Lesona 3
“Ua Fanau Mai mo Outou … se Faaola”
Faamoemoega
Ina ia uunaia tagata o le vasega e olioli i le fanau mai o Iesu Keriso ma mulimuli i faataitaiga a o talavou o ia, “[ua tupu] le poto ma le tino, ua alofagia o ia e le Atua atoa ma tagata” (Luka 2:52).
Sauniuniga
-
Faitau, mafaufau loloto, ma tatalo e uiga i mau nei:
-
Luka 2:1–7. Ua fanau mai Iesu Keriso.
-
Luka 2:8–39. Ua olioli agelu ma isi i le fanau mai o Iesu.
-
Mataio 2. O le au makoi mai sasae sa latou asia Iesu ma tuuina atu ia te ia meaalofa. O Herota, ua atuatuvale o ia i le fanau mai o le Tupu o tagata Iutaia, sa ia faatonuina ina ia fasiotia tama tane uma i Peteleema e oo i ona tuaoi uma, e afua i e ua lua o latou tausaga atoa ma e ua pito ane i ai. Ua faatonuina e le agelu a le Alii ia Iosefa e sosola atu ma Maria ma Iesu i Aikupito ona latou toe o atu ai lea i Isaraelu.
-
Luka 2:40–52. Sa saunia Iesu i lona talavou mo lana misiona, e ala i le taitaiga a le Tama.
-
-
Mau faitau faaopoopo: Faaliliuga a Iosefa Samita, Mataio 3:24–26; 1 Nifae 11:1–23; Helamana 14:1–8; 3 Nifae 1:4–21; 27:13–16; Mataupu Faavae ma Feagaiga 93:11–20.
-
Afai e maua mea nei ona faaaoga lea o sina vaega i le taimi o le lesona:
-
“Luka 11,” o se ata e ono minute mai Ata o le Feagaiga Fou (53914).
-
O le ata Leai Se Potu i le Faletalimalo (62115); O le Fanau Mai o Iesu (62116; Taga Ata o le Talalelei 200); O Le Soifua Mai o le Alii (62495; Taga Ata o le Talalelei 201); O Le Folafola Atu o le Fanau Mai o Keriso i Leoleo Mamoe (62117; Taga Ata o le Talalelei 202); O Le Au Makoi (62120; Taga Ata o le Talalelei 203); Solaaga i Aikupito (62119; Taga Ata o le Talalelei 204); O le Tama o Iesu i le Malumalu (62500; Taga Ata o le Talalelei 205); O le Soifuaga o Iesu Keriso a o Itiiti (62124; Taga Ata o le Talalelei 206); ma Iesu ma Lona Tina (Taga Ata o le Talalelei 242).
-
-
Fautuaga mo le aoaoina atu: Ia faaaoga ata talafeagai ma ata vitio e valaaulia ai le Agaga, ia faaopoopo i ai nisi mea i le lesona, ma fesoasoani i tamaiti ina ia latou manatua tala faatusi paia sa latou talanoaina (tagai Aoao Atu—Leai Se Isi Valaauga e Sili Ai [36123 890] itulau 168).
Faalautelega Fautuaina o le Lesona
Gaoioiga e Faatosina Mai Ai
Afai e talafeagai, ia faaaoga le gaoioiga lenei po o sau lava gaoioiga e amata ai le lesona.
Ia tusi le lisi lenei o tagata i luga o le laupapa: o se leoleo mamoe, Simeona, o se makoi mai sasae, Herota, o se tagata i se faletalimalo, Ana, o se agelu, Maria.
Faitau atu tali nei o le fanau mai o Iesu Keriso. Fai atu i tagata o le vasega e faafetaui tali nei ma tagata sao:
Gaoioiga e Faatosina Mai Ai
-
Sa ou malaga i se ala mamao e saili ia te ia, ma tuuina atu i ai meaalofa, ma ifo atu ia te ia. (O se makoi mai sasae; Mataio 2:1–2, 9–11.)
