Aoga Sa: Aoaoga Faavae o le Talalelei
Lesona 14: ‘O Ai Lo’u Tuaoi?’

Lesson 14

“O Ai Lo’u Tuaoi?”

Mataio 18; Luka 10

Faamoemoega

Ina ia fesoasoani i tagata o le vasega ina ia latou lotomaualalo, faamagalo i isi, ma faaali atu le alofa moni i isi.

Sauniuniga

  1. Faitau, mafaufau loloto, ma tatalo e uiga i mau nei:

    1. Mataio 18:1–6, 10–11, 14. Na aoao mai Iesu e tatau ona liua i tatou faapei o se tamaitiiti ina ia ulu atu ai i le malo o le lagi.

    2. Mataio 18:15, 21–35. O le faataoto i le auauna leaga, na aoao mai ai Iesu e uiga i le faamagalo atu.

    3. Luka 10:25–37. O le faataoto i le Samaria agalelei, na aoao mai ai Iesu e uiga i le alofa moni.

  2. Tusi faitau faaopoopo: Mareko 9:33–50; Mosaea 3:17–21; 4:16–19, 26.

  3. Afai e maua mea nei, ia faaaoga i le taimi o le lesona:

    a. O le ata O Keriso ma Tamaiti (62467; Taga Ata o le Talalelei 216) ma le O Le Samaria Agalelei (62156; Taga Ata o le Talalelei 218).

  4. Afai e te faaaogaina le gaoioiga e faatosina mai ai, ia valaaulia se matua e talanoa atu i le vasega e pei ona otootoina mai i le lesona.

  5. Fautuaga mo le aoaoina atu: Ia valaaulia ni tagata o le vasega (po o nisi tagata o le uarota) ina ia fesoasoani atu i le lesona e ala lea i le tuuina atu o se lipoti, fetufaai atu se tala, tuuina atu se molimau, po o le fesoasoani atu foi i soo se isi lava auala. Afai e faia ia tofiga, ia manino lelei le mea o loo e manao e faia e lena tagata ma le umi e te manao na te faatinoina ai. (Tagai O le Aoao Atu— E Leai Se Isi Valaauga e Sili Ai, 136, 139.)

Faalautelega Fautuaina o le Lesona

Gaoioiga e Faatosina Mai Ai

Afai e talafeagai ai, ia faaaoga le gaoioiga lenei po o sau lava gaoioiga e amata ai le lesona.

Ia valaaulia se matua faatasi ma se tamaitiiti (tolu i le fa tausaga) e aumai i le vasega, ia faailoa atu o ia, ma faamatala faapuupuu atu nisi o uiga tausaafia o le tamaitiiti. A maea le faamatalaga a le matua, ia fai atu i tagata o le vasega e mafaufau i ni uiga faatamaitiiti ia e finagalo Iesu ina ia tatou maua. Ia lisi i luga o le laupapa ia tali.

Ia faamatala atu o lenei lesona o le a talanoaina ai le taua o le atinaeina o ni uiga faatamaiti ma le tausia o tagata uma i le agalelei ma le lotomaualalo.

Mau Talanoaina ma le Faaaogaina

Ao e aoaoina atu fuaiupu nei mai tusitusiga paia, ia talanoaina pe mafai faapefea ona tatou mulimuli i aoaoga a le Faaola e uiga i le lotomaualalo, faamagalo atu, ma le alofa moni.

1. Na aoao mai Iesu e tatau ona avea i tatou e faapei o tamaiti

Faitau ma talanoaina le Mataio 18:1–6, 10–11, 14.

  • O le a sou manatu aisea na popole ai le au soo po o ai e sili i le malo o le Alii? (Mataio 18:1; Mareko 9:33–34). O faapefea ona tatou faia foi ni sese faapea i nisi o taimi? E mafai faapefea ona tatou tuueseina nei popolega?

  • Faaali atu le ata o Iesu ma tamaiti. O le a le fautuaga a Iesu ia i latou o e naunau ia mauaina le sili i lona malo? (Tagai Mataio 18:2–4; Mareko 9:35.) Aisea e faigata ai i nisi o taimi ona mulimuli i lenei fautuaga? E faapefea ona faatusatusa lenei fautuaga i le mea o loo aoao mai e le lalolagi e uiga i le mauaina o le tulaga sili?

