Lesona 38
“Ua e Molimau Ia Te Au”
Faamoemoega
Ina ia uunaiina tagata o le vasega ia mulimuli i le faataitaiga a Paulo ma avea ma molimau faamaoni a Iesu Keriso e oo lava i le ogaoga o tofotofoga ma faigata.
Sauniuniga
-
Faitau, mafaufau loloto, ma tatalo e uiga i mau nei:
-
Galuega 21:1–22:21. E ui lava i le tetee o ana soa, o e na popole mo lona ola, ae na malaga atu lava Paulo i Ierusalema. Na ia lipotia atu ana malaga faatalai i le auuso o i ai iina. Na alu atu o ia i le malumalu ma pueina ai o ia e tagata leaga o loo matau’a ia te ia. Ua pu’eina o ia e le taitai ‘au ae na faatagaina o ia e tautala atu i tagata. Ua tau atu e Paulo i tagata lona liliu mai i le talalelei a Iesu Keriso.
-
Galuega 22:22–23:35. Ua teenaina Paulo e tagata leaga ma ua latou saili e aveesea lona ola. Ua aveesea e le taitai ‘au ia Paulo mai tagata leaga ma ave o ia ua tuu i se ’olo. O le aso na sosoo ai na ave ai e le taitai ‘au ia Paulo i luma o le Au Seneterini. Ua tupu mai se isi feeseeseaiga tele, ma ua toe aveesea foi e le taitai ‘au ia Paulo ma toe tuuina atu i le ‘olo. O le po lena na faaali atu ai le Alii ia Paulo ma tau atu ia te ia ua valaauina o ia e avea ma molimau i Roma faapea foi ma Ierusalema. E silia ma le 40 tagata Iutaia na taumafai e fasioti ia Paulo, ma ua avatu o ia ia Filiki, le kovana, mo lona saogalemu.
-
Galuega 26. Ina ua mavae ni nai tausaga o sauaga ma le faafalepuipuiina, sa aumaia loa Paulo ina ia molimau atu i luma o le Tupu o Akeripa. Na teena e Akeripa le molimau a Paulo ma auina atu ai loa o ia i Roma e feiloai ma Kaisara.
-
Galuega 27–28. Ua matagivaleina le malaga a Paulo i lona alu atu i Roma ina ua le taliaina e le kapeteni lana fautuaga. Ina ua taunuu o ia i Roma, sa faafalepuipuiina loa o ia, ae na ia lauga atu ia i latou uma o e na faalogo..
-
-
Afai e maua mea nei, ia faaaoga i le taimi o le lesona:
-
“O Paulo—O Se Ipu Filifilia” o se vaega e sefulutasi minute o Ata Vitio o le Feagaiga Fou (53914). Ia muai iloiloina lenei vaega, pe afai e mafai, ina ia e iloa ai le taimi e taofi ai le ata mo le talanoaga.
-
O se faafanua o le malaga a Paulo i Roma.
-
-
Fautuaga mo le aoaoina atu: “e taua tele lou fafagaina o i latou e te aoaoina, ina ia mafai ona i ai se mea e aoaoina ai. O taimi uma e malaga mai ai e tatau ona le itiiti ifo ma le tasi se mafaufauga, tasi se manatu, tasi se musumusuga latou te maua mo le auai mai i le vasega. E mafai ona avea o se mafaufauga laitiiti, o se mea e masani ai—ae o le mea moni, o le faavaeina lelei o lena mafaufauga, o le tele foi lea o mea ua e mauaina” (Boyd K. Packer, Teach Ye Diligently [1975], 154).
Faalautelega Fautuaina o le Lesona
Gaoioiga e Faatosina Mai Ai
Afai e talafeagai ai, ia faaaoga le gaoioiga lenei po o sau lava gaoioiga e amata ai le lesona.
Gaoioiga e Faatosina Mai Ai
-
E i ai se tagata i tusitusiga paia e te lagona e mafai ona e faailoaina mai, ona e tutusa o oulua mafaufauga, mea na oo i ai, po o tulaga? Aisea e te lagona ai lou matuai latalata atu i lenei tagata?
Tuu atu i ni tagata o le vasega e tali mai. Ona faamanino atu lea, i le toe manatunatu i mea na ia oo i ai i le Uluai Faaaliga, na lagona ai e le Perofeta o Iosefa Samita o mea na ia oo i ai e pei lava o mea na oo i ai le Aposetolo o Paulo. Tuu atu i tagata o le vasega e faitauina le Talafaasolopito o Iosefa Samita 2:23–25 e iloa ai pe aisea.
Ia faamatala atu o le i ai o le Aposetolo o Paulo i luma o le Tupu o Akeripa o se tasi lea o mea na tupu o le a talanoaina i lenei lesona. I lenei tulaga ma ana malaga faatalai uma, e ui i le teenaina ma sauaina. Ae na tumau Paulo i le faatuatua ma le lototoa e tuuina atu le molimau ia Iesu Keriso.
