Fesoasoani mo le Faiaoga

Ina ua mavae ona faaali atu le Alii toetu i ana Aposetolo, na toe faaali atu foi o ia i se vaega o i latou i le Sami o Kalilaia. Ao faatasi o ia ma i latou, sa ia fesili faatolu atu ia Peteru i se fesili faapea: “Pe e te alofa mai ea ia te au?” O taimi uma lava na tali mai ai Peteru faapea, “Ua e silafia, ou te alofa ia te oe.” Na tali atu le Alii i le tautinoga a Peteru e faapea: “Ia e fafaga i au tamai mamoe… . Fafaga i au mamoe… . Fafaga i au mamoe” (Ioane 21:15–17).

I le avea ai ma se faiaoga o Aoaoga o le Talalelei, e mafai ona e faaali atu lou alofa mo le Alii e ala lea i le fafagaina o ana mamoe, ia mautinoa o tagata taitoatasi uma i lau vasega ua “manatulia i latou ma tausia ma le afioga lelei a le Atua” (Moronae 6:4). O le tasi faamoemoega taua o le afioga a le Atua o le fesoasoani lea ia i tatou ina ia “tatou talitonu o Iesu o le Keriso lava ia, o le Alo o le Atua; ma o lo [tatou] talitonu e mafai ai ona tatou maua le ola i lona suafa” (Ioane 20:31). A taitaiina e le Agaga, o le a mafai ai e oe ona fesoasoani i tagata o le vasega ina ia faamalosia a latou molimau i le Faaola, o lo latou faatuatua ia te ia, ma a latou tautinoga ina ia ola i lana talalelei. O le a e mafai foi ona fesoasoani ia i latou ina ia mauaina isi faamanuiaga lea e maua mai le suesue ma le faamaoni i le Feagaiga Fou, e pei ona faailoa mai e Peresitene Thomas S. Monson:

“O le savali atoa o le Feagaiga Fou e manavaina mai ai se agaga fagufagu i le tagata. O ata lafoia o le faanoanoa e tafi ese i sulu o le faamoemoe, e suia le faanoanoa i le olioli, e soloiesea foi lagona faaesea o le olaga, i le malamalama mautinoa o loo manatu tele mai lo tatou Tama Faalelagi ia i tatou taitoatasi” (“O le Agaga e Ola Ai,” Liahona, Iuni 1997, 4).

Aoao Atu e Ala i le Agaga

A o sauniuni e aoao atu le vasega o Aoaoga o le Talalelei, e taua tele lou sailia o musumusuga ma taitaiga mai le Agaga o le Alii. “O le a tuuina atu foi le Agaga ia te outou i le tatalo i le faatuatua,” ua fetalai mai ai le Alii, “ae afai tou te le maua le Agaga aua tou te aoao atu” (MFF 42:14.)

E mafai ona e sailia le Agaga e ala i le tatalo, anapogi, suesue i tusitusiga paia i aso taitasi, ma le usitai i poloaiga. A o e sauniuni atu mo le vasega, ia tatalo mo le Agaga ina ia fesoasoani ia te oe ia e malamalama i mau ma manaoga o tagata o le vasega. O le Agaga foi e mafai ona fesoasoani ia te oe e fuafua ni auala lelei e aoao ai mau ma faatusatusa i o tatou olaga i le taimi nei (tagai 1 Nifae 19:23). Faatasi ai ma le fesoasoani a le Agaga, o le a mafai ai ona avea oe ma auupega i aao o le Atua e aoao atu ai ana afioga i ana fanau.

