Lesson 5
“Toe Fanauina”
Faamoemoega
Ina ia fesoasoani i tagata o le vasega ia malamalama, ina ia maua le ola e faavavau, e tatau ona tatou “toe fanauina” ma faaauau pea ona mulimuli ia Iesu Keriso.
Sauniuniga
-
Faitau, mafaufau loloto, ma tatalo e uiga i mau nei:
-
Ioane 3:1–22. Sa aoao atu e Iesu ia Nikotemo e tatau ona toe fanauina tagata uma i le vai ma le Agaga ina ia ulufale atu ai i le malo o le Atua. Sa aoao mai e Iesu e na o ia lava o le Alo Pele e Toatasi o le Atua, na auina mai e laveaiina tagata.
-
Ioane 4:1–42. Sa aoao e Iesu se fafine Samaria i le Vaieli o Iakopo. E toatele Samaria ua liliu mai.
-
-
Afai o loo e faaaogaina le gaoioiga e faatosina mai ai, aumai i le vasega:
-
Se laau o loo ola lauusiusi i le vai, ma se laau ua pe ona ua leai se vai (pe tusi foi i luga o le laupapa se laau o loo ola lauusiusi ma se laau ua pe, e pei ona faaali mai i le gaoioiga e faatosina mai ai).
-
O se sioki vai.
-
-
Afai e maua ata nei ona faaaoga lea i le taimi o le lesona:
-
O le ata O Keriso ma le Fafine Samaria (62169; Taga Ata o le Talalelei 217).
-
“O le Fafine i le Vaieli,” o se ata e valu minute mai le Ata Vitio o le Feagaiga Fou (53914).
-
O se faafanua o le Nuu Paia i taimi o le Feagaiga Fou.
-
-
Fautuaga mo le aoaoina atu: “O le iloaina e gafa tagata taitoatasi ma le aoaoina o le talalelei, ua mafai ai ona tatou fesili ifo, O le a le matafaioi a faiaoga? O le fesoasoani lea i tagata taitoatasi ina ia gafa ma le aoaoina o le talalelei— ia fafagu i totonu ia te i latou le naunautaiga e suesue, malamalama, ma ola i le talalelei ma faaali atu ia i latou le auala e faia ai” (O Le Aoao Atu—E Leai Se Isi Valaauga e Sili Ai [36123 890], 63).
Faalautelega Fautuaina o le Lesona
Gaoioiga e Faatosina Mai Ai
Afai e talafeagai ai, ia faaaoga le gaoioiga lenei po o sau lava gaoioiga e amata ai le lesona.
Faaali atu le laau o loo ola lauusiusi ma le laau ua pe (tagai i le vaega o “sauniuniga”), pe tusi foi i luga o le laupapa e pei ona faaalia i le isi itulau. Ia faaali atu foi le sioki vai.
Gaoioiga e Faatosina Mai Ai
-
O le a le mea e tupu i le laau pe afai na te le mauaina se vai? O le a le mea e tupu ia i tatou pe a le mauaina se vai?
Faamatala atu o le a tatou feoti faaletino pe a tatou le mauaina le vai faaletino, e faapena foi ona tatou feoti faaleagaga pe a tatou le mauaina le vai faaleagaga. O lenei lesona o loo aoao mai e uiga i aoaoga a Iesu i le toe fanauina i le vai ma le Agaga faatasi ai ma le vaiola na ia ofoina mai.
Mau Talanoaina ma le Faaaogaina
A o e aoaoina atu nei mau, ia talanoaina pe faapefea ona faaaoga i le olaga i aso taitasi. Uunai le vasega e faamatala ni aafiaga e faatatau i mataupu ua taua i le mau.
1. Sa aoao atu e Iesu ia Nikotemo e tatau ona toe fanauina tagata uma i le vai ma le Agaga ina ia ulufale atu ai i le malo o le Atua.
