Lesona 33
“O Le Malumalu Outou o le Atua”
Faamoemoega
Ina ia musuia tagata o le vasega ina ia saili i faamanuiaga na e maua mai i le faatasia ma Keriso, mulimuli i le Agaga, ma le ola mama.
Sauniuniga
-
Faitau, mafaufau loloto, ma tatalo e uiga i mau nei:
-
1 Korinito 1:10–13; 3:1–11. Ua apoapoai Paulo i le Au Paia ina ia foia le felotoai ae ia maopoopo i le manatu e tasi ma le loto e tasi.
-
1 Korinito 1:17–31; 2:1–16. Ua fautuaina e Paulo le Au Paia ina ia faalagolago i le Agaga nai lo le atamai ma le poto o le lalolagi.
-
1 Korinito 3:16–17; 5; 6:9–20. Ua apoapoai Paulo i le Au Paia ina ia ola mama.
-
-
Tusi faitau faaopoopo: 1 Korinito 7–10.
-
Fautuaga mo le aoaoina atu: Na fautua mai Elder Boyd K. Packer: “E taua i se faiaoga ona malamalama o tagata e lelei. E taua le iloaina o lo latou faamoemoega o le faia lea o le mea tonu. O lea ituaiga manatu faaeaina, o se fua lea o le faatuatua. E matuai iloa ai lava le eseesega pe a tatou tutu i luma o a tatou lava fanau po o le alu atu foi i luma o se vasega o tagata talavou ina ia aoaoina i latou” (Teach Ye Diligently [1975], 73).
Faalautelega Fautuaina o le Lesona
Gaoioiga e Faatosina Mai Ai
Afai e talafeagai ai, ia faaaoga le gaoioiga lenei po o sau lava gaoioiga e amata ai le lesona.
Tusi se auala i luga o le laupapa, ma tusi se taavale i luga o le auala. Ona fetufaai atu lea o le mea lenei na faamatalaina mai e Elder Joseph B. Wirthlin:
“A o ma malaga atu ma lo’u toalua i le ma taavale i se tasi po i timuga ma le papa o faititili ma le feemo o uila, sa ou tau le iloa atu le auala i o ma luma, po o le itu taumatau ma le itu tauagavale. E leai se isi taimi na ou matua vaavaai lelei ai i laina papa’e muamua nai lo le taimi lena. O lo ma o tonu lava i totonu o laina papa’e na puipuia mai ai i ma’ua mai le ma o i autafa o le auala ma pauu atu ai i le tofe i le isi itu, ma sa puipuia ai i ma’ua mai le fetaui ma se isi taavale. Ana ma oso ese ma laina semanu e tupu mai se faalavelave. Ona ou mafaufau lea, “Mata e feosoosofa’i solo se tagata mafaufau lelei i le itu agavale po o le itu taumatau o le ala taavale pe a ia iloa e tupu mai ai se faalavelave e oti ai? Afai e taua ia te ia lona ola, e tatau lava ona tumau i le va o nei laina.”
“O lena mea na tupu i le faigamalaga i luga o lenei auala i le mauga e faapea foi le faigamalaga i le soifuaga. Afai tatou te tutumau i laina ua faailogaina mai e le Atua, o le a ia puipuia i tatou, ma o le a mafai ona tatou taunuu faalelei ma le saogalemu i lo tatou taunuuga” (i le Conference Report, Oke. 1990, 80; po o le Liahona, Ian. 1991, 66).
Ia faamatala atu i le taimi na tusia ai e Paulo lana uluai tusi i le Au Paia i Korinito, o nisi o i latou ua amata ona o ese mai laina o le talalelei. O lenei lesona o le a talanoaina ai apoapoaiga a Paulo mo le Au Paia ina ia salamo mai auala e tolu ua amata ona latou o ese mai ai. Tusi ni laina se tolu i luga o le laupapa e faaali ai le taavale ua aluese mai le auala. I le faaiuga o le laina muamua tusi ai le Felotoai ma le le lotogatasi. I le faaiuga o le laina lona lua tusi ai le Faalagolago i le poto o le lalolagi. I le faaiuga o le laina lona tolu, tusi ai le Ola le mama.
Mau Talanoaina ma le Faaaogaina
Ao e aoaoina atu ia mau nei mai tusitusiga paia, ia talanoaina pe faapefea ona faatatau le fautuaga a Paulo i o tatou aso ae pe mafai faapefea ona tatou faatatauina ana aoaoga i o tatou lava olaga.
