Lesona 20
“Oi Talofa ia te Outou… . Tagata Pepelo”
Faamoemoega
Ina ia fesoasoani i tagata o le vasega ia latou iloaina ma foiaina le pepelo ma ia faamalosia ai a latou tautinoga ia Iesu Keriso.
Sauniuniga
-
Faitau, mafaufau loloto, ma tatalo e uiga i mau nei:
-
Ioane 12:1–8. Na malaga Iesu i Petania, lea na uu ai e Maria ona aao. Na muimui Iuta i le faaaogaina e Maria o le suauu taugata.
-
Mataio 21:1–11. Ua toe foi Iesu i Ierusalema mo le Tausamiga o le Paseka. Na ia faia se malaga faatupu i le aai, na tietie i le asini, o le tamai asini foi.
-
Mataio 21:23–46. Ua o atu faitaulaga sili ma toeaiina ia Iesu i le malumalu ma luiina o ia i lana pule. Nai lo le taliina o a latou fesili, ae ua faamatala atu i ai e Iesu le faataoto i atalii e toalua ma le faataoto i le matai.
-
Mataio 22:15–46. Ua taumafai le au tusiupu ma le Au Faresaio e mailei ia Iesu i lona faia lea o se faaupuga e faatagaina ai i latou ina ia tuuaia ma faasalaina o ia.
-
Mataio 23. Ua ta’usalaina e Iesu le au tusiupu ma le Au Faresaio i lo latou pepelo.
-
-
Tusi faitau faaopoopo: Mataio 26:6–13; Mareko 11–12; 14:3–9; Luka 11:37–51; 19:29–48; 20; Ioane 12:12–18.
-
Afai e te faaaogaina le gaoioiga e faatosina mai ai, ia aumai se ipu se tasi o loo mama fafo ma totonu ma se ipu faapena foi o loo mama fafo ae palapala totonu.
-
Afai e maua le ata O Le Malaga Faatupu (62173; Taga Ata o le Talalelei 223), ia faaaoga i le taimi o le lesona.
-
Fautuaga mo le aoaoina atu: Ao e sauni e te aoao atu, e tatau ona e faia ia sili atu nai lo le na ona faitauina o mau filifilia. Ia suesue ia mau taitasi ia le itiiti ifo ma le faatolu. O le taimi muamua, ia faitauina po o le a le mea o loo ta’u mai ai. Ona suesue lea i ai ma le faaeteete, ia vaai ia mataupu faavae, aoaoga, ma ni mea tulaga ese na tutupu. Ona toe faitau lea, ina ia iloilo ai po o fea fuaiupu e talafeagai lelei ma manaoga o tagata o le vasega ma fuafua i ai auala e talanoaina ai na fuaiupu.
Faalautelega Fautuaina o le Lesona
Gaoioiga e Faatosina Mai Ai
Afai e talafeagai ai, ia faaaoga le gaoioiga lenei po o sau lava gaoioiga e amata ai le lesona.
Faaali atu ipu e lua (tagai i le vaega o “Sauniuniga”). Ia mautinoa ia tagatagai uma le vasega i pito i fafo o ipu uma taitasi.
Gaoioiga e Faatosina Mai Ai
-
O le fea o nei ipu e sili ona outou feinu mai ai?
Faaali atu i le vasega totonu o ipu taitasi.
Gaoioiga e Faatosina Mai Ai
-
O le fea la o nei ipu o le a outou feinu mai ai nei? Aisea?
Ia faamatala atu na faatusatusaina e Iesu le Au Faresaio i se ipu e mama mai fafo ae palapala ia totonu (Mataio 23:25–26). O le Au Faresaio sa latou matuai gauai atu lava i le itu i fafo o sauniga ma gaoioiga na e foliga mai ai i latou o nisi e amiotonu, ae peitai e leai pe a faatusatusa lea i o latou loto. O le mea lea na faatusa ai i latou e Iesu o tagata pepelo. O lenei lesona o le a talanoaina ai le fetuuina e le Faaola o tagata pepelo—o tagata ia o e ua foliga e amiotonu ae peitai latou te le o taumafai e ola amiotonu.
