Aoga Sa: Aoaoga Faavae o le Talalelei
Lesona 8: O le Lauga i le Mauga: ‘O Se Ala e Silisili Lava’

Lesona 8

O le Lauga i le Mauga: “O Se Ala e Silisili Lava”

Mataio 5

Faamoemoega

Ina ia uunaiina tagata o le vasega ina ia o mai ia Keriso e ala lea i le faaaogaina o mataupu na ia aoaoina i le Lauga i le Mauga.

Sauniuniga

  1. Faitau, mafaufau loloto, ma tatalo e uiga i mau nei:

    1. Mataio 5:1–12. I luga o se mauga i Kalilaia, na aoao atu ai e Iesu ia faaAmuia i ona soo.

    2. Mataio 5:13–16. Na faailoa atu ai e Iesu o ona soo o le “masima o le lalolagi” ma “o le malamalama o le lalolagi.”

    3. Mataio 5:17–48. Na faailoa atu ai e Iesu o ia na sau e faataunuu le tulafono a Mose, ma na ia aoao atu ai se tulafono maualuga.

  2. Mau faitau faaopoopo: Luka 6:17–36; Mosaea 13:28–35; Alema 34:13–16; 3 Nifae 12; Eteru 12:11.

  3. Afai e te faaaogaina le gaoioiga e faatosina mai ai, ia tufa atu i tagata o le vasega ia tofu ma se penitala ma se fasi pepa.

  4. Afai e maua mea nei, ia faaaoga i le taimi o le lesona.

    1. O le ata o le Lauga i le Mauga (62166; Taga Ata o le Talalelei 212)

    2. Se fagu masima po o se moli matagi.

  5. Fautuaga mo le aoaoina atu: O Iesu Keriso o le Matai Faiaoga. Ao e suesueina le Lauga i le Mauga, ia maitauina auala na ia aoao atu ai ma vaai mo auala e mafai ona e faataitaia i le avea ai o se faiaoga.

Faalautelega Fautuaina o le Lesona

Gaoioiga e Faatosina Mai Ai

Afai e talafeagai ai, ia faaaoga le gaoioiga lenei po o sau lava gaoioiga e amata ai le lesona.

Tuu atu i tagata uma o le vasega se fasi pepa ma se peni po o se penitala. Ia faamatala atu o tusitusiga paia o loo tele naua ai valaaulia mai le Faaola. Atonu e te manao e faitau mai e tagata o le vasega ia valaaulia a le Faaola o loo i le Mataio 11:28–29 ma le 3 Nifae 27:27. Fai atu i tagata o le vasega e tusi le Ua valaaulia au e le Faaola ia: i le pito i luga o le fasi pepa. Ona faamatala atu lea o lenei lesona o loo taulai atu i le Lauga i luga o le Mauga, lea o loo aafia ai le tele o valaaulia mai le Faaola. Ia uunaiina tagata o le vasega e sue ia valaaulia i le taimi o le lesona ma tusi i luga o le fasi pepa.

Mau Talanoaina ma le Faaaogaina

A o e aoaoina atu mau nei o loo i lalo, ia talanoaina pe faapefea ona latou faaaogaina i le olaga i aso taitasi. Uunai le vasega e faasoa atu ni aafiaga e faatatau i mataupu faavae faatusi paia. Talu ai ona e faigata ona tuuina atu fesili taitasi pe talanoaina foi vaega taitasi o loo taua i le lesona, ia filifili ma le agaga tatalo vaega e sili atu ona fetaui ma manaoga o tagata o le vasega.

1. Ua aoao atu e Iesu ia faaAmuia i ona soo.

Ia faamatala atu faapea, ina ua mavae le tele o senituri talu ona tuuina mai e le Keriso ao i ai o ia i lona tino i le muai olaga ia tulafono a Mose i le Mauga o Sinai, na toe afio ae ai le Mesia i la le tino nei i se isi mauga e folafola mai se tulafono maualuga atu i se lauga ua lauiloa o le Lauga i le Mauga. Faaali atu le ata o le Lauga i le Mauga.

O uluai aoaoga i lenei lauga ua lauiloa o Faaamuia (Mataio 5:1–12). O le upu faaamuia e sau mai le upu Latina o le beatus, o lona uiga o le lelei, fiafia, po o le amuia. Faitau ia Faaamuia ma talanoaina e pei ona otootoina atu.