1. Aloese mai le fefinauai ma ia lotogatasi.
Faitau ma talanoaina le 1 Korinito 1:10–13; 3:1–11.
-
O le a le faafitauli na taua e Paulo i le 1 Korinito 1:10–13? O le a le uiga o le faapea mai o nisi o le Au Paia o latou o “sa Paulo,” o nisi “o sa Apolo,” o nisi “o sa Kefa [Peteru],” ma nisi “o sa Keriso”? (Nai lo le faatasia uma o ni soo o Iesu Keriso, o nisi o le Au Paia ua latou vaevaeina i latou i ni vaega i totonu o le Ekalesia.) E faapefea ona tatou faia foi lea mea sese i nisi o taimi? O a ni taunuuga o ia ituaiga fevaevaeaiga? E faapefea ona aafia lo tatou avea ma soo o Keriso i le fevaevaeai ma le fefinauai? (Tagai Mosaea 18;21–22; 3 Nifae 11:29–30; MFF 38:27.)
-
O le a le mea na fautuaina ai e Paulo le Au Paia ina ia faia ina ia faateleina ai le lotogatasi? (Tagai 1 Korinito 1:10. Ao faitauina e se tagata o le vasega le mau lenei, ia lisiina i luga o le laupapa vaega o le fautuaga a Paulo e pei ona faaalia i lalo.) E mafai faapefea ona tatou faaaogaina lenei fautuaga i le aiga ma le Ekalesia?
-
“Ia tasi la outou upu.”
-
Aua nei “i ai ni maseiga.”
-
“Ia maopoopo i le loto e tasi ma le manatu e tasi.”
-
-
Aisea ua na o le “suasusu” ai o le talalelei ua maua e le Au Paia i Korinito? (Tagai 1 Korinito 3:1–4.) Aisea ua avea ai le fefinauai ma mafuaaga ua taofia ai i tatou mai le mauaina o “mea aano” o le talalelei? E mafai faapefea ona tatou saunia i tatou lava ina ia fafagaina i le “mea aano” o le talalelei?
-
Na aoao mai Paulo faapea e toatele auauna o le talalelei ae o Iesu Keriso o le faavae moni lava ia (1 Korinito 3:5–11). Aisea e taua ai le avea o le Faaola ma faavae o lo tatou faatuatuaga? (Tagai Helamana 5:12.)
2. Faalagolago i le Agaga nai lo le poto o le lalolagi.
Ia talanoaina le 1 Korinito 1:17–31; 2:1–16. Ia valaaulia tagata o le vasega e faitauina fuaiupu filifilia.
-
Na aoao mai Paulo faapea o le poto o lenei lalolagi o le “valea” lea i le Atua (1 Korinito 1:18–21). E faapefea ona eseese le poto o le Atua mai le poto o le lalolagi? (Tagai Isaia 55:8–9; MFF 38:1–2.) O a nisi o faataitaiga o le poto o le Atua ua ta’uvaleaina ai le poto o le lalolagi?
-
O a ni auala e mafai ai ona avea aoaoga e le o ni aoaoga faalelotu ma se faamanuiaga ia i tatou? O a ni auala e mafai ai ona avea ma se maa tuia ia i tatou? E mafai faapefea ona tatou faapaleniina ia aoaoga faalelalolagi ma aoaoga faaleagaga? (Tagai 2 Nifae 9:28–29.)
Na aoao mai Peresitene Spencer W. Kimball faapea: “E i ai se avanoa e maua uma ai [aoaoga faaleagaga ma le faalelalolagi] i le taimi e tasi. … Afai tatou te faaaluina o tatou aso i la le tino nei e maua ai le malamalama faalelalolagi ae faagalo ai le faaleagaga, o lona uiga e le o sauniaina i tatou, aua o le taimi lenei e sauniuni ai le tagata e fetaiai ma le Atua; o le taimi lenei e fausiaina ai le faatuatua, mo le papatisoga ina ia faia, mo le Agaga Paia ina ia mauaina, mo sauniga ina ia faataunuuina. Faatasi ai ma lenei polokalama e oo mai ai le malamalama faalelalolagi, aua o le lalolagi o agaga pe a mavae le oti o le a mafai ona faaauauina ai pea le aoaoina o o tatou agaga” (The Teachings of Spencer W. Kimball, ed. Edward L. Kimball [1982], 390).
