីស្ទ ? ( សិស្សអាចនឹងរកឃើញសេចក្ដីពិតមួយចំនួនដែលស្រដៀងសេចក្តីពិតដូចនេះ ៖ តាមរយៈការចុះចូលដោយរាបសាតាមព្រះទ័យរបស់ព្រះវរបិតាសួគ៌ក្នុងគ្រប់ការណ៍ទាំងអស់ នោះព្រះយេស៊ូវគ្រីស្ទធ្វើជាគំរូដ៏ឥតខ្ចោះស្ដីពីការគោរពប្រតិបត្តិ ដើម្បីឲ្យយើងធ្វើតាម ) ។
-
ហេតុអ្វីអ្នកគិតថា ការស្ម័គ្រព្រះទ័យរបស់ព្រះយេស៊ូវគ្រីស្ទដើម្បីគោរពតាមព្រះវរបិតា គឺជារឿងសំខាន់ចំពោះភាពជោគជ័យក្នុងបេសកកម្មនៅលើផែនដីរបស់ទ្រង់ ? តើការគោរពប្រតិបត្តិសំខាន់ប៉ុណ្ណាដែរ ចំពោះជោគជ័យរបស់អ្នកនៅក្នុងជីវិតនេះ និងជីវិតបន្ទាប់ទៀត ?
-
តើគំរូរបស់ព្រះអង្គសង្គ្រោះស្ដីពីការគោរពប្រតិបត្តិ បំផុសគំនិត និងពង្រឹងអ្នកឲ្យកាន់តែចុះចូលតាមព្រះទ័យរបស់ព្រះវរបិតាសួគ៌ដោយរបៀបណា ?
ដើម្បីជួយសិស្សឲ្យយល់កាន់តែច្បាស់ពីអ្វីដែលពួកគេអាចសម្រេចបានតាមរយៈការគោរពប្រតិបត្តិផ្ទាល់ខ្លួនគេនោះ អ្នកអាចចែកចាយសេចក្ដីថ្លែងការណ៍ខាងក្រោមដោយអែលឌើរ ហ្វុន ជី ខីតឆ៍ ក្នុងពួកចិតសិបនាក់ ៖
ការគោរពប្រតិបត្តិពិត … គឺជាការថ្វាយខ្លួនយើងទាំងស្រុងដល់ [ ព្រះវរបិតាសួគ៌ ] ហើយអនុញ្ញាតឲ្យទ្រង់គូសផ្លូវឲ្យយើងដើរទាំងនៅក្នុងសមុទ្រដ៏ស្ងប់ និងសមុទ្រដែលមានរលកធំៗ ដោយយល់ដឹងថា ទ្រង់អាចធ្វើឲ្យយើងបានប្រសើរឡើងច្រើនជាងយើងធ្វើវាដោយខ្លួនឯង ។ …
… [ ព្រះបញ្ញត្តិទាំងឡាយ ] ជាគំនូសពីវិធីដែលយើងគួរធ្វើ—ហើយសំខាន់បំផុត វាបំភ្លឺថាយើងគួរក្លាយជាមនុស្សបែបណា ។ ( « Blessed and Happy Are Those Who Keep the Commandments of God » Liahona ខែ វិច្ឆិកា ឆ្នាំ ២០១៥ ទំព័រ ១១៧ )
-
តើអ្នកអាចធ្វើអ្វីខ្លះ ដើម្បីធ្វើតាមគំរូរបស់ព្រះអម្ចាស់ស្ដីពីការគោរពប្រតិបត្តិឲ្យបានកាន់តែពេញលេញ ? ( វាអាចមានប្រយោជន៍ដើម្បីឲ្យសិស្សមានពេលសញ្ជឹងគិត និងកត់ត្រាយោបល់ ព្រមទាំងអារម្មណ៍របស់ពួកគេ ) ។
សូមអញ្ជើញសិស្សឲ្យអាន នីហ្វៃទី១ ២:២០–២១ ហើយពិចារណាចែកចាយស្ថានភាពដូចខាងក្រោមនេះ ៖
