Aoga Sa: Aoaoga Faavae o le Talalelei
Lesona 19: ‘O Lou Faatuatua Ua e Ola Ai’

Lesona 19

“O Lou Faatuatua Ua e Ola Ai”

Luka 18:1–8, 35–43; 19:1–10; Ioane 11

Faamoemoega

Ina ia fesoasoani i tagata o le vasega ina ia atinaeina se faatuatua malosi i le Tama Faalelagi ma Iesu Keriso.

Sauniuniga

  1. Faitau, mafaufau loloto, ma tatalo e uiga i mau nei:

    1. Luka 18:1–8. O le faataoto i le faamasino amioletonu ma le fafine ua oti lana tane, na aoao mai ai e Iesu le taua o le faamaoni i le tatalo.

    2. Luka 18:35–43. Ua faaalia e se tagata tauaso lona faatuatua ma ua faamaloloina e Iesu.

    3. Luka 19:1–10. Ua taliaina Iesu i le fale o Sakaio.

    4. Ioane 11:1–54. Ua molimau mai Iesu i lona paia e ala lea i le toefaatuina o Lasalo mai le oti.

  2. Tusi faitau faaopoopo: Mareko 10:46–52; Luka 11:5–13.

  3. Afai e maua ata o le Faamaloloina e Iesu o le Tauaso (62145; Taga Ata o le Talalelei 213) ma le Ua Faaola e Iesu o Lasalo Mai le Oti (62148; Taga Ata o le Talalelei 222), ia faaaoga i le taimi o le lesona.

  4. Fautuaga mo le aoaoina atu: Na saunoa mai Peresitene Tavita O. Makei faapea, “E faatoa mafai lava ona lelei le tuuina atu o a outou aoaoga e tusa ai ma mea o loo outou lagonaina” (Gospel Ideals [1953], 190). Ia saili e ala i le suesue, tatalo, ma le usiusitai ina ia faamalosia ai lau molimau i mataupu faavae o loo e aoaoina. (Tagai i le O le Aoao Atu—E Leai Se Isi Valaauga e Sili Ai, 12–19.)

Faalautelega Fautuaina o le Lesona

Gaoioiga e Faatosina Mai Ai

Afai e talafeagai ai, ia faaaoga le gaoioiga lenei po o sau lava gaoioiga e amata ai le lesona.

Ao lei malaga atu ia Elder Hugh B. Brown i se misiona, na tauina atu e lona tina ia te ia:

“Hugh, o e manatua ao avea oe ma se tama laitiiti ma afai e fai sau miti leaga pe ete ala ae foi i le po e te fefe? E te valaau mai i lou potu, ‘Tina, o e iina? Ma ou te tali atu ma taumafai e faamafanafana ia te oe ma aveesea lou fefe. O lenei a e alu atu i sau misiona ma e alu atu i le lalolagi, o le a i ai taimi o le a e fefe ai, pe a e lagonaina le vaivai, le le lava, tuua toatasi, ma i ai ni faafitauli. Ou te manao ia te oe ina ia e iloaina e mafai ona e valaau atu i lou Tama Faalelagi e pei ona e masani ona tauvalaau mai ai ia te au ma e faapea atu, “Tama, o e iai iina? Ou te moomia lau fesoasoani.’ Ia faia lenei mea ma lou malamalama o loo i ai o ia iina ma o le a saunia o Ia e fesoasoani mai ia te oe pe afai o le a fai lau vaega ma ola agavaa mo ou faamanuiaga. Ou te manao e toe faamautinoa atu ia te oe o loo i ai o Ia iina ma o le a talia mai au talosaga ma manaoga mo lou lelei” (faamatalaina e Marvin J. Ashton, “Know He Is There,” Ensign, Feb. 1994, 50).

Ia faamatala atu o lenei lesona o le a tatou suesueina ai ia tala faatusi paia na e mafai ona fesoasoani ia i tatou e atinaeina ai lo tatou faatuatua malosi faapea o le Tama Faalelagi ma Iesu Keriso la te silafiaina ma alolofa ia i tatou uma taitoatasi.

