Lesona 21
“O Le a Le Faailoga O Lou Toe Afio Mai?”
Faamoemoega
Ina ia fesoasoani i tagata o le vasega ia latou iloaina faailoga ia o le a oo mai ao lei oo i le Afio Faalua Mai o le Faaola ma ia uunaia ai tagata o le vasega ina ia saunia i latou lava mo lenei mea uiga ese.
Sauniuniga
-
Faitau, mafaufau loloto, ma tatalo e uiga i mau nei:
-
Iosefa Samita—Mataio 1:1–20 (Mataio 24:1–5, 9–13, 15–22). Ua muai tauina atu e Iesu le faatafunaina o Ierusalema.
-
Iosefa Samita—Mataio 1:21–55 (Mataio 24:6–8, 14, 23–51). Ua faamatalaina e Iesu ia faailoga o le a muai oo mai ao lei oo i lona Afio Faalua Mai ma aoao mai pe mafai faapefea ona saunia i latou ua ia filifilia mo lona afio mai.
-
-
Tusi faitau faaopoopo: Mareko 13; Luka 21:5–38; Mataupu Faavae ma Feagaiga 45:15–55..
-
Afai e maua le ata O le Afio Faalua Mai (62562; Taga Ata o le Talalelei 238), ia faaaoga i le taimi o le lesona.
-
Fautuaga mo le aoaoina atu: O se valaauga e aoao atu e le tau manaomia ai lou iloaina o mea uma e uiga i le talalelei, o lea e le tatau ai ona e matamuli pe afai e tuuina atu e se tagata o le vasega se fesili e le mafai ona e talia. Nai lo le faatupuina o sau lava tali, ia e tau atu e te leiloaina ma ofo atu o le a e taumafai e sailia se tali.
Faalautelega Fautuaina o le Lesona
Gaoioiga e Faatosina Mai Ai
Afai e talafeagai ai, ia faaaoga le gaoioiga lenei po o sau lava gaoioiga e amata ai le lesona.
Fai atu i le vasega e tilotilo i fafo i le faamalama ma matamata i le lagi. Afai e leai se faamalama i le potu, fesili atu i tagata o le vasega pe na faapefea le tau ina ua latou o mai i le lotu. Ona fai lea o se taumatematega e uiga i le tau. Mo se faataitaiga, afai e lagilelei le lagi ma e vevela foi fafo, ia e iite o le a toulu le kiona i ni nai itula. Afai e malulu ma timuga fafo ma e foliga mai o le a faaauau pea ona timuga mo sina taimi, ia iite o le a vevela ma matu fafo mo le lima minute.
Fai atu i tagata o le vasega po o le a so latou manatu i lau iite. A maea ona latou tali mai, ona tuuina atu lea i ai o fesili nei:
Gaoioiga e Faatosina Mai Ai
-
O le a sau iteite e uiga i le tau i isi itula ia e lumanai ai? O le a le mea na fesoasoani ia te oe i le faiga o lena iite?
-
E mafai faapefea e uiga vaaia o le tau o le a i ai ona aafia ai mea tatou te faia? (O tali e mafai ona aofia ai le masani ona tatou faia o ni sauniuniga e faatatau i nei faailoga. Mo se faataitaiga, tatou te faia ni fuafuaga mo gaoioiga i fafo pe afai e foliga mai o le a lagilelei le tau, po o le faia foi o ni sauniuniga faapitoa ina ia tatalia ai se matagi malosi.)
Ia faamanino atu o le iite i le tau o se tasi lea o tulaga tatou te faalagolago i ai i faailoga ina ia fesoasoani ia i tatou ia saunia mo mea o le a oo mai. Afai tatou te vaai i faailoga, o le a faaitiitia ai le avanoa e maua ai i tatou ae le o saunia. E faapea foi, o le vaavaai mo faailoga o le Afio Faalua Mai o Iesu Keriso e mafai ona fesoasoani lea ia i tatou ia tatou saunia ai mo lena mea ofoofogia. O lenei lesona o loo talanoaina ai nisi o faailoga na valoia e Iesu o le a muai oo mai ae lei oo i lona Afio Faalua Mai. (Atonu e te manao e faamanino atu o se faa’ite’ite e faama’oti mai ai se mea e mafai ona tupu, ae o se valoaga e faamaoti mai ai se mea o le a tupu. O se faaiteite e uiga i le tau e mafai ona liua ma faaseseina, ae o valoaga e uiga i le Afio Faalua Mai, o le a faataunuuina lava.)
