« មេរៀនទី ១៨ ឯកសាររៀបចំសម្រាប់ថ្នាក់ ៖ ការក្លាយដូចជាព្រះវរបិតាសួគ៌ និងព្រះយេស៊ូវគ្រីស្ទ » ការបង្រៀន និងគោលលទ្ធិនៃព្រះគម្ពីរមរមន ឯកសារគ្រូបង្រៀន ( ឆ្នាំ ២០២១ )
« មេរៀនទី ១៨ ឯកសាររៀបចំសម្រាប់ថ្នាក់ » ការបង្រៀន និងគោលលទ្ធិនៃព្រះគម្ពីរមរមន ឯកសារគ្រូបង្រៀន
មេរៀនទី ១៨ ឯកសាររៀបចំសម្រាប់ថ្នាក់
ការក្លាយដូចជាព្រះវរបិតាសួគ៌ និងព្រះយេស៊ូវគ្រីស្ទ
អំឡុងការងារបម្រើរបស់ទ្រង់ដល់ពួកសាសន៍នីហ្វៃ និងពួកសាសន៍លេមិន ព្រះយេស៊ូវបានមានបន្ទូលសួរពួកសិស្សដប់ពីរនាក់របស់ទ្រង់ថា «តើអ្នករាល់គ្នាគួរធ្វើជាមនុស្សបែបណាទៅ » ? ( នីហ្វៃទី៣ ២៧:២៧ ) ។ ប្រសិនបើព្រះអម្ចាស់សួរអ្នកនូវសំណួរនេះ តើអ្នកនឹងឆ្លើយតបយ៉ាងដូចម្តេច ? តើអ្នកអាចសម្រេចបានសក្ដានុពលដ៏ពេញលេញរបស់អ្នកតាមរបៀបណា ? នៅពេលអ្នករៀបចំខ្លួនសម្រាប់ថ្នាក់រៀន សូមពិចារណាពីរបៀបដែលការបង្រៀនរបស់ព្រះអង្គសង្គ្រោះ អាចជួយអ្នកឲ្យឆ្លើយនឹងសំណួរទាំងនេះ ។ សូមជ្រើសរើសអ្វីមួយជាក់លាក់ ដែលអ្នកអាចធ្វើបានដើម្បីក្លាយកាន់តែដូចជាទ្រង់ ។
ផ្នែកទី ១
តើខ្ញុំពិតជាអាចក្លាយដូចជាព្រះវរបិតាសួគ៌ និងព្រះយេស៊ូវគ្រីស្ទមែនឬ ?
យើងអាននៅក្នុងព្រះគម្ពីរសញ្ញាថ្មីអំពីការធ្វើទេសនកថានៅលើភ្នំរបស់ព្រះយេស៊ូវដែលរួមមានការបង្រៀន ដែលនឹងជួយដល់ពួកសិស្សរបស់ទ្រង់ឲ្យបានឥតខ្ចោះនៅទីបញ្ចប់ ( សូមមើល ម៉ាថាយ ៥–៧ ) ។ បន្ទាប់ពីការមានព្រះជន្មរស់ឡើងវិញរបស់ទ្រង់ ព្រះយេស៊ូវបានបង្ហាញព្រះកាយនៅដែនដីបរិបូរណ៍ និងបានថ្លែងទេសនកថាស្រដៀងគ្នាមួយ ( សូមមើល នីហ្វៃទី៣ ១២–១៤ ) ។
នៅពេលទ្រង់ជិតថ្លែងសារលិខិតទៅកាន់ប្រជាជន ព្រះយេស៊ូវបានថ្លែងទីបន្ទាល់ថា អស់អ្នកដែល « ស្ដាប់បង្គាប់តាមពាក្យសម្ដី » នៃពួកសិស្សដប់ពីរនាក់ដ៏ជម្រើសរបស់ទ្រង់នឹងមានពរជ័យ ( នីហ្វៃទី៣ ១២:១ ) ។ ទ្រង់បានបង្រៀនពីបទបង្រៀនទាំងឡាយ បានប្រកាសថាទ្រង់បានបំពេញនូវក្រិត្យវិន័យរបស់ម៉ូសេ ហើយបានប្រទានក្រិត្យវិន័យខ្ពស់ជាងនៃដំណឹងល្អ ។
