Aoga Sa: Aoaoga Faavae o le Talalelei
Lesona 4: ‘Ina Teuteu Ia E Outou le Ala o le Alii’

Lesona 4

“Ina Teuteu Ia E Outou le Ala o le Alii”

Mataio 3–4; Ioane 1:35–51

Faamoemoega

Ina ia musuia tagata o le vasega e faalatalata atu i le Faaola e ala i le salamo mai a latou agasala, tausia a latou feagaiga o le papatisoga, ma tetee atu i faaosoosoga.

Sauniuniga

  1. Faitau, mafaufau loloto, ma tatalo e uiga i mau nei:

    1. Mataio 3:1–12. Na talai atu e Ioane le Papatiso le salamo ma le papatisoga, ma le teuteuina o le ala o le Alii o Iesu Keriso.

    2. Mataio 3:13–17. Ua papatisoina Iesu e Ioane le Papatiso.

    3. Mataio 4:1–11. Na teena e Iesu faaosoosoga a Satani i le vao.

    4. Ioane 1:35–51. Ua fuafua nisi soo o Ioane le Papatiso e mulimuli ia Iesu.

  2. Mau faitau faaopoopo: Mareko 1:1–13; Luka 3:1–22; 4:1–14; Ioane 1:19–34; 2:1–25; 2 Nifae 31.

  3. Afai e maua ata nei, ona faaaoga lea i le taimi o le lesona: O Le Talaiga a Ioane i le Vao (62132; Taga Ata o le Talalelei 207) ma le Papatisoga o Iesu e Ioane le Papatiso (62133; Taga Ata o le Talalelei 208).

  4. Fautuaga mo le aoaoina atu: Ia faaaoga tatau taimi o le vasega. Ia fuafua lelei mea o le a e talanoaina ma le umi o vaega taitasi o le lesona, ae ia taitaiina oe e le Agaga. Aua nei faamotuina se talanoaga taua ona o lou taumafai e tau fai le lesona atoa. E sili atu ona taua le aoao ma le mauaina e tagata o le vasega o le Agaga nai lo le talanoaina o vaega uma o le lesona.

Faalautelega Fautuaina o le Lesona

Gaoioiga e Faatosina Mai Ai

Afai e talafeagai ai, ia faaaoga le gaoioiga lenei po o sau lava gaoioiga e amata ai le lesona.

Tusi mea nei i luga o le laupapa, ma fesili atu i tagata o le vasega pe latou te iloa le mea o loo fai mai ai:

Ata

Faamatala atu o le upu Eperu lenei o le Mesia, o lona uiga o le faauuina. Na faatalitali tagata Iutaia i senituri mo le afio mai o le Mesia, lea na taua e valoaga, o le a avea ma o latou Tupu faauuina ma Faaolataga. O le upu Eleni mo le Mesia o le Keriso. O Iesu Keriso o le Mesia lea sa faatalitali, ma o Ioane le Papatiso o le perofeta lea sa auina mai na te teuteua le ala mo ia.

Mau Talanoaina ma le Faaaogaina

Talanoa pe faapefea ona fesoasoani aoaoga o loo taua i lalo tatou te latalata atu ai i le Faaola. Ona e faigata tele pe a tuuina atu fesili taitasi pe talanoaina foi vaega taitasi uma o le lesona, o lea e ao ai ona filifili ma le agaga tatalo fesili e sili atu ona fetaui ma manaoga o tagata o le vasega.

1.Ua teuteu e Ioane le Papatiso le ala o le Alii o Iesu Keriso.

Faitau ma talanoaina le Mataio 3:1–12. Faaali atu le ata o Ioane o loo folafola atu, ma fetufaai atu faamatalaga nei e uiga ia te ia i ni au lava upu:

I le tele o senituri ao lei soifua mai Ioane, e toatele perofeta na latou valoia lana misiona ma molimauina lona silisili ese i le avea ai o ia ma teuteu ala mo le Mesia (Isaia 40:3; 1 Nifae 10:7–10). I sauniuniga mo le misiona a Ioane, na valoia e le agelu o Kaperielu le fanau mai o Ioane (Luka 1:13–19), sa valoia e Sakaria i le aso na faaigoa ai Ioane ma peritomeina ai (Luka 1:67–79), ma sa faauuina e se agelu Ioane i lana misiona ina ua valu aso o lona matua (MFF 84:27–28). O le faamatalaga aupito maualuga e uiga i le silisili o Ioane, na sau mai le Faaola lava ia, o le sa faapea mai, “E leai se perofeta i e na fananau i fafine e sili ia Ioane le Papatiso” (Luka 7:28).

