Aoga Sa: Aoaoga Faavae o le Talalelei
Lesona 29: ‘Ua Faatoateleina le Au Soo’

Lesona 29

“Ua Faatoateleina le Au Soo”

Galuega 6–9

Faamoemoega

Ina ia fesoasoani ia iloa e tagata o le vasega o le galuega a le Ekalesia na faia e le toatele o tagata, o i latou uma lava na tuuina atu a latou taleni ma molimau ina ia faamalosia ai le Ekalesia.

Sauniuniga

  1. Faitau, mafaufau loloto, ma tatalo e uiga i mau nei:

    1. Galuega 6:1–7. Ua faauuina e le Au Aposetolo e Toasefululua isi alii e toafitu e puleaina galuega faaletino o le Ekalesia.

    2. Galuega 6:8–7:60. O Setefano, o se tasi o lea toafitu, ua molimau atu i luma o le au Seneterini. O ana upu na feita ai tagata o e na faalogo i ai, ma latou avatu ia te ia i tuapa o le aai ma fetogi ai i maa seia oo ina oti.

    3. Galuega 8:4–40. O Filipo, o se tasi o le toafitu, na lauga atu ma faia vavega i Samaria. Na ia aoao atu ma papatisoina se eunuka mai Aitiope.

    4. Galuega 8:1–3; 9:1–31. Ua faasaua Saulo i le Ekalesia seia oo ina ua ia mauaina se faaaliga ia Iesu Keriso. Ua liua Saulo ma ua papatisoina ma ua amata ona talai atu le talalelei.

  2. Tusi faitau faaopoopo: Galuega 22:1–16; 26:1–5, 9–18.

  3. Fautuaga mo le aoaoina atu: Manatua o loo e aoaoina se vasega o tagata taitoatasi. Atonu e eseese uma mea na latou oo i ai i le olaga, le umi talu ona avea ma tagata o le Ekalesia, o le malamalama i aoaoga ma mataupu o le talalelei, o taleni ma mea e mafaia, ma avanoa mo aoaoga. Saili ina ia malamalama i mea e eseese ai tagata o le vasega ma fesoasoani i tagata taitoatasi ina ia malamalama i upu moni o loo aoaoina. (Tagai O le Aoao Atu—E Leai Se Isi Valaauga E Sili Ai, 35–39.)

Faalautelega Fautuaina o le Lesona

Gaoioiga e Faatosina Mai Ai

Afai e talafeagai ai, ia faaaoga le gaoioiga lenei po o sau lava gaoioiga e amata ai le lesona.

Fesili atu i tagata o le vasega:

Gaoioiga e Faatosina Mai Ai

  • O le fea vaega o lou tino e te manatu e sili ona taua? Aisea?

A maea ona tuu mai ni tali mai tagata o le vasega, ona fesili atu lea:

Gaoioiga e Faatosina Mai Ai

  • O ai le tagata o le Ekalesia e te manatu e sili ona taua? Aisea?

Ia toe tuu atu foi i tagata o le vasega e tali mai. Ona tuu atu lea i se tagata o le vasega e faitauina le 1 Korinito 12:14–21, ae tuu atu i se isi tagata o le vasega e faitauina le 1 Korinito 12:12–13. Ia faamatala atu o nei fuaiupu o loo faatusatusa ai e le Aposetolo o Paulo ia tagata o le Ekalesia i vaega o le tino. E pei o le vae, o le lima, o le taliga, ma le mata e taua uma lava i o latou aoga, e faapea foi i tagata o le Ekalesia e taua uma lava i o latou tomai ma taleni eseese.

Mau Talanoaina ma le Faaaogaina

A o e aoaoina atu nei mau, ia talanoaina pe faapefea ona faaaoga i le olaga i aso taitasi. Uunai le vasega e faamatala ni aafiaga e faatatau i mataupu ua taua i le mau.

1. Ua faauuina alii e toafitu e puleaina galuega faaletino o le Ekalesia.

Faitau ma talanoaina le Galuega 6:1–7. Ia faamatala atu na matuai faatoateleina le Ekalesia i lalo o le taitaiga a le Au Aposetolo, ma ua toatele ai tagata liliu mai i atunuu e tele. O le mafuaaga lea o le fiafia tele, ae ua tulai mai ai foi ma nisi o luitau. Ao tuputupu ae le Ekalesia, na moomia ai e le Au Aposetolo nisi tagata e fesoasoani e faatonutonuina ma fausia le malo o le Atua.

