Lesona 37
O Iesu Keriso: “O Le Na Te Taitaiina ma Faaatoatoaina le Faatuatua”
Faamoemoega
Ina ia faamanatu atu i tagata o le vasega faapea o le faaolataga e auala mai le faatuatua ia Iesu Keriso ma le usiusitai i ana poloaiga.
Sauniuniga
-
Faitau, mafaufau loloto, ma tatalo e uiga i mau nei:
-
Eperu 1–4. Ua molimau atu Paulo o Iesu Keriso, o le Alo Pele e Toatasi o le Tama Faalelagi, o lo tatou Faaola.
-
Eperu 5; 6:20; 7. Na faamalamalama mai e Paulo o le Perisitua Mekisateko o se vaega lea o le atoatoaga o le talalelei.
-
Eperu 8:1–10:18. Ua aoao mai Paulo o le tulafono a Mose o le feagaiga tuai lea i le va o le Atua ma ana fanau, ae o le talalelei a Iesu Keriso o le feagaiga fou. O le feagaiga tuai o se faatulagaga, o le feagaiga fou, ae na o le feagaiga fou e i ai le mana e faaolaina ai.
-
Eperu 10:19–11:40. Na apoapoaiina e Paulo le Au Paia ina ia faatinoina le faatuatua ia Iesu Keriso ina ia mafai ona latou maua ai se nofoaga i le malo o le Atua.
-
-
Fautuaga mo le aoaoina atu: Ia faaeteete ia aua nei avea oe ma se failauga. O nisi taimi o le a moomia ai ona e lauga otooto atu ina ia tuuina atu ai faamatalaga, ae o le lauga atu e aveesea ai lona aoga pe afai e na o le pau lena o le auala e aoao atu ai. A maea ona e tuuina atu faamatalaga po o le faamalamalamaina atu o se mataupu, ia mautinoa ua tuuina atu avanoa i tagata o le vasega ina ia tali mai ai ma aumai ni o latou sao. (Tagai O Le Aoao Atu— E Leai Se Isi Valaauga E Sili Ai, itulau 63–76.)
Faalautelega Fautuaina o le Lesona
Gaoioiga e Faatosina Mai Ai
Afai e talafeagai ai, ia faaaoga le gaoioiga lenei po o sau lava gaoioiga e amata ai le lesona.
Ia faamatala atu tulaga nei, ma fai atu i tagata o le vasega e sue se mau e mafai ona faaaogaina i se tasi o nei tulaga. (Ua fautuaina atu nisi o mau i totonu o puipui.)
Gaoioiga e Faatosina Mai Ai
-
O se tamaitiiti e te iloaina faatoa ia aoaoina lava i le Peraimeri o Iesu Keriso na foafoaina le lalolagi ma ua manao e fia iloa po o fea o faamatala mai ai lenei mea i tusitusiga paia. (Eperu 1:2; Ioane 1:1–3, 10; Efeso 3:9; Mosaea 3:8)
-
O se uo o loo i ai ni nai faafitauli e patino ia te ia lava ma manatunatu pe mafai faapefea e le Faaola ona tausiaina o ia po o le malamalama foi i le mea o loo tupu. (Eperu 2:6–8; 2 Nifae 1:15; Alema 7:11–12)
-
O se uo e le auai i le Ekalesia o loo manatunatu pe matuai talafeagai lava i se tasi ona mauaina le perisitua ina ia faataunuuina ai papatisoga ma isi sauniga. (Eperu 5:1, 4; Esoto 28:41; Ioane 15:16)
Ia valaaulia se tagata se toatasi pe toalua foi o le vasega ina ia faitauina mau na latou filifilia mo tulaga taitasi. Ia faamanino atu o le tusi a Paulo i Eperu o loo aofia ai mau e mafai ona faaaogaina i tulaga taitasi uma e tolu. Ia valaaulia tagata o le vasega ina ia faalogo lelei i nei mau ao outou talanoaina le tusi o Eperu.
Mau Talanoaina ma le Faaaogaina
A o e aoaoina atu nei mau, ia talanoaina pe faapefea ona faaaogaina i le olaga i aso taitasi. Uunai le vasega e faamatala ni aafiaga e faatatau i mataupu ua taua i le mau.