Mau Talanoaina ma le Faaaogaina

Ia filifili ma le agaga tatalo ia fuaiupu mai mau, o fesili, ma isi mea o le lesona na o le a sili ona faafetaiaia ai manaoga o tagata o le vasega. Ia talanoaina pe faapefea ona faatatau ia mau filifilia i le olaga i aso faipea. Ia uunaia tagata o le vasega ina ia fetufaai atu ni mea na oo i ai na e faatatau i mataupu faavae o loo i mau.

1. Ua tuuina atu e Iesu le faataoto i le faamasino amioletonu ma le fafine ua oti lana tane.

Faitau ma talanoaina le Luka 18:1–8. Faamatala na tuuina atu e Iesu lenei faataoto i se vaega o Faresaio.

  • E tusa ai ma le Luka 18:1, aisea na tuuina atu ai e Iesu lenei faataoto i le faamasino amioletonu ma le fafine ua oti lana tane? Ua aoaoina faapefea i tatou e lenei faataoto e “ao ona tatou tatalo e le aunoa”? (Tagai Luka 18:1–8.)

    Na aoao mai Elder James E. Talmage faapea, “E lei faailoaina mai e Iesu faapea ina ua gauai atu le faamasino amioletonu i le talosaga, na faapea foi i le Atua; ae na ia faamaninoina mai faapea e tusa lava po o se tagata e pei o lenei faamasino, o le e le’i mata’u i le Atua, e le ava foi i tagata, ae na faalogo atu lava i le talosaga a le fafine ua oti lana tane, e leai se tasi e tatau ona masalosalo faapea o le Atua, o le Amiotonu ma tumu i le Alofa, o le a ia faafofogaina ma talia mai” (Jesus the Christ, 3rd ed. [1916], 436).

  • O le a le uiga o le tatalo e le aunoa? (Tagai Luka 18:7; Alema 34:27.) O a faamanuiaga e mafai ona oo mai ia i tatou pe a tatou tatalo e le aunoa? (Tagai Luka 18:7–8; 2 Nifae 32:9; MFF 90:24.)

  • E faapefea ona avea le tatalo soo ma se aga o le faatuatua? O le a se mea e tatau ona tatou faia pe afai ua tatou tatalo soo ma lagonaina tatou te le o mauaina se tali?

    Na saunoa mai Elder Richard G. Scott:

    “O se mea sese le manatu faapea o tatalo uma tatou te faia o le a maua vave mai le tali. O nisi tatalo e manaomia ai sa tatou taumafaiga tele lava… .

    “Pe a tatou faamatala atu se faafitauli ma tuuina atu ia se faaiuga [i lo tatou Tama Faalelagi], o nisi taimi Na te tali mai ioe, o nisi taimi e leai. E masani lava na te taofia le tali, e le faapea ona o lona le manatu mai, a o lona alofa tele ia i tatou. E finagalo o ia ia tatou faaaoga aoaoga moni ua Ia tuuina mai ia i tatou. Ina ia faatupuina i tatou, e tatau ona tatou faalagolago i lo tatou malosi e faia faaiuga sa’o. E tatau ona tatou faia le mea sili tatou te lagona e sa’o. I se taimi, o le a Ia tali mai. Na te le tuulafoaiina i tatou” (Liahona, Ianuari 1990, 32).

  • O le a se mea ua aoaoina pe a e tatalo soo?

2. Ua faaalia e se tagata tauaso lona faatuatua ma ua faamaloloina e Iesu.

Faitau ma talanoaina le Luka 18:35–43. Faaali atu le ata o Iesu o loo faamaloloina le tauaso.

  • Na faapefea ona faaalia e le tagata tauaso sa latalata i Ieriko e i ai lona faatuatua i le Alii? (Tagai Luka 18:38–42.) Na faapefea ona faamanuiaina oe ao e faaaogaina lou faatuatua ia Iesu Keriso?