Ia talanoaina le (Ioane 3:1–22.) Tofi ni tagata o le vasega e faitau leotele atu fuaiupu filifilia. Faamatala atu o Nikotemo o se faipule i Iutaia. Na alu ane o ia ia Iesu aua sa ia iloa o Iesu “o se aoao mai le Atua” (Ioane 3:2)
-
O le a le mea na aoao atu e Iesu ia Nikotemo e tatau ona ia faia ina ia sao atu ai i le malo o le Atua? (Tagai (Ioane 3:5) O le a le uiga o le “fanau i le vai”? (Ioane 3:5; o le papatisoina). E faapefea ona avea le papatisoga ma faailoga o le toe fanauina? (O le faatofuina i le vai o se faailoga lea o le maliu po o le tanumia o a tatou agasala sa faia; pe a tatou tulai mai le vai, ua tatou amataina se olaga fou.) O le a le uiga o le “fanau … i le Agaga”? (Ioane 3:5;) o le mauaina lea o le meaalofa o le Agaga Paia)
-
Na aoao mai e Bruce R. McConkie e faapea o “tagata o le Ekalesia e le o fanaufouina i le na o le papatiso” (Doctrinal New Testament Commentary, 3 vols. [1966–73], 1:142). E ese mai le na ona papatisoina ma maua le meaalofa o le Agaga Paia, o le a le isi vaega taua i le toe fanauina? (Tagai Ioane 3:16, 18; Mosaea 5:1–7; 27:25–26; Alema 5:14–35; 22:15–18. Atonu e te manao e makaina e tagata o le vasega ia vaega o fuaiupu nei e faatatau i le toe fanauina. O se lisi o faataitaiga o loo taua i lalo. Ia faamanino atu faapea, o fuaiupu mai le Tusi a Mamona o loo faamaninoina mai le uiga o le toe fanaufouina.)
-
Talitonu ia Iesu Keriso (Ioane 3:16, 18).
-
Iloaina se “faaliliuina tele … i o matou loto, ua le toe ai so matou manatue fai amio leaga, ae fia fai pea lava le amio lelei” (Mosaea 5:2; tagai foi Alema 5:12–14, 26).
-
Ia “liua mai le faaletino ma le pau i le amiotonu” (Mosaea 27:25.)
-
Avea ma “atalii ma afafine o le [Atua]”(Mosiah 5:7; 27:25.)
-
Avea ma “tagata fou”(Mosiah 27:26.)
-
Mauaina “foliga o le Atua i o [tatou] mata” (Alma 5:19; tagai foi i le fuai upu 14).
-
Salamo ina ia “faamamaina o tatou ofu sisina mai le leaga, e ala i le toto o [Keriso]” (Alma 5:21; tagai foi Alma 5:19, 33–34; 22:18).
-
-
Sa aoao mai foi Elder McConkie o le toe fanauina “e le tupu i se taimi vave lava. [O se] faagasologa” (“Sa Faasatauroina Iesu Keriso ma Ia,” i le 1976 Devotional Speeches of the Year, 399). O le a se mea e mafai ona tatou faia e faaauau ai lenei faagasologa i o tatou olaga? (Tagai 2 Nifae 31:19–20.) E faapefea ona tatou foia tulaga e faavaivai ai lo tatou alualu i luma faaleagaga? O a ni suiga ua e iloa ia te oe lava po o se tasi foi i le faagasologa o le toe fanauina?
-
Tofi se tagata o le vasega e faitau leotele mai le Ioane 3:14–18. E faapefea ona talafeagai nei upumoni e uiga i le misiona a le Faaola ma lana poloaiga e ao ona tatou toe fanaufouina?
-
Na faaaoga e Iesu le faataitaiga o le malamalama ma le pogisa e aoao ai Nikotemo (Ioane 3:19–21). Aisea e filifili ai e isi le pouliuli nai lo le malamalama? E faapefea ona tatou faatumauina lo tatou agavaa e fiafia i le malamalama ae tetee atu i le pouliuli? O a ni folafolaga ua tuuina mai e le Alii mo i latou e o mai i le malamalama? (Tagai MFF 50:24; 88:67.)
2. Sa aoao e Iesu se fafine Samaria i le Vaieli o Iakopo.
Faitau ma talanoaina fuaiupu filifilia nei mai le Ioane 4:1–42. Faaali atu le faafanua o le Nuu Paia. Faamatala atu a o femalagaai Iesu ma ona soo mai Iutaia i Kalilaia (atonu o le a e manao e faasino atu nei nofoaga i luga o le faafanua), sa latou malolo i le Vaieli o Iakopo i Samaria. A o nofonofo Iesu i tafatafa o le vai, na oo mai se fafine Samaria e asu vai.
Faaali atu le ata o le fafine i le vai. Afai o loo e faaaogaina le ata vitio “O le Fafine i le Vaieli,” ia faaali nei loa.
-
O Iutaia “e leai ni a latou mea e feaveai ma Samaria” (Ioane 4:9) ma latou te teena lava Samaria pe a latou faimalaga. Ae peitai sa i ai le mafuaaga na ui atu ai Iesu i Samaria. O le a se mea o loo tau mai e lenei mea e uiga ia Iesu? O ai ni “Samaria” o loo i ai nei i le lalolagi? (O tali atonu e aofia ai soo se tagata lava po o se faalapotopotoga vaivai.) E tatau faapefea ona tatou tausia i latou?