Ua tuuina atu i lalo nisi o fautuaga e valaaulia ai le Agaga i lau vasega:

Ia tofi tagata o le vasega e faia tatalo i le taimi a o lei amataina le vasega ma le faaiuga. I le taimi o le vasega, ia e tatalo i lou loto mo le agaga e taitaiina oe, ina ia tatalaina loto o le vasega, ma molimau atu ma musuia i latou.
Ia faaaoga mau (tagai “Taulai Atu i Tusitusiga Paia” i le itulau vi).
Molimau atu i soo se taimi e musuia ai oe e le Agaga, ae le na o le faaiuga o le lesona. Molimau atu e uiga i le Faaola. Ia valaaulia e le aunoa ia tagata o le vasega e tuuina atu a latou molimau.
Ia faaaoga viiga, pese a le Peraimeri, ma isi musika paia e saunia ai loto o tagata o le vasega ia lagona le Agaga.
Ia faailoa atu lou alofa mo tagata o le vasega, mo isi tagata, ma le Tama Faalelagi ma Iesu Keriso.
Ia faasoa atu ou manatu, lagona, ma ni mea na e aafia ai e talafeagai ma mataupu o loo i le lesona. Ia valaaulia tagata o le vasega ina ia faapea foi ona latou faia. E mafai foi e tagata o le vasega ona faamatala atu pe na faapefea ona latou faaaogaina ia ni mataupu faavae na talanoaina i lesona ua mavae.

Taula’i Atu i Tusitusiga Paia

Na aoao mai Elder Boyd K. Packer e faapea, “O aoaoga moni, a malamalama i ai, e suia ai uiga ma amioga” (Liahona, Ianuari 1987, 17). I au sauniuniga faapea i taimi o le vasega, ia tulimatai atu i aoaoga laveai o le talalelei o loo tuuina mai i tusitusiga paia ma aoaoga a perofeta o aso e gata ai. O lea tulaga e moomia ai lou suesue ma le maelega i tusitusiga paia ma ia tatalo. Na poloai mai le Alii, “Aua le saili e talai atu la’u upu, ae mua’i saili ia maua la’u upu.” Pe a e mauaina ana afioga e ala i au suesuega i tusitusiga paia, ua folafola mai e le Alii, “ona matala ai lea o lou laulaufaiva; o lea, afai e te manao ai, o le a e maua lo’u Agaga ma la’u upu, ioe, o le mana lea o le Atua i le faatalitonuina o tagata” (MFF 11:21).

Ia uunai tagata o le vasega e aumai a latou tusitusiga paia i le vasega i vaiaso uma. Ia faitau faatasi mau filifilia ao outou talanoaina. I tulaga e mafai ai, ia faaaoga na o lomiga a le Au Paia o Aso e Gata Ai o le Tusi Paia, lea e na o le faa-Peretania e maua ai.

E tatau ona tofu tagata o le vasega ma se kopi o le Feagaiga Fou Taiala Suesue a Tagata o le Vasega (35862 890). O lenei tamaitusi o le a fesoasoani i tagata o le vasega e faaleleia o latou tomai i suesuega ma liliu atu i tusitusiga paia mo tali i a latou fesili. O le a fesoasoani foi ia i latou ia malamalama i tusitusiga paia, faatatau mau i o latou soifuaga, saunia e talanoaina i le vasega, ma faaaogaina i talanoaga faaleaiga.

Faaaogaina o Lenei Tusi Lesona

O lenei tusi lesona o se meafaigaluega lea ina ia fesoasoani ai ia te oe e aoao atu aoaoga o le talalelei mai tusitusiga paia. Ua tusia mo le autalavou ma tagata matutua i vasega o Aoaoga o le Talalelei ma e faaaogaina i le tai fa tausaga. E le tau manaomia fua ona suesueina e faiaoga ia isi faamatalaga faaopoopo po o le faalauteleina o mau ina ia aoao atu ai lesona.

O lesona i lenei tusi lesona o loo aofia ai le tele o faamatalaga e le mafai ona e aoaoina atu i le taimi o le vasega e tasi. Ia sailia le Agaga o le Alii e filifili ai tala faatusi paia, fesili ma gaoioiga e fetaui ma manaoga o tagata o le vasega.

