Lesona 10

“Ia Outou Amoina La’u Amo, ma Faaaoao mai ia te Au”

Mataio 11:28–30; 12:1–13; Luka 7:36–50; 13:10–17

Faamoemoega

Ina ia fesoasoani i tagata o le vasega ia latou malamalama afai tatou te amoina le amo a le Faaola i o tatou luga ma faia lona finagalo, o le a tatou mauaina le filemu ma le olioli lea na ia folafolaina mai.

Sauniuniga

1. Faitau, mafaufau loloto, ma tatalo e uiga i mau nei.

   1. Mataio 11:28–30. Na valaauliaina e Iesu i latou uma o e tigaina ma mafatia i avega ina ia o atu ia te ia, ma amoina lana amo, ma faaaoao ia te ia.

   2. Mataio 12:1–13; Luka 13:10–17. Na faailoa atu e Iesu o ia o le Alii o le Sapati. Na ia faamalolo i le Sapati ma na faitioina ai o ia.

   3. Luka 7:36–50. O se fafine na ia sailia le faamagaloga na mulumuluina aao o le Alii i ona loimata; na faitioina e Simona le Faresaio ia Iesu ona o lona faatagaina o le fafine agasala e pai atu ia te Ia. Na aoaoina e Iesu ia Simona i le faataoto i tagata nono tupe e toalua ma sa ia faamagaloina le fafine.

2. Tusi faitau faaopoopo: Isaia 58:13–14; Mataio 11:16–19; 12:14–50; 26:6–13; Mareko 2:23–3:12; 14:3–9; Luka 6:1–11; Mataupu Faavae ma Feagaiga 59:9–19.

3. Afai e maua mea nei, ia faaaoga i le taimi o le lesona:

   1. “O mai ia te Au,” o se ata e fitu minute mai Ata Vitio o le Feagaiga Fou (53914).

   2. O le ata Ua Sopoia e Mele Filitia ma Iosefa F. Samita Fanua Laugatasi (62608; Taga Ata o le Talalelei 412), lea o loo faaali mai ai ni povi se lua ma avega.

4. Fautuaga mo le aoaoina atu: A o e sauniaina au lesona taitasi, ia mafaufau ma le agaga tatalo pe faapefea ona e uunaiina tagata taitoatasi o le vasega ina ia auai. O faataitaiga, talanoaga faavaega, faatinoina o se tala, ma isi gaoioiga e talafeagai ai e mafai ona fesoasoani i tagata o le vasega ina ia auai ma le atoatoa. (Tagai i le O Le Aoao Atu—E Leai Se Isi Valaauga e Sili Ai, 62–79, 167–93.)

Faalautelega Fautuaina o le Lesona

Gaoioiga e Faatosina Mai Ai

Afai e talafeagai ai, ia faaaoga le gaoioiga lenei po o sau lava gaoioiga e amata ai le lesona.

Fai atu i se tagata o le vasega e sau i luma o le vasega ma faaloloa i luma ona lima. Tuu ni tusi po o nisi mea mamafa i luga o ona lima. Ia faaauau pea ona la’u ni mea i luga o lima o le tagata lea seia oo lava ina ua foliga mai ua le lava. Ona fesili atu lea i ai:

Gaoioiga e Faatosina Mai Ai

• O le a le mamao e mafai ona e tauaveina ai lenei avega ae e te lei malolo? O a ni fuafuaga e te faia ina ia umi ai se mamao e te tauaveina ai lenei avega?

Ia faamalamalama atu e tele ituaiga avega, po o amoga. O nisi e faaletino, ae o isi e faaleagaga pe faalelagona foi ma e le faigofie foi ona iloa. O le tele o avega e le vaaia e mafai ona sili atu nai lo lo tatou malosi e tauaveina ai, ma tatou te vaivai ai. O lenei lesona o loo talanoaina ai pe mafai faapefea e le Alii ona faamamaina a tatou avega ma aumaia le malologa ia i tatou.

Mau Talanoaina ma le Faaaogaina

A o e aoaoina atu nei mau, ia talanoaina pe faapefea ona faaaoga i le olaga i aso taitasi. Uunai le vasega e fetufaai atu ni mea na latou oo i ai lea e faatatau i nei mataupu faatusitusiga paia.