  • O le a le uiga o le avea faapei o tamaiti? (Tagai Mosaea 3:19. Ia faamatala atu e ui lava o tamaiti e le atoatoa, ae tele ni o latou uiga e tatau ona tatou atinaeina ina ia maua ai le malo o le lagi. O nei uiga e aofia ai le lotomaualalo, agamalu, ma se naunautaiga ina ia talitonu.) O a ni mea ua e aoaoina mai tamaiti? E mafai faapefea ona avea atili i tatou e pei o tamaiti ma ia sili ona gauai atu i le finagalo o lo tatou Tama o i le Lagi?

  • O le a le uiga “o se na te faatausuai se tasi o i latou nei”? (I lenei fuaitau, o le upu faatausuai o lona uiga o le faamafua ai ona tautevateva.) O a nisi o auala o loo faamafua ai e tagata ia tamaiti ina ia tautevateva? (O tali e mafai ona aofia ai le avea ma se faataitaiga leaga ia i latou, faitioina leaga o i latou, toilalo e aoao i latou, ma le faasaunoa ia i latou.) O le a se finagalo o le Alii i nei soligatulafono? (Tagai Mataio 18:6.)

    Na saunoa mai Elder M. Russell Ballard: “Ua matou faalogo i lipoti o matua po o latou o loo vaaia ia fanau o e ua matuai mamao ese lava mai le Agaga o Keriso, o loo latou faasaunoa ma faia faatautala fanau. E tusa po o lenei faasaunoa e faaletino, po o upu, po o le tau leiloaina foi ae tutusa le ogaoga ma le faasaunoa i lagona, o se matuai tetee lava lea ma se soligatulafono mamafa i le Atua” (Liahona, Iulai 1991).

  • E mafai faapefea ona avea lo tatou faapei o tamaiti e fesoasoani ai ia i tatou ina ia tatou popole mo tamaiti? O le a se mea e mafai ona tatou faia ina ia faataunuuina ai le finagalo o le Atua “ina ia le fano se tasi o i latou nei e faatauvaa”? (Mataio 18:14).

2. O le faataoto i le auauna leaga, na aoao mai ai Iesu e uiga i le faamagalo atu.

Faitau ma talanoaina le Mataio 18:15, 21–35.

  • I le Mataio 18:15, o le a le mea na fetalai mai le Alii e tatau ona tatou faia pe afai e agaleagaina i tatou? Aisea e avea ai lenei auala ma auala sili e foiaina ai ni feeseeseaiga?

  • Na faapefea ona tali atu Iesu ia Peteru ina ua fesili Peteru pe faafia ona ia faamagalo atu? (Tagai Mataio 18:22. Ia faamatala atu na faaaogaina e Iesu lenei fuainumera maualuga ina ia aoao ai e tatau ona tatou faamagalo atu pea i isi.) Aisea e faigata ai i nisi taimi ona faamagalo atu? O faapefea ona faamanuiaina oe ao e faamagalo atu i isi po o le faamagaloina foi o oe e i latou?

  • Ina ia faamamafaina atili pea le taua o le faamagalo atu i isi, na tuuina mai ai e Iesu le faataoto i le auauna leaga (Mataio 18:23–35). O ai o loo faatusa i ai le tupu ma auauna? (Tagai Mataio 18:35. O le tupu o le Tama Faalelagi, o auauna o i tatou ia.) E faapefea ona faatusa i tatou i auauna a le tupu i lo tatou nofo aitalafu ai i le Alii? (Tagai Mataio 18:24–27.) O le a se mea e tatau ona tatou faia ina ia faamagaloina ai i tatou mai a tatou “aitalafu”?

  • O le a se mea e mafai ona tatou aoaoina mai le faataitaiga a le tupu e uiga i le faamagalo atu i isi? (Tagai Mataio 18:33.) O a nisi tulaga matautia o le le faamagalo atu i isi? (Tagai Mataio 18:34–35.)

3. O le faataoto i le Samaria agalelei, na aoao mai ai Iesu e uiga i le alofa moni.

Faitau ma talanoaina le Luka 10:25–37. Faaali atu le ata o le Samaria agalelei.