-
O le a le uiga o le saunoaga a Paulo ina ua ia faapea mai ua “filifilia e le Atua mea valea a le lalolagi ina ia faamaina ai e popoto” ma “mea vaivai a le lalolagi ina ia faamaina ai … mea malolosi”? (1 Korinito 1:27). Aisea e masani ai ona filifilia e le Atua “mea vaivai a le lalolagi” ina ia faataunuuina ai ona faamoemoega?
-
O a vaivaiga na feagai ma Paulo ao ia aoaoina atu le talalelei? (Tagai 1 Korinito 2:1–3.) Na faapefea ona avea ona vaivaiga ma ona malosiaga? (Tagai 1 Korinito 2:2, 4–5.) O faapefea ona fesoasoani atu le Alii ia te oe pe a e lagonaina lou le atoatoa po o lou fefe e faia lana galuega?
-
E tusa ai ma le tala a Paulo, e mafai faapefea ona tatou iloa “mea a le Atua”? (Tagai 1 Korinito 2:10–13.) Aisea tatou te faalagolago ai i nisi taimi i lo tatou lava poto ma le malamalama nai lo faaaliga e ala mai le Agaga? O a ni eseesega ua e maitauina i le va o le aoaoga e ala mai le Agaga ma le aoaoga e ala mai i le na o le poto?
Na aoao mai Elder Bruce R. McConkie: “O aoaoga faalelotu moni o se mea lea a le Agaga ae le na o le poto lava ia, ma o ona upumoni e tatau ona moliooina atu i loto o e faalogologo e ala lea i le mana o le Agaga, a leai o le a suia le loto o le tagata. … ma o le tagata na sailiili mo le faaolataga o le a le faaolaina ia Keriso” (Doctrinal New Testament Commentary, 3 vols. [1966–73], 2:318).
-
Na aoao mai Paulo faapea e le talafeagai mo le “tagata faaletino” ona talia mea a le Atua (1 Korinito 2:14). Aisea? O le a se mea e tatau ona tatou faia ina ia foiaina ai le tagata faaletino? (Tagai Mosaea 3:19.)
3. Ia ola mama.
Faitau ma talanoaina fuaiupu filifilia mai le 1 Korinito 3:16–17; 5; 6:9–20.
-
O le a le mea na faatusatusa i ai e Paulo o tatou tino? (Tagai 1 Korinito 3:16–17; 6:19–20.) Aisea e te manatu ai o se faatusatusaga talafeagai lea? O a ni mea e mafai ona faaleagaina ai o tatou tino? O a mea e tatau ona tatou faia ina ia tausia ai o tatou tino o ni malumalu?
-
I lana lapataiga e tetee atu ai le tele o agasala i ona aso, na faaaofia ai e Paulo le tele o agasala tau le faitaaga (1 Korinito 6:9). O le a le tulafono a le Atua i feusuaiga mama? (Tagai MFF 42:23; 59:6.)
Na saunoa mai Elder Richard G. Scott: “Soo se uiga feusuai lava i fafo atu o noataga o le faaipoipoga—o le uiga o la’u tala, soo se taumafaiga lava e fesootai atu i itu tino sa o le tino, tusa pe o fai ni lavalava pe leai foi—o se agasala ma e faasaina e le Atua. O se agasala foi lou taumafai e faaosofia nei lagona i lou lava tino” (i le Conference Report, Oke. 1994, 51; po o le Liahona, Ian. 1995, 45).
-
Aisea e matuai ogaoga ai agasala tau le feusuai? (Tagai i le upusii lenei.) O a faamanuiaga o le ola mama?
Na aoao mai Elder Jospeh B. Wirthlin: “O se tasi o mea pito tau faasese i tausaga talu ai nei, o le taofi lea faapea o le faitaaga o se mea e masani ai ma e le leaga, ma e leai ni ona taunuuga leaga. O le mea moni, o le faitaaga o le mafuaaga autu lea o le tele o le mafatia ma le tele o isi faalavelave ua malolosi i ona po nei e aofia ai faamai pipisi, faapau pepe, lepetia o aiga, aiga e aunoa ma ni tama, ma tina ua na o ni teineiti lava i latou” (i le Conference Report, Oke. 1994, 100–101; po o le Liahona, Ian. 1995, 90).
Na aoao mai Elder Boyd K. Packer: “O [Satani] ua ia iloaina lenei mana o le foafoaga ua le na o sina mea faatauvaa i lenei fuafuaga, ae o le autu lava lea o le ata o le faaolataga. Ua ia iloa lelei afai na te mafai ona faatosinaina oe e faaaoga lenei mana ma le le faautauta, po o le vave faaaoga ae le’i oo i le taimi e tatau ai, po o le faaaogaina i se ala le tatau, o le a mafai e oe ona le maua ai ou avanoa mo le alualu i luma e faavavau” (i le Conference Report, Ape. 1972, 137; po o le Liahona, Ian. 1973, 15.)
