Lesona 43
“O Se Tupulaga Filifilia”
Faamoemoega
Ina ia fesoasoani i tagata o le vasega ina ia ola i le paia ma avea o se tupulaga filifilia.
Sauniuniga
-
Faitau, mafaufau loloto ma tatalo e uiga i mau nei:
-
1 Peteru 1: 2:1–10. Ua aoao mai Peteru e tatau ona tatou faatuatua ma ola i le paia. Na ia aoao mai o le Au Paia o se tupulaga filifilia, ua valaauina e vivii atu i le Faaola.
-
1 Peteru 2:19–24; 3:13–17; 4:12–19. Ua aoao mai Peteru e tatau ona tatou mulimuli i faataitaiga a le Faaola i le onosaia lea o mea tiga ma sauaga.
-
2 Peteru 1. Ua apoapoai mai Peteru e tatau ona tatou tofusia i le amio Atua ma saili ma le filiga e faatumauina lo tatou valaauina.
-
2 Peteru 2–3; Iuta. Ua lapataia i tatou e Peteru ma Iuta i aoao pepelo ma i latou e teena le Afio Faalua Mai. Na la apoapoai mai i e mulimuli ia Keriso e tumau i le faamaoni.
-
-
Mau Faitau Faaopoopo: 1 Ioane 3:2–3; 3 Nifae 12:48; Mataupu Faavae ma Feagaiga 122:7–8.
-
Fautuaga mo le aoaoina atu: Ia lava au suesuega i lesona taitasi ina ia e aoao atu e aunoa ma lou vaavaai soo i le tusi lesona. O le iloa o mea o loo e aoaoina e mafai ai ona e vaavaai sao atu i mata o tagata o le vasega a o e aoao atu. O le faatumauina o le fesootaiga i mata e faaleleia ai le gauai mai ma le faaaloalo o tagata o le vasega, ma fesoasoani e ta’u atu ai lou alofa ma lou popolega mo i latou. (Tagai O Le Aoao Atu—E Leai Se Isi Valaauga E Sili Ai, 107–8.)
Faalautelega Fautuaina o le Lesona
Gaoioiga e Faatosina Mai Ai
Afai e talafeagai ai, ia faaaoga le gaoioiga lenei po o sau lava gaoioiga e amata ai le lesona.
Fetufaai atu le tala lenei na faamatala mai e Epikopo Vaughn J. Featherstone:
“I le tele o tausaga ua mavae, na ou faalogo ai i le tala o le atalii o le Tupu XVI o Louis i Farani ua aveesea mai lona nofoa ma sa faafalepuipuiina. O lona atalii laitiiti, o le perenise, ua aveina e i latou na aveesea le tupu mai lona nofoa. Na latou manatu tusa lava pe o ia o se suli i le nofoaiga, ae afai e mafai ona latou faatamaia lona ola mama, o le a leiloa lava e ia le taunuuga sili o lona olaga ua tuuina atu i ona luga.
“Na latou aveina o ia i se nuu mamao ese, ma ofoina atu i lenei tamaitiiti mea leaga uma e mafai ona fai i le olaga… . E silia ma le ono masina na fai ai ia tulaga ia te ia—e le i i ai se mea e tasi na gauai atu ai lenei alii i ia faaosoosoga. Mulimuli ane, ina ua maea nisi o tofotofoga malolosi, na latou fesiligia o ia. Pe aisea ua ia le gauai atu ai i nei mea—aisea ua ia le fia auai atu i ai? O nei mea e aumaia ai le fiafia, faamalieina ai ona manaoga, ma o ni tulaga e manaomia; e pule ai lava o ia. Na faapea mai lenei alii, ‘E le mafai ona ou faia mea ua outou fai mai ai, aua na ou fanau mai e avea ma se tupu” (“O le Atalii o le Tupu,” New Era, Nov. 1975, 35).
Na saunoa mai Epikopo Featherstone:
“O lo tatou Tama o se tupu, e pei ona faaali atu i le atalii o le tupu mea leaga uma ma faatoilaloga o lenei olaga, o le a faapea foi ona outou vaai i le tele o mea leaga ma le mama i o tatou augatupulaga. Ae o outou foi … ua fananau mai o ni tupu, masiofo, faitaulaga ma faitaulaga tamaitai” (New Era, Nov. 1975, 35).
