Lesson 13
“Ou te Avatu foi ia te Oe Ki o le Malo”
Faamoemoega
Ina ia faamalosia molimau a tagata taitoatasi o le vasega faapea o Iesu o le Keriso ma o ki o le perisitua na tuuina mai i luga o le Mauga o Liua ua toefuatai mai.
Sauniuniga
-
Faitau, mafaufau loloto, ma tatalo e uiga i mau nei:
-
Mataio 15:21–39. Ua faamaloloina e Iesu le tama teine a se fafine o Nuu Ese ma fagaina i se vavega le silia ma le 4,000 tagata, o le toatele o i latou o Nuu Ese.
-
Mataio 16:13–19. Ua molimau Peteru o Iesu o le Keriso. Na aoao atu e Iesu o lana Ekalesia o loo atiaeina i luga o le papa o faaaliga ma folafolaga ma tuuina atu ia Peteru ki o le malo.
-
Mataio 17:1–9. Ua liua Iesu i luma o Peteru, Iakopo, ma Ioane.
-
-
Tusi faitau faaopoopo: Mareko 7:24–9:10; Luka 9:18–36; 12:54–57.
-
Afai e maua se faafanua o le Nuu Paia i taimi o le Feagaiga Fou, ia faaaoga i le taimi o le lesona. Atonu e te manao e fai se kopi lapoa ina ia mafai e tagata o le vasega ona vaai uma i ai.
Faalautelega Fautuaina o le Lesona
Gaoioiga e Faatosina Mai Ai
Afai e talafeagai ai, ia faaaoga le gaoioiga lenei po o sau lava gaoioiga e amata ai le lesona.
Ia faamatala atu le tala lenei:
I le tele o tausaga ua tuanai sa asiasi atu ai Peresitene Spencer W. Kimball ma isi taitai o le Ekalesia i se tamai falesa i Copenhagen i Denmark, lea o loo i ai faatagata tautaua a Bertel Thorvaldsen o Iesu Keriso ma le Au Aposetolo e Toasefululua. I le tautalagia o lea tulaga, na saunoa mai ai Elder Rex D. Pinegar: “A o matou matamata atu i ia galuega taulima matagofie sa matou maitauina Peteru o loo ia umia ni ki lapopoa i ona lima. … Ina ua lata ona matou tuua lea falesa, sa tu i le faitotoa le alii teufale Denmark ma faatali lo matou o ese. Sa faatalofa atu i ai Peresitene Kimball, ma faafetai atu i ai mo lona agalelei na faatagaina ai matou e matamata i lea falesa. Ona amata loa lea ona faamatala e le peresitene o le ekalesia lea na faatuina e Iesu Keriso ma lona taua ia i matou. … Sa faalatalata atu uma ia te ia Peresitene Tanner, Elder Monson, ma Elder Packer, ae sa faaauau pea o ia, ‘O i matou o aposetolo soifua a le Alii o Iesu Keriso. E Toasefululua Aposetolo ma le isi toatolu o le au peresitene o le Ekalesia. O loo matou umiaina ki moni, e pei ona sa umia e Peteru, ma o loo matou faaaogaina i aso taitasi. E faaaogaina pea ia ki i taimi uma’ ” (Liahona, Fepuari 1977, 61–62).
Ia faamatala atu o lenei lesona o le a talanoaina ai ki o le perisitua ma le auala na maua ai e Peteru i luga o le Mauga o Liua.
Mau Talanoaina ma le Faaaogaina
Ia filifili ma le agaga tatalo ia fuaitau faatusi paia, o fesili, ma isi mea e faaaogaina i le lesona na e sili ona faafetaiaia ai manaoga o tagata o le vasega. Ia talanoaina pe faapefea ona faatatauina ia fuaitau filifilia i le olaga i aso taitasi. Ia uunaiina tagata o le vasega e faasoa atu ia ni mea na oo i ai e fetaui i mataupu faavae faatusi paia.
1. Ua faamaloloina e Iesu le tama teine a se fafine o Nuu Ese ma fafagaina i se vavega le silia ma le 4,000 tagata
Ia talanoaina le Mataio 15:21–39. Ia valaaulia le vasega e faitau leotele fuaiupu filifilia.
