“A ia Outou Muai Saili le Malo o le Atua”

Mataio 6–7

Faamoemoega

Ina ia uunaiina tagata o le vasega ina ia matuai avea ma ni soo faamaoni o Iesu Keriso.

Sauniuniga

Faitau, mafaufau loloto, ma tatalo e uiga i mau nei, o le faaauauina lea o le Lauga i le Mauga:
1. Mataio 6:1–6, 16–21. Na aoaoina e Iesu ona soo ina ia fai a latou meaalofa, tatalo, ma anapogi ia aua nei iloa e tagata ma ia toloa’i ‘oa o le lagi ae le o le lalolagi.
2. Mataio 6:7–13; 7:7–11. Na ia faaali atu i ona soo le ala e tatalo ai ma aoao atu o le a faamanuiaina e le Tama Faalelagi i latou o e ole atu i mea latou te manaomia.
3. Mataio 6:14–15; 7:1–6, 12. Na aoao atu e Iesu ona soo ina ia faamagalo atu i isi, ia faamasino ma le tonu, ma fai mea latou te mananao e fai mai e isi ia i latou.
4. Mataio 6:22–34; 7:13–29. Na ia aoaoina ona soo faapea o le a faamanuiaina i latou mo le auauna atu i le Tama Faalelagi ma le faia o lona finagalo.
Mau faitau faaopoopo: Luka 6:37–49; 11:1–13, 34–36; 12:22–34; 16:13; 3 Nifae 13–14.
Afai e maua le ata o le Lauga i le Mauga (62166; Taga Ata o le Talalelei 212), ona faaaoga lea i le taimi o le lesona:
Atonu e te manao e te sauni e usu le “Tagata Poto ma le Tagata Valea” (Tusipese a Tamaiti, 132) faatasi ma tagata o le vasega.
Fautuaga mo le aoaoina atu: E mafai e tala ona faamatalaina mataupu faavae o le talalelei ma faagauai mai ai tagata o le vasega e pei ona mafai ai e nai isi metotia faafaiaoga. E masani ona faaaogaina e Iesu ia tala e aoao atu ai ni lesona taua poo le faamanino atu ai o ni manatu moni. Ao e sauniaina au lesona, ia mafaufau pe mafai faapefea ona e faaaogaina ia tala ina ia fesoasoani ai i tagata o le vasega ia malamalama i mataupu faavae o le talalelei. A e faamatalaina atu se tala, ia mautinoa ia malamalama tagata o le vasega pe o se tala moni po o se tala faatusa na e fauina e oe lava ina ia faamanino ai se tulaga. (Tagai i le O Le Aoao Atu—E Leai Se Isi Valaauga e Sili Ai [36123 890], 189–90).

Faalautelega Fautuaina o le Lesona

Gaoioiga e Faatosina Mai Ai

Afai e talafeagai ai, ia faaaoga le gaoioiga lenei po o sau lava gaoioiga e amata ai lau lesona.

Faamatala atu le tala lenei i ni au lava upu:

Sa talanoa ia Elder William R. Bradford o le Au Fitugafulu ma le epikopo o se uarota sa galulue le latou autalavou i le sailia o tupe mo se gaoioiga. Sa talosagaina e le epikopo ia Elder Bradford pe na te fesoasoani i le autalavou ina ia maua so latou faalauiloaga ma tulaga aloa’ia ona o mea ua latou faia. O le mea na ofo ai le epikopo ina ua tali atu Elder Bradford e leai. Na ia faapea atu ua fiafia lava o ia ona o le galulue malolosi o le autalavou, ae le taua le faalauiloaina atu o i latou i le lautele o tagata mo lena galuega.

Ina ua fuafua le autalavou e foai atu la latou tupe i tupe lautele a le Ekalesia mo faifeautalai nai lo le faaaogaina mo le gaoioiga, sa latou mananao e pue so latou ata faatasi ma Elder Bradford ao latou tuuina atu le foai, ma sa latou mananao foi i lea ata ina ia tuuina i se nusipepa. Na toe faaofo foi i latou e Elder Bradford i lona faapea atu i ai e “leai.” Na ia tau atu i le epikopo: “Atonu e te manao e mafaufau e fesoasoani i lau autalavou ina ia aoaoina se tulafono maualuga o le faalauiloaina. O le faalauiloaina mai luga e toafilemu. E matuai faaeteete lava ma toafilemu le faamaumauina iina. Tuu atu ia i latou ia latou lagonaina le olioli ma teuina lena olioli i o latou loto ma agaga lea e maua mai galuega e faia e aunoa ma le tau faalauiloaina ma faia ma le le manatu faapito” (Liahona, Ianuari 1988, 72).