ម៉ាសែល បានខកចិត្តនឹងសេចក្ដីសន្យាក្នុងព្រះគម្ពីរមរមនដែលថា អស់អ្នកដែលកាន់តាមព្រះបញ្ញត្តិទាំងឡាយរបស់ព្រះនឹងរីកចម្រើនឡើង ។ គាត់កាន់តាមព្រះបញ្ញត្តិទាំងឡាយយ៉ាងឧស្សាហ៍ព្យាយាម ប៉ុន្ដែនៅតែមានប្រាក់តិចតួចណាស់ ហើយពុះពារដើម្បីបង់ថ្លៃចំណាយរបស់គាត់រាល់ខែ ។ គាត់ពុំមានអារម្មណ៍ថាបានរីកចម្រើនខ្លាំងឡើយ ។
សូមឲ្យសិស្សរំឭកអ្វីដែលពួកគេបានរៀននៅក្នុង ផ្នែកទី ២ នៃឯកសាររៀបចំ ដែលអាចជួយ ម៉ាសែល ឲ្យពង្រីកការយល់ដឹងរបស់គាត់អំពីរបៀបខុសៗគ្នា ដែលព្រះអម្ចាស់អាចប្រទានការរីកចម្រើន និងពរជ័យដល់អស់អ្នកដែលកាន់តាមព្រះបញ្ញត្តិរបស់ទ្រង់ ។
-
តើអ្នកអាចចែកចាយអ្វីខ្លះជាមួយនឹង ម៉ាសែល ដើម្បីជួយគាត់ឲ្យពង្រីកការយល់ដឹងរបស់គាត់អំពីរបៀបខុសៗគ្នា ដែលយើងអាចរីកចម្រើន និងទទួលបានពរជ័យ នៅពេលយើងកាន់តាមព្រះបញ្ញត្តិរបស់ព្រះ ?
ដើម្បីធ្វើឲ្យការពិភាក្សារបស់អ្នកកាន់តែស៊ីជម្រៅ អ្នកអាចបង្ហាញវគ្គបទគម្ពីរដូចតទៅនេះ ហើយអញ្ជើញឲ្យសិស្សជ្រើសរើសយកបទគម្ពីរមួយ ឬពីរទៅសិក្សា ៖ នីហ្វៃទី១ ៣:៧; នីហ្វៃទី១ ១៧:៣; នីហ្វៃទី១ ២០:១៨; នីហ្វៃទី១ ២២:៣១; ម៉ូសាយ ២:៤១; អាលម៉ា ១២:៩–១០; អាលម៉ា ៥០:២២–២៣; នីហ្វៃទី៣ ១៤:២៤–២៥ ។
បន្ទាប់ពីសិស្សសិក្សាបទគម្ពីរដែលបានជ្រើសរើសរបស់ពួកគេរួចហើយ សូមបង្ហាញប្រយោគមិនពេញលេញដូចតទៅនេះ ហើយសូមឲ្យសិស្សចែកចាយពីរបៀបដែលពួកគេនឹងបំពេញប្រយោគនេះ ៖ នៅពេលខ្ញុំកាន់តាមព្រះបញ្ញត្តិទាំងឡាយរបស់ព្រះ …
ការអភិវឌ្ឍការបង្រៀន និងការរៀនសូត្ររបស់យើង
ថ្លែងទីបន្ទាល់ ។ សូមមើលវីដេអូ « Bearing Testimony » ( ១:៥៧ ) ហើយពិចារណាពីតួនាទីរបស់ទីបន្ទាល់នៅក្នុងថ្នាក់រៀនរបស់អ្នក ។ តើសិស្សរបស់អ្នកមានឱកាសថ្លែងទីបន្ទាល់ជាទៀងទាត់ អំពីរបៀបដែលសេចក្ដីពិតនៃដំណឹងល្អនៃព្រះយេស៊ូវគ្រីស្ទ បានមានឥទ្ធិពលលើជីវិតរបស់ពួកគេដែរឬទេ ? តើពួកគេបានស្ដាប់ឮ និងទទួលអារម្មណ៍ពីសាក្សីរបស់អ្នកអំពីដំណឹងល្អរបស់ព្រះអម្ចាស់ដែរឬទេ ? តើអ្នកអាចធ្វើអ្វីខ្លះបន្ថែមទៀត ដើម្បីបង្កើតឲ្យមានបរិយាកាសមួយដែលការចែកចាយទីបន្ទាល់គឺជារឿងធម្មតា និងជាផ្នែកសាមញ្ញមួយនៃបទពិសោធន៍រៀនសូត្រ ?