-
O le a le mea na talosaga atu ai le fafine Kanana ia Iesu e fai? (Tagai Mataio 15:22.) Aisea na le talia ai e Iesu lana talosaga i le taimi lava lena? (Tagai Mataio 15:24. E le o ia o se tagata Iutaia, ae o faamanuiaga o le talalelei e ao ona tuuina atu muamua i tagata Iutaia ona faatoa tuu atu ai lea i Nuu Ese.) Aisea na iu ai lava ina ua faamaloloina e Iesu le tama teine a le fafine? (Tagai Mataio 15:28.) O le a se mea e mafai ona tatou aoaoina mai lenei fafine? (O tali e mafai ona aofia ai le tulaga faapea o i latou e le o i ai le atoatoaga o le talalelei e matuai tele lo latou faatuatua, ma e le tatau ona aveesea lo tatou faatuatua pe afai e le tuuina vave mai faamanuiaga e pei ona tatou manaomia.)
-
Na tuumuliese atu le Faaola mo le Sami i Kalilaia, ma ui atu ai i Tekapoli (Mareko 7:31). O Tekapoli o se nofoaga e i le itu i sasae o le Sami i Kalilaia lea e toatele tagata o Nuu Ese e nonofo ai. Na faapefea ona faaali atu le alofa o le Alii mo tagata o loo i ai iina? (Tagai Mataio 15:29–31.) O a ni uiga na faaalia e le motu o tagata? (Tagai Mataio 15:31.) O a ni vavega i o tatou taimi ua mafua ai ona e viia le Atua?
-
Na faatasi le motu o tagata ma Iesu mo le tolu aso, ae ina ua oo mai le taimi mo i latou e tuumuli ese atu ai, sa lei finagalo Iesu e tuumuli ese atu i latou ma le fia aai. O le a le vavega na ia faia mo i latou? (Tagai Mataio 15:32–38.)
Ia faamatala atu o lenei vavega e ese mai le vavega lea na muai faia muamua o le fafagaina o le 5,000 (Mataio 14:15–21) ona o le vavega lea o le toatele o tagata o Nuu Ese. Na faamatala mai e Elder Bruce R. McConkie faapea o le fafagaina o le 5,000, o le “faataatiaga lea e Iesu o le faavae o lana lauga e le mafaatusalia i le Areto o le Ola” (Ioane 6:22–69; tagai lesona 12). O le fafagaina mulimuli ane o le 4,000, na aoao mai ai e Iesu o le faatusa lea i le lumanai, o le ofoina atu lea o le areto o le ola i malo o Nuu Ese. (Doctrinal New Testament Commentary, 3 vol. [1966–73], 1:375.)
2. Ua folafolaina atu ia Peteru ki o le malo.
Faitau ma talanoaina le Mataio 16:13–19.
-
Na tuua e Iesu ia Tekapoli ma alu atu i le nuu o Kaisareia i Filipi, lea na ia fesili atu ai i ona soo “Pe se a la outou upu ia te au, po o ai? (Mataio 16:15). O le a le tali a Peteru? (Tagai Mataio 16:16). O le a le pogai o le molimau a Peteru? (Tagai Mataio 16:17.) O le a se mea e mafai ona tatou aoaoina mai lenei tala e uiga i a tatou molimau?
-
Na fetalai atu Iesu ia Peteru, “Ou te atiae foi la’u ekalesia i luga o lenei papa” (Mataio 16:18). Na aoao mai e le Perofeta o Iosefa Samita faapea o le papa lea o loo faatatau i ai le fetalaiga a Iesu o faaaliga (Teachings of the Prophet Joseph Smith, sel. Joseph Fielding Smith [1976], 274. O le a le auala ua avea ai faaaliga ma faavae o le Ekalesia a le Alii?
-
Na folafola e le Faaola le tuuina atu ia Peteru o “ki o le malo o le lagi” (Mataio 16:19). O a nei ki? Aisea e manaomia ai? (Tagai MFF 128:9–10; 132:46.) O ai o loo umiaina i le taimi nei?
Na aoao mai Peresitene Iosefa F. Samita faapea:
“O le Perisitua i lona tulaga lautele o le pule lea e tuuina atu i le tagata e galue ai mo le Atua. Soo se alii e faauuina i soo se tulaga o le Perisitua, ua ia te ia lenei pule ua tuuina atu ia te ia.