ការសិក្សានៅក្នុងការរៀបចំសម្រាប់ថ្នាក់
សូមអាន នីហ្វៃទី៣ ១២:១៩–២០, ៤៦–៤៨ ដោយរកមើលថាតើយើងអាចក្លាយទៅជាអ្វី នៅពេលយើងមករកព្រះគ្រីស្ទ ហើយខិតខំរស់នៅតាមក្រិត្យវិន័យខ្ពស់ជាងរបស់ទ្រង់នោះ ។
មនុស្សមួយចំនួនអាចមានអារម្មណ៍ភាន់ច្រឡំ ឬព្រួយបារម្ភ ព្រោះបទបញ្ញត្តិរបស់ព្រះអង្គសង្គ្រោះត្រូវធ្វើឲ្យបានល្អឥតខ្ចោះ ។ វាអាចមានអត្ថប្រយោជន៍ដើម្បីដឹងថា នៅក្នុងព្រះគម្ពីរ ពាក្យល្អឥតខ្ចោះអាចមានន័យថា « ដែលបានទៅជាគ្រប់ ពេញ និងពេញលេញ សុចរិតទាំងស្រុង » ហើយថា « ពួកអ្នកដើរតាមដ៏ពិតរបស់ព្រះគ្រីស្ទ អាចក្លាយទៅជាល្អឥតខ្ចោះបាន តាមរយៈព្រះគុណ និងដង្វាយធួនរបស់ទ្រង់ » ( សេចក្ដីណែនាំដល់បទគម្ពីរទាំងឡាយ « ល្អឥតខ្ចោះ » នៅលើគេហទំព័រ scriptures.ChurchofJesusChrist.org ) ។
ការសិក្សានៅក្នុងការរៀបចំសម្រាប់ថ្នាក់
សូមអាន មរ៉ូណៃ ១០:៣២–៣៣ ហើយរកមើលរបៀបដែលភាពល្អឥតខ្ចោះតម្រូវឲ្យមានទាំងកិច្ចខិតខំរបស់យើងផង និងព្រះគុណរបស់ព្រះអម្ចាស់ផង ។
របៀបមួយដើម្បីផ្ដល់និយមន័យដល់ពាក្យព្រះគុណគឺដូចនេះ ៖ « ពាក្យព្រះគុណ ដូចដែលបានប្រើនៅក្នុងព្រះគម្ពីរ សំដៅជាចម្បងទៅលើអំណាចដែលធ្វើឲ្យកើតមាន និងការព្យាបាលខាងវិញ្ញាណ ដែលបានប្រទានតាមរយៈសេចក្ដីមេត្តាករុណា និងសេចក្ដីស្រឡាញ់របស់ព្រះយេស៊ូវគ្រីស្ទ ។ … ដើម្បីទទួលបានអំណាចដែលធ្វើឲ្យកើតមាននេះ យើងត្រូវតែគោរពតាមដំណឹងល្អនៃព្រះយេស៊ូវគ្រីស្ទ ។ … ព្រះអម្ចាស់បានសន្យាថា ប្រសិនបើយើងបន្ទាបខ្លួនយើងនៅចំពោះព្រះភក្រ័្ដទ្រង់ ហើយមានសេចក្ដីជំនឿលើទ្រង់ នោះព្រះគុណរបស់ទ្រង់នឹងជួយយើងឲ្យយកឈ្នះលើភាពទន់ខ្សោយផ្ទាល់ខ្លួនរបស់យើងទាំងអស់ ( សូមមើល អេធើរ ១២:២៧ ) » ( « Grace » Gospel Topics នៅលើគេហទំព័រ topics.ChurchofJesusChrist.org ) ។
អែលឌើរ ជែហ្វ្រី អ័រ ហូឡិន ក្នុងកូរ៉ុមពួកសាវកដប់ពីរនាក់បានបង្រៀន ៖
