“Ia Fai Mo Outou Tofi Le Malo Ua Saunia Mo Outou”

Faamoemoega

Ina ia fesoasoani i tagata o le vasega ina ia saunia i latou lava mo le Afio Faalua Mai e ala lea i le ola amiotonu, atinaeina a latou taleni, ma auauna atu i isi.

Sauniuniga

Faitau, mafaufau loloto, ma tatalo e uiga i mau nei:
1. Mataio 25:1–13. Na aoao mai e Iesu e ala mai i le faataoto i taupou e toasefulu faapea e tatau ona tatou saunia mo lona Afio Faalua Mai.
2. Mataio 25:14–30. Na aoao mai e Iesu e ala mai i le faataoto i taleni faapea e tatau ona tatou atinaeina meaalofa na tatou maua mai le Atua.
3. Mataio 25:31–46 Na aoao mai e Iesu e ala mai i le faataoto i mamoe ma oti faapea e tatau ona tatou auauna atu ma le naunautai i isi.
Afai e te faaaogaina le gaoioiga e faatosina mai ai, ia aumai se tamai fagu, o se fagu suauu po o se vailanu, ma afai e maua le ata O Le Afio Faalua Mai (62562; Taga Ata o le Talalelei 238).
Ia maua mai se fasi pepa ma se peni po o se penitala mo tagata uma o le vasega.
Fautuaga mo le aoaoina atu: Ia faaaoga soo ia faamatalaga mai perofeta o aso e gata ai, na e mafai ona mauaina i totonu o lenei tusi lesona ma mekasini a le Ekalesia, ina ia fesoasoani e faatonutonu ma faamanino ai talanoaga a le vasega ma ia faamamafaina ai le faaauauina pea ona faaalia mai e le Alii lona finagalo i aso nei. Ia faaaoga nei upu sii ina ia lagolago ai, ae aua nei suia ai ia mau faitauina ma talanoaga a le vasega.

Faalautelega Fautuaina o le Lesona

Gaoioiga e Faatosina Mai Ai

Afai e talafeagai ai, ia faaaoga le gaoioiga lenei po o sau lava gaoioiga e amata ai le lesona.

Faaali atu se tamai fagu, o se fagu o loo i ai se suauu po o se vailanu, ma le ata o le Afio Faalua Mai.

Ia faamatala atu o lenei lesona o loo taulai atu lea i faataoto e tolu na aoaoina atu e le Faaola e tali atu ai i fesili a le Au Aposetolo e uiga i lona Afio Faalua Mai. Tau atu i tagata o le vasega o le a e faaaogaina le fagu ma le suauu po o le vailanu e faatusa i ai a tatou sauniuniga mo le Afio Faalua Mai.

Mau Talanoaina ma le Faaaogaina

A o e aoaoina atu nei mau, ia talanoaina pe faapefea ona faaaoga i le olaga i aso taitasi. Uunai le vasega e faamatala ni aafiaga e faatatau i mataupu ua taua i le mau.

1. Ua tuuina atu e Iesu le faataoto i taupou e toasefulu.

Faitau ma talanoaina le Mataio 25:1–13. Ia faamatala atu o le faataoto i taupou e toasefulu e faavae lea i aganuu faaIutaia i faaipoipoga. I le taimi o Iesu, o le faatoafaiava ma ana uo latou te faafeaoina atu le faatoanofotane mai lona fale i le fale o le faatoafaiava. I luga o le auala, o loo faatalitali ai uo a le faatoanofotane ina ia faatasi ma i latou. Pe a latou taunuu i le fale o le faatoafaiava, latou te o atu uma lava i totonu mo le faaipoipoga. O nei faaipoipoga e masani ona faia i le po, o i latou la e faatalitali mo le faatoanofotane latou te tauaveina ni a latou lamepa e utu i suauu.