1. Ua valaaulia i tatou e Iesu ina ia tatou tauaveina lana amo ma faaaoao ia te ia.

Faitau ma talanoaina le Mataio 11:28–30.

• O le a le uiga o le “mafatia ma tigaina i avega”? (Mataio 11:28). O a nisi faataitaiga o avega o loo tatou tauamoina i lenei olaga? E mafai faapefea e le Alii ona “aumaia le malologa” mai nei avega?

• O le a le amo? (Faaali atu le ata o Mele Filitia ma Iosefa F. Samita ma faailoa atu ia povi ma le amo o loo i ai i le ata. Ia faamalamalama atu o se amo o se laau lea e mafai ona tuuina i luga o ni tagata po o ni meaola se toalua o loo tosoina pe tauaveina se avega mamafa. O le amo e faapaleni ai le avega ma faigofie ai ona toso. I le faaopoopo atu i ai i lona uiga ua faamatalaina, o le mataupu i le amo o loo faaalia mai foi i le tele o mau e avea ma faatusa mo le saisaitia po o le pologa; tagai i le Ieremia 28:2; Alema 44:2.) O le a le uiga o le tauaveina o le amo a Keriso i o tatou luga? (O le faia lea ma le lotomaualalo o lona finagalo ma faatagaina o ia e taitaiina ma faatonutonuina o tatou olaga.)

Afai o loo e faaaogaina le ata vitio o le “O mai ia te Au,” ia faaali atu loa le vaega muamua i le taimi nei. Taofi le ata pe a maea le saunoaga a Peresitene Howard W. Hunter.

• Na fetalai mai le Alii, “E avegofie la’u amo, o la’u avega foi e mama ia” (Mataio 11:30). O le a le uiga o le avegofie o le amo a le Faaola? Aisea e manatu ai nisi tagata faapea o aoaoga a le Faaola ua mamafa tele? E faapefea ona avea le usiusitai ma auauna i le Alii ma auala e faamamaina ai a tatou avega?

2. Na faailoa mai e Iesu o ia le Alii o le Sapati.

Ia talanoaina le Mataio 12:1–13 ma le Luka 13:10–17. Ia valaaulia tagata o le vasega e faitau leotele ia fuaiupu filifilia.

• O le a le mea na faia e le Au Faresaio ina ua latou vaai o ooti e soo o Iesu ia ‘au o saito i le Sapati? (Tagai Mataio 12:1–2. Ia faamalamalama atu o le faaliliuga a le Au Faresaio i le tulafono a Mose na teenaina ai le agaga moni ma le faamoemoega o le Sapati ae ua tulimatai atu i tu ma aga ia e matuai faasaina ai ni gaoioiga i le Sapati.) O le a le mea na aoaoina atu e le Alii a o ia tali atu i nei tuuaiga? (Tagai Mataio 12:3–8.)

• O le a le uiga o le fetalaiga a Iesu ina ua ia faapea mai, “Ou te loto i le alofa, ae le o le taulaga”? (Mataio 12:7. Na ia finagalo ina ia taulai atu tagata i le alolofa i isi, ae le na o le faataunuuina lava o sauniga faalelotu faitele.) E mafai faapefea ona tatou faaaogaina lenei mataupu e taitaiina ai a tatou gaoioiga i le Sapati?

• O le a le mea na aoao atu e Iesu e uiga i le faamoemoega o le Sapati ina ua ia faamaloloina le tagata na gase lona lima ma le fafine sa i ai le agaga e vaivai ai? (Tagai Mataio 12:10–13; Luka 13:10–17.) O le a le mea na ia aoaoina e uiga i le Sapati i le Mareko 2:27–28? (Ia faamanino atu o le Faaliliuga a Iosefa Samita o le Mareko 2:26 o loo faamatalaina ai faapea na tuuina mai le Sapati e avea o se aso e malolo ai ma vivii ai i le Atua.) O a mea e mafai ona tatou faia i le Sapati ina ia viia ai le Atua? E mafai faapefea e lo tatou tausia o le faapaiaina o le Sapati ona faamamaina ai a tatou avega ma tatou maua ai le malologa?