Na fanau mai Ioane i le ono masina ao lei soifua mai Iesu. E lei umi se taimi talu ona soifua mai Iesu, ae atuatuvale loa Herota ina ua faasalalau mai e faapea ua fanau mai le tupu o tagata Iutaia, “ia fasiotia tama tane uma i Peteleema e oo i ona tuaoi uma, e afua i e ua lua o latou tausaga atoa ma e ua pito ane i ai” (Mataio 2:16). Ina ia puipuia Iesu, sa faaali se agelu ia Iosefa i le miti ma faatonuina e ave Iesu ma Maria i Aikupito (Mataio 2:13–15). Ina ia puipuia Ioane, “Sa tau atu e Sakaria ia [Elisapeta] e auina atu Ioane i le atu mauga, lea sa tausi ai i se akerise ma le meli vao” (Teachings of the Prophet Joseph Smith, sel. Joseph Fielding Smith [1976], 261). Sa amata le galuega talai a Ioane i le tele o tausaga mulimuli ane, sa ia talai atu i le vao ona sosoo ai lea ma Ierusalema “atoa ma le itu uma o Ioritana” (Mataio 3:5).

  • O le a le misiona a Ioane le Papatiso? (Tagai Luka 1:76–79; 3:3–4.) Aisea e te manatu ai e taua le teuteu e se tasi o le ala o le Alii?

  • O le a le savali na talai atu e Ioane e saunia ai tagata mo le afio mai o le Faaola? (Tagai Mataio 3:1–2.) O le a le uiga o le salamo? (A o talanoaina e tagata o le vasega tali i le fesili lea, ia lisiina i luga o le laupapa ni vaega o le salamo e pei ona faaalia i lalo. Atonu o le a e manao e valaaulia tagata o le vasega e faitau atu mau o loo aofia ai.)

    1. Lagona le tiga e tusa i le Atua ona o agasala (2 Korinito 7:9–10).

    2. Tautau atu ma lafoai agasala (MFF 58:42–43).

    3. O le toe faalelei o mea sese sa faia (Luka 19:8).

    4. Usitai i poloaiga (MFF 1:31–32).

    5. Liliu atu i le Alii ma auauna ia te ia (Mosaea 7:33).

  • E faapefea ona fesoasoani le salamo tatou te saunia ai e mau faatasi ma le Tama Faalelagi ma Iesu Keriso? (Tagai 3 Nifae 27:19.) E faapefea ona fesoasoani le salamo ina ia tatou latalata atu ia te i latou i aso taitasi?

  • Ua molimauina e le au Faresaio ma le au Satukaio le papatisoga na faia e Ioane ae latou te lei fia papatiso (Mataio 3:7; Luka 7:29–30). Sa fautuaina i latou ma uunaia e “salamo … ma aumai fua e talafeagai mo le salamo” (Faaliliuga a Iosefa Samita, Mataio 3:35; ia iloa o le upu fua o loo faatatau i mea na maua a o le upu fetaui o lona uiga o le agavaa po o le talafeagai). O a fua o le salamo? (Tagai Moronae 8:25–26.)

  • O Ioane na papatiso “i le vai mo le salamo” ma sa ia folafola atu o Iesu o le a papatiso “i le Agaga Paia ma le afi”?

    E papatisoina i tatou i le Agaga Paia ma le afi pe a tatou maua le meaalofa o le Agaga Paia e ala i le faaee atu o lima (MFF 20:41). “O le meaalofa o le Agaga Paia o se meaalofa e tatau ona tatou maua, pe afai e agavaa soo se tasi e taitoalua ma le Agaga Paia… . E pei o se fasimoli na te faamamaina le tagata ma faapaiaina mai agasala uma. E masani ona taua o le ‘afi’” (Bible Dictionary, “Holy Ghost,” 704).

