« មេរៀនទី ១៩ ឯកសារគ្រូបង្រៀន ៖ ការរស់នៅដោយសុចរិតនៅក្នុងគ្រានៃភាពទុច្ចរិត » ការបង្រៀន និងគោលលទ្ធិនៃព្រះគម្ពីរមរមន ឯកសារគ្រូបង្រៀន ( ឆ្នាំ ២០២១ )
« មេរៀនទី ១៩ ឯកសារគ្រូបង្រៀន » ការបង្រៀន និងគោលលទ្ធិនៃព្រះគម្ពីរមរមន ឯកសារគ្រូបង្រៀន
មេរៀនទី ១៩ ឯកសារគ្រូបង្រៀន
ការរស់នៅដោយសុចរិតនៅក្នុងគ្រានៃភាពទុច្ចរិត
ប្រធាន រ័សុល អិម ណិលសុន បានសង្កេតឃើញថា « ព្រះគម្ពីរមរមនបញ្ជាក់ពីការបង្រៀនរបស់លោកចៅហ្វាយ ហើយបង្ហាញពីយុទ្ធសាស្ត្ររបស់មារសត្រូវ » ( « The Book of Mormon: What Would Your Life Be Like without It? » Ensign ឬ Liahona ខែ វិច្ឆិកា ឆ្នាំ ២០១៧ ទំព័រ ៦២; សូមមើលផងដែរ នីហ្វៃទី២ ២៦–៣៣ ) ។ ជំពូកទី ៦ នឹងជួយសិស្សឲ្យស្គាល់យុទ្ធសាស្ដ្ររបស់សាតាំងកាន់តែច្បាស់ ហើយកំណត់ពីអ្វីដែលពួកគេអាចធ្វើបាន ដើម្បីពង្រឹងខ្លួនគេប្រឆាំងនឹងផែនការដ៏អាក្រក់របស់សាតាំង ។ នៅក្នុងមេរៀននេះ សិស្សនឹងកំណត់ពីអ្វីដែលពួកគេអាចធ្វើបានដើម្បីបន្ដនៅរឹងមាំ ពេលពួកគេប្រឈមមុខនឹងការបៀតបៀន និងអ្វីដែលពួកគេអាចធ្វើបានដើម្បីរស់នៅដោយសុចរិតនៅក្នុងពិភពលោកមួយដែលពោរពេញទៅដោយភាពទុច្ចរិត ។
យោបល់សម្រាប់ការបង្រៀន
ការអភិវឌ្ឍការបង្រៀន និងការរៀនសូត្ររបស់យើង
សូមប្រើប្រាស់ស្ថានភាពជាក់ស្ដែង ។ នៅពេលសិស្សឃើញភាពទាក់ទងគ្នារវាងជីវិតរបស់ពួកគេផ្ទាល់ និងអ្វីដែលពួកគេកំពុងសិក្សានៅក្នុងបទគម្ពីរ នោះពួកគេនឹងរៀបចំខ្លួនបានកាន់តែប្រសើរ ដើម្បីកោតសរសើរដល់ភាពទាក់ទងគ្នានៃព្រះបន្ទូលរបស់ព្រះ ហើយឃើញពីរបៀបដែលព្រះបន្ទូលនេះអាចដឹកនាំទៅរកសកម្មភាពដ៏មានប្រសិទ្ធភាព និងសុចរិត ។ ស្ថានភាពនានាដែលបង្ហាញពីស្ថានភាពជីវិតពិត ហើយឆ្លើយនឹងសំណួរ កង្វល់ ក៏ដូចជាឧបសគ្គជាក់ស្ដែងដែលសិស្សប្រឈម អាចជួយសិស្សឲ្យភ្ជាប់ជីវិតរបស់ពួកគេទៅនឹងគោលលទ្ធិ ព្រមទាំងគោលការណ៍ទាំងឡាយដែលមាននៅក្នុងព្រះបន្ទូលរបស់ព្រះ ។ ស្ថានភាពជាក់ស្ដែងក៏អាចជួយសិស្សឲ្យស្វែងយល់ដោយខ្លួនគេថា ពេលខ្លះជីវិតគឺសាំញ៉ាំ ហើយវាមិនងាយរកឃើញចម្លើយជានិច្ចនោះទេ ។
អ្នកដើរតាមដ៏សុចរិតរបស់ព្រះយេស៊ូវគ្រីស្ទ ត្រូវបានពង្រឹងឡើងនៅពេលមានការបៀតបៀន ។
ដើម្បីចាប់ផ្ដើមមេរៀន សូមពិចារណាចែកចាយស្ថានភាពខាងក្រោមនេះ ឬស្ថានភាពទាក់ទងមួយទៀតដែលអ្នកអាចគិតដល់ ។
