“Ona La Tuua Loa Lea o Laua Upega”

Faamoemoega

Ina ia fesoasoani i tagata o le vasega ina ia latou malamalama e valaauina ia Aposetolo e avea o ni molimau faapitoa ia Iesu Keriso ma e faamanuiaina i tatou pe a tatou lagolagoina ma mulimuli ia i latou.

Sauniuniga

Faitau, mafaufau loloto, ma tatalo e uiga i mau nei:
1. Luka 4:14–32. Ua aoao atu Iesu i se sunako i Nasareta ma molimau atu o ia o le Mesia o le na valoia e Isaia. Na matuai itagia lava ma teena o ia e tagata.
2. Luka 5:1–11, 27–28; 6:12–16. Ua valaauina e Iesu ana Aposetolo e Toasefululua.
3. Mataio 10. Ua faauuina ma aoaoina e Iesu le Au Aposetolo e Toasefululua ma auina atu i latou ina ia talai le talalelei.
Mau faitau faaopoopo: Isaia 61:1–2; Mataio 4:18–22; Mareko 1:16–20; 3:13–19; 6:7–13; Luka 9:1–6; 12:1–12; Mataupu Faavae ma Feagaiga 107:23–24, 33–35, 39, 58.
Afai e maua ata nei, ia faaaoga i le taimi o le lesona: Valaauina o Tagata Faifaiva (62496; Taga Ata o le Talalelei 209) po o Iesu ma Tagata Faifaiva (62138; Taga Ata o le Talalelei 210); Faauuina e Keriso o le Au Aposetolo (62557; Taga Ata o le Talalelei 211); ma se ata o le Korama a le Au Aposetolo o loo i ai nei (mai se lomiga lata mai o le konafesi i le Liahona).
Fautuaga mo le aoaoina atu: Aoao ma faaaoga igoa o tagata o le vasega. Afai e te faia faapea, o le a iloa ai e tagata o le vasega e te manatu alofa mo i latou o ni tagata taitoatasi. O le iloaina o igoa o tagata o le vasega e mafai foi ona fesoasoani ai ia te oe ina ia uunaiina oe e te auai e ala lea i lou mafai ona tuusao atu fesili i tagata patino (Tagai O le Aoao Atu—E Leai se Isi Valaauga e Sili Ai, 105–6.)

Faalautelega Fautuaina o le Lesona

Gaoioiga e Faatosina Mai Ai

Afai e talafeagai ai, ia faaaoga le gaoioiga lenei po o sau lava gaoioiga e amata ai le lesona.

Tuu atu i se tagata o le vasega e faitau le vaega muamua o le Mosaea 27:31 (e oo i le “tautino atu o ia o le Atua”). Ia faamalamalama atu, i le Afio Faalua mai o Iesu Keriso, o le a iloa uma ai lava e tagata o ia o le Faaola. E lei moni lenei mea i lona afio mai muamua. Na suesueina e Iutaia ia valoaga e uiga i le oo mai o le Faaola i le tele o senituri, ae o le toatele o i latou na faalogo ia Iesu sa latou le mafafai ona iloaina o ia o le Faaola. Talu ai ona e lei faasaolotoina e Iesu ia tagata Iutaia mai le pulega a Roma, e pei ona sa latou faamoemoe i ai o le a faia e le Mesia, o lea na toatele ai i latou na teenaina o ia ma lana savali.

Ia faamanino atu o le vaega muamua lava o lenei lesona o le a talanoaina ai le mea na tupu ina ua uluai faailoa atu e Iesu o ia o le Mesia lea ua leva ona faatalitali i ai. O isi vaega o le lesona o le a talanoaina ai le valaauina e Iesu o le Au Aposetolo ina ia fesoasoani e faasalalauina atu lana savali.

Mau Talanoaina ma le Faaaogaina

Ao e aoaoina atu ia mau nei, ia talanoaina ia faamanuiaga ia e oo mai i le iloaina o Iesu Keriso o le Faaola ma le mulimuli i Aposetolo.

1. Ua faailoa atu e Iesu o ia o le Mesia.

Ia talanoaina le Luka 4:14–32. Ia valaaulia tagata o le vasega e faitau ia fuaiupu filifilia. Ia faamatala atu na valaauliaina ia Iesu e faitauina se fuaiupu mai tusitusiga paia ma faia sana faamatalaga i se sauniga sa faia i le sunako i Nasareta.

