“Na Le Iloa Foi o Ia, A ua Maua”

Faamoemoega

Ina ia fesoasoani i tagata o le vasega ia malamalama i le olioli e maua mai pe a tatou salamo ma pe a tatou fesoasoani atu i isi ina ia salamo.

Sauniuniga

Faitau, mafaufau loloto, ma tatalo e uiga i mau nei:
1. Luka 15:1–10. O le faataoto i le mamoe na se, ma le tupe na le iloa, na aoao mai ai e Iesu le taua o agaga.
2. Luka 15:11–32. O le faataoto i le atalii faamaumauoa, na aoao mai ai e Iesu faapea e matuai tele le olioli o lo tatou Tama Faalelagi e faamagalo i le ua salamo. Na aoao foi e le Faaola ona soo ina ia latou loto faamagalo.
3. Luka 17:11–19. O se tagata na faamaloloina e Iesu mai le lepela ua toe foi atu e faafetai ia te ia.
Tusi faitau faaopoopo: Mataio 18:11–14.
Afai e maua ata O le Atalii Faamaumauoa (62155; Taga Ata o le Talalelei 220) ma le O Lepela e Toasefulu (62150; Taga Ata o le Talalelei 221), ia faaaogaina i le taimi o le lesona.
Fautuaga mo le aoaoina atu: E masani ona tuuina mai e Iesu ni fesili ina ia uunaiina ai le au faalogologo ina ia faaaogaina mataupu faavae na ia aoaoina (tagai Mataio 16:13–16; Luka 7:41–42). Ia saunia ma le agaga tatalo ia fesili na o le a uunaia ai tagata o le vasega e auai i le lesona ma o le a fesoasoani lea ia i latou ia malamalama ma faaaogaina mataupu faavae ua aoaoina. (Tagai O Le Aoao Atu—E Leai Se Isi Valaauga E Sili Ai, 66–73.)

Faalautelega Fautuaina o le Lesona

Gaoioiga e Faatosina Mai Ai

Afai e talafeagai ai, ia faaaoga le gaoioiga lenei po o sau lava gaoioiga e amata ai le lesona.

Ia valaaulia tagata o le vasega e faamatala atu se taimi na leiloa ai se mea e sili ona taua ia i latou po o se taimi foi na leiloa ai se tagata o le aiga. Ona tuuina atu lea o fesili nei:

Gaoioiga e Faatosina Mai Ai

O a ni ou lagona na i ai ina ua le iloa lena mea po o se tagata foi o le aiga? O a ni ou lagona ina ua toe maua lena mea po o lena foi tagata o le aiga?

Atonu e te manao foi e fai atu i tagata o le vasega ina ia faamatala atu ni mea na latou oo i ai i le leiloa ma le toe maua.

Ia faamalamalama atu e masani ona aoaoina e Iesu ia lesona faaleagaga e ala lea i le faatusatusaina i ni mea e masani ona tutupu i tagata. O lenei lesona o loo talanoaina ai nisi o faataoto ia o loo aoaoina ai le taua o le sailia ma le toe mauaina mai o e na leiloloa.

Mau Talanoaina ma le Faaaogaina

Ao outou talanoaina ia fuiaupu nei mai tusitusiga paia, ia fesoasoani i tagata o le vasega faapea e alolofa le Tama Faalelagi ma Iesu Keriso ia i tatou uma taitoatasi ma e finagalo ina ia tatou toe foi atu ma toe mau faatasi ma i laua.

1. Ua aoao mai e le Faaola le taua o agaga.

Faitau ma talanoaina le Luka 15:1–10. Ia faamatala atu na tuuina atu e Iesu le faataoto i le mamoe na se ma le faataoto i le tupe siliva ina ua mavae ona muimui le Au Faresaio ma le au tusiupu, “Ua talia e lenei tagata o e agasala, ua aai faatasi foi o ia ma i latou” (Luka 15:2).

I le faataoto i le mamoe na se, na tuua e le leoleo mamoe le ivasefuluiva mamoe ina ia sailia le tasi na le iloa (Luka 15:4). I le faataoto i le tupe siliva, na matuai saili ma le maelega e le fafine le tupe e tasi na le iloa (Luka 15:8). O le a se mea e mafai ona tatou aoaoina mai uiga o le leoleo mamoe ma le fafine? (Tagai MFF 18:10–13.)
O a ni auala atonu e “leiloa” ai se tagata? O le a lo tatou tiutetauave mo i latou o loo leiloloa? (Tagai Luka 15:4–5; Alema 31:34–35.)

Na saunoa mai faapea Peresitene Gordon B. Hinckley:

“O loo i ai nisi o o tatou lava tagata … o tagi mai i le tiga ma le mafatia ma le faanoanoa i le nofotoatasi ma le fefe. O la tatou galuega o se tiute maoae ma paia, o le aapa atu lea ma fesoasoani ia i latou, e siitia i latou, e fafaga i latou pe afai o fia aai, e tausia o latou agaga pe afai o galala mo le upumoni ma le amiotonu… .