  • Mataio 5:3. O le a le uiga o le “matitiva i la le agaga”? (Ia lotomaualalo; Tagai foi i le 3 Nifae 12:3.) Aisea e taua ai ona tatou lotomaualalo? E mafai faapefea ona tatou lotomaualalo?

  • Mataio 5:4. O a nisi o auala ua saunia e le Alii mo i tatou ina ia tatou maua ai le faamafanafanaga? (Tagai Ioane 14:26–27 ma le Mosaea 18:8–9 mo nisi faataitaiga.) Na faapefea ona faamafanafanaina oe i taimi o faanoanoaga?

  • Mataio 5:5. O le a le uiga o le agamalu? (Ia le gaoia, loto faamagalo, po o le uiga lelei.) E mafai faapefea ona tatou atinaeina le agamalu? (Tagai Mosaea 3:19; Alema 7:23; 13:28.)

  • Mataio 5:6. O le a le mea na folafolaina atu e Iesu ia i latou “o e fiaaai ma fiainu i le amiotonu”? (Tagai Mataio 5:6; 3 Nifae 12:6.) O le a se mea e mafai ona tatou faia e aveese ai lo tatou tuinanau i mea o le lalolagi ae ia naunau i le amiotonu?

  • Mataio 5:7. E mafai faapefea ona tatou faaali atu le alofa i isi? Aisea tatou te moomia ai le alofa mai le Alii? (Tagai Alema 42:13–15.)

  • O le a sou manatu o le a le uiga o le i ai o se loto mama? E mafai faapefea ona tatou faamamaina o tatou loto? (Tagai Helamana 3:35.) Aisea e tatau ai ona mama o tatou loto pe afai tatou te fia vaai i le Atua ma mau faatasi ma ia? (Tagai Mose 6:57.)

  • Mataio 5:9. E mafai faapefea ona avea i tatou ma tagata faatupu filemu i o tatou aiga ma nuu?

  • Mataio 5:10–12. Aisea e sauaina ai tagata amiotonu i nisi o taimi? O le a le tali e tatau ona tatou tali atu ai i sauaga? (Tagai Mataio 5:44; Luka 6:35.)

Afai e te faaaogaina le gaoioiga e faatosina mai ai, fai atu i tagata o le vasega e lisi i lalo ia valaaulia o loo i Faaamuia latou te lagona e matuai fesoasoani tele ia i latou.

2. Ua faailoa atu e Iesu o ona soo o “masima o le lalolagi” ma o le “malamalama o le lalolagi.

Faitau ma talanoa le Mataio 5:13–16. A o outou talanoaina nei fuaiupu, atonu e te manao e faaali atu se fagu masima ma se moli matagi.

  • Na fetalai Iesu faapea o ona soo “o le masima o le lalolagi” (Mataio 5:13; MFF 101:39). O a nisi mea e faaaoga i ai le masima? (O tali e mafai ona aofia ai le faamanogi meaai ma le faasaoina o meaai.) E mafai faapefea ona avea le Au Paia o Aso e Gata Ai ma “masima o le lalolagi”?

  • Ia valaaulia se tagata o le vasega e faitau le Mataupu Faavae ma Feagaiga 103:9–10. O a ni malamalamaaga o loo faaopoopo mai e nei fuaiupu i le uiga o le avea ma “masima o le lalolagi”? E mafai faapefea ona avea i tatou ma “faaola i tagata”? (O tali e mafai ona aofia ai le fetufaai atu o le talalelei ma le faia o galuega faalemalumalusa.)

  • E mafai faapefea ona avea le Au Paia o Aso e Gata Ai ma “malamalama o le lalolagi”? (Mataio 5:14; tagai foi i le fuaiupu 16). O le a le mea e tupu pe a tuu se lamepa i “lalo o le mea e fua a’i saito”? (Mataio 5:15; ia maitauina o le mea e fua a’i saito o se ato lapoa). I le avea ai o i tatou ma tagata o le Ekalesia, e faapefea ona tatou tuuina a tatou lamepa i lalo o le mea e fua a’i saito i nisi o taimi? E mafai faapefea ona tatou tuu atu lo tatou malamalama e faasusulu atu i se auala e taitaiina ai nisi ina ia “viia ai lo [tatou] Tama … o i le Lagi”? (Tagai Mataio 5:16; 3 Nifae 18:24.)