Ia faamatala atu, i ana malaga faatalai uma, na taumafai ai Paulo e faatalitonu tagata o le Ekalesia e tatau ona aua nei o latou toe faatinoina le tulafono a Mose. Talu ai o loo aoao atu e Kerisiano Iutaia faapea o le faaolataga e oo mai e ala i le faatuatua ia Iesu Keriso, o le toatele lava o i latou e talitonu pea o le usiusitai i le tulafono a Mose e talafeagai lea mo le faaolataga. Na tusi e Paulo le tusi i Eperu e toe faamamafa atu i ai o le tulafono a Mose ua faataunuuina e Keriso.
1. O Iesu Keriso, le Alo Pele e Toatasi o le Tama Faalelagi, o lo tatou Faaola.
Ia talanoaina le Eperu 1–4. Ia valaaulia tagata o le vasega e faitauina fuaiupu filifilia.
-
O le a se mea tatou te aoaoina e uiga ia Iesu Keriso mai le Eperu 1? (Ia lisi i luga o le laupapa tali a tagata o le vasega. O tali e mafai ona aofia ai tali o loo lisiina atu i lalo.)
-
Na ia foafoaina le lalolagi (fuaiupu 2, 10).
-
O ia ua tusa ma le Atua le Tama (fuaiupu 3).
-
Na ia faamamaina a tatou agasala (fuaiupu 3).
-
O ia le Alo Ulumatua o le Atua le Tama (fuaiupu 5–6).
-
O lona mamalu ma lona mana e faavavau, ma e le suia (fuaiupu 8, 12).
-
-
Na faapea mai Paulo o le Alo o le Atua, “ua faapea ona silisili o ia i agelu” (Eperu 1:4), na faapea foi ona “faamaulaloina teisi i agelu” (Eperu 2:9). O le a se ala na “faamaulaloina teisi ai Iesu i agelu”? (Tagai Mosaea 13:34–35. Na afio mai o ia i le lalolagi o se tagata ma sa oo ia te ia le tiga ma le oti.) Aisea na moomia ai lea tulaga? (Tagai Eperu 2:9–10, 16–18; 4:15–16; tagai foi i le Mataio 23:10–11.)
-
Na uunaiina e Paulo le Au Paia ina ia ola amiotonu ina ia mafai ai ona latou ulu atu i le malologa o le Atua (Eperu 3:7–19; 4:1–11). O le a le uiga o le ulu atu i le malologa o le Atua? (Tagai MFF 84:23–24; 3 Nifae 27:19.) O le a le faamatalaga a Paulo e uiga i le mafuaaga na le mafai ai e nisi o le fanauga a Isaraelu i le taimi o Mose ona ulu atu i le malologa o le Atua? (Tagai Eperu 3:7–11, 16–19; 4:1–2.) E mafai faapefea ona tatou fesoasoaniai ina ia tatou agavaa e ulu atu i le malologa o le Atua? (Tagai Eperu 3:13–14; 4:11; Alema 13:12–13, 16.)
2. O le Perisitua Mekisateko o se vaega o le atoatoaga o le talalelei.
Faitau ma talanoaina fuaiupu filifilia mai le Eperu 5; 6:20; 7.
-
O le a le mea na aoao mai e Paulo i le auala e tatau ai i se alii ona mauaina le pule o le perisitua? (Tagai Eperu 5:1–4.) Aisea e tatau ai i se tasi e umiaina le perisitua ona “filifilia e le Atua” nai lo le “fai fua e ia lenei faiva mamalu”?
-
O le a le pule o le perisitua lea e o mai faatasi ma le tulafono a Mose? (O le Perisitua Arona, e taua foi o le perisitua faa-Levi, perisitua maualalo, po o le perisitua faasauniuni. Tagai MFF 84:25–27.) O le a le pule o le perisitua e umia e Iesu Keriso? (Tagai Eperu 5:5–6; 6:20.) Ia faamatala atu, ina ua oo mai Iesu ma faataunuuina le tulafono a Mose, na ia toefuataiina mai foi le Perisitua Mekisateko. Aisea na talafeagai ai lea tulaga? (Tagai Eperu 7:11. O le Perisitua Arona e le o i ai le pule e faatinoina ai sauniga uma e moomia mo le faaolataga.)