-
តើនៅពេលណាដែលអ្នក ឬនរណាម្នាក់ដែលអ្នកស្គាល់បានទទួលពរជ័យណាមួយ ដែលមាននៅក្នុងវគ្គបទគម្ពីរទាំងនេះ ដោយសារការកាន់តាមព្រះបញ្ញតិ្តរបស់ព្រះ ? ( អ្នកអាចលើកទឹកចិត្តសិស្សឲ្យចែកចាយអ្វីដែលពួកគេបានរៀន នៅពេលពួកគេពិភាក្សាពីសំណួរនេះជាមួយមិត្តភក្ដិ ឬសមាជិកគ្រួសារម្នាក់ពេលរៀបចំខ្លួនសម្រាប់ថ្នាក់ ) ។
កងពលកំលោះគោរពប្រតិបត្តិតាមដោយឥតល្អៀង ។
អ្នកអាចបង្ហាញរូបភាពដែលអមមកជាមួយនេះ ហើយអញ្ជើញសិស្សឲ្យតំណាលរឿងអំពីកងពលកំលោះទាំងនេះ ( សូមមើល ផ្នែកទី ៣ នៃឯកសាររៀបចំ ) ។
សូមអញ្ជើញសិស្សឲ្យរំឭក អាលម៉ា ៥៧:២១, ២៧; ៥៨:៤០ ហើយរកមើលអ្វីដែលវគ្គបទគម្ពីរទាំងនេះបង្រៀនយើងអំពីការគោរពប្រតិបត្តិ ។ សូមពិចារណាថាអ្នកអាចសួរសំណួរមួយណានៃសំណួរខាងក្រោមនេះ ដើម្បីជួយសិស្សរបស់អ្នកឲ្យរកឃើញអ្វីដែលពួកគេត្រូវរៀនចេញពីគំរូរបស់កងពលកំលោះទាំងនេះ ។
-
តើយើងអាចរៀនអ្វីខ្លះអំពីការគោរពប្រតិបត្តិចេញពីបទពិសោធន៍របស់កងពលកំលោះទាំងនេះ ? ( សិស្សអាចរកឃើញសេចក្ដីពិតមួយដែលស្រដៀងសេចក្តីពិតដូចនេះ ៖ នៅពេលយើងខិតខំគោរពតាមបទបញ្ជារបស់ព្រះដោយឥតល្អៀង ហើយដាក់ទីទុកចិត្តរបស់យើងលើទ្រង់យ៉ាងខ្ជាប់ខ្ជួន នោះទ្រង់នឹងប្រទានពរដល់យើង ) ។
-
តើអ្នកគិតថា ការខិតខំគោរពតាមដោយឥតល្អៀងមានន័យដូចម្ដេច ? តើការគោរពប្រតិបត្តិដោយឥតល្អៀងខុសពីការគោរពប្រតិបត្តិធម្មតាយ៉ាងដូចម្ដេច ? ( អ្នកអាចចង់រំឭក សេចក្ដីថ្លែងការណ៍ដោយប្រធាន រ័សុល អិម ណិលសុន នៅក្នុងផ្នែកទី ៣ នៃឯកសាររៀបចំ ។ ដោយផ្អែកលើការពិភាក្សារបស់អ្នក អ្នកក៏អាចពិចារណាចែកចាយសេចក្ដីថ្លែងការណ៍ដូចតទៅនេះដោយប្រធានណិលសុនបានដែរ ៖ « ការគោរពប្រតិបត្តិនាំមកនូវជោគជ័យ គោរពប្រតិបត្តិដោយឥតល្អៀង នាំមកនូវអព្ភូតហេតុ » [ នៅក្នុង R. Scott Lloyd « Elder Nelson Delivers Spiritual Thanksgiving Feast to MTCs » Church News នៅថ្ងៃទី ៤ ខែ ធ្នូ ឆ្នាំ ២០១៣ នៅលើគេហទំព័រ ChurchofJesusChrist.org ] ) ។
-