“Ae moomia foi soo se gaoioiga lava e faataunuuina i lalo o lenei pule e tatau ona faia i le taimi sa’o ma le nofoaga sa’o. O le mana e faatonutonuina ai nei galuega o loo i ai lea i ki o le Perisitua. I lo latou atoatoa, o nei ki o loo umiaina e le tagata e toatasi i se taimi, o le perofeta ma le peresitene lea o le Ekalesia. E mafai ona ia faasafuaina atu se vaega o lenei mana i se isi, i lea tulaga ua umia ai e lea tagata ia ki e faasinotonu mo lea galuega” (Gospel Doctrine, 5th ed. [1939], 136).
-
Aisea e avea ai le talitonuga o le perofeta o loo umiaina nei ki ma se vaega taua o a tatou molimau?
3. Ua liua Iesu i luma o Peteru, Iakopo, ma Ioane.
Faitau ma talanoaina le Mataio 17:1–9. Ia faamatala atu pe tusa o se vaiaso talu ona maea le folafolaina atu ia Peteru o ki o le malo, o ia, ma Iakopo, ma Ioane na molimauina le Liuaina o le Faaola ma mauaina le malamalama taua ma ki. O se tasi lenei o mea sili ona taua na tupu i le Feagaiga Fou. Na fesoasoani i le sauniaina o Iesu mo lana Togiola ma faamalosia ai Aposetolo e toatolu mo isi tiutetauave faaopoopo o le a latou mauaina i se taimi vave i le avea ai ma taitai o le Eklaesia.
-
O le a le uiga o le liua? (O se suiga le tumau i foliga ma le natura o se tagata; o se suiga i se tulaga sili atu ona mamalu. E mafua ona o le mana o le Atua. Tagai MFF 67:11; Mose 1:11.)
-
E tusa ai ma le Mataio 17:1–5, o le a le mea na tupu ao i ai Peteru, Iakopo, ma Ioane i le Mauga o Liua? (Atonu e te manao e lisi i luga o le laupapa tali a tagata o le vasega.)
-
Na pupula foliga o Iesu e pei o le la, ma ua matuai sinasina lava ona ofu.
-
Na faaali mai foi Mose ma Elaia.
-
“Ua ufitia i latou i se ao pupula,” ma ua latou faalogoina le siufofoga o le Tama ua molimau mai i lona Alo.
Atonu e te manao e faamatala atu o le igoa Elaia o loo faaaogaina i le tele o auala eseese i tusitusiga paia. I le Mataio 17:3–4 o le upu Eleni e tutusa ma le upu Eperu Elia. I isi vaega (e pei o le Mataio 17:10–13), o se igoa e faailoa ai se tasi o loo avea ma se e muamua i luma, po o se teuteu ala.
Ia faamatala atu ua aoao atili mai e perofeta o aso e gata ai e uiga i mea na tutupu i le Mauga o Liua. Iloilo aoaoga nei faatasi ma tagata o le vasega, ma afai e manaomia, ia faia se aotelega i luga o le laupapa.
-
Na vaaia e Peteru, Iakopo, ma Ioane se faaaliga i le liuaina o le lalolagi i le Afio Faalua mai o le Faaola (MFF 63:20–21).
-
Na “liuaina i latou i luma [Keriso]” (Teachings of the Prophet Joseph Smith, 158).
-
Na aoaoina i latou e uiga i le maliu ma le toetu o le Faaola (Faaliliuga a Iosefa Samita, Luka 9:31).
-
Na latou mauaina mai ia Iesu, Mose, ma Elia ia ki o le perisitua o le a latou manaomiaina i le puleaina o le Ekalesia pe a mavae le maliu o le Faaola (Teachings of the Prophet Joseph Smith, 158; Joseph Fielding Smith, Doctrines of Salvation, 3 vol. [1954–56], 2:110).