3. Ua aoao atu e Iesu se tulafono e maualuga atu nai lo le tulafono a Mose.

Ia talanoaina le Mataio 5:17–48. Ia valaaulia ni tagata o le vasega e faitau leotele ia fuaiupu filifilia.

  • Na fetalai mai Iesu na ia sau e faataunuu le tulafono a Mose, ae le o le lepetiina (Mataio 5:17–18). Na faapefea ona ia faataunuuina le tulafono a Mose?

    Ia faamatala atu o le tulafono a Mose na “tuuina atu i le fanauga a Isaraelu… . aua o i latou o le nuu ua malolo, e telelise e fai le amioletonu, ae telegese e manatua le Alii lo latou Atua.” O se “tulafono o taulaga ma sauniga… . latou [Isaraelu] te tausi tonu i ai i lea aso ma lea aso, ina ia latou manatu pea i le Atua ma mea e tatau ona latou faia ia te ia” (Mosaea 13:29–30). O i latou o e na malamalama i le tulafono “na latou [faatalitali] ma le faamaoni ia Keriso, seia faataunuuina le tulafono. Aua o le mea lea na tuuina mai ai le tulafono” (2 Nifae 25:24–25).

    Na faataunuuina e le Faaola le tulafono a Mose ina ua ia togiola mo i tatou (Alema 34:13–16). Ina ua mavae le Togiola, e lei toe poloaiina tagata e osia ni taulaga i manu, lea sa manaomia o se vaega o le tulafono a Mose e faatatau lea i le taulaga togiola a Iesu Keriso. Ae peitai, na poloaiina tagata latou te “ositaulaga … i se loto momomo ma se agaga salamo” (3 Nifae 9:20; tagai foi i le fuaiupu 19).

  • Na fetalai mai Iesu e tatau ona sili atu le amiotonu o ona soo “nai lo le amiotonu o le au tusiupu ma le Au Faresaio” (Mataio 5:20). O le a se mea sa le maua i le “amiotonu o le au tusiupu ma le Au Faresaio? ( Sa latou taulai atu i le vaaiga i fafo o le tulafono ae le amanaiaina le taua o le faamaoni i totonu. Ana fai latou te tausiaina le tulafono e pei ona tuu mai ai, semanu e mafai foi ona latou iloaina o Iesu o le Mesia.)

    I le tulimanu tauagavale i le pito i luga o le laupapa, tusi ai le Ua outou faalogo na fai mai ai. Ia faamatala atu o le Lauga i le Mauga na faaaoga ai e Iesu nei upu ina ua faatatau lana fetalaiga i poloaiga lea ua avea ma se vaega o le tulafono a Mose. I le tulimanu taumatau i le pito i luga o le laupapa, tusi ai le Ao au ou te fai atu ia te outou. Ia faamanino atu na faaaoga e Iesu nei upu ina ua ia aoao atu i ona soo lana tulafono maualuga.

  • I le Mataio 5:21, o le a le tulafono anamua lea na faatatau i ai le fetalaiga a Iesu? (Tusi le Aua e te fasioti tagata i lalo o le Ua outou faalogo na fai mai ai.) O le a le tulafono maualuga na tuuina mai e Iesu e faatatau i lea poloaiga? (Tagai Mataio 5:22. Tusi le Aua e te ita i lalo o le Ao au ou te fai atu ia te outou. E faapefea ona avea le fuaitau e teena le ita o se tulafono maualuga nai lo le poloaiga e faasaga i le fasioti tagata? E faapefea ona aafia lo tatou va ma le Atua i lagona ita? O le a se mea e mafai ona tatou fai e puleaina ai lagona ita ma saili e aveesea mai o tatou olaga?

  • Na fetalai le Faaola e uiga i le aumaia o se “taulaga i le fata faitaulaga,” e faatatau lea i tu faaanamua o le aumaia o taulaga i le fata faitaulaga (Mataio 5:23). O le a le fetalaiga a Iesu i mea e tatau ona faia e ona soo pe afai o loo ia i latou le lagona ita ao latou sauni e avatu se taulaga i le fata faitaulaga? (Tagai Mataio 5:23–24.) E mafai faapefea ona faatatau lenei mea ia i tatou?

