“O le Atua o le Alofa Lava Ia”

Faamoemoega

Ina ia fesoasoani i tamaiti o le vasega ia malamalama i le auala o loo faaali mai ai le alofa o le Tama ma le Alo mo i tatou ma le ala e tatau ona faaali atu ai lo tatou alofa mo i laua.

Sauniuniga

Faitau, mafaufau loloto, ma tatalo e uiga i mau nei:
1. 1 Ioane 2:28–29; 3:1–2; 4:7–19; 5:1, 11–15. Na aoao mai Ioane ua faaali mai e le Tama Faalelagi lona alofa mo i tatou i lona saunia lea o se ala mo i tatou ina ia avea ai faapei o ia ma maua le ola e faavavau.
2. 1 Ioane 1:7–9; 2:1–2; 3:5–8, 16; 5:11–13. Na aoao mai Ioane ua faaali mai e Iesu lona alofa mo i tatou i lana taulaga togiola, e mafai ai ona avea i tatou faapei o lo tatou Tama Faalelagi.
3. 1 Ioane 2:3–17; 3:9–24; 4:4–21; 5:1–10; 2 Ioane; 3 Ioane. Na aoao mai e Ioane e tatau ona tatou faaalia lo tatou alofa mo le Tama Faalelagi ma Iesu Keriso e ala i lo tatou usitai ma alolofa i isi.
Mau faitau faaopoopo: Moronae 7:48; Mataupu Faavae ma Feagaiga 45:3–5.
Afai e te faaaogaina le gaoioiga e faatosina mai ai, ia aumai se ata o se aiga po o se ata o ata nei o loo taua i lalo: O se Aiga o loo Galulue Faatasi (62313); Fiafiaga Faaleaiga (62384); po o Faatasiga Faaleaiga (Taga Ata o le Talalelei 616).
Fautuaga mo le aoaoina atu: “A o e faaaluina le taimi e sauniuni ai ma le mafaufau ma le agaga tatalo, o le a faamanuiaina oe i le malamalama tele. O le a sili atu ona e gauai atu i le taitaiga a le Agaga… . Ia manatua o au taumafaiga ina ia aoao atu le talalelei a Iesu Keriso, e le lava le tau ina na ona saunia o au lesona. E moomia foi lou saunia o oe lava ia” (O le Aoao Atu— E Leai Se Isi Valaauga E Sili Ai, 104).

Faalautelega Fautuaina o le Lesona

Gaoioiga e Faatosina Mai Ai

Afai e talafeagai ai, ia faaaoga le gaoioiga lenei po o sau lava gaoioiga e amata ai le lesona.

Faaali atu se ata o se aiga.

Gaoioiga e Faatosina Mai Ai

O a nisi auala e faaalia ai e matua lo latou alolofa i a latou fanau? E faapefea ona faaalia e fanau lo latou alolofa i o latou matua, tuagane ma uso?
O le a le auala e ta’ua ai i tatou o tagata o le aiga e tasi?

Faamanatu atu i tagata o le vasega i le faaopoopo atu i le avea ma se tasi o se aiga faalelalolagi, o i tatou uma taitoatasi o atalii ma afafine faaleagaga o lo tatou Tama Faalelagi, e alofa ia i tatou ma naunau e faamanuia i tatou. I ana aoaoga, ua toe faamanino mai ai e Ioane le auala ua faaali mai ai le alofa o le Tama ma le Alo ia i tatou ma le auala tatou te faaali atu ai lo tatou alolofa mo i laua.

Mau Talanoaina ma le Faaaogaina

A o e aoaoina atu nei mau, ia talanoaina pe faapefea ona faaaoga i le olaga i aso taitasi. Uunai le vasega e faamatala ni aafiaga e faatatau i mataupu ua taua i le mau.

1. O le faatinoga o le alofa o le Tama Faalelagi mo i tatou

Talanoaina fuaiupu o loo lisiina i lalo. Atonu e te manao e otooto le talanoaga i luga o le laupapa i le lisiina lea o le faatinoga o le alofa o le Atua.