“E le mafai e le tulafono a Mose po o le perisitua faa-Arona lea ua tuuina mai ona aumaia fanau a le Atua i le atoatoa. O le Perisitua Arona o se pule maualalo, ma e taitaiina na o le talalelei faasauniuni. O le Perisitua Mekisateko, o le perisitua maualuga, ua aumaia ina ia faataunuuina ai sauniga o le talalelei i o latou atoatoaga ma mafai ai ona faamamaina olaga ina ia mafai ai ona toe ulu atu i le afioaga o le Alii” (The Life and Teachings of Jesus and His Apostles [Tusi Lesona a le Ofisa o Aoga, 1979], 385–86; tagai foi i le MFF 107:18–20).
-
Aisea tatou te taua ai le perisitua maualuga o le Perisitua Mekisateko? (Tagai MFF 107:2–4.) O faapefea ona faamanuiaina tagata o le Ekalesia i aso nei i le mauaina o le Perisitua Mekisateko faapea foi ma le Perisitua Arona? O faapefea ona faamanuiaina lou olaga e le perisitua?
3. O le talalelei a Iesu Keriso o le feagaiga fou lea i le va o le Atua ma lana fanau.
Faitau ma talanoaina fuaiupu filifilia mai le Eperu 8:1–10:18. Ia faamatala atu na faamanatu atu e Paulo i tagata o le Ekalesia faapea o le tapuai i lalo o le tulafono a Mose o le faasino atu lea i le Alii o Iesu Keriso.
-
E tusa ai ma le Eperu 8:5, o le a le mea na tau atu e le Alii ia Mose ina ia faia ao fausiaina le fale fetafai ina ia faaaogaina e Isaraelu mo tapuaiga? (Ia faamatala atu o sauniga i totonu o le fale fetafai o se faatusa lea o “mea faalelagi,” e pei ona otootoina atu i lalo.)
Sauniga i le fale fetafai:
O le mea o loo faatusa i ai:
-
a. E tuuina atu e faitaulaga ia manu e avea ma taulaga i le Atua (Eperu 10:1–4, 11).
Na ofoina atu e Iesu o ia lava e avea o se taulaga mo a tatou agasala (Eperu 9:26–28; 10:4–12).
-
E tuuina e faitaulaga le toto mai manu ua taulagaina i luga o le fata faitaulaga e faatusa ai le faamamaina o tagata (Eperu 9:6–7, 19–23).
O le toto o Iesu, na faamaligiina i le taimi o le Togiola, ua faamamaina ai i tatou mai le agasala (Eperu 9:11–15).
-
E ui atu le faitaulaga sili i le veli i totonu o le Nofoaga Sili Ona Paia (Eperu 9:1–7).
O Iesu, le faitaulaga silisili, na ui atu o ia lava i le veli e oo atu i le lagi (Eperu 9:24).
-
-
Na faamatalaina e Paulo faapea o le tulafono a Mose o le feagaiga tuai lea i le va o le Atua ma ona tagata (Eperu 8:9; tagai foi i le Kalatia 3:24–25). O le a le feagaiga fou lea na aumaia e Iesu Keriso? (Tagai Eperu 8:6–8, 10–13. O le atoatoaga o le talalelei.) Ia faamanino atu o le feagaiga tuai o loo faamatalaina i le Feagaiga Tuai i le Tusi Paia, ae o le feagaiga fou o loo faamatalaina i le Feagaiga Fou.
-
Aisea na le mafai ai e le feagaiga tuai ona faaatoatoaina ona tagata? (Tagai Eperu 10:1–4.) Aisea ua tatou maua ai se faamoemoega sili mo le atoatoaga i le feagaiga fou? (Tagai Eperu 10:9–18.)