អាខារី គឺជាសមាជិកម្នាក់ដែលទើបតែបានទទួលបុណ្យជ្រមុជទឹកថ្មីៗនៅក្នុងសាសនាចក្រ ។ ឪពុកម្ដាយរបស់នាងលែងទទួលស្គាល់នាង នៅពេលនាងបានជ្រមុជទឹក ។ ដំបូង គ្រប់គ្នានៅក្នុងវួដរបស់នាងរួសរាយរាក់ទាក់ណាស់ ។ ប៉ុន្ដែ ថ្មីៗនេះមានសមាជិកមួយចំនួនបាននិយាយពាក្យមិនល្អខ្លះអំពីអតីតកាលរបស់អាខារី ហើយថែមទាំងបានសើចចំអកដាក់នាង ដោយសារតែការអន្ទះសាដើម្បីរស់នៅតាមដំណឹងល្អរបស់នាងទៀតផង ។ នាងចង់ធ្វើជាសមាជិកដ៏ស្មោះត្រង់ម្នាក់នៅក្នុងសាសនាចក្រ ប៉ុន្ដែមានអារម្មណ៍បាក់ទឹកចិត្តយ៉ាងខ្លាំង ។
-
ហេតុអ្វីវាអាចជាការប្រឈមដ៏លំបាកមួយចំពោះ អាខារី ដែលត្រូវសមាជិកសាសនាចក្រដូចគ្នា ធ្វើការបៀតបៀនបែបនេះ ?
-
ប្រសិនបើអាខារីបានមកជួបអ្នកដើម្បីសូមជំនួយ តើអ្នកនឹងនិយាយ ឬធ្វើអ្វីខ្លះ ?
សូមរំឭកសិស្សថា នៅក្នុង ហេលេមិន ៣:២៤–៣៤ យើងអានថា ប្រជាជនរាប់ពាន់នាក់បានចូលរួមក្នុងសាសនាចក្រ ហើយប្រជាជនបានរីកចម្រើនឡើងយ៉ាងខ្លាំង ។ ប៉ុន្ដែនៅទីបំផុត សេចក្ដីឆ្មើងឆ្មៃបានជ្រាបចូលក្នុងដួងចិត្តរបស់សមាជិកសាសនាចក្រមួយចំនួន ដែលបានចាប់ផ្ដើមបៀតបៀនអស់អ្នកដែលបានបន្ដរាបសា និងស្មោះត្រង់ ។
សូមអញ្ជើញសិស្សឲ្យរំឭក ហេលេមិន ៣:៣៣–៣៥ ហើយរកមើលអ្វីដែលបានជួយសមាជិកសាសនាចក្រដែលរាបសាទាំងនោះ ឲ្យឈរយ៉ាងរឹងមាំកាលប្រឈមមុខនឹងការបៀតបៀន ។ សូមពិចារណាថា តើអ្នកអាចសួរសំណួរខាងក្រោមមួយណា ដើម្បីជួយបំផុសដល់ការរៀនសូត្ររបស់សិស្សអ្នកបានល្អបំផុត ៖
-
តើការបង្រៀនអ្វីខ្លះនៅក្នុងខគម្ពីរទាំងនេះដែលអាចជួយដល់ អាខារី ឬនរណាម្នាក់ដែលស្ថិតក្នុងស្ថានភាពស្រដៀងគ្នាដូច្នេះ ? ( អ្នកអាចសរសេរសេចក្ដីពិតមួយចំនួនដែលសិស្សរកឃើញដូចតទៅនេះ ៖ នៅពេលយើងតមអាហារ អធិស្ឋាន និងសម្របដួងចិត្តរបស់យើងតាមព្រះ នោះការបន្ទាបខ្លួន និងសេចក្ដីជំនឿរបស់យើងលើព្រះយេស៊ូវគ្រីស្ទនឹងរីកដុះដាលកាន់តែខ្លាំងឡើង ហើយដួងចិត្តរបស់យើងនឹងត្រូវបានបន្សុទ្ធ—មិនថាមនុស្សដទៃមានអាកប្បកិរិយាអាក្រក់បែបណានោះទេ ) ។
-
តើការតមអាហារ ការអធិស្ឋាន និងការសម្របដួងចិត្តរបស់អ្នកតាមព្រះ បានមានឥទ្ធិពលលើសេចក្ដីជំនឿរបស់អ្នកលើព្រះយេស៊ូវគ្រីស្ទដោយរបៀបណា ? (សូមមើល ហេលេមិន ៣:៣៥ ) ។ តើសកម្មភាពសុចរិតទាំងនេះបានជួយអ្នក នៅពេលអ្នកប្រឈមមុខនឹងអាកប្បកិរិយាអាក្រក់របស់មនុស្សដទៃដោយរបៀបណា ?
