Lesona 40
“Ou Te Mafaia Mea Uma Lava I Le Faamalosi Mai o Keriso”
Faamoemoega
Ina ia uunaiina tagata o le vasega ia atinae ni uiga o ni soo moni o Iesu Keriso.
Sauniuniga
-
Faitau, mafaufau loloto, ma tatalo e uiga i mau nei:
-
Filipi. Na faafetai atu Paulo i le Au Paia i Filipi mo le fesoasoani na auina atu ia te ia ma uunaiina i latou ina ia avea i latou o ni soo lotogatasi ma faamaoni o Keriso.
-
Kolose 1. Na faamanatu atu e Paulo i le Au Paia i Kolose faapea o le togiola e na o Iesu Keriso e auala mai ai.
-
Kolose 2:1–8, 16–23; 3; 4. Ua aoao atu e Paulo i le Au Paia i Kolose mea e tatau ona latou faia ma uiga e tatau ona latou atinaeina i le avea ai ma e ua filifilia a le Atua.
-
Filemoni. Ua uunaiina e Paulo ia Filemoni ina i faamagalo atu ia Onesemo, o se pologa na solaese.
-
-
Fautuaga mo le aoaoina atu: O se otootoga o se lesona po o ni mau e faitauina e mafai ona aofia ai nisi mea e tele atu nai lo le taimi e faaaogaina ai i le vasega. A o e sauniaina lesona taitasi, ia iloilo ma le agaga tatalo po o a aoaoga ma mataupu e sili atu ona aoga mo lau vasega. Fuafua ina ia aoao muamua atu mea nei, e aofia ai isi vaega o le lesona pe afai e lava le taimi. Ae peitai, a o e aoao atu, ia gauai atu i le Agaga ma ia fetuutuunai ina ia suia lau fuafuaga pe afai e te lagonaina le musuia ai o oe ina ia faia.
Faalautelega Fautuaina o le Lesona
Gaoioiga e Faatosina Mai Ai
Afai e talafeagai ai, ia faaaoga le gaoioiga lenei po o sau lava gaoioiga e amata ai le lesona.
Tusi i luga o le laupapa ni upu autu eseese mai le mataupu faavae e sefulutolu o le faatuatua, e pei o le faamaoni, amiotonu, amio mama, ma le tauleleia.
Gaoioiga e Faatosina Mai Ai
-
O le fea mataupu faavae o le faatuatua o loo aofia ai nei upu? (Afai e le iloa e tagata o le vasega, fai atu i ai e vaai i Mataupu Faavae o le Faatuatua, o loo i le faaiuga lava o le Penina Tautele.)
Afai e sao lelei le tali a tagata o le vasega, ona fai atu lea i se tagata o le vasega e tauloto mai le mataupu faavae e sefulutolu o le faatuatua. Ona toe fai atu lea i le tagata lea o le vasega e toe tauloto mai le afa muamua o le mataupu faavae o le faatuatua, e oo atu “i le apoapoaiga a Paulo.”
Gaoioiga e Faatosina Mai Ai
-
O le a le “apoapoaiga a Paulo”? O fea e maua ai?
Fai atu i tagata o le vasega e sue i le Filipi 4:8 ma faatusatusa i le mataupu e sefulutolu o le faatuatua. Ia faamatala atu ina ua ta’ua e Iosefa Samita le apoapoaiga a Paulo i le mataupu faavae e sefulutolu o le faatuatua, na faatatau lana faamatalaga i le Filipi 4:8, o se vaega lea o le tusi a Paulo i le Au Paia i Filipi. O le lesona i le aso o le a aofia ai le tusi lenei a Paulo ma tusi a Paulo i Kolose ma Filemoni, o tusi uma nei na tusia i le taimi ao faafalepuipuiina Paulo i Roma. O nei tusi o loo talanoaina ai uiga e tatau ona tatou sailia e atinaeina i le avea ai ma ni soo faamaoni o Iesu Keriso.
Mau Faitauina ma le Faaaogaina
Ao e aoaoina atu nei mau mai tusitusiga paia, ia talanoaina pe faapefea ona faaaoga ia i tatou i aso nei e pei lava ona faatatauina i le Au Paia i taimi o Paulo. Ia uunaiina tagata o le vasega ia fetufaai atu mea na latou oo i ai e faatatau i mataupu mai tusitusiga paia.