Tuu atu i se tagata o le vasega e faitau le Luka 4:16–19. (Ia faailoa atu o fuaiupu 18–19, o upu ia na sii mai i le Isaia 61:1–2. O Isaia o loo taua o “Isaia” i le Luka 4:17.) O le a le uiga o nei fuaiupu? (O se faamatalaga faavaloaga o mea o le a faia e le Mesia; tagai i le lesona 1.)
Ina ua maea ona faitauina e Iesu ia fuaiupu mai le Isaia, o le a le molimau na ia tuuina atu? (Tagai Luka 4:21. Na ia faailoa atu o ia o le Mesia lea na valoaia e Isaia lea o loo faatalitali i ai tagata Iutaia mo le tele o senituri.) O le a le tali a tagata sa iai i le sunako i lea faamatalaga a Iesu? (Tagai Luka 4:22–29.)
O le a sou manatu aisea na faafaigata ai i tagata sa i le sunako ona taliaina o Iesu o le Mesia? (Tagai Luka 4:22. O tali e mafai ona aofia ai lo latou iloaina o ia ma na vaai i lona tuputupu a’e, o lea e le mafai ai ona latou iloa e mafai ona avea o ia ma Mesia silisiliese o loo latou faamoemoeina.) O le a sou manatu aisea o loo faafaigata ai i nisi tagata i aso nei ona taliaina Iesu Keriso? E mafai faapefea ona tatou faamalosia a tatou molimau o Iesu o le Faaola?

2. Ua valaauina e Iesu ana Aposetolo e Toasefululua.

Faitau ma talanoaina ia fuaiupu filifilia mai le Luka 5:1–11, 27–28; 6:12–16. Faaali atu le ata o Iesu ma tagata faifaiva ma le ata o le Au Aposetolo o loo i ai nei. Ao outou talanoaina ia mau, fesoasoani i le vasega ina ia latou malamalama e valaauina Aposetolo ina ia faia mea na faia e Iesu i totonu o le sunako i Nasareta—o le faailoa atu lea o ia o le Mesia, o le Faaola.

O le a le mea sa faia e Simona Peteru, Iakopo, ma Ioane ina ua alu atu Iesu ia te i latou? (Tagai Luka 5:1–2.) O le a le mea na tau atu i ai e Iesu e uiga i le auala e suia ai o latou olaga pe afai latou te mulimuli atu ia te ia? (Tagai Luka 5:10.) Na faapefea ona aafia lou olaga ona o lau faaiuga e te mulimuli ia Iesu Keriso?
Na faapefea ona avea le vavega na faia i upega fagota ma faataimuaga o mea o le a oo i ai ia Peteru, Iakopo, ma Ioane o ni “faifaiva i tagata”? (Mareko 1:17). Tuu atu i tagata o le vasega e mafaufau i fuaitau nei:
1. Luka 5:5: “Ona o lau fetalaiga ou te tuu ifo ai le upega.” (O le a latou galulue i le mea e faatonu ai latou e Iesu.)
2. Luka 5:6: “Sa latou siomia le au i’a tele lava: ua masae ai lo latou upega.” (O le a latou mauaina le toatele o tagata o e naunau e taliaina le talalelei.)
3. Luka 5:7: “Ua latou genogeno atu i a latou uo … e o mai e fesoasoani ia te i latou.” (O le a latou valaauina isi ina ia fesoasoani atu i le galuega.)
Ia faamalamalama atu, i le Luka 5:1–11, na valaauina ai e Iesu ia Peteru, Iakopo, ma Ioane e avea ma ona soo. Mulimuli ane, na ia valaauina lea o i latou e avea ma Aposetolo. Tusi le upu Soo ma le Aposetolo i luga o le laupapa. O le a le eseesega i le va o se soo ma se Aposetolo?