សូមពិចារណាបង្ហាញសំណួរខាងក្រោមនេះ ហើយឲ្យសិស្សមានពេលផ្ទាល់ខ្លួនខ្លះៗដើម្បីវាយតម្លៃពីសំណួរមួយ ឬច្រើន ហើយដាក់ផែនការមួយស្ដីពីរបៀបដែលពួកគេនឹងឆ្លើយតបចំពោះការបំផុសគំនិតណាមួយដែលពួកគេទទួលបាន ៖
-
តើអ្នកធ្វើបានល្អប៉ុណ្ណាដែរ នៅក្នុងការស្វាគមន៍ និងការរាប់អានមនុស្សដទៃក្នុងសាសនាចក្រនៃព្រះយេស៊ូវគ្រីស្ទ ?
-
តើអ្នកធ្វើបានល្អប៉ុណ្ណាដែរ នៅក្នុងការសម្របដួងចិត្តរបស់អ្នកតាមព្រះ ?
-
មិនថាមនុស្សដទៃមានអាកប្បកិរិយាអាក្រក់បែបណានោះទេ តើអ្នកអាចបង្កើនសេចក្ដីជំនឿរបស់អ្នកលើព្រះយេស៊ូវគ្រីស្ទដោយរបៀបណា ?
សូមចែកចាយទីបន្ទាល់របស់អ្នក ឬអញ្ជើញសិស្សម្នាក់ឲ្យថ្លែងទីបន្ទាល់អំពីអំណាចដែលកើតមាន នៅពេលយើងធ្វើសកម្មភាពដោយសេចក្ដីជំនឿ និងសម្របដួងចិត្តរបស់យើងតាមព្រះ ។
នៅពេលពួកសាសន៍នីហ្វៃបានទុំក្នុងសេចក្ដីទុច្ចរិត នោះមរមន និងមរ៉ូណៃបានបន្ដនៅស្មោះត្រង់ចំពោះព្រះអម្ចាស់ ។
សូមអញ្ជើញសិស្សឲ្យចែករំលែកឧទាហរណ៍នានាអំពីដំណើររឿងក្នុងសារព័ត៌មាន ទំនោរវប្បធម៌ ព្រមទាំងប្រធានបទនៃការសន្ទនាផ្សេងៗនៅលើប្រព័ន្ធផ្សព្វផ្សាយសង្គម ដែលអាចធ្វើឲ្យវាពិបាកដើម្បីរស់នៅតាមដំណឹងល្អនៅជំនាន់របស់យើង ។
-
តើមានកាលៈទេសៈអ្វីខ្លះ ដែលធ្វើឲ្យពិបាកដើម្បីរស់នៅតាមដំណឹងល្អនៅជំនាន់របស់មរមន និងកូនប្រុសរបស់លោកមរ៉ូណៃ ? ( ប្រសិនបើចាំបាច់ សូមអញ្ជើញសិស្សឲ្យរំឭក ផ្នែកទី ២ នៃឯកសាររៀបចំ ឬអានត្រួសៗក្នុងក្បាលជំពូក មរមន ១–៦ និង មរ៉ូណៃ ៩ ) ។
-
តើអ្នកស្រមៃថា វាអាចមានសភាពយ៉ាងណាទៅដើម្បីរស់នៅក្នុងជំនាន់របស់មរមន និងមរ៉ូណៃនោះ ?
សូមអញ្ជើញសិស្សឲ្យរំឭក មរមន ១:១–២, ១៥ និង មរ៉ូណៃ ៩:២៥–២៦ ហើយរកមើលមូលហេតុមួយចំនួនដែលមរមន និងមរ៉ូណៃអាចបន្ដនៅស្មោះត្រង់ចំពោះព្រះអម្ចាស់បាន កាលពួកលោកបានតស៊ូនឹងសង្គមមួយដែលពោរពេញដោយភាពទុច្ចរិតនោះ ។
-
តើមានគោលការណ៍អ្វីខ្លះ ដែលយើងអាចរៀនមកពីខគម្ពីរទាំងនេះ អំពីរបៀបដើម្បីបន្ដនៅស្មោះត្រង់ចំពោះព្រះអម្ចាស់នៅក្នុងគ្រានៃភាពទុច្ចរិត ? ( សូមជួយសិស្សឲ្យកំណត់គោលការណ៍មួយស្រដៀងគោលការណ៍ដូចតទៅនេះ ៖ យើងអាចយកឈ្នះលើភាពទុច្ចរិតនៃពិភពលោកនេះបាន នៅពេលយើងទទួលបានសេចក្ដីល្អនៃព្រះយេស៊ូវគ្រីស្ទ ហើយបន្ដស្មោះត្រង់ចំពោះទ្រង់ ) ។
-
តើអ្នកគិតថាវាមានន័យដូចម្ដេច ដើម្បីទទួលបានសេចក្ដីល្អនៃព្រះយេស៊ូវគ្រីស្ទ ?
