Lesona 35
“Ia Outou Lelei Ma Le Atua”
Faamoemoega
Ina ia uunaiina tagata o le vasega ia avea ma soo moni o Iesu Keriso e ala lea i lo latou faaaogaina o le fautuaga a Paulo i le 2 Korinito.
Sauniuniga
-
Faitau, mafaufau loloto, ma tatalo e uiga i mau nei:
-
2 Korinito 1:3–11; 4; 6:1–10; 11:21–33; 12:1–10. Na aoao mai Paulo e uiga i le faatoilaloina o faigata.
-
2 Korinito 2:5–11. Ua aioi atu Paulo i le Au Paia ina ia fefaamagaloai.
-
2 Korinito 7:8–10. Ua aoao atu Paulo e uiga i le tiga o le Atua ona o agasala.
-
2 Korinito 5:17–21. Ua apoapoai atu Paulo i le Au Paia ina ia lelei ma le Atua.
-
-
Afai e maua Ata Vitio o le Feagaiga Fou (53914), faaali le “Tiga FaaleAtua”, o se ata e sefulutasi minute, i le taimi o le lesona.
-
Afai e te faaaogaina le gaoioiga e faatosina mai ai, ia aumai sina luuga oneone i le vasega.
-
Fautuaga mo le aoaoina atu: Ia i ai sina taimi i le faaiuga o le vasega e aotele ai mea na e aoaoina atu. O se aotelega e fuafuaina lelei e mafai ona fesoasoani lea i tagata o le vasega ia iloa ma manino i mea na latou aoaoina ma fuafuaina pe faapefea ona faaaogaina i o latou olaga. (Tagai O Le Aoao Atu— E Leai Se Isi Valaauga E Sili Ai, itulau 101–102.)
Faalautelega Fautuaina o le Lesona
Gaoioiga e Faatosina Mai Ai
Afai e talafeagai ai, ia faaaoga le gaoioiga lenei po o sau lava gaoioiga e amata ai le lesona.
Faaali atu i tagata o le vasega le luuga oneone na e aumaia i le vasega.
Gaoioiga e Faatosina Mai Ai
-
Afai e tuuina atu e se tasi e te faatuatuaina ia te oe ni oneone faatasi ma se folafolaga o loo i ai ma ni auro, o le a se mea e te faia?
Tuu atu i tagata o le vasega e tali mai i le fesili. Ona faitauina atu lea o le faamatalaga lenei mai ia Elder Henry B. Eyring e uiga i le mauaina o fautuaga mai perofeta:
“Aua nei tuulafoai i le fautuaga ae taofi mau i lou loto. Afai e tuuina atu e se tasi e te faatuatuaina se mea e foliga mai ua na o se oneone faatasi ai ma le folafolaga o loo i ai ma le auro, atonu e te uuina pea i lou lima mo sina taimi, ma lulu ma le faaeteete. O taimi uma lava ou te faia ai faapea se fautuaga mai se perofeta, e mavae sina taimi ae amata ona ou iloaina ia faamanuiaga e ala mai i lo’u usiusitai i lena fautuaga ma ou lagona ai le agaga faafetai” (i le Conference Report, Ape. 1997, 35; po o le Liahona, Iulai 1997, 31).
Gaoioiga e Faatosina Mai Ai
-
O le a le uiga o le faamatalaga a Elder Eyring?
Ia faamatala atu o le tusi o le 2 Korinito o loo aofia ai fautuaga faaperofeta ia e faatatau i o tatou aso. O aoaoga a Paulo i le tusi lenei e masani ona tatou faalogo ai i le konafesi aoao. Na maitauina e Elder Eyring, “A foliga mai ua tuuina soo mai saunoaga a perofeta, e tatau loa ona tuu atu i ai lo tatou naunautaiga atoa [i ai]” (Liahona, Iulai 1997, 28).
