“O Molimau i Matou Nei”

Faamoemoega

Ina ia faamanatu i tagata o le vasega o latou tiutetauave ina ia avea ma molimau ia Iesu Keriso ma ia fesoasoani ia i latou ina ia latou iloa pe faapefea ona fesoasoani le Agaga Paia ia i latou ina ia latou faia faapea.

Sauniuniga

Faitau, mafaufau loloto, ma tatalo e uiga i mau nei:
1. Galuega 1. Ina ua mavae ona ia aoao atu i ona soo mo le 40 aso, ona afio a’e ai lea o le Alii toetu i le lagi. Ua filifilia Matatia e faatumuina le avanoa lea na tuua e Iuta i le Korama a le Au Aposetolo e Toasefululua.
2. Galuega 2. I le aso o le Penetekoso, sa faatumulia ai le Au Aposetolo i le Agaga Paia ma tautatala atu ai i gagana eseese. O le toatele o i latou na faalogo i ai na liua ai.
3. Galuega 3–4. Ua faamaloloina e Peteru ma Ioane se tagata pipili ma molimau atu na faamaloloina lea tagata e le mana o Iesu Keriso. Na tatalo le Au Aposetolo ma mauaina le mana sili e ala i le Agaga Paia.
4. Galuega 5:12–42. Ua faaauau ona talai atu le Au Aposetolo ma faamalolo ma le mana silisiliese. Ua pueina i latou ma faafalepuipuiina ae na toe tatalaina i latou i tua e se agelu. Na latou tautino atu i ositaulaga sili latou te usitai i le Atua ae le o tagata. Na fautuaina e Kamalielu le Au Faresaio ina ia aua nei fasiotia le Au Aposetolo.
Tusi faitau faaopoopo: Mareko 16:19–20; Luka 24:49–53; Talafaasolopito Iosefa Samita 2:21–25.
Afai e maua le ata O le Afio A’e o Iesu (62497; Taga Ata o le Talalelei 236, ia faaaoga i le taimi o le lesona.
Afai e te faaaogaina le gaoioiga e faatosina mai ai, ia fuafuaina ni tagata se toalua e o atu i totonu o le potu aoga ao lei amataina le vasega, ao nonofo i lalo tagata o le vasega. (Afai e talafeagai, o nei tagata e le o ni tagata e masani ona auai i lau vasega.) Fai atu i ai e ulufale mai i le vasega, fai sina tamai gaoioiga (mo se faataitaiga, talanoa ma oe po o le tauamo atu se mea i totonu o le vasega), ona toe malaga ese lea. E le tatau ona la talanoa atu i le vasega po o le taumafai foi e gauai atu ia i laua.
Fautuaga mo le aoaoina atu: E tatau i faiaoga ona molimau atu o mea o loo latou aoaoina atu e moni. Ia molimau atu ia Iesu Keriso ma lana talalelei pe afai e uunaiina ai oe e le Agaga, ae le na o le faaiuga o le lesona. O le tuuina atu o le molimau e aumaia ai le malosiaga ia te oe i lau aoaoga. (Tagai O le Aoao Atu—E Leai Se Isi Valaauga e Sili Ai, 10, 45–46.)

Faalautelega Fautuaina o le Lesona

Gaoioiga e Faatosina Mai Ai

Afai e talafeagai ai, ia faaaoga le gaoioiga lenei po o sau lava gaoioiga e amata ai le lesona.

Fesili atu i tagata o le vasega pe sa latou maitauina tagata e toalua ia na ulu atu i totonu o le potu ona toe o ese lea ao lei amataina le vasega (tagai i le vaega o “Sauniuniga”). Afai e i ai se tasi o le vasega na maitauina, fesili atu i ai po o a ni mea na latou maitauina i ia tagata, e pei o ai i laua, o a o laua lavalava sa fai, ma mea na la faia. Ia faamanino atu o tagata o le vasega na vaai i nei tagata asiasi, o ni molimau. (Afai e leai se tasi na maitauina nei tagata asiasi, tau atu mea na la faia ma faamatala atu i ai o oe o se molimau.) O se tagata na te iloa ma oo i se mea na tupu ma tau atu i isi e uiga i ai o ia lena o se molimau.

Fesili atu i soo se tagata o le vasega e lei vaai i tagata asiasi:

Gaoioiga e Faatosina Mai Ai

E te talitonu i mea ia na tauina mai e nei molimau? Aisea e te talitonu ai, aisea foi e te le talitonu ai?