តើអ្នកត្រូវធ្វើតាមការបង្រៀន ឬព្រះបញ្ញត្តិអ្វីខ្លះឲ្យកាន់តែឥតល្អៀងនោះ ? ( សូមអញ្ជើញសិស្សឲ្យសញ្ជឹងគិតដោយស្ងាត់ស្ងៀមអំពីសំណួរនេះ ហើយពិចារណាសរសេរផែនការមួយអំពីអ្វីដែលពួកគេអាចធ្វើបាន ដើម្បីសម្រេចឲ្យបានការផ្លាស់ប្ដូរនេះ ) ។
-
ហេតុអ្វីបានជាវាសំខាន់ដើម្បីពឹងផ្អែកលើព្រះចេស្ដានៃដង្វាយធួនរបស់ព្រះអង្គសង្គ្រោះដែលធ្វើឲ្យកើតមានឡើង នៅពេលយើងខិតខំគោរពតាមព្រះបញ្ញត្តិទាំងឡាយរបស់ព្រះដោយឥតល្អៀងនោះ ? ( វាអាចមានប្រយោជន៍ដើម្បីរំឭក សេចក្ដីថ្លែងការណ៍ទីពីរដោយអែលឌើរ ដេវីឌ អេ បែដណា នៅក្នុងផ្នែកទី ៣ នៃឯកសាររៀបចំ ) ។ តើនៅពេលណាដែលអ្នកមានអារម្មណ៍ថា ព្រះចេស្ដាឲ្យកើតមានឡើងរបស់ព្រះអង្គសង្គ្រោះបានជួយអ្នកឲ្យកាន់តែគោរពប្រតិបត្តិតាមព្រះបញ្ញតិ្តទាំងឡាយរបស់ព្រះ ?
ដើម្បីជួយសិស្សឲ្យវាយតម្លៃអ្វីដែលពួកគេបានរៀនអំពីការគោរពប្រតិបត្តិ សូមពិចារណាពិភាក្សាគ្នាអំពីស្ថានភាពខាងក្រោមនេះ ៖
ម៉ារីអា និង ហ្វ្រានស៊ីសកូ បានភ្ជាប់ពាក្យនាពេលថ្មីៗនេះ ហើយបានកំណត់ថ្ងៃរៀបការរួចហើយ ។ ឥឡូវនេះ ដោយសារពួកគេបានធ្វើការតាំងចិត្តដើម្បីរៀបការ នោះពួកគេកាន់តែធូររលុងខ្លាំងឡើងនឹងការកាន់តាមច្បាប់ព្រហ្មចារីភាព ។ ពួកគេមានអារម្មណ៍ថា វាមិនអីទេដែល « មិនសូវគោរពតាមច្បាប់នេះ » ដោយសារពួកគេស្រឡាញ់គ្នា ហើយបានតាំងចិត្តថានឹងរៀបការជាមួយគ្នា ។
-
ដោយផ្អែកលើអ្វីដែលអ្នកបានរៀនអំពីការគោរពប្រតិបត្តិតាមព្រះបញ្ញត្តិទាំងឡាយរបស់ព្រះ តើអ្នកនឹងផ្ដល់ដំបូន្មានអ្វីខ្លះទៅកាន់ម៉ារីអា និង ហ្វ្រានស៊ីសកូ ?
-
តើការគោរពប្រតិបត្តិដោយឥតល្អៀងអាចប្រទានពរ ដឹកនាំ និងការពារ ម៉ារីអា និង ហ្វ្រានស៊ីសកូ នៅពេលពួកគេរៀបចំខ្លួនសម្រាប់អាពាហ៍ពិពាហ៍នាពេលខាងមុខរបស់ពួកគេដោយរបៀបណា ?
សម្រាប់ពេលក្រោយ
សូមចង្អុលបង្ហាញថា នៅអំឡុងមេរៀនក្រោយ យើងនឹងរៀនអំពីសេវកភាពនៃប្រជាជនរបស់លិមហៃ និងប្រជាជនរបស់អាលម៉ា ។ សូមលើកទឹកចិត្តសិស្សឲ្យបញ្ចប់ការសិក្សាក្នុង ឯកសាររៀបចំសម្រាប់មេរៀនលើកក្រោយ ហើយរកមើលរបៀបដែលការដោះលែងប្រជាជនទាំងនេះអាចកើតឡើងបាន តែនៅពេលពួកគេបានដាក់ទីទុកចិត្តរបស់ពួកគេទាំងស្រុងលើព្រះអម្ចាស់ប៉ុណ្ណោះ ។