Gaoioiga e Faatosina Mai Ai

O a ni lesona ua tatou aoaoina mai le tali a Elder Bradford i le autalavou?

Ia faamanino atu o le tasi lesona e mafai ona tatou aoaoina o le tatau lea ona tatou faia mea lelei aua tatou te alolofa i le Atua ma mananao e faamalie o ia, ae le faapea ina ia tatou mananao e maua mai se faalauiloaina mai isi tagata. O se tasi lea o uiga o se soo moni o Iesu Keriso.

Tusi ia Soo Moni i luga o le laupapa. Ao outou talanoaina le Lauga i le Mauga, ia lisi i lalo uiga o se soo moni na aoao mai e le Faaola i lenei lauga.

Mau Talanoaina ma le Faaaogaina

A o e aoaoina atu fuaiupu nei mai tusitusiga paia, ia uunaiina tagata taitoatasi o le vasega e mafaufau i se mea na te manaomia ina ia fai e avea atili ai ma se soo faamaoni ma le gauai o Keriso. Ia uunaiina tagata o le vasega e fetufaai mea na latou oo i ai lea e faatatau i mataupu o se soo moni.

1. O soo moni latou te faia mea tonu mo mafuaaga tonu.

Faitau ma talanoaina le Mataio 6:1–6, 16–21.

Aisea na taufaasalaina ai e Iesu ia nisi tagata mo lo latou faia o mea lelei e pei o le foai atu (tuuina atu o mea mo e matitiva), tatalo, ma anapogi? (Tagai Mataio 6:1–2, 5, 16. Sa latou faia nei mea mo mafuaaga sese.) Na ta’ua e Iesu nei tagata o tagata pepelo. O le a le tagata pepelo? (O se tagata e faafoliga e i ai ni uiga lelei ae peitai e leai; o se tagata e foliga mai e amiotonu ae leai. Tagai Mataio 15:8; Luka 11:39.)
O le a le taui o le a maua e tagata o e latou te faia mea lelei ina ia vaai atu i ai isi? (Tagai Mataio 6:2, 5, 16.) O a mea atonu tatou te faia ina ia iloa e isi nai lo le faamalieina o le Atua? E mafai faapefea ona tatou faamamaina o tatou uiga mo le auauna atu ma le faia o isi galuega lelei?
I lenei lauga, o le a le mea na aoao mai e Iesu e tatau ona tatou faasilisiliina? (Tagai Mataio 6:19–21.) O le a le uiga o le “toloa’i … oa i le lagi”? O a nisi o ‘oa faalelagi e mafai ona tatou sailia? (Tagai MFF 18:14–16 ma le 130:18–19 mo faataitaiga e lua.)
O le a le uiga o le “mea e i ai a outou ‘oa, e i ai atoa foi ma o outou loto”? E mafai faapefea ona tatou fuafuaina mea tatou te teuina? (O se tasi tulaga o le iloiloina lea o le aofaiga o le taimi, tupe, ma manatu tatou te tuu atu i se mea.) O a mea o loo toloa’i e tagata i aso nei? Fai atu i tagata o le vasega e mafaufau i mea latou te toloaiina ma fuafua ma le filemu po o a mea o loo ta’uina mai e nei oa e uiga i le mea o loo i ai o latou loto.

2. O soo moni e mulimulitai i le faataitaiga a le Faaola i le tatalo.

Faitau ma talanoaina le Mataio 6:7–13; 7:7–11. Ia faamanino atu o le Mataio e 6:9–13 ua lausilafia o le Tatalo a le Alii.

O le a le mea o loo aoaoina mai ai i tatou e le Tatalo a le Alii i le ala e tatau ona tatou tatalo ai? (Tagai Mataio 6:9–13.)
Na faapefea ona faaalia i le Tatalo a le Alii le faaaloalo ma le migao o Iesu mo le Tama Faalelagi? E mafai faapefea ona tatou faaalia lo tatou faaaloalo ma le migao mo le Tama Faalelagi pe a tatou tatalo?