Mau Talanoaina ma le Faaaogaina
Ao e aoaoina atu mau faitauina, ia talanoaina pe mafai faapefea ona tatou atinaeina le lototele ma le faatuatua e malosi e pei o Paulo. Ia uunaiina tagata o le vasega ina ia faamatala atu taimi na latou tuuina atu ai a latou molimau ma le lototele e ala i a latou upu ma gaoioiga.
1. Ua tuuina atu e Paulo ia lipoti i ana malaga ma ua fesagai ma ni tagata leaga e feita ia te ia i Ierusalema.
Afai e te faaaogaina le ata vitio “O Paulo—O Se Ipu Filifilia,” ia faaali atu nei loa le vaega muamua. Taofi le ata pe a mavae ona faapea mai le faamatala upu, “Na ia faataunuuina afioga a le Alii faapea o le a ia tauaveina Lona suafa i luma o tupu ma faipule” (ao faia nei upu, sa taitaiina atu Paulo i lalo i se auala e ni fitafita).
Ia talanoaina le Galuega 21:1–22:21. Ia valaaulia tagata o le vasega e faitauina fuaiupu filifilia. Ia faamatala atu faapea ina ua mavae ni malaga faatalai faamanuiaina se tolu na ia faia i le pulega atoa a Roma, na toe foi atu Paulo i Ierusalema, e ui lava sa ia iloaina le matautia o le faia o lea mea.
-
Aisea na taumafai ai uo a Paulo e taofi o ia mai le toe foi atu i Ierusalema? (Tagai Galuega 21:10–12.) Na faapefea ona tali atu Paulo i popolega o ana uo? (Tagai Galuega 21:13.) Na faapefea ona faaalia i lea mea le tautinoga a Paulo ia Keriso?
-
O le a le mea na faia e Paulo ina ia taunuu i Ierusalema? (Tagai Galuega 21:17–19.) E faapefea ona tutusa lenei mea ma le mea o loo faia e faifeautalai i aso nei pe a foi mai a latou misiona? (E lipotiina atu mea na latou oo i ai i le misiona i le peresitene o le siteki ma fautua maualuga ma e masani foi e lipotiina atu i tagata o le uarota po o le paranesi i le sauniga faamanatuga.) O faapefea ona faamanuiaina oe mai lou faalogo atu i isi o talanoa e uiga i mea na latou oo i ai i le avea ma faifeautalai?
-
O le toatele o Kerisiano Iutaia na tetee i le aoaoga a Paulo faapea o le faaolataga e auala mai ia Iesu Keriso, ae le o le tulafono a Mose (Galuega 15:1–35). Ina ia faamalieina nei tagata, na talosagaina ai e le usoga i Ierusalema ia Paulo ina ia alu atu i le malumalu ma faia sauniga o le faamamaina e avea o se faailoga o lona tausia pea o le tulafono (Galuega 21:20–25). O le a le mea na tupu a o i ai Paulo i totonu o le malumalu? (Tagai Galuega 21:26–30. Na aveeseina o ia e se vaega o tagata leaga o e na tuuaia o ia i lona aoao atu e tetee i le tulafono a Mose ma faaleagaina le malumalu i lona avatuina i ai o se tagata e le o se Iutaia.) Na faapefea ona laveaiina Paulo mai nei tagata leaga? (Tagai Galuega 21:31–36.) O le a le mea na faia e Paulo ina ua faatagaina o ia e le taitai ‘au ina ia tautala atu i tagata? (Tagai Galuega 21:37–22:21. Aisea na moomia ai le lototele e faia ai lenei mea?
Atonu e te manao e amata se lisi i luga o le laupapa o taimi uma i le Galuega 21–28 na faaalia ai e Paulo lona lototoa tele i le tuuina atu o se molimau ia Iesu Keriso. Ia faaopoopo atu i ai i le lisi i le taimi o le lesona.
-
O anafea na e tuuina atu ai lau molimau i se tulaga na manaomia ai le lototele? Na faapefea ona e mauaina le lototele e te faia ai lenei mea? E mafai faapefea ona fesoasoani lo tatou iloa o uiga o Paulo tatou te lototetele ai e fetufaai atu a tatou molimau i isi?
2. Ua ave Paulo i luma o le Au Seneterini.
Faitau ma talanoaina fuaiupu filifilia mai le Galuega 22:22–23:35.
-
Na faapefea ona tali atu le motu o tagata sa i fafo o le malumalu i le tala a Paulo e uiga i lona liuaina? (Tagai Galuega 22:22.) O le a le faamoemoega o le taitai ‘au i le aveeseina o Paulo mai tagata leaga? (Tagai Galuega 22:24.) Na mafai faapefea e Paulo ona aloese mai le sasaina? (Tagai Galuega 22:25–26. Na ia faamaninoina atu o ia o se tagatanuu Roma. O le mea lena ia maua ai ni aia tatau ma ni avanoa i le malo o Roma, lea o loo avea ai Ierusalema ma sona vaega.)