-
Ua ou le mauaina se potu mo ia. (O se tagata i se faletalimalo; Luka 2:7.)
-
I le mauaina o se molimau mai le Agaga Paia, sa ou siiina le tamaitiiti i o’u lima ma lo’u iloa, o le a ou oti filemu. (Simeona; Luka 2:25–32.)
-
Sa ou faapea atu, “O le viiga i le Atua i mea aupitoaluga; ma le manuia i le lalolagi; o le finagalo alofa i tagata.” (O se agelu: Luka 2:13–14.)
-
Sa ou faataalise atu e vaai ia te ia. (O se leoleo mamoe; Luka 2:15–16.)
-
Sa ou atuatuvale ma ou taumafai e fasioti ia te ia. (Herota; Mataio 2:3–4, 16).
-
Ina ua mae’a ona ou vaai ia te ia i le malumalu, sa tuuina atu la’u faafetai ma talai atu le talafou i lona fanau mai. (Ana; Luka 2:36–38.)
-
Sa ou mafaufau loloto i lenei mea i lo’u loto. (Maria; Luka 2:19.)
Fai atu i tagata o le vasega e mafaufau loloto i fesili o loo i lalo i le taimi o le lesona:
Gaoioiga e Faatosina Mai Ai
-
E faapefea ona e tali atu i le tala o le fanau mai o le Faaola? E faapefea ona e tali atu i lona olaga, lona maliu, lana togiola, ma le toetutu?
Mau Talanoaina ma le Faaaogaina
A o e aoaoina atu mau o loo i lalo, ia fesoasoani ina ia malamalama tagata o le vasega i le mafuaaga e tatau ai ona tatou olioli i le fanau mai o le Faaola. Ia talanoaina auala e mulimuli ai i faataitaiga na ia faia a o talavou o ia.
1. Ua fanau mai Iesu Keriso.
Faitau ma talanoaina le Luka 2:1–7. Faaali atu nisi o ata o loo i le vaega o “Sauniuniga.”
-
Sa ia Iesu ma le Tama Faalelagi le manuia “a o lei faia le lalolagi” (Ioane 17:5). Sa ia faia le lagi ma le lalolagi (Mosaea 3:8). I le avea ai ma Ieova, sa ia faaali atu tulafono ma mataupu moni o le talalelei i perofeta o le Feagaiga Tuai (3 Nifae 15:2–5). Aisea na afio mai ai Iesu i le lalolagi? (Tagai 3 Nifae 27:13–16.)
-
O a ni mea na tutupu i le fanau mai o Iesu? (Tagai Luka 2:7.) E faapefea ona atagia mai ai i ia mea na tutupu lana misiona i le lalolagi ma lana taulaga togiola? O a ni auala ua teena ai e tagata i aso nei se avanoa mo le Faaola i o latou olaga? O a ni mea e tatau ona tatou faia e maua ai sona avanoa i o tatou olaga?
2. Sa olioli agelu ma isi tagata i le soifua mai o Iesu.
Ia talanoaina le Luka 2:8–39. Tofi ni tagata o le vasega e faitau leotele fuaiupu filifilia. Faaali atu nisi o ata o loo lisiina i le vaega o “Sauniuniga.”
Afai o loo e faaaogaina le ata vitio o le “Luka 11,” ia faaali nei loa.
-
O le a le tala a agelu a o latou faasilasilaina mai le fanau mai o Iesu? (Tagai Luka 2:13–14.) Sa faapefea ona viia e Iesu le Tama? Na faapefea ona ia aumaia le filemu ma le finagalo alofa i tagata faatasi ai ma oe lava ia? E mafai faapefea ona tatou faaali atu lo tatou faafetai i le Atua mo le tuuina mai o lona Alo?
-
O le a le mea a leoleo mamoe na fai ina ua latou vaai i le Faaola ua fanau mai? (Tagai Luka 2:17–18.) O le a se mea e tatau ona tatou faia e mulimuli ai i a latou faataitaiga? Ia tofi ni tagata o le vasega e mafaufau i se tasi e mafai ona latou fetufaai atu i ai a latou molimau e uiga i le Faaola.