“ … O loo i ai i latou sa mafanafana i le faatuatua, ae ua maalili nei lo latou faatuatua. O le toatele o i latou ua mananao nei e toe foi mai, ae ua leiloa pe faapefea nei ona fai. Ua latou manaomia ni lima faauo e aapa atu ia i latou. O se taumafaiga itiiti lava, e mafai ai ona toe aumaia le toatele o i latou e toe taumamafa i le laoai a le Alii.

“O’u uso e ma tuafafine, ou te faamoemoe lava, ou te tatalo o i tatou taitoatasi … o le a faia se faaiuga e saili i latou o loo manaomia le fesoasoani, o e o i ai i tulaga atuatuvale ma faigata, ma siitia i latou i le agaga alofa i totonu o le li’o a le Ekalesia, lea o le a mafana ai i lima malolosi ma loto alolofa, faamafanafana i latou, lagolagoina i latou, ma tuu atu ai i latou i le ala o le fiafia ma ni olaga aoga” (Liahona, Ianuari 1997, 103).
E tatau faapefea ona tatou tali atu i le toe foi mai o se tagata sa leiloa? (Tuu atu i tagata o le vasega e sailia se manatu o loo tau soo mai i le Luka 15:5, 6, ma le 9. Tagai foi i fuaiupu 7 ma le 10 ma le MFF 18:15–16.)

2. Na aoao mai Iesu faapea, e olioli le Tama Faalelagi i le faamagaloina o le tagata salamo.

Faitau ma talanoaina le Luka 15:11–32. Faaali atu le ata o le atalii faamaumauoa.

I le faataoto i le atalii faamaumauoa, o le a le mea na faia e le atalii laitiiti i lona tofi? (Tagai Luka 15:13. O a nisi o auala o loo faia e tagata i aso nei e faia ai sese e pei foi ona faia e le atalii faamaumauoa?
O le a le mea na tupu i le atalii faamaumauoa ina ua uma ona faatauga uma lona tofi? (Tagai Luka 15:14–16.) O le a se mea e faatatau i ai lea mea i aso nei?
Ina ua manaomia e le atalii faamaumauoa ni mea, o ai sa i ai i lena atunuu mamao sa alofa mo ia? (Tagai Luka 15:16.) O le a se mea e mafai ona tatou aoaoina mai lea mea?
O ai na mafaufau i ai le atalii ina ua ia iloaina e leai se tasi i lena atunuu mamao e alofa ia te ia? (Tagai Luka 15:17.) O le a se mea e mafai ona tatou aoaoina e uiga i le salamo mai uiga o le atalii? (Tagai Luka 15:18–19.)
O le a le mea na faia e le tama ina ua ia iloaina lona atalii ua toe foi mai? (Tagai Luka 15:20.) Na faapefea ona tali atu le tama i le faatoesega a lona atalii? (Tagai Luka 15:21–24.) E faapefea ona faatusatusa le tali a le tama e pei o le tali a le Alii pe a tatou salamo? (Tagai Luka 15:7; Mosaea 26:30; MFF 58:42.)
O a ni auala e pei ai i tatou o le atalii faamaumauoa? (Tagai i le upu sii o loo i lalo.) O le a le faamoemoe o loo tuuina mai e le faataoto i le atalii faamaumauoa ia i tatou?

I le faataoto i le atalii faamaumauoa, na saunoa mai ai Peresitene Gordon B. Hinckley faapea: “Ou te talosagaina outou ina ia faitau le tala lena. E tatau i matua uma ona faitau i ai ma toe faitau. Ua lava lona lautele e aofia ai auaiga uma. Ua lava foi le lautele e aofia ai tagata uma, aua pe le o i tatou uma ea o ni atalii ma ni afafine faamaumauoa, o e ua tatau ona salamo ma maua le faamagaloga alofa mutimutivale o lo tatou Tama Faalelalgi ona mulimuli ai lea i lana faataitaiga?” (Liahona, Novema 1991, 5–6).
Aisea na ita ai le atalii matua i le ala na taliaina ai e lona tama le atalii laitiiti? (Tagai Luka 15:25–30.) Na faapefea ona tali atu le tama i le faitio mai a le atalii matua? (Tagai Luka 15:31–32.) Aisea e faigata ai i nisi taimi ona taliaina se “atalii faamaumauoa” o le ua salamo? O le a se mea e mafai ona tatou aoaoina mai le tali a lenei tama i lona atalii ua toe foi mai? (Tagai Luka 15:32.)

3. O se tagata na faamaloloina e Iesu mai le lepela ua toe foi mai e faafetai atu ia te ia.

Faitau ma talanoaina le Luka 17:11–19. Faaali atu le ata o lepela e toasefulu.