Mau Talanoaina ma le Faaaogaina
O lenei lesona ua vaevaeina i ni vaega se fa lea e taulai atu i le taua o mataupu i le 2 Korinito. Filifili ma le agaga tatalo nei mataupu ao talanoaina faatasi ma tagata o le vasega.
1. Faatoilaloina o faigata
Faitau ma talanoaina le 2 Korinito 1:3–11; 4; 6:1–10; 11:21–33; 12:1–10. Ia valaaulia tagata o le vasega e faitau leotele fuaiupu filifilia.
-
O le tusi a Paulo i Korinito sa tusia i se taimi o le tetele o sauaga ina ua toetoe lava Paulo ma Timoteo a “aveesea ai o laua ola” (2 Korinito 1:8). Aisea na mafai ai e Paulo ma Timoteo ona faatoilaloina faigata e ui lava i faafitauli, mafatiaga, sauaga, ma le tuliesea? (Tagai 2 Korinito 1:3–5; 4:5–15.) Aisea ua avea ai le Tama Faalelagi ma Iesu Keriso ma puna sili o lo tatou faamafanafanaga?
Na faamautinoa mai e Elder Neal A. Maxwell ia i tatou e faapea o le a fesoasoani Iesu Keriso ia i tatou i o tatou mafatiaga:
“Pe a tatou amoina le amo a Iesu i o tatou luga, o le a faatagaina ai i tatou e oo atu “faatasi i tiga o [Keriso]” (Filipi 3:10). Po o ma’i po o le tuuatoatasi, faamasinoga le tonu po o le teenaina, … o le fua itiiti lea o o tatou tiga, pe afai tatou te lotomaualalo, o le a goto ifo i le taele o o tatou agaga. Ona tatau ai lea ona tatou faafetaia ma talisapaia e le gata le puapuagatia o Iesu mo i tatou, ae faapea foi uiga e le mafaatusalia, lea e faaosofia ai i tatou e viia ma faataitai atili ia te ia.
“Sa faailoa mai e Alema ua silafia e Iesu le ala e fesoasoani ai ia te i tatou i le lotolotoi o o tatou faanoanoaga ma ma’i, ona talu ai ua uma ona ia tauaveina o tatou faanoanoaga ma ma’i (tagai Alema 7:11–12). Ua ia silafia mai mea na oo i ai, o lea ua alagatatau ai Lona tulaga ua i ai. E moni, e le sili atu lo tatou malamalama atoatoa i ai nai lo tatou malamalama i le ala na Ia tauaveina ai agasala a tagata uma, peitai e tumau pea le avea o Lana Togiola ma auala mautinoa na laveaiina ai” (Liahona, Iulai 1997, 13).
-
Na faapefea ona fesoasoani le Tama Faalelagi ma Iesu Keriso ia te oe i taimi o faanoanoaga?
-
Na faailoa mai e Paulo se faanaunauga ina ia fesoasoani i isi ia mauaina le faamafanafanaga lava lea e tasi na ia maua mai le Atua (2 Korinito 1:4). E mafai faapefea ona tatou fesoasoani i isi ina ia latou mauaina le faamafanafanaga mai le Atua?
-
Na faafetai atu Paulo i le Au Paia o e na tatalo mo ia ma Timoteo i o laua taimi o faanoanoaga (2 Korinito 1:11). Aisea e taua ai ona tatou tatalo mo isi? O faapefea ona faamanuiaina oe ona o tatalo a isi po o se tasi e te iloa? E faapefea ona faamanuiaina i tatou pe a tatou tatalo mo isi?
-
E mafai faapefea e aoaoga o loo i le 2 Korinito 4:17–18 ona fesoasoani ia i tatou i taimi o faigata? (Tagai foi MFF 121:7–8.) Aisea e taua tele ai lo tatou vaai atu i o tatou tofotofoga o se faamoemoega e faavavau? E mafai faapefea ona tatou aoaoina ina ia tatou vaai atu i o tatou tofotofoga mai se vaaiga e faavavau?