Mau Talanoaina ma le Faaaogaina
Ao e aoaoina atu ia fuaiupu nei mai mau, ia fesoasoani i tagata o le vasega ina ia malamalama o le Alii na ia faaalia mai nei faamatalaga ina ia fesoasoani ia i tatou ia tatou saunia mo lona Afio Faalua Mai. E ui lava i faigata o aso e gata ai, e mafai lava ona tatou tulimatai atu ma le olioli i lenei mea uiga ese.
Ia faamatala atu o le Mataio 24 o loo aofia ai valoaga a le Faaola e uiga i le faatafunaina o Ierusalema ma lona Afio Faalua Mai. I le tele o taimi, o fuaiupu i lenei mataupu ua suia ma ua toe fesuiai, ua faia i nisi taimi ina ia faigata ona malamalama i ai po o le a le mea e tupu i lea fuaiupu patino. Ae peitai, o se vaega o lana faaliliuga musuia o le Tusi Paia, na faamanino mai ai e Iosefa Samita ia valoaga e lua ma toefuataiina mai isi faamatalaga faaopoopo. O lana faaliliuga musuia o le Mataio 24 o loo maua i le Iosefa Samita—Mataio i le Penina Tautele.
Faaaoga le tala o loo i le Iosefa Samita—Mataio a o outou talanoaina ia aoaoga faavae ma mataupu faavae o loo i lenei lesona. Faaali atu le ata o le Afio Faalua Mai i le taimi o le lesona atoa.
1. Ua muai tauina mai e Iesu le faatafunaina o Ierusalema.
Ia talanoaina le Iosefa Samita—Mataio 1:1–20 (tagai foi i le Mataio 24:1–5, 9–13, 15–22). Ia valaaulia tagata o le vasega e faitauina fuaiupu filifilia.
-
I nai aso ao lumanai le faasatauroga o Iesu, na malaga atu ai o ia ma nisi o ona soo i le Mauga o Olive. O a fesili e lua na fesiligia ai e le au soo ia Iesu? (Tagai Iosefa Samita—Mataio 1:4. Ia faamatala atu o le Iosefa Samita—Mataio 1:5–20 o le tali lea a le Faaola i le latou fesili muamua, lea e faatatau i le faatafunaina o Ierusalema. O le Iosefa Samita—Mataio 1:21–55 o le tali lea a le Faaola i le latou fesili lona lua, lea e faatatau i le Afio Faalua Mai.)
-
O le a le mea na valoia e Iesu e uiga i le malumalu i Ierusalema ma le aai lava ia? (Tagai Iosefa Samita—Mataio 1:2–3, 12.) O a faailoga na valoia e le Faaola o le a oo mai ae lei faatafunaina Ierusalema? (Tagai Iosefa Samita— Mataio 1:5–10.)
-
O le a le mea na tauina atu e Iesu i ona soo ina ia faia e taofia ai le faatafunaga? (Tagai Iosefa Samita—Mataio 1:11–15.) Aisea e taua ai le aua nei toe foi atu i o latou fale pe a latou sosola ese? (Tagai Luka 9:62; MFF 133:14–15.)
Ia faamatala atu e ui lava e toatele tagata Iutaia e lei talitonu o le latou aai tele ma le malumalu e mafai ona faatafunaina, ae na faataunuuina lava valoaga a le Alii i le T.A. 70. I lo latou talitonu faapea o le a sau lo latou Mesia ma fesoasoani ia te i latou i le taua, sa faasagatau ai tagata Iutaia i tagata Roma i le T.A. 66. E fa tausaga na lumanai ai ae faatafunaina uma e Roma le aai atoa. O i latou o e na faalogo i le Faaola ma sosola i atumauga na faasaoina. O i latou e lei faalogo i lenei fautuaga na faataapeapeina ma faaumatiaina.
2. Ua faamatalaina e Iesu ia faailoga o le a muai oo mai i lona Afio Faalua Mai.
Faitau ma talanoaina ia fuaiupu filifilia mai le Iosefa Samita—Mataio 1:21–55 (tagai foi Mataio 24:6–8, 14, 23–51). Ia faamanatu atu i tagata o le vasega o le fesili lona lua na tuuina atu e soo e faatatau lea i le Afio Faalua Mai o le Faaola ma le faatafunaga o e amioleaga e oo mai ai faatasi (o nisi taimi ua taua o le “iuga o le lalolagi”). Ao outou talanoaina ia faailoga ma faigata o le a muai oo mai i le Afio Faalua Mai, ia lisiina i luga o le laupapa.