2. Sa papatisoina Iesu e Ioane le Papatiso.

Faitau ma talanoaina le Mataio 3:13–17. Faaali atu le ata o Ioane o loo papatisoina Iesu.

3. Sa teena e Iesu faaosoosoga a Satani i le vao.

Faitau ma talanoaina le Mataio 4:1–11

  • Ina ua uma ona papatisoina Iesu, sa taitaiina o ia e le Agaga i le vao e faatasi ma le Atua (Faaliliuga a Iosefa Samita, Mataio 4:1). O le a sou manatu, na faapefea ona saunia e lenei mea na tupu ia Iesu e tetee atu ai i faaosoosoga a Satani? E faamalosia faapefea i tatou e le anapogi, tatalo, ma “taitaiina … e le Agaga” ina ia tetee atu i faaosoosoga?

  • O le a le faanaunauga o Satani na ia taumafai ai e tofotofoina Iesu, o le sa anapogi, ina ia faaliu areto maa? (Tagai Mataio 4:2–3. Sa ia taumafai e faatosina lona manao e faamalie lona fia taumafa.) E faapefea ona tofotofoina i tatou e Satani e ala i mea tatou te aai ai? E faapefea ona tatou iloa ma teena ia faaosoosoga?

  • Sa aioi atu Satani ma le faamaualuga ina ua ia faaosoosoina Iesu e oso i lalo mai le tumutumu o le malumalu ma faamaonia o loo ia te ia le mana e faasaoina ai o ia e agelu (Mataio 4:5–6). E faapefea ona taumafai Satani e faatosina lo tatou faamaualuga? E faapefea ona tatou iloa ma tetee atu i faaosoosoga e faamalie ai o tatou manaoga faamaualuga?

  • O le a le mea na ofo atu e Satani mo Iesu pe afai na te faia lona manao? (Tagai Mataio 4:8–9.) E faapefea ona faaosoosoina i tatou e Satani i oa faalelalolagi ma le pule? E faapefea ona tatou iloa ma tetee atu i nei faaosoosoga? (Tagai Mataio 4:10.)

  • O le a le mea na sese i le ofo a Satani e tuuina atu malo uma o le lalolagi mo Iesu? (Tagai MFF 104:14.) O a nisi o ofo sese o loo tuuina mai e Satani ia i tatou i aso nei ina ia tatou maileia atu ai i le agasala?

  • Sa tali atu Iesu i faaosoosoga uma a Satani i mau mai tusitusiga paia? (Tagai Mataio 4:3–4, 6–7, 8–10). E faapefea ona tuuina mai e tusitusiga paia ia i tatou le malosi e tetee atu ai i faaosoosoga? (Tagai Helamana 3:29–30.)

  • Sa fesili faalua Satani pe o Iesu o le Alo lea o le Atua (Mataio 4:3, 6). O le a sou manatu i le mafuaaga o le fesili o Satani i lea fesili? E faapefea ona ia fesiligia lenei fesili i le lalolagi i ona po nei? Pe a tatou fetaia’i ma faaosoosoga, e faapefea ona fesoasoani le iloa o i tatou o fanau a le Atua? (Tagai Mose 1:12–22.)

  • E mafai faapefea ona tatou iloa o faaosoosoga na fetaia’i ma Iesu, le Alo o le Atua, e tutusa ma faaosoosoga o loo tatou fetaia’i? (A o talanoaina e tagata o le vasega le fesili lenei, atonu e te manao latou te faitauina le Eperu 4:14–15.)

    Na saunoa mai Elder Joseph B. Wirthlin: “E silafia lelei e le Alii o tatou olaga faaletino. Na te silafia o tatou vaivaiga. E malamalama o Ia i lu’itau i o tatou olaga i aso taitasi. E alofa tele o Ia i o tatou tofotofoga faaletuinanau faaletino ma faanaunauga” (i le Conference Report, Ape., 1996, 46; po o le Liahona Iulai 1996, 40).

4. Ua fuafua nisi soo o Ioane le Papatiso e mulimuli ia Iesu.

Faitau ma talanoaina fuaiupu filifilia mai le Ioane 1:35–51.