  • Ao tuputupu ae le Ekalesia, o vaega sa i ai i totonu sa i ai ni o latou feeseeseaiga. Aisea na muimui ai nisi tagata Eleni i nisi o tagata Eperu? (Galuega 6:1.) E mafai faapefea e i tatou o tagata o le Ekalesia ona foiaina ni feeseeseaiga ma fevaevaeaiga ia i tatou, e tusa lava pe mafua i gagana, tamaoaiga, aganuu, po o nisi eseesega? Aisea e taua ai lo tatou foiaina o na fevaevaeaiga? (Tagai 2 Nifae 26:33; MFF 38:26–27.)

    Na saunoa mai Peresitene Howard W. Hunter faapea: “O le malamalama la ma le taliaina o lenei tulaga, o le Atua o le Tama o tagata uma, e mafai ai ona talisapaia e tagata uma le popole alofa o le Atua mo i latou, ma lo latou va o le tasi ma le tasi. O le savali lenei o le ola ma le alofa, lea e tetee i tu masani uma faaonoono e mafua ona o ituaiga, gagana, tulaga faalesoifuaga po le faapolotiki, tulaga faaleaoaoga, po o talaaga faaleaganuu, aua o i tatou uma lava, e tutusa lo tatou tupuaga faaleagaga. Ua ia i tatou se gafa paia; o tagata uma taitoatasi o se alo faaleagaga o le Atua” (Liahona, Ianuari 1992, 20).

  • E faapefea ona faatamaoaigaina ma faamalosia le Ekalesia i le eseese o tagata e i ai? E mafai faapefea ona ese i tatou mai isi ae tatou te lotogatasi pea?

  • Na lagona e le Au Aposetolo e le tatau ona latou aveesea se taimi mai le aoaoina atu o le talalelei ina ia foia ai ni feeseeseaiga ma taulimaina isi galuega faaletino (Galuega 6:2). Na faapefea ona latou foiaina lea faafitauli? (Tagai Galuega 6:3–6.) Aisea e taua ai le fetufaai o le galuega a le Ekalesia i tagata e toatele? O faapefea ona faamanuiaina oe i lou auauna atu i le Ekalesia?

  • O a fesuiaiga i faalapotopotoga na musuia ai taitai o le Ekalesia o aso e gata ai ina ia faia ao tuputupu ae le Ekalesia? (O tali e mafai ona aofia ai le faaopoopoina o Korama a le Au Fitugafulu po o le faavaeina o le Ekalesia i eria o loo pule faamalumalu ai Au Peresitene o Eria.) O faapefea ona fesoasoani nei fesuiaiga e faafetaiaia ai manaoga o le tagata o le Ekalesia i le lalolagi atoa?

2. Ua molimau atu Setefano i luma o Seneterini ma ua fetogia seia oo ina oti.

Ia talanoaina le Galuega 6:8–7:60. Ia valaaulia tagata o le vasega e faitau leotele ia fuaiupu filifilia.

  • O Setefano, o se tasi o alii e toafitu ia na valaauina ina ia fesoasoani i Aposetolo e Toasefululua, na pueina ona o ni moliaga sese o le upu leaga ma aumaia ai i luma o le Au Seneterini, o le fono a Iutaia (Galuega 6:11–15; afai e talafeagai, ia faamatala atu o le upu leaga o le le faaaloalo lea i le Atua po o mea paia). O le a le mea na faia e Setefano ina ua tulai o ia i luma o le au Seneterini? (Tagai Galuega 7:1–53. Na ia toe faamatalaina atu se vaega o le talafaasolopito o tagata Isaraelu.)

  • O le a sou manatu aisea na faamamafa atu ai e Setefano ia galuega mamana a le Alii i le talafaasolpito o Isaraelu? E mafai faapefea ona tatou mautinoa tatou te le o faagaloina ia galuega a le Alii i o tatou olaga? E faapefea ona fesoasoani lo tatou manatuaina o faamanuiaga ua tuanai mai le Alii ina ia tatou tutumau ai i le faamaoni?

  • O le a sou manatu aisea na faamamafaina atu ai foi e Setefano le faagalo soo ma le le usiusitai o Isaraelu i le Atua? O le a le faatusatusaga na faia e Setefano i le va o i latou sa faalogologo ma tagata Isaraelu le usiusitai? (Tagai Galuega 7:51–53.) O a ni uiga na faaalia e tagata i lea faatusatusaga? (Tagai Galuega 7:54.)