  • Na faapefea ona faaalia e lenei tagata lona loto faafetai ina ua mafai ona toe pupula? (Luka 18:43; tagai foi Mareko 10:52.) E mafai faapefea ona faaalia lo tatou loto faafetai i le Alii?

3. Ua taliaina Iesu i le fale o Sakaio.

Faitau ma talanoaina le Luka 19:1–10.

  • O ai Sakaio? (Tagai Luka 19:2. Ia faamatala atu o le au telona o tagata Iutaia ia sa galulue o ni ao lafoga mo le malo o Roma. E masani ona le fiafia i ai tagata Iutaia i le au telona ma e taua i latou o ni tagata agasala, ma le le faamaoni.)

  • Na faapefea ona faaalia e Sakaio lona matuai naunau e fia vaai ia Iesu? (Tagai Luka 19:3–4.) O le a le fetalaiga a Iesu i ai ina ua vaaia o ia i luga o le laau? (Tagai Luka 19:5.) Na faapefea ona tali atu Sakaio i fetalaiga a Iesu? (Tagai Luka 19:6.) O le a se mea e mafai ona tatou faia ina ia taliaina ai ma le olioli le Faaola i o tatou aiga?

  • O a ni uiga na faaalia e tagata ina ua alu atu Iesu ma faatasi ma Sakaio? (Tagai Luka 19:7.) Na faapefea ona ese le tali atu a Iesu ia Sakaio ma lana tali atu i isi? (Tagai Luka 19:5.) O le a se mea e mafai ona tatou aoaoina mai le faataitaiga a Iesu i lenei tala?

  • O le toatele o tagata e matuai manino lelei ia Sakaio ona o lana galuega o se telona (Luka 19:2, 7). O a ni auala tatou te faia ai foi i nisi taimi ni faamasinoga faapea i isi? Aisea e taua ai le aua nei o tatou le amanaiaina isi po o lo tatou manatu ua sili atu i tatou nai lo i latou? (Tagai Alema 5:54–56; 38:13–14.) E mafai faapefea ona tatou faatoilaloina ni lagona agaleaga i isi?

    Na saunoa mai Elder Joe J. Christensen e faapea: “O loo i ai i latou e ala a’e i taeao uma ma le musua e o i le aoga, pe o se gaoioiga foi a le Ekalesia, ona e latou te popole i se faiga e fai ai i latou. Ua ia te oe se mana e suia ai o latou olaga mo le lelei… . O loo faamoemoe mai le Alii ia te oe e avea ma tagata atinae e te fesoasoani e sii a’e i latou. Ia itiiti lou manatu ia te oe lava, a ia manatu atili i le mana ua e maua e te fesoasoani atu ai i isi, e oo lava ia i latou o i lou lava aiga” (Liahona, Ianuari 1997, 45).

4. Ua toefaatuina e Iesu ia Lasalo mai le oti.

Faitau ma talanoaina ia fuaiupu filifilia mai le Ioane 11:1–54. Ia faamatala atu e lei pine talu ona taunuu Iesu i le fale o Sakaio, ae ona ia mauaina loa se tala mai ana uo o Maria ma Mareta e faapea o lo laua tuagane o Lasalo, o se uo pele foi ia Iesu, o loo ma’i (Ioane 11:1–5). E lua aso na lumanai ai, ae faatonuina e Iesu ona soo ina ia latou o atu ma ia i Petania, o le aai i Iutaia lea o loo nonofo ai Maria, Mareta, ma Lasalo (Ioane 11:6–7).

  • Ina ua toe foi atu Iesu i Petania, ua fa lena o aso talu ona maliu ia Lasalo (Ioane 11:17). O le a le mea na faia e Mareta ina ua faalogo o loo sau Iesu? (Tagai Ioane 11:20.) O le a se mea na faagaeetia ai oe i le molimau a Mareta e uiga i le paia o le misiona a le Faaola? (Tagai Ioane 11:21–27.)

  • O le a le mea na faia e Iesu ina ua silafia e ia ia Maria ma le toatele o isi o loo fetagisi? (Tagai Ioane 11:33–35.) E faapefea ona aafia ou lagona e uiga ia Iesu i lenei tala?

