Lesona 15
“O a’u o le Malamalama o le Lalolagi”
Faamoemoega
Ina ia faamalosia molimau a tagata o le vasega o Iesu Keriso o lo tatou Faaola ma o lo tatou mulimuli ia te ia tatou te maua ai le saolotoga moni.
Sauniuniga
-
Faitau, mafaufau loloto, ma tatalo e uiga i mau nei:
-
Ioane 7. Ua auai atu Iesu i le Tausamiga o Fale Apitaga ma aoao atu i totonu o le malumalu. O nisi tagata sa talitonu o ia o le Keriso, ae o nisi na manatu o ia o se taufaasese.
-
Ioane 8:1–11. O se fafine na maua ina o mulilua ua aumaia ia Iesu. Na ia taulimaina o ia ma le alofa.
-
Ioane 8:12–36. Na faailoa mai e Iesu, “ O au o le malamalama o le lalolagi.” Na ia aoaoina tagata Iutaia sa talitonu e faapea o le mulimuli atu ia te ia o le a faasaolotoina ai i latou mai noataga faaleagaga.
-
-
Fautuaga mo le aoaoina atu: Ia saga iloiloina lau lesona ae pe toe vaiaso fai. Afai e te vave faitauina mau filifilia, o le a e mauaina ni manatu ma ni lagona i le gasologa o le vaiaso na o le a fesoasoani ia te oe i le aoaoina o le lesona. Ao e mafaufau loloto i le lesona i le gasologa o le vaiaso, ia tatalo mo le Agaga e taitaiina oe ma ia maua le faatuatua o le a faamanuiaina oe e le Alii. (Tagai O le Aoao Atu—E Leai Se Isi Valaauga e Sili Ai, 23–24, 104–106.)
Faalautelega Fautuaina O Le Lesona
Gaoioiga E Faatosina Mai Ai
Afai e talafeagai ai, ia faaaoga le gaoioiga lenei po o sau lava gaoioiga e amata ai le lesona.
Ia taumafai e faapogisa le potu i le mea e gata mai ai e ala lea i le tapeina o moli ma toso pupuni. Fai atu i se tagata o le vasega e faitau leotele le Mataupu Faavae ma Feagaiga 93:1–2. Ao faitau le tagata o le vasega (po o taumafai e faitau) nei fuaiupu, fesili atu i ai:
Gaoioiga E Faatosina Mai Ai
-
Pe sa faigata ona faitauina nei fuaiupu? O le a se mea e faigofie ai? (Ia lava le malamalama.)
Toe ki moli ma toe tatala ia pupuni. Fai atu i le tagata o le vasega e toe faitau le Mataupu Faavae ma Feagaiga 93:1–2. Ia faamatala atu o le malamalama o loo faaaogaina i tusitusiga paia e avea o se faailoga o Iesu Keriso. Na faaaogaina e Iesu lenei lava faailoga ao aoao atu o ia i totonu o le malumalu. O lenei lesona o le a talanoaina ai auala lea e avea ai Iesu Keriso ma malamalama mo i tatou.
Afai e le mafai ona e faapogisaina le potu, ia tusi se ata o se moli o le ava i luga o le laupapa (po o le faaali atu foi o se ata o se fale o le moli o le ava). Ia faamatala atu o le faamoemoega o se fale o le moli o le ava e lapatai ai ia vaa i ni mea matautia ma taitai atu ai i latou i le saogalemu. Ona faamatala atu lea o le malamalama o se tasi lea o faailoga na faaaogaina e Iesu e aoao atu ai e uiga i lana misiona ma lana sootaga ma i tatou. O lenei lesona o le a talanoaina ai pe faapefea ona avea Iesu ma malamalama lea e faaali mai ai ia i tatou le ala e tau atu i le saogalemu faaleagaga.
Mau Talanoaina Ma Le Faaaogaina
Ao e aoaoina atu tala nei faatusi paia, ia molimau atu ia Iesu Keriso pe a e lagonaina ua talafeagai. Ia uunaiina tagata o le vasega ina ia tuu mai a latou molimau ia Iesu Keriso pe afai ua faagaeetiaina i latou e faia.
1. Ua auai atu Iesu i le Tausamiga o Fale Apitaga ma aoao atu i totonu o le malumalu.
Ia talanoaina le Ioane 7. Ia valaaulia tagata o le vasega e faitau leotele fuaiupu filifilia. Ia faamatala atu o le Tausamiga o Fale Apitaga o se tausamiga faaletausaga lea a Iutaia e faia i le ono masina talu ona maea le Tausamiga o le Paseka. E valu aso e faia ai ma e faamanatuina ai le faamanuiaga a le Alii i le fanauga a Isaraelu i le taimi o le latou faigamalaga i le vao. E faamanatuina ai foi seleselega o le tausaga ma faailogaina ai le maea o le vaitau o le seleselega. E mafaufau tagata Iutaia o le tausamiga sili lenei ma fiafia i tausamiga uma. (Tagai Levitiko 23:34–43.)