-
Na fautuaina e Paulo le Au Paia ina ia “aua nei feoai ma e faitaaga” (1 Korinito 5:9). E mafai faapefea ona faatatau lenei fautuaga ia i tatou? (Ia talanoaina pe mafai faapefea ona aafia o tatou faanaunauga ma le malosi ina ia tatou ola mama i uo ma ituaiga fiafiaga tatou te filifilia.) E mafai faapefea ona tatou faatoilaloina ni aafiaga le mama?
-
O a auala o loo faaaogaina e Satani ina ia faatauanau ai i tatou faapea e i ai ni faatagaga i tulafono a le Atua e uiga i le ola mama? (Tagai i le upusii o loo i lalo.) E mafai faapefea ona tatou tatalia nei faaosoosoga? O le a se faamautinoaga o loo tuuina mai e le 1 Korinito 10:13 ia i tatou ao tatou tauivi ina ia tetee atu i faaosoosoga o le solia o le agasala o le faitaaga? O faapefea ona faamanuiaina oe ao e saili atu i le fesoasoani a le Alii ina ia tetee atu ai i faaosoosoga?
Na saunoa mai Elder Richard G. Scott: “E faaosoosoina e Satani tagata ina ia talitonu e i ai se vaega e faatagaina o fesootaiga faaletino pe a mananao ai ni tagata se toalua ua sailia faalogona malolosi faaosofia, ma afai e faia ma le faaeteete o le a le afaina. I le avea ai ma se molimau a Iesu Keriso, ou te molimau atu ua matua pepelo lena mea. … Filifili po o le a le mea e te faia ma le mea e te le faia. A oo mai faaosoosoga, aua le suia ou tulaga” (i le Conference Report, Oke. 1994, 51; po o le Liahona, Ian. 1995, 45–46).
-
O a folafolaga ua ofoina mai e le Togiola a Iesu Keriso ia i latou o e salamo i agasala o le feusuai? (Tagai 1 Korinito 6:11; Isaia 1:18; MFF 58:42.)
Faaiuga
Ia molimau atu, o Paulo, e pei o aposetolo ma perofeta o o tatou aso o loo faaauau pea ona latou aoao mai i tatou i mea e tatau ona tatou faia ina ia tatou tutumau ai i totonu o tuaoi ua uma ona faatulagaina e le Alii. Atonu e te manao e talanoaina puupuu se lauga talu ai nei o le konafesi lea na lauga ai perofeta po o se tasi o aposetolo i se autu na taua e Paulo i lana tusi i Korinito, e pei o le aloese mai le fefinauai, faalagolago i le Agaga, po o le tumau i le ola mama. Afai e talafeagai ai, ia fetufaai atu faamanuiaga ua e maua ao e faaaogaina le fautuaga mai ia Paulo po o se tasi o perofeta po o aposetolo o aso e gata ai.
Manatu Faaopoopo e Aoao Atu Ai
O mea nei e lagolago atu ai i le otootoga o le lesona ua fautuaina. Atonu e te manao e faaaoga le tasi po o le sili atu foi o nei manatu e avea o se vaega o le lesona.
1. “O mea a le Atua ua saunia mo i latou e alolofa ia te ia” (1 Korinito 2:9)
-
O le a se mea sili ona manaia ma matagofie ua e vaai pe ua e oo foi i ai?
Tuu atu i se tagata o le vasega e faitauina le 1 Korinito 2:9. Ia molimau atu, o faamanuiaga ua saunia e le Atua mo i tatou pe afai tatou te alolofa ia te ia ma tausia ana poloaiga e sili atu ona matagofie nai lo isi mea e mafai ona tatou mafaufauina.
2. “E fai finauga a le uso” (1 Korinito 6:6)
Faitau ma talanoaina le 1 Korinito 6:1–8.
-
Na faapefea ona faaleleia e le Au Paia i Korinito o latou feeseeseaiga? (Tagai 1 Korinito 6:1–8.) Na faapefea ona tupu mai ai se feeseeseaiga tele i lenei mea? O faapefea ona tulai mai lenei faafitauli i nei aso? O le a se mea e mafai ona tatou aoaoina mai le fautuaga a Paulo?