  • E ui lava i le malosi o lana molimau, ae na foliga mai na faavaivaia le faatuatua o Mareta ina ua talosaga Iesu e fuliese le maa mai le tuugamau o Lasalo (Ioane 11:39). Na faapefea ona fesoasoani Iesu ia te ia? (Tagai Ioane 11:40.) O le a se mea e mafai ona tatou aoaoina mai lenei tala e uiga i mea o loo faamoemoeina mai e le Alii ia i tatou?

  • O le a se mea e mafai ona aoaoina ai i tatou i le tatalo a Iesu ao lei toefaatuina mai ia Lasalo e uiga i lo laua sootaga ma lona Tama? (Tagai Ioane 11:41–42.) E mafai faapefea ona tatou mulimuli i le faataitaiga a Iesu i a tatou tatalo taitoatasi faapea ma tatalo faaleaiga?

Faaali atu le ata o Iesu o loo toefaatuina Lasalo mai le oti, ma valaaulia tagata o le vasega ina ia faitau le Ioane 11:43–44.

  • Ua uma ona toefaatuina mai e Iesu tagata e toalua mai le oti (Mareko 5:22–24, 35–43; Luka 7:11–17). E faapefea ona ese le toefaatuina mai o Lasalo mai le oti ma isi vaega ia e lua na muamua atu? (O le afafine o Iairo ma le tama a le fafine Naina ua oti lana tane na toefaatuina mai le oti i le taimi lava na tuueseeseina ai o laua tino ma o laua agaga. E lei tuua i laua i totonu o ni tuugamau. O Lasalo e tusa e fa aso talu ona oti, ma ua uma foi ona tuuina lona tino i totonu o le tuugamau.)

  • E faapefea ona avea le vavega i le toefaatuina mai o Lasalo mai le oti ma se molimau i le misiona paia a le Faaola? O le a se aafiaga o lenei vavega na i ai i tagata sa molimauina? (Tagai Ioane 11:45–46.) E faapefea ona faamalosia lou faatuatua i le Faaola i lenei vavega?

Faaiuga

Ia faamatala atu o mataupu faavae o loo aoaoina mai i nei tala na outou talanoaina e mafai ona faamalosia ai o outou faatuatua i le Tama Faalelagi ma Iesu Keriso. A mavae le toe iloiloina puupuu o nei tala, ona faitau lea o le faamatalaga lenei mai ia Elder Thomas S. Monson:

“O le gasologa o taimi e le’i suia ai le mafai e le Togiola ona suia olaga o tagata. E pei ona ia fai atu ia Lasalo ua oti, e faapea foi ona ia fetalai mai ia te oe ma a’u: ‘ … ina sau ia i fafo.’ (Ioane 11:43.) Sau ia i fafo mai le lotovaivai o le masalosalo. Sau ia i fafo mai le faanoanoa i le agasala. Sau ia i fafo mai le oti o le le talitonu. Sau ia i fafo i se olaga fou. Sau ia i fafo” (Liahona, Oketopa 1974, 84).

Ia uunaiina tagata o le vasega ina ia sailia auala e mafai ai ona faamalosia o latou faatuatua i le Tama Faalelagi ma Iesu Keriso.

Manatu Faaopoopo e Aoao Atu Ai

O le vaega lenei e lagolago atu ai i le otootoga o le lesona ua fautuaina. Atonu e te manao e faaaoga lenei manatu e avea o se vaega o le lesona.

O le faataoto i le Faresaio ma le telona

Faitau ma talanoaina le faataoto i le Faresaio ma le telona (Luka 18:9–14).

  • E faapefea ona e faamatalaina le tatalo a le Faresaio i lenei faataoto? E faapefea ona e faamatalaina le tatalo a le telona?

  • O le a le uiga o le “aua o se faamaualuga ia te ia, e faamaualaloina lea; a o le faamaualalo ia te ia, e faamaualugaina lea”? (tagai Luka 18:14; Eteru 12:27.)

Lolomi