-
O a faailoga o le Afio Faalua Mai o le Faaola o loo faamatalaina i le Iosefa Samita—Mataio 1:22? O a ni faamaoniga ua e vaai i ai ua faataunuuina ai lenei valoaga? E mafai faapefea ona tatou teenaina le faaseseina o i tatou e perofeta pepelo? (Tagai Mataio 7:15–20; MFF 45:57; 46:7–8.)
-
O a faailoga o le Afio Faalua Mai o loo taua i le Iosefa Samita—Mataio 1:23 ma le 28? O a faamaoniga ua e vaai i ai ua faataunuuina ai lenei valoaga? Na aoao mai le Alii e tatau ona “aua nei o tatou atuatuvale” ona o taua ma tala i taua. E mafai faapefea ona tatou maua le filemu i taimi faapea o faigata? (Tagai 1 Ioane 4:16–18; MFF 6:34–36; 45:34–35; 59:23.)
Na tuuina mai e Elder M. Russell Ballard le fautuaga lenei o le faamoemoe ma le uunaiga:
“E ui ina ua tau mai e valoaga ia i tatou e ao ona taunuu nei mea, e tele ma tele tagata ua faaali lo latou fefefe tele i le saoasaoa o le oo mai o mala i le lalolagi… . E moni lava, ua lava se pogai ua tatou maua tatou te atugalu loloto ai ona ua tatou vaai i le vave maua o ni tali i ni faafitauli ua foliga mai ua le mafo’ia ua latou faafetaiaia le aiga tagata. E ui lava i lenei ata pogisa, lea o le a faateleina le leaga, e le tatau lava ona tatou faatagaina i tatou e aveesea le faamoemoe! …
“… O loo pule le Alii. Na te silafia le iuga mai le amataga. Ua lava aoaoga ua ia tuuina mai ia i tatou na, afai e mulimuli ai, o le a fesoasoani tatou te saogalemu ai i soo se mala. O le a faataunuuina ona faamoemoega ma e i ai se aso o le a tatou malamalama ai i pogai e faavavau o le tutupu mai o nei mea uma. O lea la, e ao ai ia i tatou i aso nei ona faaeteete ia ‘aua tatou te soona popole, pe tatau foi ona tatou soona faia ni sauniuniga tetele, a o le mea e ao ona tatou faia, o le tausi o poloaiga a le Atua ma aua lava ne’i aveesea le faamoemoe!
“Ae o fea tatou te maua ai le faamoemoe i le taulotoaiga o tulaga faafatiatama’i faapena, atoa ma mala? E faigofie lava, o lo tatou faamoemoe e tasi mo se saogalemu faaleagaga i le gasologa o ia taimi o le vevesi, o le liliu atu lea o o tatou mafaufau ma loto ia Iesu Keriso… . O le faaofuina i le talita o le faatuatua, e mafai ai ona tatou faatoilaloina o tatou lui e tele o aso taitasi ma manumalo ai i o tatou vaivaiga sili ma mea e fefefe ai, i lo tatou iloaina lea afai tatou te faia le mea sili i le tausiga o poloaiga a le Atua, po o le a lava le mea e oo mai, o le a tatou le afaina lava” (Liahona, Ianuari 1993, 38–39).
-
O a faailoga o le Afio Faalua Mai o loo faamatalaina i le Iosefa Samita—Mataio 1:27 ma le 31? O faapefea ona faataunuuina nei valoaga i nei aso? (O le galuega faafaifeautalai ua faateleina, ma ua aoaoina ma taliaina le talalelei i le tele o nofoaga i le lalolagi atoa.) O le a se mea e mafai e i tatou uma taitoatasi ina ia fesoasoani ai i le faataunuuina o nei valoaga?
-
O a faailoga o le Afio Faalua Mai o loo faamatalaina i le Iosefa Samita—Mataio 1:29–30? O a ni faamaoniga ua e vaai i ai i nei valoaga ua faataunuuina? O a ni mea ua fautuaina ai i tatou e perofeta o aso e gata ai ina ia saunia ai mo faalavelave tutupu o le natura ia o le a muai oo mai ae lei oo i le Afio Faalua Mai?