-
Na tau atu e Paulo i tagata o Korinito e uiga i tofotofoga na tumau ai o ia ma le toatele o le Au Paia talu ai lo latou talitonu ia Iesu Keriso (2 Korinito 6:4–5; 11:23–33). O a ni uiga na aoao mai e Paulo e tatau ona tatou atinaeina ina ia fesoasoani ai ia i tatou e tutumau i taimi o tofotofoga? (Tagai 2 Korinito 6:4, 6–7.) O faapefea ona fesoasoani se uiga se tasi po o le sili atu foi ia te oe i se taimi o tofotofoga?
-
Na faapea mai Paulo na tuuina atu e le Alii ia te ia se vaivaiga— o se mea matuitui i le tino” (2 Korinito 12:7). Aisea na tuuina atu ai e le Alii lenei vaivaiga? (Tagai 2 Korinito 12:7.) O le a le mea na aoaoina e Paulo ina ua le aveesea e le Alii lenei vaivaiga e pei ona ia talosaga i ai? (Tagai 2 Korinito 12:8–10.) E mafai faapefea e o tatou vaivaiga ona fesoasoani ia i tatou ina ia maua le malosi mai ia Iesu Keriso? (Tagai Eteru 12:27.) O faapefea ona e vaaia le faamaoniga o le faamatalaga lenei a Paulo faapea “aua pe a ou vaivai, ona ou malosi ai lea”?
2. Faamagalo atu i isi
Faitau ma talanoaina le 2 Korinito 2:5–11.
-
Na aoaiina e Paulo le Au Paia ina ia fefaamagaloai (2 Korinito 2:5–8). Aisea e taua ai lo tatou faamagalo atu i isi? (Tagai Mataio 6:14–15; 2 Korinito 2:7–8; MFF 64:9–10. Ia talanoaina pe faapefea ona aafia i tatou faapea ma isi pe a tatou loto faamagalo pe tatou te le le loto faamagalo foi?
Na saunoa mai Peresitene Gordon B. Hinckley:
“Ua tatou vaaia le manaomia o le [fefaamagaloai] i totonu o aiga o tagata, lea o loo avea ai mauga iti o le le malamalama ma mauga tetele o le fefinauai. Ua tatou vaaia i totonu o tuaoi, lea ua avea ai ni feeseeseaiga faatauvaa ma mea ua taitaiina atu ai i le loto tiga e le mavae. Ua tatou vaaia foi i paaga faipisinisi o e ua fefinauai ma mumusu e fefaaleleiai ma faamagalo atu. I le tele lava o tulaga, ana i ai le naunau e nonofo faatasi ifo i lalo ma talatalanoa filemu le tasi i le tasi, semanu e mafai ona foia lea mataupu ma faamanuiaina ai tagata uma. I lo lena, ua latou faaalu o latou aso i le teulotoina o mea faafatiatama’i ma le faia o fuafuaga ae taui ma sui. …
“… Afai o i ai nisi o teu i o latou loto se ava oona o le feitagai o le tasi i le tasi, ou te aioi atu ia te outou ia ole atu i le Alii mo se malosi e faamagalo atu ai. O le faaalia o lea faanaunauga, o le faatinoga moni lea o lo outou salamo. Atonu o le a le faigofie, ma e atonu foi o le a le vave ona oo mai. Peitai, afai tou te sailia ma le faamaoni ma atinae lena uiga, o le a maua. …
“… E leai se filemu e maua i le mafaufau pea i tiga o manu’a ua leva. Na o le pau le mea e maua ai le filemu, o le salamo ma le faamagalo atu. O le filemu suamalie lenei o Keriso, o Le na fetalai mai, “Amuia e faatupuina le filemu; aua e taua i latou o atalii o le Atua.’ (Mataio 5:9.)” (Liahona, Novema 1991, 4–6).
-
O le a se mea e mafai ona tatou faia ina ia sili ai ona tatou faamagalo atu?