Ia faamatala atu o le lesona i lenei aso e faatatau lea i uluai Aposetolo, o e na avea ma molimau ia Iesu Keriso toetu. Ina ua latou molimau atu ia te ia, e toatele tagata sa talitonu ia i latou ma sa papatisoina i totonu o le Ekalesia.

Mau Talanoaina ma le Faaaogaina

Ao e aoaoina atu mau nei mai tusitusiga paia, ia faamamafa atu le faatuatua ma le mana lea na molimau atu ai le Au Aposetolo i le Alii toetu. Ia talanoaina ma tagata o le vasega pe mafai faapefea ona avea foi i latou ma molimau ia Iesu Keriso.

Ia faamatala atu o le tusi o Galuega o le tala lea a Luka i mea taua na tutupu i le Ekalesia i le vaitaimi pe tusa ma le 30 tausaga po o le sili atu foi ina ua mavae le soifuaga faaletino o Iesu Keriso. O loo faamatala mai ai e Luka le aoaoga a le Alii toetu i le 40 aso ma lona Afio A’e. Ona ia faamatalaina lea o se matuai faaleagaga lava na i ai i le aso o le Penetekoso, o le taitaiga e Peteru o le Ekalesia, o uluai taumafaiga faafaifeautalai a Aposetolo, ma le liliu uiga ese o Paulo. O le afa lona lua o le tusi o loo taulai atu lea i galuega faafaifeautalai a Paulo i tagata o Nuu Ese.

1. Ua afio a’e le Alii i le lagi. Ua valaauina Matatia e avea ma se Aposetolo.

Ia talanoaina le Galuega 1. Ia valaauliaina tagata o le vasega e faitau leotele ia fuaiupu filifilia. Faaali atu le ata o le Afio A’e.

Ina ua mavae le toetu o Iesu, sa ia faatasi ma ona soo mo le 40 aso, “ma na fetalai atu i mea a le malo o le Atua” (Galuega 1:3). Ao lei toe foi atu o ia i lona Tama o i le Lagi, o le a le mea na ia folafola atu i ana Aposetolo o le a le pine ae latou mauaina? (Tagai Galuega 1:4–5; tagai foi Luka 24:49. Ia faamanino atu e ui lava na iloaina e le Au Aposetolo faaaliga a le Agaga Paia, ae latou te lei mauaina lava le meaalofa o le Agaga Paia.)
O le a le mea na tauina atu e Iesu i le Au Aposetolo latou te faia pe a mavae ona latou mauaina le meaalofa o le Agaga Paia? (Tagai Galuega 1:8.) E faapefea ona faatusatusa lenei faatonuga i le tiutetauave ua tuuina atu i Aposetolo i ona po nei? (Tagai MFF 107:23, 35.) Na faapefea ona faataunuuina e le Au Aposetolo lenei tiutetauave i le taimi ina ua faatoa mavae lava le Toetu o Iesu? (Faaaliga, mo se faataitaiga, o nisi o molimau malolosi o loo faamaumauina i le Galuega 2–5.) O faapefea ona faataunuuina e Aposetolo lenei tiutetauave i ona po nei?
Na faapefea ona fesoasoani le meaalofa o le Agaga Paia i le Au Aposetolo i o latou tiutetauave i le avea ai ma molimau ia Iesu Keriso? (Tagai Ioane 15:26–27; 1 Korinito 12:3.) O le a le matafaioi o le Agaga Paia i a tatou taumafaiga ina ia aoao atu le talalelei? (Tagai 2 Nifae 33:1; MFF 42:14.)
Ao vaavaai atu le Au Aposetolo ia Iesu o afio a’e i le lagi, e toalua ni tagata na tutu ai i ona tafatafa. O le a le mea na tauina atu e nei tagata i le Au Aposetolo? (Tagai Galuega 1:10–11.) Ia molimau atu o le Afio Faalua Mai o Keriso o le a avea ma se mea e mafai ona vaaia. O le a toe afio mai Keriso i le lalolagi e taimua i le Meleniuma ma pule i le lalolagi.
Ina ua mavae le Afio A’e o le Alii, na filifilia se Aposetolo fou e suitulaga i le avanoa i le Korama na tuua e Iuta. Na faapefea ona filifilia Matatia e avea ma Aposetolo fou? (Tagai Galuega 1:21–26.) O faapefea ona filifilia Aposetolo ma taitai o le Ekalesia i ona po nei? (Tagai Mataupu Faavae o le Faatuatua 1:5.)

2. I le aso o le Penetekoso, sa faatumulia ai le Au Aposetolo i le Agaga Paia.

Faitau ma talanoaina fuaiupu filifilia mai le Galuega 2. Ia faamatala atu o le Tausamiga o le Penetekoso o se faamanatuga o le seleselega e faia i le 50 aso talu ona mavae le Tausamiga o le Paseka. O tagata Iutaia mai le tele o atunuu e o atu i Ierusalema mo lenei tausamiga.