  • O le a le mea e tatau ona tatou faia pe afai ua faatiga mai se isi ia i tatou? (Tagai Mataio 5:24; 18:15; MFF 64:8–11.) O a ni tulaga matautia o le faatalitali mo se tagata na faatiga ia i tatou ina ia talosagaina la tatou faamagaloga?

  • I le Mataio 5:27, o le a le tulafono faaanamua o loo faatatau i ai le fetalaiga a Iesu? (Tusi le Aua e te mulilua i lalo o le Ua outou faalogo na fai mai ai.) O le a le tulafono na tuuina mai e Iesu e sili atu nai lo lenei poloaiga? (Tagai Mataio 5:28. Tusi le Aloese mai manatu faatuinanau i lalo o le Ao au ou te fai atu ia te outou.) O a nisi o taunuuga o manatu le mama? (Tagai Mosaea 4:30; Alema 12:14; MFF 63:16.) O le a se mea e mafai ona tatou faia ina ia faatumauina ai pea le mama o o tatou manatu?

  • O le Faaliliuga a Iosefa Samita o loo faapea mai ai o le mata ma le lima o loo taua i le Mataio 5:29–30 o le faatusa lea o agasala. O le a se mea o loo tau mai e nei fuaiupu ia i tatou e tusa ma mea e ao ona tatou faia i a tatou agasala?

  • E pei ona tusia i le Mataio 5:33, na faapefea ona faailoa e tagata i taimi o le Feagaiga Tuai o loo latou tauina le mea moni? (Tusi le Faia tautoga i le Alii i lalo o le Ua outou faalogo na fai mai ai.) O le a le tulafono na tuuina mai e Iesu e sili atu nai lo lenei faiga? (Tagai Mataio 5:34–37. Faitau le faamatalaga lenei mai ia Elder Bruce R. McConkie. Ona tusi lea o le Tausi i lau upu i lalo o le Ao au ou te fai atu ia te outou.)

    Na saunoa mai Elder Bruce R. McConkie: “I le tulafono a Mose, o le faia o tautoga sa taatele ma sa aafia ai le tele o tulaga, i lona faataunuuina, e itiiti lava ni upumoni sa lei faia faatasi ma se tautoga… . Ae i le tulafono atoatoa a Keriso o upu uma lava a se tagata ua fusia ai, ma o faamatalaga uma lava e tautalagia e matuai moni e pei lava ona taua ai upu uma o se tautoga” (The Mortal Messiah, 4 vol. [1979–81], 2:140).

  • I le Mataio 5:38, o le a le tulafono faaanamua na faatatau i ai le fetalaiga a Iesu? (Tusi le E suia le mata i le mata i lalo o le Ua outou faalogo na fai mai ai.) Ia faamatala atu o le uiga o le “suia o le mata i le mata” o le toe tauia lea o le tagata na faamanu’aina le isi tagata i le manua lava e tasi e ala lea i se faasalaga; tagai Levitiko 24:17–21.) O le a le poloaiga ua sili atu nai lo lenei tulafono? (Tagai Mataio 5:39–40. Tusi le Liliu le isi alafau i lalo o le Ao au ou te fai atu ia te outou.) O a mataupu na aoao atu e Iesu ina ua ia fetalai e uiga i le liliu o le isi alafau i se tasi na poina mai ma avatu i ai lo tatou ofutele i se tasi na ia ave o tatou ofu?

  • I le Mataio 5:43, o a ni faiga faaanamua o loo faatatau i ai le fetalaiga a Iesu? (Tusi le Ia e alofa atu i le lua te tuaoi a ia inoino i le ua ita mai ia te oe i lalo o le Ua outou faalogo na fai mai ai.) O le a le poloaiga ua sili atu nai lo lenei faiga? (Tagai Mataio 5:44–47. Tusi le Ia outou alolofa atu i e ua ita mai ia te outou i lalo o le Ao au ou te fai atu ia te outou.) E mafai faapefea ona tatou atinaeina le alofa mo e ua ita mai ia i tatou? (Tagai Moronae 7:47–48 mo se faataitaiga e tasi.) O le a faapefea ona suia o tatou olaga pe a tatou alolofa atu i e ita mai ia i tatou? O le a mafai faapefea ona suia o latou olaga?