I le faataoto i taupou e toasefulu, o ai o loo faatusa i ai le faatoafaiava? (O le Faaola.) O ai o loo faatusa i ai taupou? (Tagata o le Ekalesia.) O le a le mea o loo faatusa i ai le faaipoipoga? (O le Afio Faalua Mai o le Faaola.) O le a le mea o loo faatusa i ai le suauu o loo i lamepa? (Sauniuniga mo le Afio Faalua Mai.)
O le a le mea na faia e taupou e toalima na matuai faavalevalea lava? (Tagai Mataio 25:3.) O a ni taunuuga i le le lava o a latou sauniuniga? (Tagai Mataio 25:8–12.) E faapefea ona tatou faia i nisi taimi mea sese e pei o taupou valea?
O a mea na faia e taupou e toalima na matuai atamamai lava? (Mataio 25:4.) O a taunuuga o a latou sauniuniga? (Tagai Mataio 25:10.) O le a se mea e mafai ona tatou aoaoina mai i gaoioiga a taupou popoto e toalima? (Tagai MFF 45:56–57. E tatau ona tatou saunia mo le Afio Faalua Mai o Iesu Keriso.)
I le teuina pea i le mafaufau o le suauu o loo i le faataoto e faatusa lea i sauniuniga mo le Afio Faalua Mai, o a nisi o auala e mafai ona tatou faaopoopoina atu ai le “suauu” i a tatou “lamepa”? (O tali e mafai ona aofia ai vaega patino o le ola amiotonu, e pei o le faataitaia o le faatuatua, mauaina o sauniga, tausia o feagaiga, po o le tuuina atu o le auaunaga.)

Afai o loo e faaaogaina le fagu ma le suauu po o le vailanu (tagai i le gaoioiga e faatosina mai ai), ia faamatala atu o le fagu o loo avea ma faatusa o lamepa o loo i le faataoto. Tuu sina suauu po o le vai i totonu o le fagu i taimi uma taitasi e fautua mai ai e tagata o le vasega se mea e mafai ona tatou faia ina ia saunia ai. Atonu e te manao e fetufaai atu mataupu nei mai ia Peresitene Spencer W. Kimball:

“I le faataoto, e mafai ona faatauina mai le suauu mai le maketi. I o tatou olaga o le suauu o le sauniaina e maua mai lea mataua ma lea mataua i le ola amiotonu. O le auai i sauniga faamanatuga e faaopoopo atu ai le suauu i a tatou lamepa, o lea mataua ma lea mataua i tausaga. O le anapogi, o tatalo faaleaiga, aoaoga i aiga, puleaina o meaai mo le tino, talaiga o le talalelei, suesueina o tusitusiga paia—o ia aga taitasi o le naunautai ma le usiusitai o se mataua lea e faaopoopo atu i lo tatou faleoloa. O gaoioiga o le agalelei, totogiina o taulaga ma sefuluai, o manatu ma gaoioiga mama, faaipoipoga i le feagaiga mo le faavavau—o nei foi mea, e taua foi lo latou sao i le suauu lea e mafai ona toe utuina ai a tatou lamepa o le a mamate” (Faith Precedes Miracles [1972], 256).

Fai atu i tagata o le vasega e mafaufau filemu i fesili nei:

O le a se mea na e faia i le vaiaso na tea nei e faaopoopo atu ai le suauu i lau lamepa? O le a se mea o le a e faia i le vaiaso o lumanai nei e faaopoopo atu ai le suauu i lau lamepa?

2. Ua tuuina atu e Iesu le faataoto i taleni.

Faitau ma talanoaina le Mataio 25:14–30. Ia faamatala atu i taimi o le Feagaiga Fou, o se taleni o se aofaiga lea o tupe.

I le faataoto i taleni, o ai o loo faatusa i ai le tagata lea na alu malaga i se atunuu mamao? (O le Alii.) O ai o loo faatusa i ai auauna? (O i tatou uma taitoatasi.) O a mea o loo faatusa i ai taleni? (Meaalofa mai le Atua.)
O le a le mea na faia e auauna ia na tuuina atu i ai taleni e lima ma le lua i a laua tupe? (Tagai Mataio 25:16–17.) O le a le taui na la mauaina? (Tagai Mataio 25:21, 23.) O le a le mea na aoao mai e lenei faataoto e uiga i le taui e faavavau o le a faamanuiaina ai i tatou e lo tatou Tama Faalelagi? (O tali e mafai ona aofia ai ia tagata o e foliga mai e laitiiti meaalofa mai le Atua o le a mauaina faamanuiaga uma pe afai latou te faaaogaina a latou meaalofa i le atoatoa.)