O le a se mea na tupu na matuai tulaga ese i le aso o le Penetekoso, ina ua tasi le vaiaso talu ona tuanai le Afio A’e o le Faaola? (Tagai Galuega 2:1–4. Ia faamanino atu le ala na faataunuuina ai lenei folafolaga a le Alii i le Ioane 14:26, 15:26, ma le 16:7–14 ma le Galuega 1:5.)
O le a le mea na faia e le Au Aposetolo ina ua latou maua le Agaga Paia? (Tagai Galuega 2:4.) O a ni uiga na faaalia o tagata ina ua latou faalogo i le Au Aposetolo ua tautatala i gagana eseese? (Tagai Galuega 2:5–13.) O faapefea ona tali tutusa le talaiga o le talalelei i aso nei ma le talaiga i le aso o le Penetekoso? (Tagai MFF 90:11; 100:5–8.)
Na faapefea ona tali atu Peteru ia i latou o e sa faatauemu i le Au Aposetolo ona o lo latou tautatala i gagana? (Tagai Galuega 2:14–24, 36.) O le a se mea na faagaeetia ai oe e uiga i le tali a Peteru? Aisea e taua ai le i ai o se molimau ia Iesu Keriso ma lana misiona paia? Aisea e taua ai mo i tatou le fetufaai atu o a tatou molimau i isi? E mafai faapefea ona fesoasoani le Agaga Paia ia i tatou ina ia fetufaai atu a tatou molimau?
Na faapefea ona aafia isi na faalogo i le molimau a Peteru? (Tagai Galuega 2:37.) O le a le mea na aoao atu e Peteru i tagata o e na talitonu i lana molimau? (Tagai Galuega 2:38.) Tuu atu i tagata o le vasega e faatusatusa le Galuega 2:38 i le mataupu faavae lona fa o le faatuatua ma le 3 Nifae 27:19–20. Ia faamanino atu o mataupu faavae ma sauniga o le talalelei e tutusa lava i augatupulaga uma.
Pe tusa ma le 3,000 tagata na talitonu i upu a Peteru ma sa papatisoina. Na faapefea ona faaali atu e nei tagata ua liua i latou i le talalelei a Iesu Keriso? Tagai Galuega 2:41–47. Ia lisi i luga o le laupapa tali a tagata o le vasega.) O le a se mea e mafai ona tatou aoaoina mai a latou faataitaiga?

3. Ua faamaloloina e Peteru ma Ioane se tagata pipili i le mana o Iesu Keriso.

Faitau ma talanoaina fuaiupu filifilia mai le Galuega 3–4. Atonu e te manao e tuu atu i se tagata o le vasega e faitau leotele le Galuega 3:1–11.

E ui lava e leai ni tupe a Peteru ma Ioane e tuuina atu i le tagata pipili i le faitotoa o le malumalu, o le a le mea na la ofoina atu ia te ia? O le a le mana na faaatoatoaina ai lea tagata? (Tagai Galuega 3:6, 12–13, 16; 4:10.) O faapefea ona e lagonaina le mana faamalolo o Iesu Keriso i lou olaga?
Na faaaogaina e Peteru lenei vavega e avea o se avanoa e molimau atu ai ia Iesu Keriso (Galuega 3:12–26; 4:5–12). O a ni avanoa tatou te maua e molimau ai ia Iesu Keriso? O faapefea ona faamanuiaina oe ao avea ma se molimau (po o le faalogo i isi o avea ma molimau) ia Iesu Keriso?
Na faapefea ona tali atu le au faitaulaga ma le Au Satukaio i le lauga a Peteru? (Tagai Galuega 4:1–3. Sa latou pueina ia Peteru ma Ioane.) Na faapefea ona tali atu le motu o tagata i le lauga? (Tagai Galuega 4:4.) Aisea e te manatu ai o nei vaega e lua na eseese a laua tali atu i le lauga lava e tasi? O le a se tulaga o o tatou loto e faaalia i a tatou tali i saunoaga a taitai o le Ekalesia?
Faatasi ai ma le tagata ua faamaloloina o loo faatasi ai, sa le mafai e le au faitaulaga ma le Au Satukaio ona teenaina faapea o se vavega na tupu (Galuega 4:13–14, 16). Talu ai ona e leai sa latou mafuaaga e faafalepuipuiina ai Peteru ma Ioane, o le a la le mea na latou faia? (Tagai Galuega 4:15–18. Ia faamanino atu na faamoemoe taitai faalelotu o Iutaia o Iesu ma ana aoaoga o le a faagaloina pe a mavae le Faasatauroga. Ina ua taumafai le Au Aposetolo e faaauauina ona talai atu le talalelei a Iesu Keriso, sa taumafai taitai Iutaia e taofia i latou.)
Na faapefea ona tali atu Peteru ma Ioane i le manaoga o le au faitaulaga ma le Au Satukaio ina ia taofia lo latou aoaoina atu o le talalelei? (Tagai Galuega 4:19–20.) O a nisi tulaga o lou olaga atonu e moomia ai se ituaiga lototele faapea ina ia avea ai ma se molimau mo Iesu Keriso?
Ina ua toe tatala mai i tua ia Peteru ma Ioane, sa la toe foi atu i tagata o le Ekalesia ma tatalo faatasi ma i latou (Galuega 4:23–30). O le a le mea na latou ole atu ai i le tatalo? (Tagai Galuega 4:29–30.) O le a le mea na tupu mai ona o lenei tatalo faapea ma gaoioiga na sosoo mulimuli ane ai a le Au Aposetolo? (Tagai Galuega 4:31–35; 5:12–16.)