Mau Talanoaina ma le Faaaogaina
Ao e aoaoina atu fuaiupu nei mai mau, ia talanoaina po o le a se mea o loo aoao mai ai e foiaina ai le pepelo. Ia uunaiina tagata o le vasega ina ia taulai atu i le iloaina ma le faasa’oina o ni pepelo i o latou olaga, nai lo le taumafai e faasinosino pepelo i olaga o isi.
1. Ua uu e Maria aao o Iesu.
Faitau ma talanoaina le Ioane 12:1–8. Ia faamatala atu i le toe lima aso oo i lona Faasatauroga, na faaalu ai e Iesu se afiafi e faatasi ai ma ana uo i Petania. O iina na uuina ai e Maria, le uso o Mareta ma o ia o le tuafafine o Lasalo, ia aao o le Faaola i se uu nato, o se suauu taugata tele (Ioane 12:1–3). Na faamatalaina e Elder James E. Talmage le mafuaaga na ia faia ai lea mea:
“O le uuina o le ulu o se malo faaaloalogia i se suauu masani o se faamamaluga lea o ia; o le uuina o ona vae o se faailoga e le masani ai e faailoa ai foi lona aloaia; ae o le uuina o le ulu ma vae i se uu nato, aemaise i se suauu sili faapea, o se gaoioiga o le faaaloalo faaleaiga e seasea ona tuuina atu e oo lava i tupu. O le galuega a Maria o se faailoga o le viiga; o se mea manogi ua sau mai le loto ua tumu i le faaaloalo ma le alofa” (Jesus the Christ, 3rd ed. [1916], 512).
-
Na uu e Maria aao o le Alii e faailoa atu ai lona alofa mo ia. E faapefea ona tatou faaali atu lo tatou alofa mo le Alii?
-
O galuega a Maria na faitioina e Iuta. O le a lana tala i le mea e tatau ona fai i le suauu? (Tagai Ioane 12:4–5.) Na faapefea ona avea Iuta ma tagata pepelo? (Tagai Ioane 12:6.) Afai e te lei faaaogaina le gaoioiga e faatosina mai ai, ia faaaoga le faamatalaga o loo i le gaoioiga e faamatala ai le mea e tau o le tagata pepelo. Ia faamanino atu o se vaega o loo mulimuli mai i le lesona o le a talanoaina ai ia lagona o le Faaola e faatatau i tagata pepelo.)
2. Ua faia e Iesu se malaga faatupu i Ierusalema.
Faitau ma talanoaina le Mataio 21:1–11. Faaali atu le ata o le malaga faatupu a Iesu. Ia faamatala atu o le toe foi atu o Iesu i Ierusalema mo le Paseka, sa toatele tagata sa o atu e vaai ia te ia aua ua latou faalogo na ia toefaatuina ia Lasalo mai le oti (Ioane 12:17–18). Ina ua latalata atu Iesu i le aai, sa faafeiloaia o ia e le motu o tagata e toatele o e sa latou fola o latou ofu i le ala ma talotalo atu ia te ia i lau pama, o se faaaloaloga e masani ona faia i tupu ma alii sili. Ua faataunuuina ai le valoaga a le perofeta o Sakaria (Sakaria 9:9) ma o se isi molimau lea o Iesu o le Mesia na folafolaina.
-
O le a se mea e faagaeetia ai oe e uiga i le tala o le maliu atu o Iesu ma le faamaualalo e ui o loo maliu atu faatupu i Ierusalema? O le a sou manatu o le a se lagona e oo ia te oe pe ana faapea sa e i ai iina i lena aso?
-
O tagata sa talotalo atu ia Iesu i lau pama sa latou iloaina o ia o se perofeta ma le tupu (Mataio 21:9, 11; Luka 19:38), ae o isi sa le malamalama i lana misiona po o le teenaina o ia. O a ni auala e le o malamalama ai tagata ma teenaina le Faaola i aso nei? E mafai faapefea ona tatou talia ma le atoatoa ma faafeiloaia o ia i o tatou olaga?