  • Ina ua amata le misiona faaletino a Iesu, o le a le mea na uunaia ai e Ioane le Papatiso ona soo e fai? (Tagai Ioane 1:35–37.) Ina ua vaaia e Iesu le toalua o soo o Ioane o mulimuli ia te Ia, o le a le mea na Ia faia? (Tagai Ioane 1:38–39.)

  • Ina ua faalogo ma iloa e Aneterea le Faaola, o le a le mea na ia faia? (Tagai Ioane 1:40–42.) Ina ua ia maua se molimau o Iesu o le Mesia, na faapefea ona tali atu Filipo i le le talitonu o Natanielu? (Tagai Ioane 1:43–46.) O le a le mea tatou te faia e valaau atu ai i isi e “o mai e matamata” i le Faaola?

Faaiuga

Molimau atu o le valaaulia “e o mai e matamata” i le Faaola, o loo tuuina mai ia i tatou taitoatasi. Faamatala atu e mafai ona tatou talia lea valaaulia e ala i le salamo, papatisoina, tausia o a tatou feagaiga o le papatisoga, ma tetee atu i faaosoosoga.

Manatu Faaopoopo E Aoao Atu Ai

O mea nei e lagolago atu ai i le otootoga o le lesona ua fautuaina. Atonu e te manao e faaaoga le tasi po o le sili atu foi o nei manatu e avea o se vaega o le lesona.

1. O Manatu Mai le Papatisoga o le Faaola

Toe iloilo le Mataio 3:16–17

  • O faapefea ona faaali mai i le tala o le papatisoga o le Faaola e tatau ona faataunuu le papatisoga i le faatofu? (Tagai Mataio 3:16; tagai foi i le Ioane 3:23; Roma 6:3–6; 3 Nifae 11:23; Bible Dictionary, “Baptism,” 618, lea o loo faamatala mai ai o le upu “papatiso“ e mai le upu Eleni o lona uiga o le faatofu.”)

  • O le a le mea na vaaia e Ioane ina ua uma ona papatisoina Iesu? (Tagai Mataio 3:16.) O le leo o ai na ia faalogoina? (Tagai Mataio 3:17.) O le a le mea o loo aoao mai e le tala o le papatisoga o Iesu e uiga i le Aiga Atua? (O le Tama Faalelagi, Iesu Keriso, ma le Agaga Paia o i latou o ni tagata mavaevae.)

2. Sa faaalia e Iesu le faaaloalo ma le alofa i lona tina

Faamatala atu ina ua maea ona papatisoina Iesu, sa latou auai atu ma ona soo i le aiga o se faaipoipoga i Kana (Ioane 2:1–11). Ina ua fai atu lona tina ia te ia ua leai se uaina mo le taumafataga, sa ia tali atu, “Funa e, se a ea lau na ia te au?” (Tagai Faaliliuga a Iosefa Samita Ioane 2:4).

  • O a ni lagona o Iesu e uiga i lona tina i ana upu na fai atu ia te ia? O le a le mea na ia faia e fesoasoani ai ia te ia? (Tagai Ioane 2:6–11. Faamanino atu o le uluai vavega lea a Iesu o loo tusia i le Feagaiga Fou.)

3. Sa faaalia le faaaloalo o Iesu a o ia faamamaina le malumalu

Tuu atu i tagata o le vasega e faitau mai le Ioane 2:13–17, lea o loo taua ai le mauaina e Iesu o tagata faatau oa i le malumalu. Afai e maua le ata o le Faamamaina o le Malumalu e Iesu (62163; Taga Ata o le Talalelei 224), ona faaali lea. Faamanino atu sa faaalia le faaaloalo o Iesu ina ua ia “tutuli atu ia te i latou uma lava i fafo o le malumalu, … ua sasaa ifo foi tupe a tagata faatau tupe, ma fuli atu laulau” (Ioane 2:15). Faamatala atu o le faaaloalo i lo tatou Tama Faalelagi e le na o le nofo filemu i le Falesa. E aofia ai le faaali atu i a tatou galuega tatou te alolofa ia te ia ma faailoa atu lona mana.

Lolomi