  • O le a le faaaliga na vaaia e Setefano ina ua uma ona tautala o ia? (Tagai Galuega 7:55–56.) O le a le mea na faia e tagata ina ua ia tauina atu ia te i latou lana faaaliga? (Tagai Galuega 7:57–58.) O le a le mea na faaalia i upu mulimuli a Setefano e uiga i lona avea ai ma soo? (Tagai Galuega 7:59–60.)

3. Ua talai atu Filipo ma faia vavega i Samaria.

Faitau ma talanoaina fuaiupu filifilia mai le Galuega 8:4–40.

  • O Filipo, o se tasi o alii e toafitu ia na filifilia e fesoasoani i le Au Aposetolo, na ia talai atu ma faia vavega i Samaria. Na faapefea ona tali atu tagata o Samaria i le savali a Filipo? (Tagai Galuega 8:6–8, 12.) Na faapefea ona mauaina e nei tagata le meaalofa o le Agaga Paia? (Tagai Galuega 8:14–17.)

  • O se tasi o tagata Samaria na liua o se fai togafiti faataulaitu e igoa ia Simona. O ai na ave i ai le faamalo a Simona mo galuega na ia faia e ala i togafiti faataulaitu? (Tagai Galuega 8:9–11.) O ai na ave i ai le faamalo a le Au Aposetolo mo vavega na latou faia? (Tagai Galuega 4:7–10.) Aisea e tulaga ese ai lea eseesega? (Ia faamanino atu o le toatele o tagata o e tauva mo le vaaiga a tagata ma lo tatou faamaoni e faia ina ia viia ai i latou. O lona eseesega, o auauna a le Atua latou te avatu le viiga ia te ia. O le malamalama i lea eseesega e mafai ona fesoasoani ia i tatou e iloiloina ai le tele o aafiaga i o tatou olaga.)

  • O le a le mea na faia e Simona ina ua ia vaaia le Au Aposetolo o tuuina ifo le Agaga Paia? (Tagai Galuega 8:18–19.) Na faapefea ona tali atu Peteru i le talosaga a Simona? (Tagai Galuega 8:20–23.) E faapefea ona agavaa se tasi ina ia mauaina le mana o le perisitua? (Tagai Eperu 5:4; MFF 121:36.)

    Na saunoa mai Peresitene James E. Faust faapea: “O lenei mana silisili o na mana uma, le mana lea o le perisitua, e le pei o le auala o loo faaaogaina ai malosiaga i le lalolagi. E le mafai ona faatauina mai pe faatauina atu. … O le malosiaga faalelalolagi e masani ona faaaogaina ma le saua. Ae peitai, o le mana o le perisitua ua faaaogaina ia na o mataupu faavae lava o le amiotonu lea e puleaina ai le perisitua” (Liahona, Iulai 1997, 52).

  • Na faapefea ona feiloai Filipo ma le eunuka mai Aitiope? (Tagai Galuega 8:25–29.) O a faamanuiaga na oo mai ia Filipo ma le tagata Aitiope ona o le mulimuli o Filipo i le Agaga? (Tagai Galuega 8:30–38.) O a faamanuiaga ua oo mai ia te oe (po o se tasi e te iloa) talu ai lou mulimuli i le Agaga?

  • Na faapefea ona faaalia e le tagata Aitiope lona lotomaualalo? (Tagai Galuega 8:30–39.) E faapefea ona fesoasoani le lotomaualalo ia i tatou ina ia tatou malamalama ma taliaina ai le afioga a le Atua?

4. Ua liua Saulo ma papatisoina ma ua amata ona talai atu le talalelei.

Faitau ma talanoaina fuaiupu filifilia mai le Galuega 8:1–3 ma le 9:1–31. Ia faamatala atu o Saulo o se Faresaio o le na matuai faasaua lava i uluai tagata o le Au Paia. Sa i ai o ia i le fetogiina o Setefano (Galuega 7:58) ma sa gafa foi ma le faafalepuipuiina ma le fasiotia o le toatele o tagata o le Ekalesia (Galuega 8:3; 22:4). Ae peitai, na oo o ia i se vavega o le liuaina ma avea ma se faifeautalai maoae.

  • O le a le mea na mafua ai ona liliu Saulo mai le avea ma se tagata faasaua i le Au Paia ma se auauna maoae i le Alii? (Tagai Galuega 9:1–9, 17). Ia faamanino atu na liua Saulo ina ua faalogo i le siufofoga o le Alii. E mafai faapefea ona tatou faalogo i le siufofoga o le Alii? (Tagai MFF 1:38; 6:23; 8:2; 18:34–36.) E mafai faapefea e lo tatou faalogoina o lona siufofoga ona fesoasoani ina ia tatou liua ai?