Afai o le a e faaaogaina se upu se tasi e faamatala ai le Tama Faalelagi, o le a lena upu? O le a le upu na faaaoga e Ioane e faamatala ai le Tama Faalelagi i le 1 Ioane 4:8, 16? Aisea e talafeagai ai lea upu?
Faitau le 1 Ioane 3:1–2. O le a le faatinoga o le alofa o le Atua na taua e Ioane i nei fuaiupu? (O le a taua i tatou e le Atua o ona atalii ma avea i tatou faapei o Keriso—viia, faaeaina, avea ma suli faatasi ma ia; tagai foi i le Roma 8:14–17.) O le a le mea e tatau ona tatou faia e taua ai i tatou o atalii o le Atua? (Tagai 1 Ioane 2:28–29; 4:7; 5:1; Kalatia 3:26–27; Mosaea 5:5–9; Moronae 7:48. Faamatala atu ona o i tatou uma o fanau faaleagaga a le Atua, o le faaaogaina o le upu “atalii o le Atua” o loo i le 1 Ioane 3:1–2, ua faatatau lea ia i latou ua tauave i o latou luga le suafa o Keriso e ala i le papatisoga ma faamamalu i lona suafa e ala i le faatuatua ma le amiotonu.)
Faitau le 1 Ioane 4:9–10. O le a se faatinoga o le alofa o le Atua na taua e Ioane i ia fuaiupu? (Tagai foi i le Ioane 3:16; 1 Ioane 5:11; 2 Nifae 9:10. Faamatala atu o le upu togiola o loo faatatau i le taulaga togiola a Iesu Keriso.) E faapefea ona avea le aumaia o lona Alo e togiola mo a tatou agasala ma faatinoga o le alofa o le Tama Faalelagi mo i tatou?
Faitau le 1 Ioane 4:13. O le a se faatinoga o le alofa o le Atua o loo taua e Ioane i nei fuaiupu? E faapefea ona avea le Agaga ma meaalofa taua i lou olaga?
Na aoao mai e Ioane o le a tali mai le Tama Faalelagi i a tatou tatalo pe afai tatou te ole atu e tusa ma Lona finagalo (1 Ioane 5:14–15.) E faapefea ona fesoasoani le tatalo e te lagona ai le alofa o le Tama Faalelagi? Aisea e taua ai le tatalo tatou te avea ai faapei o le Tama Faalelagi?
Na aoao mai e Ioane “tatou te alolofa i le [Atua], aua na ia muai alofa mai ia te i tatou” (1 Ioane 4:19). O a nisi o auala ua faaalia ai e le Atua lona alofa mo oe? O a ni ou lagona pe a e malamalama i auala ua faaalia ai e le Atua lona alofa mo oe?

Na saunoa mai Peresitene Thomas S. Monson: “O le fuafuaga a lo tatou Tama Faalelagi e aofia ai le faaalia atu o le alofa moni. O mea uma e pele ia i tatou— o o tatou aiga, o a tatou uo, lo tatou olioli, lo tatou malamalama, o a tatou molimau—o le a mou atu, pe ana le seanoa lo tatou Tama ma lona Alo, le Alii o Iesu Keriso. E leai se isi meaalofa sili ua molimauina e le lalolagi e pei o lea meaalofa, ma e leai foi se isi alofa ua iloa e sili atu le tumau” (i le Conference Report, Ape. 1993, 77; po o le Liahona Iulai 1993, 74).

2. Faatinoga o le alofa o le Faaola mo i tatou

Talanoaina fuaiupu nei o loo taua i lalo.

Faitau le 1 Ioane 3:16. O le a se faatinoga o le alofa o le Faaola na taua e Ioane i lenei fuaiupu? O a ni faamanuiaga ua tatou maua ona o le taulaga togiola a le Faaola? (Tagai 1 Ioane 1:7–9; 5:11–13; 2 Nifae 9:11–13; Alema 11:40–44. Atonu e te manao e lisi tali a tagata o le vasega i luga o le laupapa a o talanoaina nei fuaiupu.)
Faitau le 1 Ioane 2:1–2. O le a se faatinoga o le alofa o le Faaola na taua e Ioane i ia fuaiupu? O le a le uiga o le fautua? (O se tagata e aioi mo se mea e manao ai se tasi.) O le a le mea na faia e Iesu, i le avea ai ma o tatou Faaola? (Tagai MFF 45:3–5.)
Na aoao mai Ioane ua afio mai le Alo o le Atua e faatamaia galuega a le tiapolo (1 Ioane 3:8.) E faapefea ona faatamaia e le soifuaga o le Faaola ma ana aoaoga galuega a le tiapolo?

3. O le faaalia o lo tatou alofa mo le Tama Faalelagi, Iesu Keriso, ma isi

Talanoaina fuaiupu o loo lisiina i lalo. Atonu e te manao e otooto talanoaga o loo i luga o le laupapa i le lisiina lea o ala e mafai ai ona faaali atu lo tatou alolofa i le Tama Faalelagi ma Iesu Keriso.

Faitau le 1 Ioane 2:3–6. O le a se mea e mafai ona tatou aoaoina mai nei fuaiupu e uiga i le auala tatou te faaalia ai lo tatou alolofa i le Atua? (Tagai foi Ioane 14:15; 1 Ioane 3:24; 5:3; 2 Ioane 1:6.) E faapefea ona faaalia e le usitai lo tatou alofa i le Atua?
Faitau le 2 Ioane 1:4 ma le 3 Ioane 1:4. E faapefea ona aumaia e lo tatou faatuatua le olioli i lo tatou Tama Faalelagi?
Faitau le 1 Ioane 2:15–17. O le a se mea e mafai ona tatou aoaoina mai i nei fuaiupu i le auala e faaalia ai lo tatou alofa i le Atua? E faapefea ona tatou faaalia i nisi taimi lo tatou alofa mo le lalolagi ae le mo le Atua? E faapefea ona aafia i tatou pe a tatou faaali atu lo tatou alofa mo le lalolagi? E faapefea ona tatou aveesea le alofa po o le fiafia i mea faalelalolagi?
Faitau le 1 Ioane 4:7–8, 11. O le a se mea ua tatou aoaoina mai nei fuaiupu e uiga i le auala e faaali ai lo tatou alofa mo le Atua? (Tagai foi i le 1 Ioane 3:11, 23; 4:21.) Na faapefea ona faamatalaina e Ioane i latou o loo faapea mai e alolofa i le Atua ae le “alolofa i isi”? (Tagai 1 Ioane 2:9, 11; 3:14–15, 17; 4:20.) Aisea e taua ai lo tatou alolofa i isi o se faailoga o lo tatou alolofa i le Atua? E faapefea ona tatou lagonaina ma faaali atu le alofa sili i tagata taitoatasi? O faapefea ona faamanuiaina oe i le alofa o se isi mo oe?