-
-
I le 1836 na toe oo mai ai Mose ma Elia i le lalolagi. Na laua faaee atu o laua lima i luga o Iosefa Samita ma Oliva Kaotui e toefuatai atu i ai ki lava ia e tasi na tuuina atu ia Peteru, Iakopo, ma Ioane. O a ki na toefuatai mai e Mose? (Tagai MFF 110:11. O ki o le faapotopotoina o Isaraelu.) O a ki na toefuatai mai e Elia? Tagai MFF 110:13–16. O ki o le mana o faamauga.) O faapefea ona faaaogaina nei ki i aso nei? (I galuega faafaifeautalai ma galuega faalemalumalu, lea o loo faataunuuina i lalo o le taitaiga a le Peresitene o le Ekalesia.)
-
Na aoao mai e Elder David B. Haight faapea o le Liuaina o Iesu “sa faatatau lea mo lo tatou malamalama faaleagaga e faapea foi ma i latou sa molimautino i ai” (Liahona, Oketopa 1977, 7). O le a se mea na tatou aoaoina mai le Liuaina e fesoasoani ai ia i tatou pe a tatou manaomia le malosiaga faaleagaga?
Atonu e te manao e iloilo manatu nei na tuuina mai e Elder David B. Haight (Liahona, Oketopa 1977, 7);
-
E tatau ona tatou mulimuli i le faataitaiga a le Faaola e ala lea i le tatalo faatauanau pe a tatou manaomia le malosiaga faaleagaga (Luka 9:28). I le tautalagia o le Liuaina, na saunoa mai ai Elder Haight: “Atonu sa faalogoina e Iesu se lagona toafilemu faaleagaga lea e mafai ona maua mai ai le avanoa e fesootai ai o Ia ma Lona Tama, ae sa faapea foi ona ia maua le lagona o le a maua e Ia le fesoasoani i le itula o le a oo mai i tagata e le ni o le lalolagi. … A o ia tatalo atu i Lona Tama, sa faapea ona aveesea masalosaloga ma amioleaga uma o le lalolagi ia na teena ai o ia.”
-
E mafai ona tatou maua le lagona mautinoa o le a faamalosia i tatou e Iesu e pei ona ia faia ia Peteru, Iakopo, ma Ioane. Na saunoa mai Elder Haight faapea, “Sa avea e Ia Ana aposetolo e toatolu ma le talitonu, a mavae ona latou vaai i Lona mamalu … ia mafai ona faamalosia ai lo latou faatuatua ma saunia i latou mo mea matautia o le a latou fetaia’i mulimuli ane.”
-
E mafai ona faamalosia i tatou e ala i le molimau i le Faaola (Mataio 17:5) faapea ma aoaoga a le talalelei. Na saunoa mai Elder Haight faapea: “Sa aoaoina aposetolo e toatolu e uiga i le oo mai o le maliu [Faaola] faapea ma Lona toetu, o ni aoaoga o le a faamalosiauina ai i latou taitoatasi i mea o le a tutupu i le lumanai.”
-
Faaiuga
Ia faamamafa atu i le avea ai ma Au Paia o Aso e Gata Ai ua tatou maua faamatalaga e fesoasoani ai ina ia tatou malamalama i le mea na tupu i le Mauga o Liua. Ia molimau atu i le taua o faaaliga i le Ekalesia i aso nei ma le manaomiaina o ki o le perisitua. Ia faamautinoa atu i tagata o le vasega faapea, e pei foi i tatou o Peteru, Iakopo, ma Ioane e mafai ona tatou iloa e ala i le Agaga Paia o Iesu o le Keriso, le Alo o le Atua soifua.
Manatu Faaopoopo e Aoao Atu Ai
O mea nei e lagolago atu ai i le otootoga o le lesona ua fautuaina. Atonu e te manao e faaaoga le tasi po o le sili atu foi o nei manatu e avea o se vaega o le lesona.
O Faataitaiga o le molimau mai o le Tama i le Alo
E fa ni faataitaiga o loo faamaumauina i tusitusiga paia ina ua faailoa mai e le Tama ma molimau mai i lona Alo. O se tasi o ia faataitaiga o loo talanoaina i lenei lesona. Ia valaaulia tagata o le vasega e tomanatu i le isi tolu.
-
Papatisoga o Iesu (Mataio 3:13–17)
-
O le Liuaina (Mataio 17:1–9)
-
O le faaali atu o Iesu i sa Nifae (3 Nifae 11:1–7)
-
O le Uluai Faaaliga a Iosefa Samita (Talafaasolopito o Iosefa Samita 2:13–17)