  • Na faapefea ona tali atu Iesu i le aoao tulafono o le na fesili po o le a le mea e tatau ona ia faia ina ia maua ai le ola e faavavau? (Tagai Luka 10:25–28.) E faapefea ona fusia e poloaiga o le alofa i le Atua ma o tatou tuaoi ia le talalelei atoa? E mafai faapefea ona tatou matuai usiusitai atoatoa i nei poloaiga?

  • Na faapefea ona tali atu Iesu ina ua fesiligia e le aoao tulafono, “O ai foi le tagata ma te tuaoi?” (Tagai Luka 10:29–37.) O le a se mea o loo aoao mai e lenei faataoto e faatatau lea po o ai o tatou tuaoi?

    Na saunoa mai Peresitene Howard W. Hunter: “E ao ina tatou manatua e ui lava tatou te faia ni a tatou uo, o le Atua na ia faia o tatou tuaoi—i soo se mea lava. O le alofa e le tatau ona i ai sona tuaoi; e le tatau ona vaapiapi o tatou faamaoni” (Liahona, Ianuari 1987, 36).

  • O le a le mea na faia e le faitaulaga ma le sa Levi ina ua la vaaia le tagata ua fasia ma ua manua? (Tagai Luka 10:31–32.) O a nisi o auala o loo moomia ai e tagata le fesoasoani i aso nei? O a nisi o mafuaaga tatou te le fesoasoani ai i isi o loo i ai ni manaoga? (Tagai Mosaea 4:16–19 mo le tasi faataitaiga.)

  • Na faapefea ona fesoasoani le Samaria agalelei i le tagata o le ua fasia ma ua manua? (Tagai Luka 10:33–35.) O a ni uiga o se tuaoi lelei sa i ai i le Samaria agalelei? O faapefea ona faamanuiaina oe e ni “Samaria agalelei”? E mafai faapefea ona avea i tatou ma ni Samaria agalelei”? (Tagai Mosaea 4:26.)

Faaiuga

Ia molimau atu i le taua o le mulimuli i faataitaiga a le Faaola e ala lea i le faalotomaualaloina o i tatou lava, faamagalo atu i isi, ma faaali atu le alofa moni mo isi. Ia luiina le vasega ina ia ola ai i nei aoaoga.

Manatu Faaopoopo e Aoao Atu Ai

O mea nei e lagolago atu ai i le otootoga o le lesona ua fautuaina. Atonu e te Ymanao e faaaoga le tasi po o le sili atu foi o nei manatu e avea o se vaega o le lesona.

1. Maria ma Mareta

Tuu atu i se tagata o le vasega e faitauina le Luka 10:38–42.

  • Na faapefea ona auauna atu Mareta i le Alii? O le a le “vaega lelei” lea na filifilia e Maria? E faapefea ona tatou “pupu o tatou loto i le fatuaiga” i nisi taimi ae ua tatou le taliaina ai Iesu e pei ona tatau ona tatou faia? O le a se mea e mafai ona tatou aoaoina mai nei fuaiupu?

2. “Ina tuu maia o tamaiti e o mai ia te au” (Mareko 10:14)

Ao outou talanoaina aoaoga a le Faaola lea e tatau ona avea i tatou e pei o tamaiti, e mafai foi ona e manao ina ia talanoaina le tala i lona faamanuiaina o tamaiti i le Mareko 10:13–16.

  • Na faapefea ona tali atu soo o Iesu ina ua avatu tamaiti ia te ia? (Tagai Mareko 10:13.) O le a le mea na tau atu e Iesu i ona soo? (Tagai Mareko 10:14–15.) O le a le mea na faia e Iesu mo tamaiti? (Tagai Mareko 10:16.) O le a se mea e mafai ona tatou aoaoina e uiga ia Iesu mai le tala lenei? E mafai faapefea ona tatou mulimuli lelei i le faataitaiga na ia faia?

3. Talanoaga faaopoopo o le Mataio 18

  • Ia talanoaina le Mataio 18:8–9 ma le Mareko 9:43–48 (tagai foi Mareko 5:29–30). O le a le uiga o nei fuaiupu? O le Faaliliuga a Iosefa Samita o loo faailoa mai ai nei elemene leaga ao taitaiseseina i tatou e tagata. E sili atu ona faamuta la tatou masaniga ma tagata nai lo le faatagaina o i latou e taitaiina atu i tatou i le agasala.)