-
O le a le mea muamua lava na tautala i ai Paulo ina ua tuuina atu o ia i luma o le Au Seneterini (o le aufono a Iutaia)? (Tagai Galuega 23:1; tagai foi Galuega 24:16. Tagai MFF 135:4 mo se faamatalaga foi faapea na faia e le Perofeta o Iosefa Samita.) E faapefea ona e manatu o le “lotofuatiaifo lelei o Paulo i luma o le Atua” na fesoasoani ia te ia i lenei taimi? Ia valaaulia tagata o le vasega ina ia iloiloina po o a suiga e moomia ona faia i o latou olaga ina ia maua ai se “lotofuatiaifo lelei i luma o le Atua.”
-
O le a le fetalaiga a le Alii ina ua faaali atu ia Paulo ina ua mavae le suesueina o Paulo e le Au Seneterini? (Tagai Galuega 23:11.) Na faapefea ona fesoasoani le Alii ia te oe ina “ia e faalototele” i taimi o faigata?
-
I le aso ina ua tuanai le faaali atu o le Alii ia Paulo, e silia ma le 40 tagata na foufou e fasioti ia Paulo, ua latou tauto latou te le aai lava pe feinu seiloga e faamanuiaina i latou (Galuega 23:12–15). Na faapefea ona puipuia Paulo mai le latou fuafuaga? (Tagai Galuega 23:16–35. Atonu e te manao e faamanino atu o le faatolu ai lea i totonu o ni nai aso ona puipuia Paulo mai le oti.)
3. Ua molimau atu Paulo ia Akeripa, ae ua teenaina lana molimau.
Faitau ma talanoaina fuaiupu filifilia mai le Galuega 26. Atonu e te manao e otooto ia faamatalaga nei mai le Galuega 24–25: Na auina atu Paulo ia Filiki le kovana, ma matuai molimau atu i luma o ia. Na tumau pea ona faafalepuipuiina Paulo mo tausaga e lua ao faamoemoe Filiki e maua se tupe e faasaoloto ai o ia. Ina ua suitulaga Feso ia Filiki i le avea ai ma kovana, na talosagaina e Iutaia ia Feso ina ia avatu Paulo i Ierusalema e faamasinoina ai. Na musu Paulo e alu, aua ua ia iloa o le a le tonu ai lona faamasinoga iina. Ae ui i lea, sa talosaga atu Paulo ia Kaisara, aua o lana aia tatau lea i le avea ai ma se tagatanuu o Roma. Na malie Feso e auina Paulo i Roma, ae tatau ia Paulo ona tulai muamua i luma o Herota Akeripa, le pulenuu tofia o Roma i totonu o Iutaia.
Afai o loo e faaaogaina le ata vitio, ia faaali atu nei loa le vaega lona lua. Taofi le ata pe a maea le tautalaga a Paulo, “Ou te aioi atu i le Atua ia le na o au, ae atoa foi ma e o faafofoga mai ia te au, ia faapea lava outou, ae tuu pea ia o nei fusi” (ao lei aveesea Paulo mai le maota o le Tupu o Akeripa).
-
O le a se mea na faagaeetia ai oe e uiga i upu a Paulo i le Tupu o Akeripa? (Tagai Galuega 26:2–27.) Na faapefea ona tali atu Akeripa i upu a Paulo? (Tagai Galuega 26:28.) O le a se mea atonu na taofia mai ai Akeripa mai le avea ma Kerisiano? O a ni uiga po o nisi faafitauli o loo taofia ai tagata i aso nei mai le taliaina o le talalelei a Iesu Keriso?
-
E faapefea ona eseese uiga o Feso ma Akeripa na faaalia ia Paulo? E faapefea foi ona tutusa? (Tagai Galuega 26:24, 28. Ia faamanino atu e leai se mea e itiiti nai lo le gauai atoatoa ina ia taliaina e le Alii. E ui lava na iloaina e Akeripa o le savali a Paulo e toetoe lava a talitonuina ae o Feso na matuai tetee lava i ai, ae na toilalo uma i laua e toalua i le suesueina o le faatuatua na tuuina atu e Paulo ia te i laua.)
4. Ua matagivaleina le malaga a Paulo i lona agai atu i Roma.
Faitau ma talanoaina fuaiupu filifilia mai le Galuega 27–28. Ia faamatala atu na naunau lava Akeripa e faasaolotoina ia Paulo (Galuega 26:32), ae ua uma ona talosaga Paulo ia Kaisara ma o lea na auina atu ai i Roma. A o outou talanoaina le malaga i Roma, ia faaali atu le faafanua ma faasino atu nofoaga tonu, e pei o Ava Matagofie, lea na fautuaina ai e Paulo le auvaa ina ia malolo ai iina mo le vaitau malulu, ma Melita, lea na feausi i ai le pasese o le vaa na malepe.