-
O a faailoga o le Afio Faalua Mai o loo taua i le Iosefa Samita—Mataio 1:32–33?
-
Na tau atu e le Alii i ona soo i Ierusalema ina ia “tutu i nofoaga paia” (Iosefa Samita—Mataio 1:12), ma ua ia tuuina mai foi lea lava fautuaga i o tatou aso (MFF 87:8; 101:22). O a nisi o nofoaga paia ia e tatau ona tatou tutu ai? O le a faapefea ona fesoasoani nei nofoaga e puipuia i tatou i taimi faigata i aso e gata ai?
Na saunoa mai faapea Peresitene Ezra Taft Benson, “O alii paia ma tamaitai paia e tutu i nofoaga paia, ma o nei nofoaga paia e aofia ai o tatou malumalu, o o tatou falelotu, o o tatou fale, faapea ma siteki o Siona, lea e avea, e pei ona faailoa mai e le Alii, ‘ma se sulufaiga mai afa, ma le ita pe a liligi ifo e le faafefiloia i le lalolagi atoa’ (MFF 115:6)” (“Prepare Yourself for the Great Day of the Lord,” Brigham Young University 1981 Fireside and Devotional Speeches [1981], 68).
-
O le a le taitaiga na tuuina mai e Iesu ina ia fesoasoani ai ia i tatou ina ia aua nei faaseseina i aso e gata ai ao lei oo i lona Afio Faalua Mai? (Tagai Iosefa Samita—Mataio 1:37.) E mafai faapefea ona tatou faatamaoaigaina le afioga a le Alii? O faapefea ona fesoasoani le faatamaoaigaina o le afioga a le Alii ia te oe e foiaina ai le faaseseina?
-
O le a le mea na aoao mai e Iesu i fuaiupu nei ina ia fesoasoani ai ia i tatou ina ia saunia mo lona Afio Faalua Mai?
-
O le faataoto i le laau o le mati (Iosefa Samita—Mataio 1:38–40).
-
O le faatusatusaga o le Afio Faalua Mai i aso o Noa (fuaiupu 41–43).
-
O le valoaga i tagata e toalua sa galulue i le fanua ma tagata e toalua sa galulue i le olo saito (fuaiupu 44–46).
-
O le faataoto i le tagata lelei ma le gaoi (fuaiupu 47–48).
-
O le faataoto i le alii pule ma ana auauna (fuaiupu 49–54).
-
-
Aisea e taua ai lo tatou faaauau pea ona vaavaai ma sauniuni mo le afio mai o le Alii? E mafai faapefea ona tatou vaavaai ma sauniuni e faafetaiai i le Alii?
-
O le a se mea o le a tupu i e amiotonu pe a toe afio mai le Faaola? (Tagai Iosefa Samita—Mataio 1:37, 44–45, 50; 1 Tesalonia 4:16–18; MFF 88:96–98.)
Faaiuga
Ia molimau atu o valoaga mai tusitusiga paia e uiga i le Afio Faalua Mai o Iesu Keriso o le a faataunuuina lava. Ia faamamafa atu o le suesueina o aoaoga a le Faaola ma le mulimuli i fautuaga a perofeta soifua, e mafai ai ona tatou saunia e faafetaia’i le Keriso. Afai o le a tatou saunia, o le Afio Faalua mai o le a avea lea ma se aso matagofie mo i tatou.
Manatu Faaopoopo e Aoao Atu Ai
O le vaega lenei e lagolago atu ai i le otootoga o le lesona ua fautuaina. Atonu e te manao e faaaoga lenei manatu e avea o se vaega o le lesona.
O faailoga o le Afio Faalua Mai ua faaali mai i aso e gata ai
Ia faamatala atu na mauaina e le Perofeta o Iosefa Samita se faaaliga lea o loo tau soo mai ma faamanino mai ai valoaga na tuuina atu e Iesu i soo anamua. O lenei faaaliga o loo maua lea i le Mataupu Faavae ma Feagaiga 45. Tuu atu i tagata o le vasega e faatusatusa le Mataupu Faavae ma Feagaiga 45:15–55 i le Iosefa Samita—Mataio.
Atonu e te manao e faamanino atu faapea i totonu o le Mataupu Faavae ma Feagaiga 45:60–61, na fetalai atu ai le Alii ia Iosefa Samita ina ia amata ona faaliliuina le Feagaiga Fou. O le Iosefa Samita—Mataio o se vaega o lea faaliliuga musuia.