Gaoioiga e Faatosina Mai Ai
-
I le avea ai ma fanau agaga a lo tatou Tama Faalelagi, o le a lo tatou malosiaga? E faapefea ona aafia le ala tatou te ola ai i le malamalama o lo tatou malosiaga paia?
Ia faamamafa atu faapea o le avea ai ma fanau a lo tatou Tama o i le lagi, e mafai ona avea i tatou faapei o ia ma tatou maua mea uma o loo ia te ia. O savali a Peteru ma Iuta ua ofoina mai ai ni aoaoga aoga e fesoasoani tatou te ola agavaa ai o ni fanau a le Atua.
Mau Talanoaina ma le Faaaogaina
Filifili ma le agaga tatalo mau, fesili ma isi mea mo le lesona o le a sili ona talafeagai ma manaoga o tagata o le vasega. Talanoaina le auala e mafai ai ona faaaoga ia mau i le olaga i aso taitasi. Uunaia tagata o le vasega e fetufaai mai ni mea na tutupu e talafeagai ma mataupu faavae o loo tuuina mai i mau.
1. Ola i le faatuatua ma le paia e pei o se tupulaga filifilia.
Talanoaina le 1 Peteru 1 ma le 2:1–10. Tofi ni tagata o le vasega e faitau fuaiupu filifilia.
-
O le a le mea o loo aoao mai e Peteru i le mataupu 1 e uiga i le misiona a Iesu Keriso? (Tagai 1 Peteru 1:3–4, 18–21.) E faapefea ona aafia a tatou amioga i aso taitasi i le iloa o le misiona a le Faaola ma lana taulaga? (Tagai 1 Peteru 1:8; 13–16, 22–23; 2:5. Atonu o le a e manao e lisi tali a tagata o le vasega i luga o le laupapa.)
-
Aisea e sili atu ai le taua o le faatuatua nai lo auro,” e pei ona taua e Peteru? (Tagai 1 Peteru 1:7; Eperu 11:6; 1 Nifae 7:12.) E te manatu o le a le uiga o le tofotofoina o lo tatou faatuatua i le afi? O le a le faamoemoega maualuga o lo tatou faatuatua? (Tagai 1 Peteru 1:5, 9.)
-
Na aoao mai e Peteru o perofeta na molimau ia Iesu Keriso sa “sailiili ma suesue ma le filifiliga” (1 Peteru 1:10; tagai foi i le fuaiupu 11). E faapefea ona faamalosia a tatou molimau i le Faaola e le tatalo ma le filiga ma le suesue i tusitusiga paia?
-
O ai le tupulaga filifilia lea na tautala i ai Peteru? (Tagai 1 Peteru 2:9–10 ma le faamatalaga o loo i lalo.) O le a lo tatou tiutetauave i le avea ai ma se augatupulaga filifilia? (Tagai 1 Peteru 2:9.) E mafai faapefea ona tatou faataunuuina lenei tiutetauave? (Tagai Mataio 5:16.)
Na faamatala e Elder Bruce R. McConkie le tupulaga filifilia “e le o i latou o loo ola i se piriota po o ni tausaga patino, ae … o le fale o Isaraelu i aso ua mavae, i le vaitaimi na i ai Keriso i le lalolagi, ma le taimi lenei o aso e gata ai … [E aofia ai] tagata faatuatua o le Ekalesia ua tauave i o latou luga le suafa o Keriso ma ua fai ma tama fai i lona aiga” Doctrinal New Testament Commentary, 3 vols. [1996–73], 3:294).
2. Mulimuli i faataitaiga a le Faaola i le onosai i mea tiga ma sauaga.
Faitau ma talanoaina le 1 Peteru 2:19–24; 3:13–17; 4:12–19.