Na faamatala mai e Elder Dallin H. Oaks le ituaiga gagana e tatau ona tatou faaaogaina pe a tatou tatalo: “ O le gagana faapitoa o le tatalo e eseese ituaiga e faia ai i gagana eseese, ae e tutusa lava le mataupu faavae. E tatau ona tatou faia a tatou tatalo i lo tatou Tama Faalelagi i upu o lena gagana e o faatasi ma le alofa ma le faaaloalo ma le migao ma le vavalalata… . O alii ma tamaitai o e fia faaali atu le faaaloalo o le a latou faaalu le taimi e aoao ai le gagana faapitoa o le tatalo” (Liahona, Iulai 1993, 20).
E mafai faapefea ona tatou aloese mai le “tautu i upu” pe a tatou tatalo? (Tagai Mataio 6:7.)
Talu ai ua silafia e le Tama Faalelagi mea tatou te manaomia ae tatou te lei tatalo atu (Mataio 6:8), aisea la e moomia ai ona tatou tatalo? Aisea e moomia ai le ole atu, saili atu, ma le tuitui atu (Mataio 7:7) mo lo tatou alualu i luma faaleagaga? E mafai faapefea ona tatou saili atu ma le maelega mo le fesoasoani a lo tatou Tama Faalelagi?
E faapefea ona tatou malamalama i le folafolaga a le Faaola faapea “ai se ole atu, e maua e ia”? (Mataio 7:8). Aisea tatou te le maua ai i nisi taimi mea tatou te ole atu ai i le taimi lava lena tatou te ole atu ai po o se ala foi tatou te manaomia ai? (Tagai 3 Nifae 18:20.) Na faapefea ona e iloaina e silafia e le Atua le mea e sili ona lelei mo oe?

3. O soo moni latou te tausia lelei isi tagata.

Faitau ma talanoaina le Mataio 6:14–15; 7:1–6, 12.

O le a sou manatu aisea na poloaiina ai i tatou e le Faaola e faamagalo atu i isi? E mafai faapefea ona sili atu lo tatou loto faamagalo?
O le Faaliliuga a Iosefa Samita o loo faasao’ina ai le Mataio 7:1 ina ia faitauina faapea e le tatau ona tatou faamasino atu ma le le amiotonu ina ia le faamasinoina ai i tatou; ae tatau ona tatou faamasino atu ma le tonu (tagai i le Faaliliuga a Iosefa Samita, Mataio 7:2). O le a le faamasinoga tonu? O le a se leaga e oo mai ia i tatou ma i latou e faamasinoina pe a tatou faamasino ma le le tonu? E mafai faapefea ona tatou mautinoa ua tatou faamasino ma le tonu? (Tagai Mataio 7:3–5; Moronae 7:14–18.)
Na fetalai mai Iesu faapea o se tagata e taumafai ma le amioletonu e faasao i isi o le tagata pepelo ia (Mataio 7:4–5). E faapefea ona avea le faamasino ma le le tonu ma faailoga o se tagata pepelo?
O le aoaoga i le Mataio 7:12 e masani ona ta’ua o le Tulafono Faaauro. O a ni mea na oo ia te oe ua faailoa atu ai ia te oe le taua o lenei mataupu? E faapefea ona avea le mulimuli i le Tulafono Faaauro ma auala e avea ai i tatou ma soo sili ona lelei o Iesu Keriso?

Na faamatalaina e Elder Marvin J. Ashton se fonotaga na iloiloina ai e se vaega o tagata o le Ekalesia le fesili “E mafai faapefea ona iloa se tagata ua liua ia Iesu Keriso?”

“E tusa ma le fasefululima minute na taliina ai e i latou sa auai lenei fesili, ma sa tusia uma i lalo ma le faaeteete e le taitai ia tali taitasi i luga o le laupapa. O tali uma lava sa talafeagai ma ’anoa. Ae ina ua tuanai sina taimi, sa tape ese uma ai lava e lenei taitai maoae mea sa ia tusia. Ona ia faailoa mai lea faapea o tali uma lava e taua ma taliaina, ae na ia aoaoina atu se aoaoga sili ona taua: ‘O le faailoga sili ona lelei ma manino e iloa ai lo tatou alualu i luma faaleagaga ma le o mai ia Keriso o le ala lea tatou te tausia ai isi tagata.’”