ក្ដីសង្ឃឹមតែមួយគត់របស់យើងសម្រាប់ភាពល្អឥតខ្ចោះពិត គឺក្នុងការទទួលវាជាអំណោយទានមួយមកពីស្ថានសួគ៌—យើងពុំអាច « រក » វាបានឡើយ ។ ហេតុដូច្នេះហើយ ព្រះគុណនៃព្រះគ្រីស្ទ ដែលបានប្រទានដល់ពួកយើង ពុំគ្រាន់តែសង្គ្រោះពីភាពសោកសៅ និងអំពើបាប និងសេចក្ដីស្លាប់ប៉ុណ្ណោះទេ ប៉ុន្ដែក៏សង្គ្រោះពីការរិះគន់ខ្លួនឯងជាប្រចាំផងដែរ ។ …
… ប្រសិនយើងស៊ូទ្រាំ កន្លែងចម្រាញ់យើងនឹងត្រូវបានបញ្ចប់ ហើយបំពេញនៅក្នុងភាពអស់កល្បជានិច្ច ។ …
… ខ្ញុំថ្លែងទីបន្ទាល់ថា នៅក្នុងម៉ោងនេះ និងគ្រប់ម៉ោង ទ្រង់កំពុងលាតព្រះហស្តដែលមានស្នាមដែកគោលមកកាន់យើង ដោយព្រះគុណដូចគ្នានោះ កំពុងកាន់យើងយ៉ាងជាប់ ហើយលើកទឹកចិត្តយើង បដិសេធមិនបោះបង់យើងចោលឡើយ រហូតដល់យើងទៅដល់ផ្ទះដោយសុវត្ថិភាពនៅក្នុងការឱបក្រសោបនៃបិតាមាតាសួគ៌ ។ ( « Be Ye Therefore Perfect—Eventually » Liahona ខែ វិច្ឆិកា ឆ្នាំ ២០១៧ ទំព័រ ៤១, ៤២ )
សញ្ជឹងគិតនៅក្នុងការរៀបចំសម្រាប់ថ្នាក់
តើវាមានន័យយ៉ាងណាចំពោះអ្នកដែលដឹងថា ព្រះយេស៊ូវគ្រីស្ទកំពុងសន្ធឹងព្រះគុណរបស់ទ្រង់មកកាន់អ្នក ហើយបានរៀបចំផ្លូវមួយឲ្យអ្នកដើម្បីក្លាយដូចជាទ្រង់ និងព្រះវរបិតារបស់ទ្រង់ ?
ផ្នែកទី ២
តើខ្ញុំអាចធ្វើអ្វីខ្លះ ដើម្បីក្លាយកាន់តែដូចជាព្រះយេស៊ូវគ្រីស្ទ ?
កាលព្រះយេស៊ូវបានបន្ដបង្រៀនពួកសាសន៍នីហ្វៃ នោះទ្រង់បានចែកចាយពីគោលការណ៍ដ៏ជ្រាលជ្រៅ ស្ដីពីរបៀបដើម្បីរស់នៅតាមក្រិត្យវិន័យខ្ពស់ជាងនៃដំណឹងល្អរបស់ទ្រង់ ។ ប្រធាន ហារ៉ូល ប៊ី លី បានថ្លែង ៖
ព្រះគ្រីស្ទមិនត្រឹមតែបានយាងមកពិភពលោកនេះដើម្បីធ្វើដង្វាយធួនសម្រាប់អំពើបាបនៃមនុស្សលោកនោះទេ ប៉ុន្ដែទ្រង់ថែមទាំងបានធ្វើជាគំរូមួយដល់ពិភពលោកនេះផងដែរ អំពីបទដ្ឋាននៃភាពល្អឥតខ្ចោះនៃក្រិត្យវិន័យរបស់ព្រះ និងការគោរពប្រតិបត្តិដល់ព្រះវរបិតា ។ នៅក្នុងទេសនកថារបស់ទ្រង់នៅលើភ្នំ លោកចៅហ្វាយបានប្រទានដល់យើងនូវវិវរណៈមួយបែបអំពីបុគ្គលិកលក្ខណៈរបស់ទ្រង់ផ្ទាល់ ដែលល្អឥតខ្ចោះ … ហើយពេលធ្វើដូច្នោះ ទ្រង់បានប្រទានដល់យើងនូវប្លង់មេមួយសម្រាប់ជីវិតរបស់យើងផ្ទាល់ ។( Decisions for Successful Living [ ឆ្នាំ ១៩៧៣ ] ទំព័រ ៥៥–៥៦ )