Afai e te faaaogaina le gaoioiga e faatosina mai ai, fai atu i tagata o le vasega e vaai i le laupapa ma lisi i lalo ia valaaulia o loo i le Mataio 5:17–47 lea e matuai fesoasoani lava ia i latou.

  • E faapefea ona tatou malamalama i le poloaiga a le Faaola e tatau ona tatou atoatoa? (O se faaliliuga faaEleni o le upu atoatoa o le maea, uma, atinae ma le atoatoa.) E mafai faapefea e le poloaiga ina ia tatou atoatoa ona faagauaiina i tatou nai lo le faapopoleina ai o i tatou?

    Na saunoa mai Peresitene Iosefa Filitia Samita:

    “Ou te talitonu o le uiga lava lena o le fetalaiga a le Alii: e tatau ona tatou atoatoa, e pei o lo tatou Tama o i le Lagi e atoatoa o ia. O lena tulaga e le oo uma mai i le taimi e tasi, ae o le upu ma le upu, o le fuaiupu ma le fuaiupu, o le faataitaiga ma le faataitaiga, ma e le umi foi ona tatou ola ai i lenei olaga faaletino, aua o le a tatou oo atu i talaatu o le tuugamau ae tatou te lei oo atu i le atoatoa ma avea faapei o le Atua.

    “Ae o iinei tatou te faataatia ai le faavae. O iinei tatou te aoaoina ai nei upumoni faigofie o le talalelei a Iesu Keriso, i lenei tulaga faataitai, e saunia ai i tatou mo le atoatoa. O lo tatou tiute o lo tatou ola lelei lea i le taimi nei nai lo ananafi, ma ia sili atu a taeao nai lo le aso… . Afai tatou te tausia poloaiga a le Alii, ua tatou i ai i le ala lena e tau atu i le atoatoa” (Doctrines of Salvation, comp. Bruce R. McConkie, 3 vol. [1954–56], 2:18–19; tagai foi MFF 93:11–14, 19–20).

  • E faapefea ona fesoasoani le Togiola a le Faaola ia i tatou ia tatou oo atu ai i le atoatoa? (Tagai Moronae 10:32–33; MFF 76:68–70.) E faapefea ona fesoasoani aoaoga o loo i le Lauga i le Mauga ia i tatou ina ia “tatou o mai ia Keriso ma faaatoatoaina ia te ia”?

Faaiuga

Ia molimau atu o aoaoga o loo i le Lauga i le Mauga e fesoasoani lea ia i tatou “ia o mai ia Keriso ma faaatoatoaina ia te ia” (Moronae 10:32). Ia uunaiina tagata o le vasega e faaaoga na aoaoga i o latou olaga. Afai e te faaaogaina le gaoioiga e faatosina mai ai, ia fai atu i tagata o le vasega e vaavaai i valaaulia na latou lisiina ma filifili se tasi po o se lua o le a latou taulai atu i ai i le vaiaso a sau.

Manatu Faaopoopo E Aoao Atu Ai

O mea nei e lagolago atu ai i le otootoga o le lesona ua fautuaina. Atonu e te manao e faaaoga le tasi po o le sili atu foi o nei manatu e avea o se vaega o le lesona.

1. “O se ala sili ona lelei” (Eteru 12:11)

Ia valaaulia ni nai tagata o le vasega ina ia o mai i le vasega ua saunia e fetufaai atu ni manatu e uiga i ni ala e mafai ona fesoasoani ai le Mataio 5 ia i latou i le fale, i le aoga, po o le galuega.

2. O aoaoga a le Faaola e uiga i le tetea

Afai e i ai ni au fesili po o tagata foi o lau vasega e uiga i le Mataio 5:31–32, ia tagai i le manatu faaopoopo e aoao atu ai lona lima i le lesona 14 (tagai itulau 66).

3. Ata Vitio

O le vaega lona lua o le “Tu ma Aga o le Feagaiga Fou,” o se filifiliga mai Ata Vitio o le Feagaiga Fou (53914), o loo faamatala mai ai le upu taitaitama, lea o loo faaaogaina i le Kalatia 3:24–25 e faamatalaina ai le tulafono a Mose. Afai e te faaalia le vaega lenei, ia talanoaina pe na faapefea ona avea le tulafono a Mose ma taitaitama e aumai ai tagata ia Keriso.

Lolomi