-
Na tusia e Peteru o “Keriso … ua mafatia mo i tatou, ma ua ia tuuina se faataitaiga mo i tatou” (1 Peteru 2:21). O le a se mea tatou te faia e mulimuli ai i faataitaiga a le Faaola e tali atu ai i faaosoosoga ma sauaga? (Tagai 1 Peteru 2:19–23.) O a ni faataitaiga ua e vaaia i tagata e faapei o Keriso i le onosaia o mea tiga? E faapefea ona faamanuiaina i tatou a o tatou mulimuli i faataitaiga a le Faaola e tali atu i tofotofoga po o mea tiga?
-
O anafea na sauaina ai oe (po o se tasi e te iloa) i le faia o le finagalo o le Alii? Ua faapefea ona lapataiina i tatou e Peteru e tali atu i ia ituaiga tulaga? (Tagai 1 Peteru 3:13–17; 4:12–19. Atonu o le a e manao e lisi i luga o le laupapa tali a tagata o le vasega.) O a ni auala o loo tuuina mai ai e tofotofoga po o mea tiga ia i tatou se avanoa tatou te latalata atu ai i le Alii ma viia o ia?
3. Tofusia i le amio Atua ma saili ma le filiga e faamauina lo tatou valaauina.
Faitau ma talanoaina fuaiupu filifilia mai le 2 Peteru 1.
-
O a ni tulaga ua faamatalaina e Peteru o ni vaega o amio Atua? (Tagai 2 Peteru 1:4–7. Lisi ia tulaga i luga o le laupapa.) Aisea e taua ai lo tatou atinaeina o ia vaega? (Tagai 2 Peteru 1:8.) E faapefea ona faaalia e isi ia tulaga?
-
Na lapataia e Peteru le Au Paia e “filiga e faamauina lo outou valaauina?” (2 Peteru 1:10). O le a le uiga o le faamauina o lou valaauina (O le mauaina mai le Alii o le faamautinoaga po o folafolaga o le faaeaina i le malo selesitila. O le tagata e ona le vaalaauga po o le filifiliga ua mautinoa o loo ia iloa ua “faamaufaailogaina o ia i le ola e faavavau, i le faaaliga ma le agaga o valoaga” [MFF 131:5]. Na mauaina e Iosefa Samita lenei folafolaga mai le Alii, e pei ona tusia i le Mataupu Faavae ma Feagaiga 132:49.)
-
O a mea e tatau ona tatou faia e faamautuina ai pe faamauina o tatou valaauga?
Na aoao mai le Perofeta o Iosefa Samita: “Pe a faatuatua se tagata ia Keriso, salamo i ana agasala, ma ua papatisoina mo le faamagaloina o ana agasala ma maua le Agaga Paia (i le faaee atu o lima), … ona tuuina atu lea ia te ia e faaauau ona faamaulalo o ia lava i luma o le Atua, fiaai ma fiainu i le amiotonu, ma ola i afioga uma a le Atua, e le pine ae fetalai atu le Alii ia te ia, Atalii e, o le a faaolaina oe. A maea ona faamaonia o ia e le Alii, ma iloa ua filifili lenei alii e auauna ia te ia i avanoa uma, ona iloa lea e lena alii ua mautinoa ona valaauga” (Teachings of the Prophet Joseph Smith, sel. Joseph Fielding Smith [1976], 150).
4. Teena aoao pepelo ma i latou e faafitia le Afio Faalua Mai.
Faitau ma talanoaina fuaiupu filifilia mai le 2 Peteru 2–3 ma le Iuta. Faamatala atu o Iuta o le atalii o Iosefa ma Maria, ma o se uso o Iesu.
-
Na lapatai atu Peteru ma Iuta o le a i ai aoao pepelo i tagata o le Ekalesia. O a ni uiga o aoao pepelo na latou faaalia? (Tagai 2 Peteru 2:1–3, 10, 12–19; Iuta 1:4, 8, 10–13, 16, 18–19.) E faapefea ona tatou iloa aoao pepelo i aso nei?
-
O le a le fautuaga na tuuina mai e Peteru ma Iuta e fesoasoani ia i tatou e teena aoaoga sese ma tumau i le faatuatua a o tatou sauniuni atu mo le Afio Faalua Mai? (Tagai 2 Peteru 3:11–14, 17–18; Iuta 1:3, 20–21; tagai foi i le Moronae 7:12–17; MFF 45:57; 46:7–8.)