Na faaopoopo mai Elder Ashton e faapea: “O le ala tatou te tausia ai tagata o o tatou aiga, o a tatou uo, o i latou tatou te galulue i aso taitasi, e pei lava o le taua o nisi o mataupu faavae iloga o le talalelei ia tatou te faamamafaina i nisi o taimi” (Liahona, Iulai 1992, 20).

4. O soo moni latou te auauna atu i le Atua ma faia lona finagalo.

Faitau ma talanoaina ia fuaiupu filifilia mai le Mataio 6:22–34; 7:13–29.

Aisea e le mafai ai ona auauna i le Atua ma mamone, po o le lalolagi? (Tagai Mataio 6:24.) O a faamanuiaga ua folafola mai e le Atua ia i latou o e auauna atu ia te ia? (Tagai Mataio 6:25–33; MFF 11:7.)
Na folafola mai e Iesu faapea afai tatou te “muai … saili le malo o le Atua,” o le a foaiina mai ia i tatou mea uma lava tatou te manaomia (Mataio 6:33). O a ni mea na oo ia te oe ua fesoasoani ai ia te oe ia maua se molimau i lenei folafolaga?
E faapefea ona aveesea e mea o lenei lalolagi lo tatou faamaoni ma le auauna atu i le Atua? O a nisi o auala atonu e faaosoosoina ai i tatou ina ia sailia mea o le lalolagi ia faamuamua nai lo mea a le Atua? (O tali atonu e aofia ai le faatali seiloga e uma ona faatau mea tatou te mananao i ai pe moomia ona faatoa totogi lea o le sefuluai po o le fuafua e aua nei avea se misiona talu ai ona o le tuinanau i mea a le lalolagi.)
Ina ua latalata atu Iesu i le faaiuina o lana lauga, o le a le mea na ia aoaoina atu e uiga i le ulu atu i le malo o le lagi? (Tagai Mataio 7:13–14, 21–23.) Aisea e tulaga ese ai le vaapiapi o le ala e tau atu i le ola e faavavau, ae vatele le ala i le malaia?
I le faaiuga o le Lauga i luga o le Mauga, na faamatala atu ai e Iesu se faataoto i le tagata poto ma le tagata valea (Mataio 7:24–27). E faapefea ona faatatau lenei faataoto ia i tatou? O le a le “papa” lea e tatau ona tatou faavae ai i luga? (Tagai Helamana 5:12.) O a nisi o mea ia atonu o loo atinae ai nisi tagata i luga, lea e mafai ona faatusatusa i le oneone?

Atonu e te manao e fai atu i tagata o le vasega e usu le “O le Tagata Poto ma le Tagata Valea” (Tusipese a Tamaiti, 132).

Faaiuga

Ia molimau atu i le taua o le mulimuli ia Iesu Keriso. Ia uunaiina tagata o le vasega e mafaufau i mea latou te moomia ina ia avea atili ai i latou ma ni soo lelei o Keriso.

Manatu Faaopoopo e Aoao Atu Ai

O mea nei e lagolago atu ai i le otootoga o le lesona ua fautuaina. Atonu e te manao e faaaoga le tasi po o le sili atu foi o nei manatu e avea o se vaega o le lesona.

1. “O lea foi tou te iloa ai i latou i o latou fua” (Mataio 7:20)

Na lapataiina e Iesu ona soo e uiga i perofeta pepelo—o tagata o e aoaoina aoaoga pepelo po o le taumafai ina ia taitaiese tagata mai ia Keriso (Mataio 7:15). E mafai faapefea ona tatou iloatinoina ia perofeta pepelo ma perofeta moni? (Tagai Mataio 7:16–20; tagai foi Moronae 7:5, 10–11.) E mafai faapefea ona faatatau le Mataio 7:20 ia i tatou faapea foi ma perofeta?

2. Ata Vitio

O le vaega lona lua o le “Tu ma Aga o le Feagaiga Fou,” o se ata filifilia mai Ata Vitio o le Feagaiga Fou (53914), o loo faamatalaina mai ai le faaaogaina e tagata Iutaia o filateri (tagai Mataio 23:5) ma tuupao (tagai Numera 15:38). Afai e te faaaliina atu le vaega lea, ia talanoaina pe faapefea ona faailoa atu le usiusitai i le Atua i le faaaogaina o nei mea, ua avea ma faailoga o le naunau o le Au Faresaio ina ia “iloa e tagata” pe a latou tapuai (Mataio 6:5).