Na saunoa mai Elder James E. Faust ia i latou o e foliga mai e laitiiti taleni latou te mauaina: “Afai e faaaogaina a latou taleni e atinae ai le malo o le Atua ma auauna atu ai i isi, o le a olioli atoatoa i latou i folafolaga a le Faaola. O le folafolaga sili a le Faaola, o le a latou ‘maua lo latou taui, o le filemu lea i lenei lalolagi ma le olaga faavavau i le lalolagi a sau’ (MFF 59:23)” (Liahona, Iulai 1994, 5).
O le a le mea na faia e le auauna lea na tuuina atu i ai le taleni e tasi i le tupe? (Mataio 25:24–25.) O le a le tala a le matai ia te ia? (Tagai Mataio 25:26–30.) Aisea tatou te toilalo ai i nisi taimi e atinaeina taleni ma meaalofa na tuuina mai e le Atua ia i tatou? E mafai faapefea ona tatou faatoilaloina ni faafaigata i le atinaeina o nei meaalofa?
Na aoao mai Elder Marvin J. Ashton ia i tatou faapea “o la tatou aia ma le tiutetauave le taliaina o meaalofa ma fetufaai atu” (Liahona, Ianuari 1988, 20). E mafai faapefea ona tatou iloa ma taliaina taleni po o meaalofa ua tuuina mai e le Alii ia i tatou? O le a sou manatu aisea e taua ai ona fetufaai atu a tatou taleni po o meaalofa? O a ni faamanuiaga ua oo mai i lou olaga ona o lou atinaeina ma le fetufaai atu o au taleni po o meaalofa? O faapefea ona faamanuiaina oe ona ua fetufaai atu e isi a latou taleni po o meaalofa?
Soo se tagata lava e le itiiti ifo i le tasi le meaalofa ua tuuina atu i ai mai le Atua (MFF 46:11–12), ae o nisi meaalofa e faigofie ona iloaina nai lo isi. O a nisi o meaalofa atonu e faigata ona iloaina ae e mafai ona faaaogaina e auauna atu ai i isi ma viia ai le Atua?

Na saunoa mai Elder Marvin J. Ashton faapea:

“Sei o’u taua la ni nai meaalofa, e le lauiloa i taimi uma pe tautaua foi ae matua taua lava. O nisi o nei meaalofa atonu o ni meaalofa o ia te oe—e le lauiloa ae moni ma taua.

“Sei o tatou iloiloina la nisi o nei meaalofa e le lauiloa: o le meaalofa o le ole atu, o le meaalofa o le lagona, o le meaalofa o le faalogo ma faaaoga le leo itiiti ma le filemu, o le meaalofa o le mafai ona tagi, o le meaalofa o le aloese mai finauga, o le meaalofa o le loto gatasi, o le meaalofa o le aloese i le tautu i upu, o le meaalofa o le saili o le mea sa’o, o le meaalofa o le le tuuai fua, o le meaalofa o le vaai i le Atua mo le taitaiga, o le meaalofa o le avea ma soo, o le meaalofa o le manatu alofa i isi, o le meaalofa o le mafai ona mafaufau, o le meaalofa o le faia o tatalo, o le meaalofa o le tuuina atu o se molimau malosi, o le meaalofa o le maua o le Agaga Paia” (Liahona, Ianuari 1988, 19).

Tuu atu i tagata uma o le vasega se peni po o se penitala ma se fasi pepa. Fai atu i ai e tusi i lalo ni a latou taleni se tasi po o se lua po o ni meaalofa faatasi ai ma se mea patino se tasi o le a latou faia i isi vaiaso o loo lumanai ina ia faaaogaina ai e auauna atu ai i isi.

Afai o loo e faaaogaina le fagu ma le suauu po o le vailanu, ia faaopoopo nai mataua i le fagu. Ia faamatala atu ao tatou atinaeina ia taleni ma meaalofa na tuuina mai e le Atua, ua tatou faaopoopo atu foi le suauu i a tatou lamepa.

3. Ua tuuina atu e Iesu le faataoto i mamoe ma ’oti.

Faitau ma talanoaina le Mataio 25:31–46.

Na aoao mai Iesu faapea, i le Afio Faalua Mai o le a ia tuueseeseina ai i tatou e pei ona tuueseeseina e se leoleo mamoe o mamoe mai ’oti (Mataio 25:31–32). I le faataoto i mamoe ma ’oti, o ai o loo faatusa i ai mamoe? (Tagai Mataio 25:33–34.) O ai o loo faatusa i ai ia ’oti? (Tagai Mataio 25:33, 41.)
O le a le mea o loo aoao mai e lenei faataoto e tatau ona tatou faia ina ia saunia ai mo le Afio Faalua Mai ma le aso o le faamasinoga? (Tagai Mataio 25:35–46.)