1. Ua uunaiina e Paulo le Au Paia i Filipi ina ia mulimuli ia Iesu Keriso.
Ia talanoaina le tusi a Paulo i Filipi. Ia valaaulia tagata o le vasega ina ia faitau leotele fuaiupu filifilia.
-
Na faafalepuipuiina Paulo i Roma ao tusi atu o ia i Filipi. O a uiga na faaalia e isi tagata o le Ekalesia i le faafalepuipuiina o Paulo? (Tagai Filipi 1:12–18.) O le a se fesoasoani ua e maua e ala i le vaai po o le faalogo e uiga i isi o e na lotototoa i le auauna atu i le Alii?
-
I le Filipi 2:2–23, o le a le mea na apoapoai atu ai Paulo i tagata o le Ekalesia ina ia faia? O a ni auala e tatau ai i tagata o le Ekalesia ona “tasi lo latou manatu”? (Tagai Filipi 1:27; 2:14–15.) Aisea tatou te faia ai mea i nisi taimi mo le “mitamita fua”? O le a sou manatu aisea na fautua mai ai Paulo i lea mea? Aisea e taua ai le aua nei o tatou manatu ua sili atu i tatou nai lo isi tagata? (Tagai MFF 38:24–26.)
-
O le a le mea na aoao atu e Paulo e uiga ia Iesu i le Filipi 2:5–8? Na faapefea ona faatuina e Iesu le faataitaiga atoatoa o le lotomaulalo ma le gauai atu i le finagalo o lona Tama? (Tagai Ioane 8:29.) E mafai faapefea ona sili atu lo tatou lotomaulalo ma le gauai atu i le finagalo o le Tama Faalelagi?
-
O le a sou manatu o le a le uiga o le tala a Paulo ina ua ia ta’u atu i tagata Filipi, “Ia outou galulue aiai ma le mata’u ma le gatete mo lo outou faaolaina”? (Filipi 2:12).
Na faamatala mai e Peresitene Tavita O. Makei: “ ‘O le galueaina o lou lava faaolataga’ o se apoapoaiga e faaalia e ala i galuega, manatunatu loloto, taumafaiga usiusitaia o le moni o le faatuatua. Ae o lenei mea e ao ona faataunuuina ma se malamalama lelei o le faalagolago ia te au lava e mafai ona fua mai ai le faamaualuga ma le vaivai lea e oo mai ai le faatoilaloina. Faatasi ai ma le ‘mata’u ma le gatete’ e tatau ona tatou sailia le malosiaga ma le alofa tunoa o le Atua mo musumusuga ina ia maua ai le manumalo” (Lipoti o le Konafesi, Aperila 1957, 7).
-
Na saga apoapoai atu pea Paulo i Filipi ina ia “olioli i le Alii” (Filipi 3:1; 4:4). E mafai faapefea ona tatou olioli i le Alii?
-
Na tau atu e Paulo i tagata Filipi na ia taulagaina mea uma mo Keriso (Filipi 3:7–8). O a mea na taulagaina e Paulo? Aisea e taua ai lo tatou faia o ni osigataulaga mo Keriso? (Tagai Filipi 3:9–12.)
Na aoao mai le Perofeta o Iosefa Samita: “O se tapuaiga latou te le faatulafonoina le taulagaina o mea uma ua le lava le mana ua i ai e faatupu ai le faatuatua talafeagai mo le ola ma le faaolataga; aua talu mai le soifuaga muamua o le tagata, o le faatuatua e tatau ai mo le fiafia i le olaga ma le faaolataga, e le mafai lava ona maua e aunoa ma le taulagaina o mea uma faaletino” (Lectures on Faith [1985], 69).
-
E mafai faapefea ona tatou mauaina le “manuia o le Atua” e pei ona taua mai i le Filipi 4:7? (Tagai Filipi 4:6–7.) O le a le taimi na e lagonaina ai le filemu o le Atua?
-
E mafai faapefea ona tatou faaaogaina le fautuaga a Paulo i le Filipi 4:8? (Tagai foi i le Mataupu Faavae o le Faatuatua 1:13.) E faapefea ona faamanuiaina i tatou pe a tatou mulimuli i lenei apoapoaiga?
-
Na molimau mai Paulo, “Ou te mafaia mea uma lava i le faamalosi mai o Keriso” (Filipi 4:13). O le a sou manatu na faapefea ona mauaina e Paulo lenei molimau ia Keriso? E faapefea ona e iloaina e te mafaia ona “faia mea uma e ala ia Keriso”?