3. Ua tuuina atu e Iesu le faataoto i atalii e toalua ma le faataoto i le matai.
Faitau ma talanoaina ia fuaiupu filifilia mai le Mataio 21:23–46.
-
I le faataoto i atalii e toalua, na faapefea ona faamaonia atu e le atalii muamua o ia e sili atu ona usiusitai nai lo le atalii lona lua? (Tagai Mataio 21:28–30.) Na faapefea ona faatatau e Iesu lenei faataoto i e na faalogologo? (Tagai Mataio 21:31–32.) Na faapefea ona avea le au telona ma fafine talitane e pei o le atalii muamua? (Na muamua ona latou teenaina ia poloaiga a le Atua, ae ina ua talai atu Ioane ia te i latou, sa latou talia Keriso ma salamo mai a latou agasala.) Na faapefea ona avea le au faitaulaga sili ma toeaiina faapei o le atalii lona lua? (Latou te fai mai o latou e mulimuli i le Atua, ae na latou teenaina aoaoga a Ioane ma teenaina Iesu e ui lava sa latou vaai tino ia te ia.) E faapefea ona avea le atalii lona lua ma tagata pepelo?
-
O a folafolaga ua tatou faia i le Alii? (Atonu e te manao e talanoaina ia folafolaga e pei o na sa tatou faia i le papatisoga, pe a tatou aai i le faamanatuga, pe a tatou maua foi le perisitua.) E faapefea ona avea i tatou i nisi o taimi ma atalii lona lua? E mafai faapefea ona tatou faamalosia la tatou tautinoga i le Alii? E mafai faapefea ona tatou fesoasoaniai ina ia tausia folafolaga na tatou faia i le Alii?
-
I le faataoto i le matai (Mataio 21:33–41), o ai o loo faatusa iai le matai, po o le pule o le tovine? (O lo tatou Tama o i le Lagi.) O ai o loo faatusa i ai e galulue i vine? (O taitai faalelotu Iutaia ia i le taimi o Iesu.) O ai o loo faatusa i ai auauna? (O perofeta.) O ai e faatusa i ai le atalii lea na fasiotia e i latou e galulue i vine? (Iesu Keriso.)
-
Na faapefea ona avea ia taitai faalelotu Iutaia e pei o tagata e galulue i vine? O le a le mea na faailoa atu i le au faitaulaga sili ma toeaiina o le a tupu i tagata e galulue i vine pe a foi mai le pule o le tovine? (Tagai Mataio 21:41.)
-
O ai le “maa lea na lafoaiina e tufuga fai fale”? (Tagai Mataio 21:42; Galuega 4:10–12.) O ai le au tufuga fai fale? O le a le fetalaiga a Iesu i le mea o le a tupu i tufuga fai fale ina ua latou lafoaiina le maatulimanu? (Tagai Mataio 21:43–44.) E faapefea ona faatatau upu a Iesu o loo i le fuaiupu e 43 ia i tatou?
-
Na faapefea ona tali atu ia le au faitaulaga sili ma le Au Faresaio ina ua latou iloaina o loo faatatau ia fetalaiga a Iesu ia i latou e ala i nei faataoto? (Tagai Mataio 21:45–46.) E mafai faapefea ona tatou faatoilaloina soo se faamaualuga po o se le fiafia i se faaiuga tatou te lagonaina pe a ua valaauina i tatou ina ia tatou salamo?
4. Ua taumafai le au tusiupu ma le Au Faresaio e pue ia Iesu.
Faitau ma talanoaina ia fuaiupu filifilia mai le Mataio 22;15–46. Ia faamatala atu o nei fuaiupu o loo faamaumauina ai taimi e tolu ia na taumafai ai le Au Faresaio ma le Au Satukaio e pue ia Iesu i lona faia lea o se faamatalaga e faatagaina ai i latou e molia ma faasalaina o ia.