ការសិក្សានៅក្នុងការរៀបចំសម្រាប់ថ្នាក់
នៅទីបញ្ចប់ ការខិតខំរស់នៅតាមការបង្រៀនទាំងនេះនឹងជួយពួកយើងម្នាក់ៗឲ្យបានល្អឥតខ្ចោះ ដូចជាព្រះអង្គសង្គ្រោះដែរ ។ សូមរំឭកដោយសង្ខេបក្នុងបញ្ជីប្រធានបទខាងក្រោមនេះដែលមាននៅក្នុង នីហ្វៃទី៣ ១២–១៤ ហើយកំណត់គុណលក្ខណៈមួយ ឬពីរដែលអ្នកចង់អភិវឌ្ឍ ។
ក្រោយពីជ្រើសរើសប្រធានបទរបស់អ្នកហើយ សូមសិក្សាដោយប្រុងប្រយ័ត្ន ហើយសញ្ជឹងគិតពីវគ្គបទគម្ពីរដែលទាក់ទងទាំងនេះ ។ ដើម្បីធ្វើឲ្យការយល់ដឹងរបស់អ្នកអំពីប្រធានបទនេះកាន់តែស៊ីជម្រៅ សូមពិចារណារកមើលសេចក្ដីយោងឆ្លងវគ្គ សម្រាប់ខគម្ពីរដែលអ្នកកំពុងសិក្សា ។
-
គុណលក្ខណៈដូចព្រះគ្រីស្ទ ( បទបង្រៀនទាំងឡាយ ) ( នីហ្វៃទី៣ ១២:៣–១២ )
-
កំហឹង ( នីហ្វៃទី៣ ១២:២១–២៤ )
-
ភាពបរិសុទ្ធខាងផ្លូវភេទ ( នីហ្វៃទី៣ ១២:២៧–២៨ )
-
សេចក្ដីស្មោះត្រង់ និងសច្ចធម៌ ( នីហ្វៃទី៣ ១២:៣៣–៣៧ )
-
ការស្រឡាញ់សត្រូវ ( នីហ្វៃទី៣ ១២:៣៨–៤៤ )
-
ការបម្រើសម្រាប់មូលហេតុត្រឹមត្រូវ ( នីហ្វៃទី៣ ១២:១–៤ )
-
ការអធិស្ឋាន និងការតមអាហារ ( នីហ្វៃទី៣ ១៣:៥–១៨ )
-
ទ្រព្យសម្បត្តិនៅស្ថានសួគ៌ ( នីហ្វៃទី៣ ១៣:១៩–២៤ )
-
ការកាត់សេចក្ដីមនុស្សដទៃ ( នីហ្វៃទី៣ ១៤:១–៥ )
កត់ត្រាគំនិតរបស់អ្នក
សូមកំណត់ពីគោលការណ៍មួយ ឬច្រើនដែលបានបង្រៀននៅក្នុងវគ្គបទគម្ពីរទាំងនេះ ដែលអ្នកបានអាន ហើយដែលអាចជួយអ្នកឲ្យក្លាយកាន់តែដូចជាព្រះអង្គសង្គ្រោះ ។ សូមកត់ត្រាចំណាប់អារម្មណ៍របស់អ្នក នៅពេលអ្នកពិចារណាពីសំណួរដូចខាងក្រោម ៖
-
តើការរស់នៅតាមគោលការណ៍ក្នុងវគ្គបទគម្ពីរនេះ អាចជួយខ្ញុំឲ្យកា្លយកាន់តែដូចជាព្រះយេស៊ូវគ្រីស្ទដោយរបៀបណា ?
-
តើព្រះយេស៊ូវគ្រីស្ទបានធ្វើជាគំរូដល់គោលការណ៍នេះដោយរបៀបណា ?
-
តើគោលការណ៍នេះបានផ្ដល់ពរជ័យដល់ជីវិតរបស់ខ្ញុំ ឬជីវិតរបស់មនុស្សដទៃតាមរបៀបណា ?
-
តើខ្ញុំអាចធ្វើអ្វីខ្លះ ដើម្បីអនុវត្តតាមគោលការណ៍នេះឲ្យបានប្រសើរឡើងក្នុងជីវិតរបស់ខ្ញុំ ?