Afai o loo e faaaogaina le gaoioiga e faatosina mai ai, ia toe faaali atu le ata o le aiga ma tuuina atu fesili nei:

O a ni faamanuiaga o le ola i se aiga e fealofani tagata ma e alolofa foi i le Atua? E faapefea ona tatou fesoasoani i isi e olioli i ia lava faamanuiaga e tasi a o avea ai ma se vaega o le aiga o le Atua?

Faaiuga

Molimau atu i le tele o le alofa o le Tama Faalelagi ma Iesu Keriso mo i tatou. Uunaia tagata o le vasega ina ia manatua pea aoaoga a Ioane a o latou taumafai e faaali atu lo latou alolofa mo le Tama Faalelagi ma Iesu Keriso ma isi foi tagata.

Manatu Faaopoopo e Aoao Atu Ai

O mea nei e lagolago atu ai i le otootoga o le lesona ua fautuaina. Atonu e te manao e faaaoga le tasi po o le sili atu foi o nei manatu e avea o se vaega o le lesona.

1. “Savali i le malamalama” (1 Ioane 1:7)

Faitau le 1 Ioane 1:6–7.

O le a le uiga o le “savali i le pouliuli”? O le a le uiga o le “savali i le malamalama”? (I le avea ai o nei fesili ma vaega o lau talanoaga, atonu e te manao e usu e tamaiti o le vasega le “Aoao Mai Ia Ou Ui i le Malamalama.” Tagai i le Viiga nu. 187, po o Tusipese a Tamaiti, 177.)

2. O lapataiga a Ioane faasaga i le agaga o aneti-Keriso

I tusi a Ioane, na ia toe lapataiina ai le Au Paia e tetee atu i aneti-Keriso. O a mea o loo taumafai aneti-Keriso e fai e pei ona taua e Ioane? (Tagai 1 Ioane 2:22–23; 4:1–3; 2 Ioane 1:7.) Aisea e te manatu ai o loo taumafai le fili e faatamaia a tatou molimau i le Faaola? O le a le mea e mafai ona tatou faia e faamalosia ai a tatou molimau?

Na aoao mai Elder M. Russell Ballard: “O molimau taitoatasi, ma faaletagata lava ia o le moni o le talalelei, aemaise le soifua paia ma le galuega a le Alii o Iesu Keriso, e taua mo lo tatou ola faavavau … O le ola e faavavau ua tautino mai i lo tatou malamalama taitoatasi e uiga i lo tatou Tama oi le Lagi ma Lona Alo Paia. E le lava le na o le iloa o i laua. E tatau ona i ai se tomai faaleagaga o le tagata lava ia tatou te taula i ai. E maua mai lea i le sailia i le ala ogaoga e tasi ma le mata’itu lea e sailia ai e se tagata fiaai ana meaai” (i le Conference Report, Ape. 1996, 111; po o le Liahona Iulai 1996, 96–96).

3. “E le i vaaia lava le Atua e se tasi” (1 Ioane 4:12)

Afai o tau mafaufau tagata o le vasega pe o le uiga o le 1 Ioane 4:12 e le mafai e se tagata ona vaai i le Atua, ona tuuina atu lea o i latou e faitau i le fuaiupu o loo i le Faaliliuga a Iosefa Samita, o loo faapea mai, “E le mafai ona vaaia e se tasi le Atua i soo se taimi, sei vagana i latou e talitonu” (tagai 1 Ioane 4:12). Ia faamanino e toatele perofeta ua vaai i le Atua. Tagai Esoto 33:9–11; Ioane 6:46; Galuega 7:55–56; Mataupu Faavae ma Feagaiga 67:10–12; Mose 1:1–2; Aperaamo 3:11; Talafaasolopito Iosefa Samita 2:16–17.

4. Talanoaga a Talavou

Ia tuli tatao atu le gaoioiga e faatosina mai ai i se talanoaga e sili atu ona anoa i le auala e mafai ai e talavou ona faaali atu lo latou alolofa mo o latou matua. Uunaia tagata o le vasega e tulimata’i ma o latou manatu, ma fai atu ia i latou e sauni e fetufaai mai mea na tutupu i le isi vaiaso.

5. Viiga e uiga i le alofa

Filifili se viiga e uiga i le alofa. Faatulaga se vaega o tamaiti o le vasega latou te usuina lea viiga, pe usu faatasi le viiga e le vasega, faitau i ona upu, pe taina foi lipine na pu’e.