-
Na faapefea ona taumafai muamua le Au Faresaio e pue ia Iesu? (Tagai Mataio 22:15–17. Ia faamatala atu ana fai e tali atu Iesu, ioe i le fesili, o le a mafai loa ona latou molia o ia i lona lagolagoina lea o le feita i le malo o Roma. Ana fai e faapea atu e leai, e mafai ona latou molia o ia i le faatautee i le malo.) O le a le mea na silafia e Iesu e uiga ia i latou na fesiligia o ia? (Tagai Mataio 22:18. Ia faamalamalama atu na silafia lelei e Iesu o latou loto ma mafaufau. E le mafai ona tatou nanaina se mea mai ia te ia.) Na faapefea ona tali e Iesu le fesili? (Tagai Mataio 22:19–21.) E mafai faapefea ona avea lenei tali ma taiala ia i tatou i le tuuina atu o lo tatou faaaloalo i le Atua ma malo faalelalolagi? (Tagai foi i le Mataupu Faavae o le Faatuatua 1:12.)
-
Na faapefea ona taumafai le Au Satukaio e pue ia Iesu? (Tagai Mataio 22:23–28.) Na faapefea ona avea le Au Satukaio ma ni tagata pepelo i la latou fesili? (Tagai Mataio 22:23. Sa latou faafoliga o loo matuai popole lava i latou e uiga i le faaipoipoga i le toetu, ae latou te lei talitonu i le toetu.) Na faapefea ona tali atu Iesu i le latou fesili? (Tagai Mataio 22:29–30. Ia faamatala atu o le Mataupu Faavae ma Feagaiga 132:15–16, 19 o loo faamanino mai ai le aoaoga a Iesu. O i latou o e latou te le osia ma tausia feagaiga o le faaipoipoga i le malumalu o le a nofo toatasi i le lagi. Mo i latou o e osia ma tausia nei feagaiga, o a latou faaipoipoga o le a oo atu i le faavavau.)
-
O le a le taumafaiga lona tolu ina ia pueina Iesu? (Tagai Mataio 22:34–36.) Na faapefea ona foiaina lenei fesili i le tali a Iesu? (Tagai Mataio 22:37–40.) O le a sou manatu aisea ua matuai taua ai lava nei poloaiga e lua? O le a se mea e mafai ona tatou faia ina ia tatou ola atoatoa ai i nei poloaiga?
Na saunoa mai Elder Howard W. Hunter faapea: “O le tagata e alofa i le Atua ma lona loto atoa … ua saunia e tuuese, faia, po o le puapuagatia i soo se mea ina ia faamalieina ma faamamaluina ai o ia. O le tagata e alofa i le Atua ma lona agaga atoa … ua saunia e tuuina atu lona ola mo ia ma ua le naunau i mea o le lalolagi ina ia faamamaluina ai o ia. O le tagata e alofa i le Atua ma lona malosi atoa o le na te faaaogaina lona malosi atoa ma lona tino ma lona agaga atoa i le galuega a le Atua. O le tagata e alofa i le Atua ma lona mafaufau atoa ma tuuina atu o ia lava ia iloa le Atua ma lona finagalo, ma na te iloa atu le Atua i mea uma ma faailoa o ia i ala uma” (in Conference Report, Apr. 1965, 58; po o le Improvement Era, June 1965, 512).
5.Ua tauleagaina e Iesu le agasala o le pepelo.
Faitau ma talanoaina ia fuaiupu filifilia mai le Mataio 23.
-
E totogi sefuluai a le au tusiupu ma le Au Faresaio, e foai atu i e matitiva, e auai atu i sauniga, ma e o atu soo i le malumalu. O le a le mafuaaga na tauleagaina ai i latou e le Alii? (Tagai Mataio 23:5, 14, 23–28. Sa latou faia nei mea ona e le o lo latou faatuatua, ae ona o se faanaunauga ina ia iloa ai e isi o i latou o ni tagata amiotonu.) O a “mea silisili” ia na taua e le Alii ua latou tuuesea? (Tagai Mataio 23:23.) E mafai faapefea ona tatou mautinoaina ua tatou le tuuesea nei “mea silisili” i o tatou olaga?