-
Na faapefea ona faafaigofie e le fafine Samaria le aoaoina o ia e Iesu? (Tagai Ioane 4:9, 11–12, 15, 19, 25. O tali atonu e aofia ai ona e lotomaualalo, sa ia naunau e fia iloa ni mea e sili atu, ma sa ia talitonu i ana upu.) O le a se mea e mafai ona tatou faia e faaalia ai lo tatou naunautai e talia aoaoga a le Faaola?
-
Na faapefea ona suia le fafine Samaria a o talanoa atu Iesu ia te ia? Na faapefea ona fesoasoani Iesu e aumai lea suiga? (O tali atonu o le a aofia ai sa ia aoao atu ia te ia i se auala e mafai ai ona ia malamalama, sa ia molimau atu ia te ia lava, sa ia faaaogaina se faataitaiga malosi e uiga i le vai, ma sa ia faaali atu le alofa.) E faapefea ona tatou mulimuli i ana faataitaiga pe a tatou aoao atu i isi?
-
Na tau atu e Iesu i le fafine Samaria e mafai ona ia tuuina atu ia te ia le “vai ola” (Ioane 4:10). E te manatu o le a le uiga o le “vai ola”? (Tagai 1 Nifae 11:25; MFF 63:23. O tali atonu e aofia ai mataupu autu o le talalelei, alofa o le Atua, ma le Togiola.) E mafai faapefea ona tatou maua le vai ola? Na faapefea ona faamanuiaina oe i lea vai ola?
-
Na sau le fafine Samaria i le vaieli e asu vai (Ioane 4:7). Ae peitai, ina ua uma ona la talanoa ma Iesu, sa ia tuu lana kate i le vai, ae alu ma talanoa atu i isi e uiga i le mea na tupu (Ioane 4:28–29). O le a se mea ua tatou aoao mai i lana faataitaiga?
-
E faapefea ona faamanuiaina isi tagata ona o le faatuatua o le fafine Samaria? (Tagai Ioane 4:39–42.) E faapefea ona faamanuiaina oe po o isi foi i le talitonu i le Alii? E faapefea ona aafia isi o loo siomia i tatou i lo tatou faatuatua?
Faaiuga
Afai o loo e faaaogaina le gaoioiga e faatosina mai ai, ia toe faaali atu laau ma le sioki vai. Faamatala atu, e faapei ona manaomia e laau le vai e ola ai, tatou te manaomia foi le mulimuli i aoaoga a le Faaola e toe fanaufouina ai ma maua ai le ola e faavavau.
Molimau atu i upumoni sa outou talanoaina i le taimi o le lesona. Tuu atu le lu’i i tagata o le vasega e saili ia Iesu Keriso, mulimuli ia te ia, ma faaauau pea i le faagasologa o le toe fanaufouina.
Manatu Faaopoopo e Aoao Atu Ai
O mea nei e lagolago atu ai i le otootoga o le lesona ua fautuaina. Atonu e te manao e faaaoga le tasi po o le sili atu foi o nei manatu e avea o se vaega o le lesona.
1. “E le o le Keriso a’u nei, ae … ua auina mai lava a’u e muamua ia te ia” (John 3:28)
-
I le Ioane 3:25–36, o a ni uiga faaalia o Ioane e uiga i lona tiute e tali tutusa ma uiga o le Faaola? E faapefea ona faaalia e uiga o Ioane o ia o se soo moni? E faapefea ona tatou faaaogaina nei uiga i la tatou auaunaga i le Ekalesia?
2. “O le fanua … ua sinasina ma ua saunia mo le seleselega”(John 4:35)
-
O le a le mea na aoao atu e Iesu i ona soo e uiga i le galuega faafaifeautalai i le Ioane 4:35–38? O le a le uiga o lana saunoaga ua sinasina le fanua ma ua saunia mo le seleselega? Na faapefea ona faaaoga e le Faaola lea lava faailoga e tasi i le Mataupu Faavae ma Feagaiga 4:1–4 ma le 75:3–5? Fai atu i tagata o le vasega e fetufaai mai ni mea na tutupu i le tufatufaina atu o le talalelei i isi.
3. Ua faamaloloina e Iesu le atalii o se alii taua
Faitau ma talanoaina le Ioane 4:46–54.
-
O le a le mea na manao ai le alii taua ia Iesu? (Tagai Ioane 4:46–47.) O le a le tali muamua a Iesu ia te ia? (Tagai Ioane 4:48.) Na faapefea ona tali atu le alii taua? (Tagai Ioane 4:49.)
-
O le a le tali lona lua a Iesu i le alii taua? (Tagai Ioane 4:50.) O a ni uiga faaalia o lenei alii taua? (Tagai Ioane 4:50.) O le a le tali o le faatuatua o lenei alii taua? (Tagai Ioane 4:51–54.) O le a se mea ua tatou aoaoina mai lenei tala e uiga i le malosi o le faatuatua?