O lesona taitasi e aofia ai vaega nei:

Ulutala. O le ulutala e aofia ai ni elemene se lua: o se fuaitau puupuu po o se upu sii ma mau e tatau ona e faitauina a o lei sauniaina lau lesona.
Faamoemoega. O le faamatalaga o le faamoemoega o loo fautua mai ai se manatu autu e mafai ona e taulai atu i ai a o sauniuni e aoao atu le lesona.
Sauniuniga. O lenei vaega e aotele ai tala faatusi paia o loo i le otootoga o le lesona ma tuuina mai ai ni fautuaga ina ia fesoasoani ai ia te oe ina ia lelei lau aoao atu. E mafai foi ona aofia ai ia tusi faitau faaopoopo ma isi fautuaga mo le sauniuniga, e pei o mea e te manao e aumai i le vasega.
Gaoioiga e faatosina mai ai. O lenei vaega e aofia ai se gaoioiga faigofie, lesona faatino, po o fesili e fesoasoani ai i tagata o le vasega ina ia saunia e aoao, auai, ma lagonaina le aafiaga a le Agaga. Afai e te faaaogaina le gaoioiga e faatosina mai ai o loo i le tusi lesona, po o sau lava gaoioiga, e taua tele lava le taulai atu o manatu o le vasega i le amataga o le lesona. E tatau ona puupuu le gaoioiga.
Mau talanoaina ma le faaaogaina. O le vaega autu lenei o le lesona. Ia suesue ma le agaga tatalo le tala faatusi paia ina ia mafai ona e aoao atu ma talanoaina ma le atoatoa. Ia faaaoga fautuaga o loo i le “Uunaia o Talanoaga a le Vasega” ma le “Fesuisuiai o le Aoaoina atu o Tusitusiga Paia” (itulau vii–viii) ina ia fesuiai ai le auala e te aoao atu ai ina ia faatumauina ai le fiafia o tagata o le vasega.
Faaiuga. O lenei vaega e fesoasoani lea ia te oe mo le tauaofaiina o le lesona ma uunaia tagata o le vasega e ola i mataupu faavae na outou talanoaina. E faamanatu ai foi ia te oe e tuuina atu lau molimau. Ia mautinoa e lava le taimi e faaiu ai lesona taitasi.
Manatu faaopoopo e aoao atu ai. O lenei vaega e tuuina atu i le tele lava o lesona i totonu o le tusi lesona. E mafai ona aofia ai upu moni faaopoopo mai tala faatusi paia, o isi manatu e aoao atu ai ni mataupu faavae, gaoioiga, ma isi fautuaga ia e lagolagoina ai le otootoga o le lesona. Atonu e te manao e faaaoga nisi o nei manatu e avea ma se vaega o le lesona.

Ia iloilo lesona taitasi ia le itiiti ifo ma le vaiaso ao lei faataunuuina. Afai e te suesueina vave ia mau ua tuuina atu e faitau ma mea e faaaoga i le lesona, o le a e mauaina ia manatu ma lagona i le gasologa o le vaiaso o le a fesoasoani ai ia te oe i le aoaoina atu ai le lesona. Ao e mafaufau loloto e uiga i le lesona i le gasologa o le vaiaso, ia tatalo mo le Agaga ina ia taitaiina oe. Ia e faatuatua o le a faamanuiaina oe e le Alii.

Uunaia o Talanoaga a le Vasega

O le tulaga lava e masani ai e le tatau lava ona e lauga atu. Ae ao ona e fesoasoani atu i tagata o le vasega ina ia auai ma le atoatoa i le talanoaina o tusitusiga paia. O le auai o tagata o le vasega e fesoasoani lea ia i latou:

Ia aoao atili ai i tusitusiga paia.
Aoao ina ia iloa faaaoga mataupu faavae o le talalelei.
Ia faateleina ona tautino atu ina ia iloa i le talalelei.
Ia valaaulia le Agaga i le vasega.
Ia aoao ma fefaamalamalamaai e le tasi ia le tasi (MFF 88:122) ina ia mafai ona faamanuiaina le tasi ona o le meaalofa, o le malamalama, o le poto, ma le molimau a le isi.

O talanoaga a le vasega e tatau ona fesoasoani i tagata ina ia o mai ai ia Keriso ma ola ai o ni ona soo. O talanoaga e ese mai le autu o le a le faataunuuina ai nei faamoemoega.