Faaiuga
Ia molimau atu e moni mea ua talanoaina. Uunaia tagata o le vasega e mulimuli i aoaoga a Peteru ma Iuta a o latou taumafai e ola i le faatuatua ma le paia.
Manatu Faaopoopo e Aoao Atu Ai
O mea nei e lagolago atu ai i le otootoga o le lesona ua fautuaina. Atonu e te manao e faaaoga le tasi po o le sili atu foi o nei manatu e avea o se vaega o le lesona.
1. Talanoaga faaopoopo o le 1 Peteru 1 Peter
-
I le 1 Peteru 1, o a ni faatusatusaga na faia e Peteru i le va o mea leaga po o mea e pala ma mea e le leaga pe faavavau? (Tagai 1 Peteru 1:4, 7, 18–19, 23–25. Ia lisiina tali a tagata o le vasega i luga o le laupapa i lalo o ulutala e lua: Mea Leaga po o Mea e Pala ma Mea Lelei po o Mea e Faavavau.) O le a se mea ua tatou aoaoina mai ia faatusatusaga?
-
Na aoao mai e Peteru o Iesu sa “faauuina a o le i faavaeina le lalolagi” e avea ma Faaola (1 Peteru 1:20; tagai foi i le Faaaliga 13:8). Aisea e taua ai lea mea moni? O a ni mea o loo faaalia mai i tusitusiga paia i aso e gata ai ua faaopoopo i lo tatou malamalamaaga i le uluai faauuina o le Faaola? (Tagai Mose 4:1–4; Aperaamo 3:27–28.)
-
O a ni fautuaga na tuuina mai e Peteru e uiga i tulafono o le laueleele? (Tagai 1 Peteru 2:13–15.) O a ni aoaoga ua faaali mai e le Alii i aso e gata ai e uiga i le tulafono o le laueleele? (Tagai MFF 58:21–22; 98:4–10; 134:5; Mataupu Faavae o le Faatuatua 1:12.)
-
O le a le mea na aoao mai e Peteru e uiga i le galuega o le folafolaina atu o le talalelei i e ua maliliu? (Tagai 1 Peteru 3:18–20; 4:6.) O anafea na afio atu ai Iesu i le lalolagi o agaga e faatulaga le folafolaina atu o le talalelei i e ua maliliu? (Tagai MFF 138:27.) Aisea na ia faia ai lea tulaga? (Tagai MFF 138:29–37.) O le a le mea na taua mai e le misiona a le Faaola i le lalolagi o agaga e uiga i le galuega a le Atua? (O tali e mafai ona aofia ai ona o le faamasinoga amiotonu a le Atua ma lona alofa, o tagata uma o loo ola i le lalolagi ua maua le avanoa e talia ai le talalelei ma olioli i ona faamanuiaga uma.)
-
O le a se aoaoga na tuuina atu e Peteru i taitai o le Ekalesia i le 1 Peteru 5:1–4? E faapefea ona “fafagaina le lafu a le Atua” e taitai o le Ekalesia? (1 Peteru 5:2; tagai 2 Peteru 1:12–15; MFF 42:12–14). O faapefea ona faamanuiaina oe e taitai o le Ekalesia na mulimuli i ia fautuaga?
2. “E leai … se mau e faamatalafuaina” (2 Peteru 1:20)
-
Faitau le 2 Peteru 1:20–21. O le a le mea o loo aoao mai e Peteru i ia fuaiupu e uiga i le mea na maua mai ai tusitusiga paia? O le a le mea na aoao mai e Peteru e uiga i le faaliliuina o tusitusiga paia? E faapefea ona tatou mautinoa o loo tatou faaliliuina sao tusitusiga paia? (O tali e mafai ona aofia ai e ala i le sailia o faaliliuga musuia a taitai o le Ekalesia ma le sailia o le taitaiga a le Agaga Paia.) E faapefea ona fesoasoani aoaoga a taitai o le Ekalesia po o le taitaiga a le Agaga Paia e te malamalama ai i se mau patino?