-
E mafai faapefea ona avea i tatou o ni tagata o le Ekalesia i nisi taimi ma ni tagata pepelo? (Mo se faataitaiga, afai tatou te auai atu i sauniga a le Ekalesia e mafai ona tatou popole i le vaai mai a isi tagata nai lo le tapuai i le Atua. E mafai ona tatou faitio e uiga i tofiga o le Ekalesia ae ua tatou le gauai atu i la tatou auaunaga. E mafai ona tatou lagolagoina taitai o le Ekalesia ona tatou faitioina lea o a latou faaiuga.)
-
O le a se mea e mafai ona tatou faia e foia ai le pepelo? Fai atu i tagata o le vasega e mafaufau filemu i nei fesili: Pe o o’u totogiina ea le sefuluai, foai atu i e matitiva, auai i a’u sauniga, ma auauna atu i isi mo lo’u lava faamamaluina pe mo le faamamaluina o le Atua? I a’u mea uma lava e fai, o o’u saili ea ina ia ou latalata atu i lo’u Tama o i le Lagi ma Iesu Keriso?
Faaiuga
Ia uunaiina tagata o le vasega ina ia iloiloina o latou olaga mo le pepelo ma taumafai e aveesea. Ia molimau atu o se naunautaiga moni ina ia auauna atu ma usiusitai ia Iesu Keriso, e faaosofiaina e le alofa ma le faatuatua ia te ia, o le a aumaia ai i tatou ia latalata atu ia te ia ma faateleina ai lo tatou alofa ma le faatuatua.
Manatu Faaopoopo E Aoao Atu Ai
O mea nei e lagolago atu ai i le otootoga o le lesona ua fautuaina. Atonu e te manao e faaaoga le tasi po o le sili atu foi o nei manatu e avea o se vaega o le lesona.
1. Ua fetuuina e Iesu le mati ua le fua, o se faailoga o le pepelo
Faitau ma talanoaina le Mataio 21:17–22. Ia faamatala atu o se tasi faailoga o le pepelo o le laau lea o le mati lea na vaai i ai Iesu i lana malaga e agai atu i Ierusalema.
-
O le a le mea na faia e Iesu ina ua ia iloaina le laau e tele naua ona lau ae leai ni ona fua? (Tagai Mataio 21:19.) E faapefea ona faatusa le laau o le mati i le tagata pepelo?
Na faamatala mai e Elder James E. Talmage faapea: “[O le laau] o le faamoemoega autu lea o le fetuu ae o le mataupu i faatonuga a le Alii, aua o le i ai o lau, o se taufaasese lea e leai ni fua. Ana fai e i ai i le laau se filifiliga saoloto, tatou te faaigoaina o ia o se pepelo; o lona le fua mai faatasi ai ma ona lau o se faailoga lea o se pepelo faaletagata” (Jesus the Christ, 3rd ed. [1916], 527).
2. Ata Vitio
O le vaega lona lua o “Aganuu o le Feagaiga Fou,” o se vaega filifilia o Ata Vitio o le Feagaiga Fou (53914), o loo faamatalaina ai le faaaogaina e Iutaia o filateri ma tuupao. Afai e te lei faaalia atu le vaega lenei i le lesona 9, e mafai nei loa ona e faaaliina atu ina ia fesoasoani ai i tagata o le vasega ina ia malamalama i le Mataio 23:5 (“ua latou faalautele i a latou filateri ma faatele i tuupao o latou ofu”). Ia talanoaina pe faapefea ona avea nei mea ma faailoga o le pepelo o le au tusiupu ma le Au Faresaio.
3. “Ua sili lo latou manao i le viiga mai tagata” (Ioane 12:43)
-
O loo faamaumauina e Ioane faapea e toatele tagata o e talitonu ia Iesu latou te lei taliaina lo latou talitonuga talu ai lo latou manao i viiga mai tagata, nai lo le viiga mai le Atua” (Ioane 12:42–43). E faapefea ona tatou popole i nisi o taimi i le mauaina o “viiga mai tagata”? O a nisi o taunuuga o le sailia o “viiga mai tagata”? E mafai faapefea ona tatou foiaina le naunau ina ia sailia le viiga ma le faalauiloaga mai isi? (Tagai MFF 82:19; 88:67.)