-
តើការមើលទៅព្រះយេស៊ូវគ្រីស្ទ និងការទទួលបានសេចក្ដីល្អរបស់ទ្រង់អាចជួយយើងឲ្យបន្ដនៅសុចរិត នៅពេលអំពើទុច្ចរិតហ៊ុមព័ទ្ធយើងដោយរបៀបណា ? ( អ្នកអាចអញ្ជើញឲ្យសិស្សរំឭកសេចក្ដីថ្លែងការណ៍ដោយ ប្រធាន ចយ ឌី ចូនស៍ និង អែលឌើរ នែល អិល អាន់ឌើរសិន នៅក្នុងផ្នែកទី ២ នៃឯកសាររៀបចំ ) ។
-
តើទីបន្ទាល់របស់អ្នកអំពីសេចក្ដីល្អរបស់ព្រះយេស៊ូវគ្រីស្ទ និងសេចក្ដីជំនឿរបស់អ្នកលើទ្រង់បានជួយអ្នកឲ្យធ្វើការជ្រើសរើសសុចរិត នៅពេលអ្នកប្រឈមនឹងភាពទុច្ចរិតដោយរបៀបណា ?
សូមរំឭកសិស្សថា នៅក្នុង ផ្នែកទី ២ នៃឯកសាររៀបចំ ពួកគេត្រូវបានអញ្ជើញឲ្យកំណត់បុគ្គលម្នាក់ ឬមនុស្សមួយក្រុមនៅក្នុងព្រះគម្ពីរមរមន ឬនរណាម្នាក់ដែលពួកគេស្គាល់ច្បាស់ ដែលបានប្រឈមនឹងភាពទុច្ចរិត ហើយបន្ដនៅស្មោះត្រង់ដដែល ។ ( ប្រសិនបើចាំបាច់ សូមផ្ដល់ពេលឲ្យសិស្សរំឭកនូវអ្វីដែលពួកគេបានកត់ត្រាទុក ) ។ ដោយផ្អែកលើទំហំថ្នាក់របស់អ្នក សូមជ្រើសរើសវិធីសាស្ដ្រមួយដែលនឹងផ្ដល់ឱកាសឲ្យសិស្សម្នាក់ៗបានចែកចាយឧទាហរណ៍របស់ពួកគេ ។
សូមដាក់បង្ហាញសំណួរខាងក្រោម ៖
-
យោងតាមអ្វីដែលអ្នកបានរៀនសូត្រ និងមានអារម្មណ៍នៅថ្ងៃនេះ តើអ្នកនឹងធ្វើអ្វីខ្លះ ដើម្បីបង្កើនសមត្ថភាពរបស់អ្នកដើម្បីឈរយ៉ាងរឹងមាំក្នុងការប្ដេជ្ញាចិត្តរបស់អ្នកចំពោះព្រះអម្ចាស់ នៅពេលអ្នកប្រឈមមុខនឹងអំពើទុច្ចរិតនៃពិភពលោកនេះ ? ( សូមលើកទឹកចិត្តសិស្សឲ្យកត់ត្រាការបំផុសគំនិតនានា ដែលពួកគេទទួលបានពីព្រះវិញ្ញាណបរិសុទ្ធ ហើយធ្វើសកម្មភាពតាមការបំផុសគំនិតទាំងនោះ ) ។
សម្រាប់ពេលក្រោយ
សូមចែកចាយសម្ដីដកស្រង់នេះមកពីព្យាការី យ៉ូសែប ស៊្មីធ ៖ « វាគឺជាសេចក្ដីស្រឡាញ់សេរីភាពមួយ ដែលបំផុសគំនិតដល់ព្រលឹងរបស់ខ្ញុំ—សេរីភាពខាងស៊ីវិល និងខាងសាសនា ដល់ជាតិសាសន៍មនុស្សលោកទាំងមូល » ( Teachings of Presidents of the Church: Joseph Smith [ ឆ្នាំ ២០០៧ ] ទំព័រ ៣៤៥ ) ។ នៅពេលសិស្សសិក្សាឯកសាររៀបចំសម្រាប់មេរៀនក្រោយ សូមអញ្ជើញពួកគេសញ្ជឹងគិតពីអត្ថន័យនៃសេរីភាពខាងសាសនាចំពោះពួកគេ ហើយមករៀនដោយបានរៀបចំខ្លួនដើម្បីពិភាក្សាពីអ្វីដែលពួកគេអាចធ្វើបាន ដើម្បីជួយលើកស្ទួយ ឬរក្សាសេរីភាពនោះ ។