Ia saili le taitaiga a le Agaga a o e suesueina ia fesili o loo i lenei tusi lesona ma fuafua po o a fesili e tuuina atu. O loo tuuina atu i le tusi lesona ia mau e faatatau i ai ina ia fesoasoani ai ia te oe ma tagata o le vasega e sue ia tali i le tele o nei fesili. O tali i isi fesili o le a maua mai lea i ni aafiaga na oo i ai tagata o le vasega.

E taua tele le fesoasoani i tagata o le vasega ia malamalama ma iloa ona faaaoga ia mau nai lo le taumafai e aoao atu mea uma o le lesona na e sauniaina. Afai o loo aoao mai tagata o le vasega i se talanoaga lelei, e sili lava le faaauauina pea nai lo le taumafai e faaaoga uma mea o loo i le lesona.

Ia faaaoga taiala nei e uunaia ai talanoaga a le vasega:

Ia fai atu ni fesili e moomia ai ni manatu ma ni talanoaga nai lo fesili e tali mai i le “ioe” ma le “leai.” O fesili e amata i le aisea, faapefea, o ai, o le a, o anafea, ma o fea e sili atu ona manaomia mo le uunaia o talanoaga.
Ia uunaia tagata o le vasega e fetufaai mai ni o latou aafiaga lea o loo faaalia mai ai pe mafai faapefea ona faaaogaina ia mataupu faavae ma mataupu autu faatusitusiga paia i le olaga. Ia uunaia foi i latou e fetufaai mai ni o latou lagona e uiga i mea na latou aoaoina mai mau. Ia tuuina atu ni faamatalaga lelei e uiga i o latou manatu.
Ia nofouta i manaoga o tagata taitoatasi o le vasega. E ui lava ina tatau ona faamalosiauina tagata uma o le vasega i talanoaga, ae e i ai lava nisi e faalotolotolua ona tali mai. Atonu e te manao e talatalanoa taitoatasi ma i latou ina ia iloa ai o latou lagona e uiga i le faitau leotele po o le auai i talanoaga a le vasega. Ia faaeteete i le tofia o tagata o le vasega pe afai e ono faalumaina ai i latou.
Ia tuuina atu ni mau ina ia fesoasoani ai i tagata o le vasega e sailia tali i nisi o fesili.
Ia uunaia tagata o le vasega e mafaufau loloto i fesili o loo i le Feagaiga Fou Taiala Suesue a Tagata o le Vasega (35862 890) ao latou suesueina ia tusi faitau o vaiaso taitasi. A o e sauniaina au lesona taitasi, ia mafaufau pe faapefea ona talanoaina nei fesili i le vasega. O le a matuai sili atu ona lelei le auai a tagata o le vasega i talanoaga pe afai na latou suesueina ia mau faitau i le vaiaso ma afai foi e te tuuina atu ni fesili ua saunia foi i latou e tali.

Fesuisuiai Auala e Aoaoina Atu ai Tusitusiga Paia

Ia faaaoga fautuaga nei ina ia aoao atu ai ma le atoatoa ia tala faatusi paia i ni auala eseese:

Fesoasoani i tagata o le vasega ina ia malamalama po o a mea o loo aoao mai e tusitusiga paia e uiga ia Iesu Keriso. Fesili atu i ai ina ia mafaufau pe faapefea ona faateleina lo latou faatuatua i le Faaola i nisi o fuaitau ma fesoasoani ai ia i latou ina ia latou lagonaina lona alofa.
Fai atu i tagata o le vasega ina ia mafaufau ma fetufaai atu ni auala patino e mafai ai ona faaaoga se mau i o latou olaga. Tuu atu i ai e faatatau le mau ia i latou e ala lea i le tuu i ai faalemafaufau o o latou igoa i fuaitau ua filifilia.
I le faaopoopo atu i ai i le aoaoina atu o le mataupu autu, ia faamamafa atu ia tala o loo i le Feagaiga Fou e faatupuina ai le faatuatua, ma ia mautinoa ua malamalama ai tagata o le vasega ma talanoaina ni auala e faatatau ai ia i latou.
Tuu atu i tagata o le vasega e vaai ni upu, fuaitau, po o manatu o loo tau soo mai i se mau e i ai sona uiga faapitoa mo i latou.
Tusi i luga o le laupapa ia fuaitau, upu autu, po o fesili e faatatau i le tala faatusi paia. Ona faitau lea pe otooto le tala. Ao faalogoina e tagata o le vasega ia fuaitau, upu autu, po o tali i fesili, ia taofi ma talanoaina faatasi ma i latou.
I le Tusi a Mamona atoa, o le fuaitau “ua faapea ona tatou iloa” o loo faaaogaina e faatomua mai ai se aotelega o mataupu o loo aoaoina (tagai, mo se faataitaiga, Helamana 3:28). A maea ona talanoaina se fuaitau mai tusitusiga paia, ona fai atu lea i tagata o le vasega e faamatala le mataupu o loo i le fuaiupu e faaaoga ai le fuaitau “ua faapea ona tatou iloa.”
Vaai ma talanoaina ia faailoga o loo faaaogaina i le Feagaiga Fou. Mo se faataitaiga, o le Faatoafaiava ma le faatoanofotane o loo avea ma sui o le Faaola ma ona tagata.
Ia maitauina le auala e mafai ai ona fefaatusatusaai ia mea na tutupu po o tagata i totonu o mau.
Ia tuu atu i tagata o le vasega e faatinoina ia tala faatusi paia e ala lea i le faitauina leotele o upu a tagata eseese o loo i ai i tala. Ia mautinoa o lea faatinoga e atagia ai le faaaloalo mo tusitusiga paia.
Vaevae le vasega i ni vaega se lua po o ni vaega laiti. A maea ona iloiloina se tala faatusi paia, ona tuu atu lea i vaega taitasi e tusi i lalo ia mataupu faavae ma mataupu autu o loo aoaoina mai i le tala. Ona fai atu lea i vaega e auauai i le talanoaina pe faapefea ona faatatauina nei aoaoga i o latou olaga.
Fai atu i tagata o le vasega e aumai ni peni e faailoga ai fuaiupu ao outou talanoaina.

Fesoasoani i Tagata Fou

I le avea ai ma se faiaoga o Aoaoga o le Talalelei, e mafai ona e maua le avanoa e aoao ai tagata e fou mai i le Ekalesia. O lau aoaoga e mafai ona fesoasoani ai i tagata fou ina ia faamausali lo latou faatuatua.

Ua saunoa mai le Au Peresitene Sili: “O tagata uma o le Ekalesia e manaomia le alofagia ma le faafaileleina, aemaise lava i uluai masina talu ona mavae le papatisoga. Afai e mauaina e tagata fou se faauoga faamaoni, o avanoa ina ia auauna atu, ma le faafaileleina faaleagaga lea e maua mai le suesueina o le afioga a le Atua, latou te iloaina ai le faatumauina ma ua ‘nuu faatasi ma le au paia, o le aiga foi o le Atua’ (Efeso 2:19)” (Tusi a le Au Peresitene Sili, 15 Me 1997).

Aoaoina Atu o le Talalelei i le Autalavou

Afai o loo e aoaoina le autalavou, ia manatua e masani lava ona latou manaomia lo latou auai atoatoa, faapea foi ma mea e faatino ai aoaoga o loo talanoaina. O lou faaaogaina o vitio, ata, ma gaoioiga o loo fautuaina atu i le tusi lesona e mafai ai ona fesoasoani i le autalavou ina ia tumau ai le fiafia i lesona. Mo nisi manatu e fesoaosani ai i lou aoaoina atu o le talalelei i le autalavou, ia tagai i le Aoao Atu—E Leai Se Isi Valaauga e Sili Ai (36123.890) ma le Tusi Taiala o Aoaoga (34595.890); ma le “Aoaoina Atu o le Talalelei ma le Taitaiga,” vaega 16 o le Tusitaulima o Faatonuga a le Ekalesia, Tusi 2: Taitai o le Perisitua ma Ausilali (35903.890).