4. O i latou e faaalia lo latou faatuatua ia Iesu Keriso o le a maua so latou nofoaga i le malo o le Atua.
Faitau ma talanoaina fuaiupu filifilia mai le Eperu 10:19–11:40. Ia faamanino atu, ina ua maea ona faamatalaina atu e Paulo ia auala ua avea ai le atoatoaga o le talalelei ma se tulafono maualuga ma atoatoa, ua suitulaga i le tulafono a Mose, na ia apoapoaiina ai le Au Paia ina ia mulimuli i lenei “ala fou e ola ai” e ala i lo latou faatuatua ia Iesu Keriso (Eperu 10:19–22).
-
O le a le mataupu muamua, po o le mataupu faavae sili o le talalelei? (Tagai Mataupu Faavae o le Faatuatua 1:4.) O le a le faatuatua? (Tagai Eperu 11:1; Alema 32:21; Eteru 12:6.) Aisea e sili ai le faatuatua nai lo le talitonu? Aisea e moomia ai le faatuatua ia Iesu Keriso mo lo tatou faaolataga?
-
Na tuuina mai e Paulo le tele o faataitaiga o tagata o e na faataunuuina mea silisili e ala lea i le faatuatua ia Iesu Keriso. O ai na ia taua? (Tagai Eperu 11:4–12, 17–34.) Ia lisi i luga o le laupapa igoa o i latou na taua, ma talanoaina pe na faapefea ona moomia le faatuatua i gaoioiga a nei tagata taitoatasi.
Atonu e te manao e tuu tagata o le vasega i ni vaega laiti mo lenei talanoaga. Ia tofi atu vaega taitasi ina ia mafaufau i ni nai tagata o loo taua i le Eperu 11. Tuu atu i vaega ni nai minute ina ia talanoaina ai pe na faapefea ona moomia e gaoioiga a nei tagata le faatuatua, ona tuu atu lea i vaega taitasi e otootoina mai a latou faaiuga i le vasega.
-
Na aoao mai foi Paulo faapea o le faatuatua e mafai ona fesoasoani ia i tatou i taimi o faigata po o feteenaiga (Eperu 11:32–38). O faapefea ona fesoasoani le faatuatua ia te oe e te taulimaina ai le faigata? O a isi faamanuiaga ua e mauaina (po o se isi e te iloa) e ala i le faatinoina o le faatuatua ia Iesu Keriso?
Faaiuga
Ia faamanino atu ua faamanuiaina i tatou i lo tatou ola ai i se taimi ua i ai le atoatoaga o le talalelei. Ia molimau atu o le faaolataga e auala mai i le faatuatua ia Iesu Keriso ma le usiusitai i ana poloaiga. Ia uunaiina tagata o le vasega ina ia tausia feagaiga ma poloaiga o le talalelei toefuataiina.
Manatu Faaopoopo e Aoao Atu Ai
O mea nei e lagolago atu ai i le otootoga o le lesona ua fautuaina. Atonu e te manao e faaaoga le tasi po o le sili atu foi o nei manatu e avea o se vaega o le lesona.
1. O le a tausia e le Atua ana folafolaga
-
O le a se mea o loo aoao mai e le Eperu 6:10-19 e uiga i folafolaga a le Atua i Lana fanau? O le a se mea o loo aoao mai e le fuaiupu 15 e uiga i le sootaga o le tumau i tofotofoga ma le mauaina o folafolaga a le Atua? (Tagai foi MFF 82:10.) O a ni mea na e oo i ai ina ua faataunuuina e le Atua ana folafolaga ia te oe?
2. “Aua o le ua alofagia e le Alii, ua aoai atu o ia ia te ia” (Eperu 12:6)
Tuu atu i tagata o le vasega e faitauina le Eperu 12:5–11.
-
E faapefea ona aoaiina i tatou e le Alii? E faapefea ona “aoga mo i tatou” le aoaiga mai le Alii? (Tagai Eperu 12:10; MFF 61:8; 95;1; 101:5.) E mafai faapefea ona tatou faaaogaina le aoaiga e avea o se avanoa e aoao ma tuputupu ae ai? Ia valaaulia tagata o le vasega ina ia faamatala atu e uiga i taimi na aoaiina ai i latou e le Alii ma mea na latou aoaoina mai ai i mea na latou oo i ai.