Ia faamanino atu na malaga mai Iesu mai Kalilaia i Ierusalema ina ia auai i lenei tausamiga i le malumalu (Ioane 7:1–10).
-
O a tala a tagata sa i le tausamiga e uiga ia Iesu ao faatalitali i lona taunuu mai? (Tagai Ioane 7:12.) Aisea na ofo ai tagata ina ua amata ona aoao atu Iesu? (Tagai Ioane 7:14–15.)
-
O le a le mea na ta’u atu e Iesu i tagata sa i totonu o le malumalu e uiga i ana aoaoga? (Tagai Ioane 7:16.) O le a le mea na ia faatonuina ai tagata ina ia latou faia e maua ai se molimau i ana aoaoga? (Tagai Ioane 7:17.) E mafai faapefea ona tatou faaaogaina nei aoaoga i o tatou olaga?
Na saunoa mai faapea Elder John K. Carmack o le Au Fitugafulu: “Na faamalamalama mai e Iesu, ‘Ai se tasi e fia fai lona finagalo, e iloa e ia le mataupu pe mai le Atua, pe ou te tautala fua lava a’u’ (Ioane 7:17). I nisi upu, ao e taumafai i ai o le a mafai ona e iloa e moni. E moomia ai le faatuatua ina ia taumafai, ae maua ai le faamaoniga faaleagaga. O le soo na te faia lea mea, o le a maua ai le talitonu, iloa, ma malamalama” (Liahona, Ian. 1989, 28).
Ia valaaulia tagata o le vasega e faamatala atu pe na faapefea ona faamalosia a latou molimau e se mataupu faavae o le talalelei ao latou ola ai (atonu e te manao e fetufaai atu se mea na oo ai lava oe i ai). Ia faamanino atu o le faafeagai o le folafolaga o loo i le Ioane 7:17 e moni foi; afai tatou te le ola ai i mataupu faavae o le talalelei, o le a faavaivaia a tatou molimau.
-
Ao aoao atu Iesu, sa faaauau pea ona fevaevaeai tagata i o latou manatu ia te ia. O a nisi o mafuaaga na talitonu ai o ia o le Keriso? (Tagai Ioane 7:31, 37–41.) O a nisi o mafuaaga sa le talitonu ai tagata o ia o le Keriso? (Tagai Ioane 7:27, 41–42, 52.) O le a se tulaga na iloa ai e tagata le mea e sau ai Iesu? (Latou te iloa lelei lona aiga ma lona nuu.) O le a se tulaga latou te leiloaina ai le mea e sau ai o ia? (Tagai Ioane 7:28–29; 8:14, 19, 23–29. Latou te lei malamalama na auina mai o ia e le Tama Faalelagi.)
-
E mafai faapefea ona faamalosia a tatou molimau i le misiona a Iesu Keriso?
2. Na aumaia ia Iesu se fafine na maua o mulilua.
Faitau ma talanoaina le Ioane 8:1–11.
-
Aisea na avatu ai e le au tusiupu ma le Au Faresaio le fafine mulilua ia Iesu? (Tagai Ioane 8:4–6. Sa latou mananao e maileia Iesu i le faasalaina o le fafine i le oti po o le feteenai ai ma le tulafono a Mose.) O le a le tala a Iesu i le au tusiupu ma le Au Faresaio? (Tagai Ioane 8:7.) Aisea na latou le fetogia ai le fafine? (Tagai Ioane 8:9.)
-
Ina ua le faamaoniaina e Iesu le agasala a le fafine, na te lei faasalaina foi o ia (Ioane 8:10–11). O le a se mea e mafai ona tatou aoaoina mai le faataitaiga a le Faaola e uiga i le ala e tatau ona tatou tali atu ai i tagata o e ua matuai agasala lava?
Na faamalamalama mai e Elder Marvin J. Ashton: “Na aumaia e le au tusiupu ma le Au Faresaio se fafine ona o le mulilua. O lo latou faamoemoega e le o le faaalia lea o le alofa mo le tamaitai po o le Faaola, ae ina ia faamaasiasiina ma faaseseina Iesu… . e lei tausalaina e Iesu le tagata na mulilua; e lei i ai se masalosalo e uiga i lona finagalo e tusa ma le tulaga o le faaalia o uiga mama e tatau ai. [Peitai] ia filifili e aoao atu ma le alofa—ina ia faaali atu i le au tusiupu ma le Au Faresaio i le tulaga manaomia o le auauna atu i tagata mo lona lava lelei, ma faaali atu ai foi le tulaga matautia o le taufaasese ma le maasiasi” (Liahona, Oketopa 1981, 51–52).
3. Na tautino mai e Iesu, “ O au o le malamalama o le lalolagi.”
Faitau ma talanoaina le Ioane 8:12–36.