    Faamanatu i tagata o le vasega o le liuaina e masani lava o se tulaga e faifaimalie, ma filemu, ae le o se vavega faafuaseia e pei o Saulo. Na saunoa mai Elder Robert D. Hales faapea, “O nisi taimi e mafai ai e tagata ona maua ni aafiaga faapena, ae o le tele o itu, o le liua e tupu i se taimi umi a o fesoasoani le suesue, tatalo, aafiaga, ma le faatuatua ia i tatou e faatupuina la tatou molimau ma le liua” (Liahona, Iulai 1997, 99).

  • Na saunoa mai Elder Ezra Taft Benson e uiga i le fesili a Paulo, “Le Alii e, se a le mea e te finagalo i ai ou te faia?” o le fesili pito i taua lea e mafai ona tatou fesili ai i lenei olaga (i le Lipoti o le Konafesi, Oketopa 1972, 53). Aisea e taua ai lo tatou tuuina atu o lea fesili? O faapefea ona faamanuiaina oe a o e gauai atu i le faia o le finagalo o le Atua mo oe?

  • Aisea na faigata ai ia Anania ona alu atu e feiloai ma Saulo? (Tagai Galuega 9:10–14.) Aisea na alu atu ai Anania e ui lava i ni ona manatu? (Tagai Galuega 9:15–16.) O le a se mea e mafai ona tatou aoaoina mai uiga o Anania? (O tali e mafai ona aofia ai le tuuina mai e le Atua ia i tatou le lototele e faia ai soo se mea na te talosagaina ai i tatou ma e le tatau lava ona tatou fiu i se tagata, e tusa lava pe foliga mai ua siliga ni taumafaiga faaleagaga i ai.)

  • O le a le mea na faia e Anania mo Saulo? (Tagai Galuega 9:17–18.) O le a le mea na faia e Saulo ina ua mavae ona papatisoina o ia? (Tagai Galuega 9:19–22, 26–29.) O a ni o tatou tiutetauave pe a tatou liua i le talalelei a Iesu Keriso? (Tagai Luka 22:32; Ioane 8:31; Mosaea 18:8–10; MFF 88:81.)

Faaiuga

Ia faamanino atu, e pei foi i tatou o Setefano, Filipo, ma Saulo, o loo tatou ola i se taimi o loo matuai televave ai le faatupulaia o le Ekalesia. Ia molimau atu o loo finagalo le Alii ia i tatou uma taitoatasi ina ia auauna atu i lona malo ao faatuputupulaia. Ia uunaiina tagata o le vasega ina ia latou iloaina ma talisapaia uiga, o taleni, ma mea eseese e oo i ai e aumaia e tagata taitoatasi o le uarota po o le paranesi i le galuega a le Alii.

Manatu Faaopoopo e Aoao Atu Ai

O mea nei e lagolago atu ai i le otootoga o le lesona ua fautuaina. Atonu e te manao e faaaoga le tasi po o le sili atu foi o nei manatu e avea o se vaega o le lesona.

1. “O le mea faigata ia te oe ona aa i tui” (Galuega 9:5)

  • Tuu atu i se tagata o le vasega e faitauina le Galuega 9:5. O le a le uiga o le “aa i tui?” (O le tetee i faatonuga po o le taitaiga. O se laau maai e faaaogaina i nisi taimi e soso’a ai manu ina ia televave le gaoioi po o le faasino o se itu e o agai i ai. Afai e aa i tui se manu i lenei laau ao soso’a atu, o le a matuai tiga lava le manu.) Na tiga faapefea uiga o Saulo ia te ia ao lei maua lana faaaliga? E faapefea ona tatou faatiga ia i tatou lava pe a tatou faasagatau atu i le upumoni?

2. Gaoioiga a le Autalavou

Tusi upu nei i luga o ni fasi pepa po o luga o le laupapa: Anania, pule, tiapolo, mata, Agaga Paia, malamalama, talai, una, le mafeganavai (le magagana), ipu, siufofoga.

Tuu atu i tagata o le vasega e suesue le Galuega 9:1–22 ma iloiloina le tulaga ese ma le faasologa o nei upu i le tala e uiga i le liua o Saulo. Ona fai atu lea i ai e faamatala le tala e faaaoga uma ai upu.

Lolomi