Ia faamatala atu o se soo o soo se tasi lea e mulimuli ia Iesu Keriso. O se Aposetolo o se soo lea ua valaauina e avea ma molimau faapitoa ia Keriso (MFF 107:23). O le upu Aposetolo o lona uiga “o le ua auina atu.” O uso o le Korama a le Au Aposetolo e Toasefululua ua auina atu e molimau atu i le lalolagi o Iesu o le Faaola ma le Togiola o tagata uma.
Aisea na taua ai le valaauina e Iesu o Aposetolo? (Tagai Mataio 9:36–38; 16:19; Mareko 3:14–15; Ioane 20:19–21, 23; Efeso 4:11–15. Latou te fesoasoani e talai atu le talalelei ma o le a latou taitaiina le Ekalesia ma tauaveina le pule o le perisitua ina ua mavae atu Iesu.) Aisea e taua ai le valaauina e le Alii o Aposetolo i aso nei?
Na faapefea ona filifilia e Iesu ia uluai Aposetolo e Toasefululua? (Tagai Luka 6:12–13.) Na faapefea ona saunia e Iesu o ia lava e valaauina i latou? E faapefea ona faatusatusa lenei faiga i le auala o loo filifilia ai tagata e avea ma Aposetolo i aso nei ma auauna atu i isi valaauga o le Ekalesia? (E tatalo taitai o le Ekalesia ma saili atu mo musumusuga ina ia iloa po o ai e finagalo le Alii e galulue i tofiga taitasi.)
O le a se mea o loo tau mai e tusitusiga paia ia i tatou e uiga i tulaga ma uiga o tagata na valaauina e Iesu e avea ma Aposetolo? (Tagai Luka 5:5, 8, 11, 27–28. O tali e mafai ona aofia ai le leai o ni tulaga aoaoina lelei mo le galuega, ae sa latou lotomaualalo, usiusitai, o ni alii galulue malolosi o e na naunau e ositaulaga mea uma ae mulimuli i le Alii.) O le a se fautuaga o loo tuuina mai e lenei vaega e uiga i le auala e agavaa ai se tagata e auauna atu i le Alii? (Tagai foi MFF 4:3, 5–6; Mataupu Faavae o le Faatuatua 1:5.)

3. Ua faauuina ma aoaoina e Iesu ia Aposetolo e Toasefululua.

Faitau ma talanoaina ia fuaiupu filifilia mai le Mataio 10. Faaali atu le ata o Iesu o loo faauuina ia Aposetolo.

Ina ua mavae ona valaauina e Iesu ia Aposetolo e Toasefululua, ona ia tuuina atu lea ia te i latou le mana o le perisitua ma aoaoina i latou i o latou tiutetauave. O le a se mea ua tatou aoaoina e uiga i mana ma tiutetauave o Aposetolo mai le fautuaga a Iesu o loo i le Mataio 10? (Ia lisi i luga o le laupapa tali a tagata o le vasega. O tali e mafai ona aofia ai vaega nei o loo i lalo.)
1. E ia te i latou le mana e faamaloloina ai e mamai i le tino ma le agaga (fuaiupu 1).
2. Na auina atu i latou i mamoe ua leiloloa o le aiga o Isaraelu e talai atu i ai ua i faitotoa le malo o le lagi (fuaiupu 6–7).
3. Latou te faaaogaina le mana o le perisitua e faamanuia ma faamalolo ai tagata (fuaiupu 8).
4. Latou te sailia tagata ua sauni e faalogologo i le talalelei (fuaiupu 11–14).
5. Latou te aoao atu e pei ona taitaiina ai e le Agaga (fuaiupu 19–20).
6. Latou te tuuina atu o latou ola atoatoa i le galuega a le Faaola (fuaiupu 39).
E faapefea ona faatusatusa ia mana ma tiutetauave na tuuina atu i uluai Aposetolo ma ia ua tuuina atu i Aposetolo i aso nei? (Tagai MFF 107:23, 33, 35; 112:14, 19–22, 30–31.) O faapefea ona e vaaia le faataunuuina e Aposetolo o aso e gata ai nei tiutetauave?
O a faamanuiaga ua folafolaina atu ia i latou o e mulimuli i Aposetolo? (Tagai Mataio 10:40–42; tagai foi MFF 124:45–46.)