-
O le a le mea a Maria na fai ina ua maea ona soifua mai le Faaola ma le asiasiga a leoleo mamoe? (Tagai Luka 2:19.) O le a se mea o faaali mai i lea tulaga e uiga ia Maria? Aisea e taua ai le faaalu o se taimi e mafaufau loloto ai i le paia o mea na tutupu?
-
Na faapefea ona saunia Simeona ma Ana e vaai i le tamaitiiti o Iesu? (Tagai Luka 2:25–26, 37.) Sa faapefea ona laua tali atu ina ua la vaai ia te ia? (Tagai Luka 2:27–35, 38.) O le a se mea ua tatou aoaoina e uiga i le Faaola mai a la valoaga?
3. O le au makoi sa latou o mai e ifo atu i le tamaitiiti o Iesu. Sa saili Herota e fasioti ia te ia.
Faitau ma talanoaina fuaiupu filifilia mai le Mataio 2. Ia faaali atu nisi o ata o loo lisiina i le vaega o “Sauniuniga.”
-
Aisea na saili ai e “makoi mai sasae” ia Iesu? (Tagai Mataio 2:1–2.) O le a le mea na latou faia ina ua maua o ia? (Tagai Mataio 2:11. Ia iloa, na latou maua mulimuli Iesu, a ua “tamaitiiti o ia,” ae le o se pepe meamea.) O a ni a tatou meaalofa e mafai ona tuuina atu mo le Alii?
-
Aisea na manao ai Herota e fia maua ia Iesu? (Tagai Mataio 2:3–6, 13. Sa atuatuvale o ia, ma sa ia manao e fasioti ia Iesu.) Aisea na atuatuvale ai le tupu i le soifua mai o Iesu Keriso? (Tagai Mataio 2:2, 6. E tusa ai ma valoaga, o le a pulea e Iesu ia Isaraelu.)
-
Na faapefea ona puipuia Iesu mai ia Herota? (Tagai Mataio 2:13–15.) Na faapefea ona iloa e Iosefa le aso e o ese ai mai Aikupito? (Tagai Mataio 2:19–23.) Aisea e te manatu ai na maua e Iosefa lenei taitaiga mai le Atua? O le a se mea e tatau ona faia e tina ma tama i aso nei latou te maua ai faaaliga e uiga i o latou aiga? E faapefea ona fesoasoani le Atua ia te oe a o e sailia lana taitaiga mo lou aiga?
4. Sa saunia Iesu a o talavou o ia mo lana misiona, e ala i taitaiga a le Tama.
Faitau ma talanoaina le Luka 2:40–52. Ia faaali atu nisi o ata o loo lisiina i le vaega o “Sauniuniga.” Faamatala atu o tausaga taitasi e faamanatu ai e Iosefa ma Maria ma isi tagata Iutaia faatuatua, le Tausamaaga o le Paseka i Ierusalema. E tusa ma le tu o le tausamiga, na auai Iesu ma i latou ina ua 12 ona tausaga (Luka 2:41–42).
-
O le maea o le faamanatuina o le Tausamaaga o le Paseka i Ierusalema, na amata ai ona toe foi le malaga a Maria ma Iosefa i Nasareta, ma o iina sa laua iloa ai e le o faatasi atu ia Iesu ua 12 ona tausaga ma i laua (Luka 2:43–45). O fea sa la maua ai o ia? (Tagai Luka 2:46.) Afai e leiloa e ou matua po o tagata o lou aiga le mea o loo e i ai, e mafai ea ona latou mautinoa o loo e faia mea e fiafia ai lou Tama Faalelagi?