3. Lagonaina o le tiga e tusa ma le Atua ona o a tatou agasala
Faitau ma talanoaina le 2 Korinito 7:8–10.
-
Ina ua mavae ona ia faalogoina faapea o se tasi o ana tusi na “faatiga ai i tagata [Korinito],” sa fiafia Paulo (2 Korinito 7:8–9). Aisea na tali atu ai faapea Paulo i le tiga o tagata Korinito? (Tagai 2 Korinito 7:9–10.) O le a le uiga o le i ai o se “tiga faaleatua” mo a tatou agasala?
Afai e te faaaogaina le ata vitio “Tiga FaaleAtua,” ia faaali atu nei loa.
-
O le a le eseesega i le va o le tiga faaleatua ma le “tiga faalelalolagi”? Aisea e avea ai le tiga faaleatua ma se vaega taua o le salamo?
Na faamatala mai e Peresitene Spencer W. Kimball: “Afai e tiga se tasi ona ua iloa e se tasi sana agasala, o lona salamo e lei atoatoa. O le tiga faaleatua e faatupuina ai le manao o se tasi ina ia salamo, e tusa lava pe le’i mauaina o ia e nisi, ma ia mafaufau ai e faia le mea sao e tusa lava po o le a le mea na tupu. O lenei ituaiga tiga e aumaia ai le amiotonu ma o le a galue e tau atu i le faamagaloga” (Repentance Brings Forgiveness, [tamaitusi, 1984], 8).
4. O le lelei ma le Atua
Faitau ma talanoaina le 2 Korinito 5:17–21.
-
Na fautuaina e Paulo ma Timoteo ia Korinito ina ia “lelei ma le Atua” (2 Korinito 5:20). O le a le uiga o le lelei ma le Atua?
Na aoao mai Elder Bruce R. McConkie: “O le faaleleiga o se fuafuaga lea o le faatulagaina o le tagata ma lona tulaga agasala ma le pogisa faaleagaga ma toefuatai atu ia te ia se tulaga sologa lelei ma faatasia ma le Silisiliese. … O le tagata, sa faaletagata ma leaga, na ola ai i la le tino, ua avea nei ma se tagata fou o le Agaga Paia; ua toe fanauina; e pei lava o se tamaitiiti, ua faaolaina ia Keriso” (Doctrinal New Testament Commentary, 3 vols. [1965–73], 2:422–23).
-
E mafai faapefea ona tatou lelei ma le Atua? (Tagai 2 Korinito 5:17–19; 2 Nifae 25:23; Iakopo 4:10–11.)
Faaiuga
Ia molimau atu i upumoni sa outou talanoaina. Ia uunaiina tagata o le vasega ina ia manatua ma mulimuli i fautuaga a Paulo o loo i le 2 Korinito.
Manatu Faaopoopo e Aoao Atu Ai
O mea nei e lagolago atu ai i le otootoga o le lesona ua fautuaina. Atonu e te manao e faaaoga le tasi po o le sili atu foi o nei manatu e avea o se vaega o le lesona.
1. O le “tagata i fafo” ma le “tagata i totonu” (2 Korinito 4:16)
-
Na tautala Paulo i le “tagata i fafo” ma le “tagata i totonu” (2 Korinito 4:16). O le a se uiga o nei fuaitau e lua? E mafai faapefea ona “faafouina le tagata i totonu i lea aso ma lea aso”? (2 Korinito 4:16).
2. “Sui mo Keriso” (2 Korinito 5:20)
-
Na faapea mai Paulo o i laua ma Timoteo o “sui mo Keriso” (2 Korinito 5:20). O le a le amepasa? (O se amepasa o se sui aloaia lea e tautala mo taitai o se atunuu po o se faalapotopotoga. O se amepasa e galue ina ia faavaeina ni sootaga lelei i le va o tagata o loo ia sui ai ma isi tagata.) Na faapefea ona avea Paulo ma Timoteo ma amepasa mo Iesu Keriso?