Na saunoa mai Elder Marion D. Hanks e faapea:

“Na aoao atu e Iesu i ona soo le faataoto i mamoe ma ‘oti, e avea ma faatusa i le faamasinoga o le a oo mai, lea na ia matuai faamanino mai ai i latou o le a mau tofi i le ‘ola e faavavau’ ma i latou ‘o le a o atu i le faasala e faavavau’ (Mataio 25:46). O le eseesega taua ona o i latou o e tatau ona mau tofi i le malo faatasi ma ia, na latou atinaeina se amioga masani o le fesoasoani atu, na latou iloa le olioli e maua mai le foai atu ma le faamalieina i le auauna atu. Sa latou tali atu i manaoga o e fia aai, o e fia feinu, o e leai ni aiga, o e leai ni lavalava, o e mamai, ma i latou sa i le falepuipui… .

“E leai se mea e sili atu ona manino nai lo le viia maualuga e le Faaola, o le auauna atu i isi ma le le manatu faapito, o se elemene taua naua o uiga faaKerisiano ma le faaolataga. O le fesoasoani atu, foai atu, ma le taulagaina, e tatau ona avea uiga na ma uiga tupu fua e pei o le tuputupu ae ma le manava i le ea” (Liahona, Iulai 1992, 10).

Afai o loo e faaaogaina le fagu ma le suauu po o le vailanu, ia faaopoopo atu ni nai mataua i le fagu. Ia faamatala atu, ao tatou auauna atu i isi, ua tatou faaopoopo atu le suauu i a tatou lamepa. E mafai foi ona tatou fesoasoani atu i isi e faaopoopo suauu i a latou lamepa. Ia fetufaai atu ni faataitaiga o le auauna atu na e vaai i ai, ma valaaulia tagata o le vasega ina ia fetufaai mai foi ni a latou faataitaiga o le auauna atu na latou vaai iai.

E mafai faapefea ona tatou faamanuiaina isi e ala i a tatou auaunaga? E faapefea ona faamanuiaina oe i lou auauna atu i isi? O a ni ou lagona mo i latou o loo e auauna atu i ai? O a ni ou lagona ia i latou o loo auauna mai ia te oe? E mafai faapefea ona tatou malamalama i manaoga o isi? E mafai faapefea ona tatou matuai maelega i le auauna atu i isi?
O le a sou manatu o le a le uiga o le fetalaiga a le Faaola ina ua ia faapea mai, “Ou te fai atu ia te outou, aua na faia e outou i le tasi o e aupito itiiti o o’u uso nei, o a’u lea na outou faia i ai”? (Mataio 25:40; tagai foi Mosaea 2:17).

Faaiuga

Ia molimau atu e tatau ona tatou saunia mo le Afio Faalua Mai o Iesu Keriso. E tatau ona tatou atinaeina ia meaalofa ua tuuina mai e le Atua ia i tatou ma mulimuli i le faataitaiga a le Faaola i le tuuina atu lea o o tatou olaga i le auauna atu i isi. Ia faamamafa atu faapea e mafai ona tatou faia nei mea uma, e tusa lava po o a o tatou tulaga.

Manatu Faaopoopo e Aoao Atu Ai

O mea nei e lagolago atu ai i le otootoga o le lesona ua fautuaina. Atonu e te manao e faaaoga le tasi po o le sili atu foi o nei manatu e avea o se vaega o le lesona.

1. “Se Tagata Mativa Faanoanoa”

Ia usu pe faitau faatasi ma le vasega ia upu o le viiga “Se Tagata Mativa Faanoanoa” (Viiga, 16). Ona faitau lea o le Mataio 25:40. Ia valaaulia tagata o le vasega ina ia fetufaai atu o latou lagona e uiga i le savali o le viiga ma le mau.

2. Ata Vitio

Atonu e te manao e faaali le vaega lona lima o “Aganuu o le Feagaiga Fou,” o se vaega e filifilia mai Ata Vitio o le Feagaiga Fou (53914), ina ia faamatalaina ai aganuu o taumafataga o faaipoipoga i taimi o le Feagaiga Fou.