Na saunoa mai faapea Peresitene Spencer W. Kimball: “E leai se tasi o i lenei Ekalesia o le a se ese pe afai o loo mulimuli ma le faamaoni i le Au Pulega o le Ekalesia o e ua tuuina mai e le Alii i le Ekalesia. O le a le sese ese lava lenei Ekalesia; o le a le taitai seseina lava e le Korama a le Toasefululua outou mai le ala sao; e lei i ai lava ma o le a le i ai lava” (i le Conference Report, Ape. 1951, 104).

Faaiuga

Ia molimau atu o Iesu Keriso o le Mesia moni ma o Aposetolo e Toasefululua o molimau faapitoa ia te ia. Atonu e te manao e fetufaai atu se mea na faamanuiaina ai lou olaga i lou mulimuli i fautuaga a se Aposetolo.

Manatu Faaopoopo E Aoao Atu Ai

O mea nei e lagolago atu ai i le otootoga o le lesona ua fautuaina. Atonu e te manao e faaaoga le tasi po o le sili atu foi o nei manatu e avea o se vaega o le lesona.

1. O Aposetolo e Toasefululua o loo i ai nei

Faaali atu ata o Aposetolo e Toasefululua o i ai nei ma fesoasoani i tagata o le vasega e aoao o latou igoa. Atonu e te manao e faaaoga le suega lenei:

Tufa atu i tagata uma o le vasega se penitala ma se fasi pepa, ma fai atu i ai e faanumera a latou pepa mai le 1 e oo i le 12. Faaali atu se ata o se Aposetolo e aunoa ma le faailoaina atu o lona igoa, ma fai atu i tagata o le vasega e tusi le igoa i luga o a latou fasi pepa i tafatafa o le fuainumera e fetaui i ai. A maea ona faaali uma atu ia ata, ona iloilo lea o tali sao.

2. O uluai Aposetolo e Toasefululua

Fesoasoani i tagata o le vasega e aoao igoa o uluai Aposetolo e Toasefululua (Mataio 10:2–4). Ia tuuina atu le faamatalaga lenei i ni au lava upu ina ia fesoasoani ai i tagata o le vasega ia malamalama i le ala o loo faatatauina ai le tele o Aposetolo i tusitusiga paia.

E toalua Aposetolo na igoa ia Iakopo: Iakopo le atalii o Sepetaio ma Iakopo le atalii o Alefaio. E toalua na igoa ia Simona: Simona Peteru ma Simona le sa Kanana, e igoa foi ia Simona le Selota (“le selota”). E toalua na igoa ia Iuta: Iuta (na valaau foi ia Lepaio Tataio) ma Iuta le Sekara, lea na faalataina Keriso. O Mataio sa igoa ia Levi i le Luka 5:27–28. O Toma sa igoa foi ia Titumo, o lona uiga o le “masaga.” O le Aposetolo lea sa igoa ia Patolomaio i evagelia a Mataio, Mareko, ma Luka o loo masalomia o le tagata foi lava lea e tasi e igoa ia Natanielu o loo i le evagelia a Ioane.

3. “O le ua tele lona alofa i lona tama po o lona tina, ae itiiti ia te au, e le aoga lea ia te au” (Mataio 10:37)

Tuu atu i tagata o le vasega e faitau le Mataio 10:35–38.

E faapefea ona faataunuuina i nisi taimi ia fuaiupu e 35 ma le 36 pe a auai se tagata i le Ekalesia? I le iloaina e finagalo le Alii ina ia filemu ma faatasia o tatou aiga, o le a sou manatu aisea na ia faia ai nei saunoaga? O ai e tatau ona ave i ai le faamuamua ma le malosi o lo tatou faatuatua? (Tagai i fuaiupu 37–38; tagai foi Luka 14:33.)

4. Ata Vitio

O le vaega muamua o “Tu ma Aga o le Feagaiga Fou,” o se filifiliga mai Ata Vitio o le Feagaiga Fou (53914), atonu e aoga i lenei lesona. O lenei vaega e aofia ai faamatalaga e uiga i le faailoaina mai e Iesu o ia lava o le na faauuina, po o le Mesia (Luka 4:18); o tapuaiga i le sunako; ma le uiga o le talaiina o le talalelei e aunoa ma se ete tupe po o se ato, e pei ona apoapoaiina ai e Iesu ana Aposetolo ina ia fai (Mataio 10:9–10).