4. Ua faaauau pea e le Au Aposetolo ona talai ma faamalolo ma se mana uiga ese.

Faitau ma talanoaina fuaiupu filifilia mai le Galuega 5:12–42.

Ina ua faaauau e le Au Aposetolo ona talai ma faia vavega, sa lafoina i latou e le au faitaulaga ma le Au Satukaio i le falepuipui (Galuega 5:17–18). Na faapefea ona tatalaina mai i latou mai le falepuipui? (Tagai Galuega 5:19–20.) O le a le mea na latou faia ina ua mavae ona tatalaina i latou? (Tagai Galuega 5:21, 25.) Aisea na faaauau ai pea ona talai atu e le Au Aposetolo le talalelei e ui lava ua tuanai lo latou faafalepuipuiina? (Tagai Galuega 5:29–32.)
O le a le fautuaga na tuuina atu e Kamalielu i taitai Iutaia o e na mananao e fasioti le Au Aposetolo? (Tagai Galuega 5:33–39.) O a ni mea na tutupu e te iloa ai le moni o upu a Kamalielu?
O le a se suiga na aumaia e le meaalofa o le Agaga Paia i le Au Aposetolo? (Faatusatusa i le Mataio 26:47–56, 69–75 ma le Galuega 4:5–21; 5:17–18, 26–42.) E mafai faapefea e faataitaiga a le Au Aposetolo ona musuia i tatou ina ia avea ma molimau o le upumoni?

Faaiuga

Ia faamatala atu ina ua mavae ona mauaina e le Au Aposetolo le meaalofa o le Agaga Paia, sa avea loa i latou ma molimau malolosi ia Iesu Keriso. I le i ai i Aposetolo o se valaauga faapitoa o le avea ma molimau ia Keriso, ua i ai foi i tagata taitoatasi o le Ekalesia se tiutetauave o le molimau atu e uiga ia te ia. Ia tuuina atu lau molimau e mafai e le Agaga Paia ona fesoasoani ia i tatou ia iloa ona tatou molimau ia Keriso. A tatou mulimuli atu i musumusuga a le Agaga, o le a faateleina lo tatou faatuatua, o lo tatou malamalama i le Agaga o le a faatupulaia, ma o le a avea i tatou ma ni molimau malolosi mo le Alii o Iesu Keriso.

Manatu Faaopoopo e Aoao Atu Ai

O mea nei e lagolago atu ai i le otootoga o le lesona ua fautuaina. Atonu e te manao e faaaoga le tasi po o le sili atu foi o nei manatu e avea o se vaega o le lesona.

1. O faaaliga a le Agaga Paia i le faapaiaga o le Malumalu o Katelani

Ia faamatala atu na matuai malosi le faatasi atu o le Agaga e pei o lea o loo i le Galuega 2:1–4 i le faapaiaga o le Malumalu o Katelani i le aso 27 o Mati 1836. Tuu atu i se tagata o le vasega e faitau leotele le Mataupu Faavae ma Feagaiga 109:36–37, o le vaega o le tatalo o le faapaiaga lea na talosagaina e le Perofeta o Iosefa Samita o se matuai liligi ifo lava o le Agaga. Ona fai atu lea i se isi tagata o le vasega e faitauina le faamatalaga lenei, lea e faamatalaina ai le taliaina o lea talosaga:

Na saunoa mai le Perofeta o Iosefa Samita faapea o se fonotaga i le afiafi i le aso na faapaiaina ai le Malumalu o Katelani, “Na tulai le Uso o George A. Smith, e amata ona vavalo atu, ae faalogoina se leo e pei o se matagi agi malosi, na faatumulia ai le Malumalu, ma na faapea ona auauai ona tutulai uma le aofia, ua faagaeetia e se mana e le mavaaia; e toatele na amata ona tautatala i gagana ma vavalo atu; o isi na vaaia ni faaaliga mamalu; ma na ou vaaia ua faatumulia le Malumalu i agelu, lea na ou faailoaina atu i le aofia. O tagata o tuaoi na taufetuli mai faatasi (ina ua faalogoina se leo e le masani ai i totonu, ma vaaia se malamalama pupula e pei o se afi faaniutu o i ai i luga o le Malumalu), ma sa matuai maofa i le mea na tupu” (History of the Church, 2:428).

2. “O tausaga e toefuatai ai mea uma” (Galuega 3:21)

Tuu atu i se tagata o le vasega e faitauina le Galuega 3:20–21.

O le a le mea na muai vaaia e Peteru ina ua ia vavalo i se “toefuataiga o mea uma”? (Na ia muai vaaia le toefuataiga i aso e gata ai o le talalelei a Iesu Keriso e ala mai i le Perofeta o Iosefa Samita.)

3. “Ua tuutele a latou mea uma” (Galuega 4:32)

Ia talanoaina le Galuega 4:32–5:11. Ia faamatala atu o uluai tagata o le Ekalesia sa “tuutele a latou mea uma” (Galuega 2:44; tagai foi Galuega 4:32, 34–37). Sa latou faapaiaina mea uma ina ia faafetaiaia manaoga o tagata uma. (Atonu e te manao e faatusatusa lenei mea i le nuu o Enoka [Mose 7:18], o fanau a Liae [4 Nifae 1:1–3], ma uluai tagata o le Ekalesia i lenei tisipenisione [MFF 42:30–34].)

Na faapefea ona tali atu Panapa i lenei fuafuaga o le faapaiaina o mea uma? (Tagai Galuega 4:36–37.) Na faapefea ona solia e Anania ma Safaira lenei fuafuaga? (Tagai Galuega 5:1–2.) O le a le mea na tau atu e Peteru ia Anania ma Safaira e uiga i o laua uiga? (Tagai Galuega 5:3–4, 8–9.) E mafai faapefea ona tatou mautinoa ua tatou faamaoni i le Atua?
E ui lava tatou te le o ola i se fuafuaga aloaia o le faapaiaga, o a mea ua talosagaina ai i tatou ina ia tuuina atu i le Atua po o le fetufaai atu ai i isi tagata? (Tagai Ominae 1:26; Mosaea 4:16; MFF 4:2; 119:4 mo nisi faataitaiga.) E faapefea i nisi taimi ona tatou” faanana nisi mea”?

Na saunoa mai Elder Neal A. Maxwell faapea:

“Sa tuu faanana e Anania ma Safaira … nisi mea mo la’ua, ae sa la’ua le tuuina atu uma (tagai Galuega 5:1–11.) E i ai nisi latou te le faatauina atu lava Iesu i ni tupe e tolugafulu, ae latou te le tuuina atu foi i latou uma ia te Ia!

“… Ua tatou manatu ua na o mea totino ma tupe tatou te faapaiaina pe tuuina atu. Ae tele naua auala ua tatou taofia ai pe faanana se vaega. Atonu o se tasi na te tuuina atu ana tupe ma lona taimi, ae taofi le vaega tele mo ia lava. Atonu o le tasi na te fetufaai ana taleni i luma o tagata, ae na te teu ia te ia lava le faamaualuga. Atonu o le tasi e le tootuli i luma o le nofoalii o le Atua, ae ifo toele i luma o tagata e fiafia i ai. Atonu o se tasi ua na talai tofiga o le Ekalesia, ae ua pupu tele lona loto i le taofi mau o tofi faapitoa o le lalolagi ua ia te ia” (Liahona, Ianuari 1993, 83).
E mafai faapefea ona tatou faatoilaloina le manatu lea ina ia “taofia se vaega”? O a faamanuiaga e oo mai i le tuuina atu o a tatou mea uma i le Alii?

4. Gaoioiga a le autalavou

O faiaoga o le autalavou atonu e mananao e faaaoga le fuafuaga o le “aoaoga manaomia” i vaega o le lesona. Tuu atu i tagata o le vasega e taumafai e fuafua le ulutala o le lesona e ala lea i le tuuina atu o fesili e mafai ona taliina mai i le “ioe” po o le “leai.”