  • O le Faaliliuga a Iosefa Samita o le Mataio 18:11 o loo faamaumauina ai le faapea mai o Iesu o tamaiti e le manaomiaina le salamo. Aisea? (Tagai Moronae 8:11–12.) E faapefea ona “ola tamaiti ia Keriso”? (Tagai Moronae 8:12; MFF 29:46–47.) O a mea e tatau ona tatou faia ina ia tatou “ola ai ia Keriso”? (Tagai Mataio 18:4; Mosaea 3:19; Moronae 8:10.)

  • Faitau le Mataio 18:11–14. E mafai faapefea ona faatatau lenei faataoto i le mamoe na se ia i tatou? Na faapefea ona faamanuiaina oe po o se isi e te iloa ona o se tasi e mulimuli i le mataupu faavae o lenei faataoto?

4. “Ua tofia foi e le Alii isi fitugafulu” (Luka 10:1)

  • Ia talanoaina le Luka 10:1–24. E faapefea ona faatusatusa ia faatonuga na tuuina atu e le Alii i Fitugafulu ma faatonuga na ia tuuina atu i le Toasefululua i le Mataio 10? O a tiutetauave o Fitugafulu i aso nei? (Tagai MFF 107:25, 34, 38, 93–97.)

5. O le paia o le sootaga i le faaipoipoga

Ia faamatala atu o le Mataio 19:1–12 o loo faamatalaina ai se tulaga na taumafai ai le Au Faresaio e maileia ai Iesu e ala lea i le fesili atu ia te ia i le faatulafonoina o le tete’a (tagai foi Mareko 10:1–12). O le tete’a o se mataupu lea sa tele ina talanoaina i taitai ma tagata Iutaia atamamai, ma sa faamoemoe lava le Au Faresaio o le tali a Iesu i le latou fesili o le a faatupuina ai le feitagai i Iutaia. Tuu atu i se tagata o le vasega e faitau leotele le Mataio 19:3–9.

  • O le a le tali a Iesu i le fesili a le Au Faresaio i le fuaiupu 3? (Tagai Mataio 19:4–6. Na ia tau atu i ai o le tete’a e lei faauuina e le Atua.) Aisea na faatagaina ai e Mose le tete’a i tagata Isaraelu? (Tagai Mataio 19:7–8.)

Ia faamatala atu, o aso anamua i Isaraelu, e mafai e se alii ona tuuese, po o le tete’a ma lona toalua ona o ni mafuaaga iloga. Na aoao mai e Iesu, i totonu o se lalolagi atoatoa, e pei o le malo selesitila, e le mafai ona i ai le tete’a. Talu ai ona o le lalolagi e lei taitai ona atoatoa, o loo faatagaina ai pea le tete’a ae le tatau ona tupu sei vagana ni tulaga sili ona ogaoga. O loo faailoa mai i le Mataio 19:9 faapea o se tagata na te faatea i lona toalua ona o se mafuaaga e le matuia o loo faaipoipo pea o ia i lona toalua i le silafaga a le Atua, ma o lea ua ia mulilua ai pe afai e faaipoipo atu i se isi tamaitai. (Tagai James E. Talmage, Jesus the Christ, 3rd ed. [1916], 473–75, 484.)

  • O a ni tulaga o le lotomaualalo, lotofaamagalo, ma le alofa moni e faatinoina i se faaipoipoga faamanuiaina? E mafai faapefea e lo tatou tauivi ina ia avea faapei o Keriso ona fesoasoani ia i tatou i faaipoipoga ma isi fesootaiga?

  • E mafai faapefea ona tatou fesoasoani i tagata o e ua mafatia i aafiaga o le tete’a?

6. Gaoioiga a le autalavou

Tusi (pe tuu atu i tagata o le vasega) ia fesili e uiga i le lesona i luga o ni fasi pepa laiti. (I le avea ai ma se gaoioiga e toe iloilo ai, e mafai ona e filifilia ni fesili tonu mai vaega taitasi o le lesona.) Tuu fasi pepa i totonu o se taga po o se atigi pusa. Tuu atu i tagata o le vasega e faatulaga o latou nofoa ina ia faataliolio, ma tuu le taga po o le atigi pusa i luga o se nofoa i le ogatotonu o le lio. Fai atu i tagata o le vasega e auauai i le aveeseina mai o fesili mai le taga po o le atigi pusa ma tali i ai.

Lolomi