Ao agai atu le Faaola i Ierusalema, na ia faamaloloina ai lepela e toasefulu (Luka 17:11–14). Mai le toasefulu o na lepela, e toafia na toe foi atu ma faailoa atu le loto faafetai? (Tagai Luka 17:15–16.) O a nisi o mafuaaga, ia e pei ai i tatou o isi lepela le lotofaafetai e toaiva, tatou te le faaalia atu lava le loto faafetai mo faamanuiaga ua tatou mauaina? Aisea e taua ai le faaali atu o le loto faafetai i le Alii?
E ui lava sa faamamaina uma lepela e toasefulu, ae na o le toatasi le tagata na toe foi mai na faamamaina atoatoa (Luka 17:14, 19). O le a le eseesega o le faamamaina ma le faaatoatoaina? (Tagai i le upu sii o loo i lalo.) E faapefea ona fesoasoani lo tatou loto faafetai ma le faatuatua ina ia avea ai i tatou ma tagata atoatoa?

Na aoao mai Epikopo Merrill J. Bateman: “I le avea ai ma se tagata atoa, o le lepela loto faafetai na faamaloloina e le gata i totonu ae o fafo foi. I lena aso, e toaiva lepela na faamaloloina i o latou tino, ae na o le toatasi sa i ai le faatuatua na faaatoatoaina ai” (Liahona, Iulai 1995, 16).

Faaiuga

Ia molimau atu tatou te lagonaina le olioli sili pe a tatou salamo ma foi mai i le Alii ma pe a tatou fesoasoani foi i isi ina ia foi mai. Atonu e te manao e faaali atu lou agaga talisapaia o faataoto a Iesu ma isi aoaoga ia e faaalia ai le alofa o le Atua mo lana fanau ma lona naunautaiga ina ia tatou fealofani.

Manatu Faaopoopo e Aoao Atu Ai

O mea nei e lagolago atu ai i le otootoga o le lesona ua fautuaina. Atonu e te manao e faaaoga le tasi po o le sili atu foi o nei manatu e avea o se vaega o le lesona.

1. O le faataoto i le auauna le aoga

Faitau ma talanoaina le faataoto i le auauna le aoga (Luka 17:5–10).

Na tuuina atu e Iesu lenei faataoto ina ua mavae ona talosaga atu ia Aposetolo ia te ia, “Ia faatuputeleina lo matou faatuatua” (Luka 17:5). O le a se mea e mafai ona tatou aoaoina mai lenei faataoto e uiga i le auala e mafai ai ona tatou faateleina lo tatou faatuatua? (O tali e mafai ona aofia ai le faateleina o lo tatou faatuatua e ala lea i le auauna atu i le Alii ma le maelega.)
Aisea e avea ai i tatou ma auauna le aoga e tusa lava pe tatou te faia mea uma ua poloaiina ai i tatou e le Alii? (Tagai Mosaea 2:20–25.) O le a se mea o faaalia mai e lenei faataoto e uiga i le alofa o le Alii mo i tatou?

2. O le faataoto i tagata faigaluega i le tovine

Faitau ma talanoaina le faataoto i tagata faigaluega i le tovine (Mataio 20:1–16).

I lenei faataoto, o le a le mea na mauaina e tagata faigaluega uma i le tovine?

Ia faamamafa atu o i latou sa galulue i le itula e tasi na tutusa lelei o latou totogi ma i latou sa galulue i le aso atoa. E le tatau ona tatou popole pe o ai e tele ana mea e maua ae o ai e tele ana mea e fai i le galuega a le Alii. O le Faamasino atoatoa ia o tagata uma, na te silafiaina o tatou loto, o le a ia faamasino i tatou i le alofa ma tuuina mai “se mea e tusa ai” (Mataio 20:4, 7).

3. Ata Vitio

O le vaega lona fa o “Aganuu a le Feagaiga Fou,” o se vaega mai le Ata Vitio o le Feagaiga Fou (53914), e mafai ona aoga e faamalamalamaina ai le tulaga sa taulimaina ai lepela i taimi o le Feagaiga Fou ma se olaga maoae, o faamanuiaga o le suiga o le olaga mo lepela e toasefulu ina ua faamaloloina e Keriso.

O lenei vaega o loo aofia ai foi faamatalaga e uiga i le auala na fuaina ai e tagata Iutaia o le Feagaiga Fou le taimi. Atonu e te manao e faaali atu lenei vaega pe afai tou te talanoaina le faataoto i tagata faigaluega i le tovine (tagai i le manatu faaopoopo lona lua e aoao mai ai), ina ia fesoasoani ai i tagata o le vasega ina ia malamalama lelei i le pule o le tovine ina “ua alu atu i le itu aso e tolu” faapea foi ma le ono, iva, ma le itu aso e sefulu ma le tasi (Mataio 20:3, 5–6).