2. Ua faamanatu atu e Paulo i tagata Kolose o le togiola e na o Keriso e oo mai ai.
Ia talanoaina le Kolose 1. Ia valaaulia tagata o le vasega ina ia faitauina leotele fuaiupu filifilia. Ia faamatala atu o le Au Paia i Kolose, o se nuu laitiiti i le itu i sasae o Efeso, sa matuai aafia lava i aoaoga na faaitiitia ai le taua o le Faaola ma le taulai atu i le mauaina o le atoatoa e ala lea i le tausia o sauniga ma le tapuai i agelu. I lana tusi i Kolose, na lapataiina ai e Paulo le tetee atu i nei aoaoga, ma apoapoai atu i le Au Paia ina ia faaauau pea ona “tutumau ma mausali” (Kolose 1:23; tagai foi Kolose 2:5–7) i le malamalamaaga faapea o le togiola e na o Iesu Keriso lava e auala mai ai.
-
O a upumoni e uiga ia Iesu Keriso na aoao atu e Paulo i Kolose? (Tagai Kolose 1:12–22. Ia lisi i luga o le laupapa tali a tagata o le vasega.) Aisea na taua ai i tagata o Kolose le malamalama i nei upumoni? E faapefea ona aafia le ituaiga olaga e ola ai i lou malamalama ma lau molimau ia Iesu Keriso?
-
O le a le “tofi o le au paia” lea e mafai ona tatou mauaina mai lo tatou Tama o i le Lagi? (Tagai Kolose 1:12; 2 Nifae 9:18; MFF 50:5.) O ai na mafua ai ona maua lea tofi? (Tagai Kolose 1:12–14.) O le a le mea e tatau ona tatou faia ina ia maua ai lenei tofi? (Tagai Kolose 1:10–12; 2 Nifae 9:18; Alema 5:51; MFF 50:5.)
-
O le a le uiga o le tala a Paulo ina ua ia apoapoaiina tagata Kolose ina ia “tutumau ma mausali” i le talalelei? (Tagai Kolose 1:23.) Aisea e mafua ai ona “faateaeseina nisi tagata mai le faamoemoe o le talalelei”? (Kolose 1:23). O le a se mea e mafai ona tatou faia ina ia faamalosia ai a tatou molimau?
3. Ua aoaoina e Paulo tagata Kolose i mea e tatau ona latou faia i le avea ai ma tagata filifilia a le Atua.
Ia talanoaina le Kolose 2:1–8, 16–23; 3; 4. Ia valaaulia tagata o le vasega e faitau leotele fuaiupu filifilia.
-
Na manao Paulo i le Au Paia ina ia “lagaina faatasi o latou loto i le alofa” ma le iloa lelei o le Atua le Tama ma Iesu Keriso (Kolose 2:2–3). E mafai faapefea ona tatou faataunuuina lenei mea i totonu o a tatou lava uarota ma paranesi?
-
O le a le uiga o le “mauaa ma atinae” ia Keriso? (Tagai Kolose 2:7.) E mafai faapefea ona tatou mauaa ia Keriso? E mafai faapefea e le “mauaa ma le atinae” ia Keriso ona fesoasoani ia i tatou i taimi o tofotofoga? (Atonu e te manao e faatusatusa se laau e pupuu ma papa’u ona aa i se laau e uumi ma loloto ona aa. Ia talanoaina po o le fea laau e foliga mai e ola i taimi o faigata e pei o afa ma lamala.)
-
O a uiga o “le au filifilia a le Atua” o loo lisiina mai i le Kolose 3:12–15? (Ia lisi i luga o le laupapa tali a tagata o le vasega.) Na faapefea ona faatuina e Iesu Keriso se faataitaiga i nei uiga? (Fai atu i tagata o le vaega e mafaufau i ni faataitaiga patino na faailoa ai e Iesu uiga taitasi.) E mafai faapefea ona tatou matuai atinaeina nei uiga?
-
E mafai faapefea ona tatou faatagaina le afioga a Keriso ia mau i totonu o i tatou, e pei ona apoapoai mai ai Paulo? (Tagai Kolose 3:16–17; tagai foi MFF 1:37; 18:34–36.) E mafai faapefea e viiga ona faamalosia lo tatou malamalama ma le molimau i le afioga a Keriso? E mafai faapefea ona tatou faaaogaina lelei ia viiga ma isi musika paia?