3. O le iloa o le utupoto i o tatou lava mata

Ia fetufaai atu le tala lenei e uiga i le ala na aoao ai e le Perofeta o Iosefa Samita se tasi tuafafine ina ia vaai i le utupoto i lona lava mata pe a taulimaina pe iloaina se mea ua sese ai se isi:

Na alu atu se tamaitai i le Perofeta o Iosefa Samita ua matuai le fiafia lava i nisi o mea na tau atu e se isi tagata o le Ekalesia ia te ia. Na tau atu i ai e le Perofeta afai o mea na tauina atu e le tagata ia te ia e le moni, e tatau ona ia le amanaiaina lea tulaga, aua o le a manumalo lava le mea moni ae o mea e le moni e le manumalo. Na lagona e lenei tamaitai e le moni nei faamatalaga, ae sa le faamalieina o ia i le aua nei amanaiaina le mataupu. Ona faamatala atu loa lea i ai e le Perofeta le ala na te taulimaina ai e ia nei tulaga faapea:

“Afai e faamatalaina atu e se fili se tala taufaasese e uiga ia te ia, lea e masani lava ona tupu, ao lei faia i ai sana faaiuga, e toe tomanatu lava o ia i tua i le taimi ma le nofoaga na afua mai ai le tala, pe na te le i faia se tala po o se gaoioiga na te lei mafaufauina na mafua ai ona tupu mai lea faamatalaga. Afai na te iloaina na ia faia, ona ia faapea mai ai lea ua ia faamagaloina lona fili i lona loto, ma ia lagonaina le agaga faafetai ua ia mauaina se lapataiga o se vaivaiga na te le o iloaina o loo ia te ia.”

Na tau atu e le Perofeta i lenei tuafafine e tatau ona ia mafaufau ma le faaeteete pe na te lei tuuina atu ma le lei mafaufauina i le tagata soo se mafuaaga ua mafua ai ona ia faia na tala. Ina ua mavae ona mafaufau loloto i ai, ona ia iloaina lea na ia faia, ma sa ia faafetai atu ai loa i le Perofeta ma ia tuumuli ese ai. (Tagai i le Jesse W. Crosby, o loo siitia mai le Hyrum L. Andrus ma Helen Mae Andrus, comps., They Knew the Prophet [1974], 144.)

4. Gaoioiga a le autalavou

Tusi fuaitau uma nei mai le Mataio 6 ma le 7 i luga o ni pepa malo eseese:

Aua nei iloa e lou lima tauagavale (6:3)	Le mea ua faia e lou lima taumatau (6:3)
O lou Tama foi o le silasila i le mea lilo (6:6)	Na te avatu faaaliali se taui ia te oe (6:6)
Aua nei (6:7)	Tautu i a outou upu (6:7)
Ia faamagalo atu tagata (6:14)	I a latou agasala (6:14)
Ia outou toloa’i mo outou (6:20)	Oa i le lagi (6:20)
Tou te le mafai ona auauna (6:24)	I le Atua ma mamone (6:24)
A ia outou muai saili (6:33)	Le malo o le Atua (6:33)
Ia muai tiai le utupoto (7:5)	I lou lava mata (7:5)
Ia ole atu (7:7)	Ona foaiina mai ai lea ia te outou (7:7)
Ia outou saili (7:7)	Ona outou maua ai lea (7:7)
Ia outou (7:15)	Ma perofeta pepelo (7:15)
O o latou fua (7:20)	Tou te iloa ai i latou (7:20)

Ia faafao pepa malo i luga o le laulau poo le fola. Ia vaevae le vasega i ni au se lua, ona tuu atu lea i au e auauai i le filifilia o ni pepa se lua. Afai e fetaui pepa, ona aveese lea e le au mai le laulau po o le fola ae toe filifili nisi pepa. Afai e le fetaui ia pepa, ona toe tuu lea e le au i le mea sa i ai, ona tuu lea o le avanoa i le isi au. Ia faaauau pea seia oo ina faafetaui uma lava ia pepa.