-
O le a le mea na tupu ina ua teenaina e le alii e ona le vaa le lapataiga a Paulo faapea e matuai matautia lava le folau mai le Ava Matagofie? (Tagai Galuega 27:7–20.) O le a le mea na faagauaiina ai le taitai o le toaselau e aua nei usiusitai i le fautuaga a Paulo? (Tagai Galuega 27:11–12.) Aisea e le amanaiaina ai e nisi o i tatou fautuaga a o tatou taitai faaleEkalesia? O faapefea ona e aoaoina le taua o le mulimuli i fautuaga a taitai o le Ekalesia?
-
Na faapefea ona iloa e Paulo o le a taunuu uma ma le saogalemu le pasese i le laueleele, e ui lava o le a matuai faaleagaina le vaa i le afa? (Tagai Galuega 27:21–26.) Na faapefea ona faataunuuina lenei valoaga? (Tagai Galuega 27:27–44.)
-
Na faapefea ona faaaogaina e Paulo lona mana o le perisitua ao i ai i le motu o Melita? (Tagai Galuega 28:7–9.) O le a se mea o loo fautuaina mai e lea mea na tupu e uiga i le faamoemoega o le mana o le perisitua? E faapefea ona fesoasoani ia i tatou le faamamaluina o le perisitua e avea ai o ni molimau a Keriso?
-
Ina ua mavae ni nai masina, na taunuu lava Paulo i Roma, lea na toe faafalepuipuiina ai foi. Na faapefea ona ia liliuina lenei fouvalega ma itu lelei ia te ia? (Tagai Galuega 28:16–31. Na tuuina atu ia te ia le saolotoga, o lea na ia faaaluina ai lona taimi e aoao atu ai le talalelei ma molimau atu ia Iesu Keriso.) O le a se mea e mafai ona tatou aoaoina mai ia Paulo i le avea ai ma se molimau faamaoni a Iesu Keriso? (Afai e te faia se lisi i luga o le laupapa i taimi na faaalia ai e Paulo lona lototele i le avea ai ma se molimau faamaoni, ia faaaogaina.)
Afai o loo e faaaogaina le ata vitio, ia faaali atu loa le vaega o loo totoe.
Faaiuga
Ia faamatala atu o le au tusi talafaasolopito na latou taumatemateina na maliu faamaturo Paulo i Roma pe tusa o le 65 T.A. I lona olaga atoa, na ia faataunuuina ai lona tiutetauave o se Aposetolo ina ia “o atu e aoao nuu uma” (Mataio 28:19). Na ia faataunuuina foi le valoaga a le Alii o le a ia talaiina atu le talalelei “i luma o nuu ese, ma tupu, ma le fanauga a Isaraelu” (Galuega 9:15). O ia o se molimau faamaoni a Keriso e ui i osofaiga i upu ma le faaletino, o le faafalepuipuiina le tonu, ma faigata o le natura.
Ia molimau atu a tatou mulimuli i le faataitaiga a Paulo i le avea ai ma se molimau faamaoni a Iesu Keriso i tulaga uma, o le a Ia tuuina mai ia i tatou le malosi e onosa’ia ai tofotofoga.
Manatu Faaopoopo e Aoao Atu Ai
O le manatu lenei e lagolago atu ai i le otootoga o le lesona ua fautuaina. Atonu e te manao e faaaoga lenei manatu e avea o se vaega o le lesona.
Iloiloina o le olaga o Paulo
Ina ia fesoasoani i tagata o le vasega e talisapaiaina le auala na faataunuuina ai e Paulo lana misiona i lona olaga e molimau atu ai ia Keriso, tuu atu i ai e sue i le ulutala “Paulo” i le Taiala i Tusitusiga Paia. Tuu atu i tagata taitasi o le vasega e filifilia se mea se tasi i le olaga o Paulo ina ua ia molimau atu ia Keriso. (O mea na tutupu e le o lisiina atu i le Taiala i Tusitusiga Paia e mafai foi ona faaaogaina.) Ia valaaulia tagata taitoatasi o le vasega ina ia fetufaai atu i le vasega mea na ia filifilia, ma lisiina i luga o le laupapa mea uma lava na tutupu. Ona fai atu lea i tagata o le vasega e tagatagai i faafanua o malaga a Paulo ma faailoa mai ai nofoaga taitasi ma mea na tutupu ai. Fesoasoani i tagata o le vasega e iloiloina mau e talafeagai i ai pe afai e moomia ina ia iloiloina ai le nofoaga o le mea na tupu.