-
O le Faaliliuga a Iosefa Samita o le Luka 2:46 o loo faapea mai o tagata sa i totonu o le malumalu “sa faalogo ia [Iesu], ma tuufesili atu ia te ia.” O le a se mea o loo faaalia i lenei mea e uiga i le tulaga aoaoina o Iesu ma lona talavou?
-
Ina ua maua e Maria ma Iosefa ia Iesu, sa faapea atu Maria ia te ia, “O i maua ma lou tama sa ma saili lava ia te oe ma le tiga” (Luka 2:48). O ai o loo ia faatatau i ai ina ua ia faapea mai “lou tama”? (Iosefa.) Na faapefea ona tali atu Iesu i le manatu o Maria? (Tagai Luka 2:49.) O ai o loo faatatau i ai Iesu ina ua ia faapea mai “fale o lo’u Tama”? (Tama Faalelagi.) O le a se mea o loo tau mai ai le malamalama o Iesu i lana misiona na uluai faauuina ai o ia?
-
O a ni uiga o Iesu na faaali atu ia Maria ma Iosefa a o talavou o ia? (Tagai Luka 2:51. E ui lava o ia o le Alo o le Atua, ae sa faalogo lava o ia i lona tina ma Iosefa.) O le a se mea e mafai ona tatou aoaoina mai lea faataitaiga?
-
• I le avea ai ma talavou, sa “tupu le poto ma le tino o Iesu, ua alofagia o ia e le Atua atoa ma tagata” (Luka 2:52). I nisi faaupuga, na faateleina lona atamai, faaletino, faaleagaga ma le va fealoai. O a ni mea patino e mafai ona tatou faia e faatupulaia ai lo tatou atamai, faaletino, faaleagaga ma le va fealoai?
-
O le a se mea tatou te aoao mai le Mataupu Faavae ma Feagaiga 93:11–17 e uiga i le atinaeina o le olaga talavou o le Faaola? (I ana sauniuniga e avea ma o tatou Faaola, e lei maua uma e Iesu le atamai talafeagai, pule, atamai, ma le manuia i le taimi e tasi. Sa ia mauaina “lea amioga mama i lea amioga mama,” taitasi i le taimi.) E faapefea ona faatatau lenei upumoni ia i tatou? (Tagai MFF 93:18–20.)
Faaiuga
Molimau atu i le moni o mea sa outou talanoaina i le lesona. Ia uunaia tagata o le vasega e olioli i le soifua mai o le Faaola ma mulimuli i faataitaiga na ia faia a o talavou.
Manatu Faaopoopo e Aoao Atu Ai
O mea nei e lagolago atu ai i le otootoga o le lesona ua fautuaina. Atonu e te manao e faaaoga le tasi po o le sili atu foi o nei manatu e avea o se vaega o le lesona.
1. “A o Maria ua taofi ia upu uma, ua mafaufau ai lona loto” (Luka 2:19)
A o outou talanoaina le tali filemu atu a Maria i le soifua mai o Iesu, ia tofi se tina e faamatala atu ni ona lagona ina ua maea ona fanau mai se tasi o lana fanau.
2. Gaoioiga a le Autalavou
Ia filifili ni mau taua se lima mai le lesona, ona faamasani lea o tagata o le vasega i le uiga o vaega taitasi. Ona tapuni lea o Tusi Paia a tagata o le vasega. Ia tuu atu se faamatalaga e taitaiina ai tagata o le vasega i le mau sa e talanoaina, ia faaupu faamatalaga taitasi ina ia le faigata ona iloa le vaega o loo e faatatau i ai. (Mo se faataitaiga, ia e faapea atu, “O lenei fuaiupu o loo aofia ai upu vivii a le agelu i le Atua ina ua soifua mai Iesu.” E na o le pau le tali sao o le Luka 2:14.) A maea ona e faitauina atu se faaupuga, ona tuu atu lea i tagata o le vasega e susue a latou Tusi Paia ma saili mai le vaega sao. Ia faaaoga le gaoioiga lenei o se auala e matau ai mau ae le faatauvaina. Aua nei faaaluina ai se taimi umi.