Na saunoa mai Elder Dallin H. Oaks: “E manaomia ona tatou faaaoga atili a tatou viiga ia tatou mafuta ai ma le Agaga o le Alii, ia faalotogatasia ai i tatou, ma ia fesoasoani ia i tatou e aoao atu ai ma iloa a tatou mataupu. E manaomia ona faaaoga lelei a tatou viiga i aoaoga faafaifeautalai, i vasega faaletalalelei, i fonotaga a korama, i afiafi faaleaiga, ma asiasiga a faiaoga o aiga. O musika o se auala lelei lea e tapuai atu ai i lo tatou Tama Faalelagi ma lona Alo o Iesu Keriso. E tatau ona tatou faaaoga viiga pe a tatou manaomia se malosi faaleagaga ma musumusuga” (i le Conference Report, Oke. 1994, 13; po o le Liahona, Ian. 1995, 12).
-
Na faamamafa soo mai e Paulo le taua o le faafetai atu (Kolose 2:7; 3:15, 17). Aisea e taua ai lo tatou faafetai atu? E mafai faapefea ona tatou faaali atu le agaga faafetai i le Tama Faalelagi ma Iesu Keriso i mea uma?
4. Na uunaiina e Paulo ia Filemoni ina ia faamagalo atu ia Onesemo.
Ia talanoaina le tusi a Paulo ia Filemoni. Ia valaaulia tagata o le vasega e faitau leotele fuaiupu filifilia. Ia faamatala atu, na tusia e Paulo se tusi e faatatau lava ia Filemoni, o se tagata o le Ekalesia i Kolose, e tusa ai ma le pologa a Filemoni e igoa ia Onesemo. Na faoa e Onesemo ni mea mai ia Filemoni ma solaese atu ai o ia i Roma, lea na feiloai ai ma Paulo ma sa faaliliuina ai loa i le talalelei. Na talosaga atu Paulo ia Filemoni ina ia faamagalo ia Onesemo ma taliaina o ia o sona uso i le talalelei.
-
O le a se mea e mafai ona tatou aoaoina e uiga i a Paulo mai lana tusi ia Filemoni?
-
Na faapefea ona faaalia e Paulo le faaaloalo mo le saolotoga o Filemoni lava ia? (Tagai Filemoni 1:14.) Na faapefea ona faaalia e Paulo lona naunau mo le olaga sologa lelei o Onesemo?
-
O le a se mea e mafai ona tatou aoaoina mai lenei tusi e uiga i le mana o le talalelei e liua ai sootaga faaletagata? (Tagai Filemoni 1:16.) O faapefea ona aafia tou fesootaiga ma isi tagata ona o le talalelei?
Faaiuga
Ia molimau atu i le taua o le atinaeina o uiga na e fesoasoani ai ia i tatou ina ia avea atili ai faapei o Keriso, e pei o i latou na taua e Paulo i lana tusi i Filipi, o Kolose, ma Filemoni. Ia valaaulia tagata o le vasega ina ia faitauina le Filipi 4:8 ma le Kolose 3:12–15 ma filifilia se uiga se tasi mai na fuaiupu e galulue i ai i lona atinaeina i lenei vaiaso.
Manatu Faaopoopo e Aoao Atu Ai
O mea nei e lagolago atu ai i le otootoga o le lesona ua fautuaina. Atonu e te manao e faaaoga le tasi po o le sili atu foi o nei manatu e avea o se vaega o le lesona.
1. Sootaga i le va o matua ma fanau
Tuu atu i se tagata o le vasega e faitauina le Kolose 3:20–21.
-
E tusa ai ma le tala a Paulo, o le a le tiute o se tamaitiiti i ona matua? O le a le tiute o matua i se tamaitiiti? E mafai faapefea ona faaleleia le sootaga i le va o matua ma fanau i lou aiga?
2. “Ua auauna outou i le Alii o Keriso” (Kolose 3:24)
Tuu atu i se tagata o le vasega e faitauina le Kolose 3:23–24.
-
E mafai faapefea ona tatou mulimuli i faatonuga a Paulo o loo i ai i nei fuaiupu? (Tagai foi i le Mataio 25:34–40.) O le a se eseesega atonu o le a faia e lenei uiga i le auala tatou te auauna atu ai.