-
I le taimi o le Tausamiga o Fale Apitaga, sa matuai faamalamalamaina le malumalu i Ierusalema i aloiafi mai tuugalamepa lapopoa e fa. O nei aloiafi e mafai ona iloa uma i totonu o le aai. Aisea ua talafeagai lelei ai lea nofoaga mo Iesu e faasilasila atu ai, “O au o le malamalama o le lalolagi”? (Ioane 8:12). O le a le uiga, o Iesu o le malamalama o le lalolagi? (Tagai Ioane 8:12; Alema 38:9, 3 Nifae 15:9; MFF 88:6–13.)
-
Ao tauivi tagata ina ia avea e faapei o Iesu, e avea foi i latou ma malamalama o le lalolagi, o loo atagia ai lona malamalama (Mataio 5:14, 3 Nifae 18:24). E mafai faapefea ona tatou fesoasoani i isi ina ia latou iloa le malamalama lea ua ofoina mai e Keriso? (Tagai Mataio 5:16; 28:18–20; Filipi 2:14–15.)
-
Na tau atu e Iesu i tagata i le malumalu faapea na te faia lava mea e fiafia ai lona Tama (Ioane 8:29). E mafai faapefea ona sili atu lo tatou tautino e faia mea e fiafia ai le Tama Faalelagi?
-
Ao molimau atu Iesu i lona Tama i le Lagi, “e toatele na talitonu ia te ia” (Ioane 8:30). O le a le mea na folafola atu e Iesu i nei tagata pe afai o le a faaauau pea ona latou mulimuli ia te ia? (Tagai Ioane 8:31–32.) O le a le mea e faasaolotoina ai i tatou e le upumoni? (Tagai Ioane 8:33–34.) E noanoatia faapefea i tatou pe a tatou faia le agasala? (Tagai Alema 12:11; 34:35.) E faapefea ona faasaoloto i tatou mai lo tatou iloa o le mea moni?
-
Na taua mulimuli ane e Iesu o ia o le “upumoni” (Ioane 14:6). E faapefea ona aafia ai lou malamalama i le folafolaga o loo i le Ioane 8:32 ona o lenei mea? E faapefea ona faasaolotoina i tatou i le iloaina o le Faaola? E mafai faapefea ona tatou iloaina o ia?
Faaiuga
Ia molimau atu o Iesu Keriso o lo tatou Faaola ma na o ia e mafai ona faasaoloto ai i tatou mai noataga o le agasala. Ia uunaiina tagata o le vasega ina ia mulimuli ia Keriso, “o le malamalama o le lalolagi,” ina ia mafai ona ia taitaiina i latou i le mapusaga faaleagaga.
Manatu Faaopoopo E Aoao Atu Ai
O mea nei e lagolago atu ai i le otootoga o le lesona ua fautuaina. Atonu e te manao e faaaoga le tasi po o le sili atu foi o nei manatu e avea o se vaega o le lesona.
1. Vai ola
I se tasi o sauniga na faia i le Tausamiga o Fale Apitaga, na tuuina ai e se faitaulaga ia le vai mai le taelega i Seloa i luga o le fata faitaulaga. O lenei taulaga na faia ina ia talosagaina ai le timu ma le faamanuiaina o mea toto i le isi tausaga. E pei ona aoao e Iesu i le malumalu i le aso mulimuli o le tausamiga, na ia valaauliaina ai tagata ina ia feinu i le vai o le ola (Ioane 7:37–38).
-
O fea nisi vaega na taua ai e Iesu le vai o le ola? (Tagai Ioane 4:5–15.) O le a le “vai o le ola”? E mafai faapefea ona tatou inu i ai?
2. O Iesu Keriso o Ieova
Faitau ma talanoaina le Ioane 8:37–59.
-
Aisea na tau atu ai e Iesu i tagata Iutaia le talitonu e le o latou o ni fanau a Aperaamo? (Tagai Ioane 8:39–40. E ui lava o i latou o nisi e suli mai ia Aperaamo, ae latou te lei faia galuega amiotonu e pei ona faia e Aperaamo.) Aisea na tau atu ai e Iesu ia i latou e le o ni fanau a le Atua i latou? (Tagai Ioane 8:41–44.) E mafai faapefea ona tatou faaalia e ala i a tatou mea e fai o i tatou o fanau a le Tama Faalelagi?
-
Aisea na tete’i ai tagata Iutaia i le faamatalaga a le Alii e uiga ia Aperaamo? (Tagai Ioane 8:51–53, 56–57. Latou te le iloaina sa faatatau le saunoaga a Iesu i lona mafaia lea ona faatoilaloina le oti faaleagaga [fuaiupu 51] ma lona muai olaga [fuaiupu 56–57].) O le a se fesoasoaniga o le fetalaiga a Iesu, “Sa a’u i ai, ao lei leai se Aperaamo” (Ioane 8:58) ia i tatou ina ia tatou malamalama ai ia te ia? Tagai Esoto 3:13–14. O Iesu o Ieova, le Silisiliese “O Au,” le Atua o Aperaamo, Isaako, ma Iakopo.) Aisea e taua ai le iloa o Iesu o Ieova ao lei oo i lona soifuaga faaletino?