3. Ua faamagaloina e Iesu se fafine i totonu o le fale o Simona le Faresaio.

Afai o loo e faaaogaina le ata vitio o le “O mai ia te Au,” ia faaali atu loa le vaega lena e totoe i le taimi nei. Ona faitau lea ma talanoaina ia fuaiupu filifilia mai le Luka 7:36–50.

• O le fafine na ulu atu i le fale o Simona le Faresaio na ia tauaveina le avega o le agasala (Luka 7:37). O le a le mea na faia e le fafine na faatagaina ai e Iesu le aveeseina o lana avega? (Tagai Luka 7:38, 44–50.) O le a se mea e mafai ona tatou faia ina ia aveesea ai e le Faaola le avega o le agasala mai o tatou olaga?

• E faapefea ona eseese Simona le Faresaio ma le fafine agasala i o laua uiga ia Iesu? (Faatusatusa le salamo, faaaloalo, lotomaualalo, ma le alofa o le fafine i le faamaualuga, leai se faaaloalo, ma uiga faamasino atu o Simona. Tagai foi i le upu sii lea o loo i lalo.) Aisea e taua ai uiga sa i le fafine pe a tatou salamo ma saili atu mo le faamagaloga? E faapefea ona taofia i tatou mai le salamo i uiga e pei ona sa ia Simona?

  Na aoao mai Elder James E. Talmage faapea: “O se aganuu i na ona po le tausia o se malo faaaloalogia i le gauai atoa i ai; e faafeiloai atu ia te ia i se kisi, e saunia se apa vai e mulumulu ai le palapala mai ona vae, ma le suauu e uu ai le lauulu ma le ‘ava. O nei aga faaaloalo uma e le’i faia e Simona” (Jesus the Christ, 3rd ed. [1916], 261).

• O a ni uiga o Simona na faaalia i le fafine na foliga mai ai ua mamafa tele lana avega? E faapefea ona foliga mai tatou te faamamafa i se avega o agasala a se isi i nisi o taimi? O le a se mea e mafai ona tatou aoaoina mai le tali a le Faaola i le fafine?

• E ui lava e lei valaauliaina o ia ma o se tulaga faigata foi uiga le lelei o Simona ma lona aiga na faaalia ia te ia, ae na alu atu sao lava le fafine ia Keriso i le taimi lava na ia iloaina ai le mea e maua i ai o ia (Luka 7:37). O le a se mea e mafai ona tatou aoaoina mai lana faataitaiga? O a ni faafaigata atonu e taofia ai i tatou mai le salamo ma o mai ia Keriso? E mafai faapefea ona tatou faatoilaloina nei faafaigata?

• O le a se mea e mafai ona tatou aoaoina mai le faataoto i tagata nono tupe e toalua? (Tagai Luka 7:41–50.) E faapefea ona faatusatusa le agasala i le nofo aitalafu? (Tagai Luka 7:44–50.) E mafai faapefea ona faamamaina a tatou avega i le avea ai o Keriso ma o tatou “togisala”?

Faaiuga

Ia molimau atu e mafai ona tatou filifili e ave i o tatou luga ia avega a le lalolagi po o le amo a Iesu. Ia molimau atu o aoaoga a Keriso e moni ma o le a tatou maua lava le malologa pe a tatou mulimuli ia te ia. Ia uunaiina tagata o le vasega ina ia faaaoao ia Keirso ma usiusitai i ana aoaoga ina ia mafai ai ona latou maua le malologa ma le filemu.

Manatu Faaopoopo e Aoao Atu Ai

O mea nei e lagolago atu ai i le otootoga o le lesona ua fautuaina. Atonu e te manao e faaaoga le tasi po o le sili atu foi o nei manatu e avea o se vaega o le lesona.

1. O le taua o le lotogatasi

Faitau ma talanoaina le Mataio 12:22–30.

• E faapefea ona tatou fevaevaeai i nisi taimi i o tatou aiga, fale, po o uarota? O le a se mea e mafai ona tatou faia ina ia tatou lotogatasi atili ai?

• Na fetalai atu Iesu i le Au Faresaio, “O se le ‘au ia te au, e ‘au ese lea ia te au” (Mataio 12:30). Aisea?

2. “O upu faatauvaa uma” (Mataio 12:36)

Faitau ma talanoaina le Mataio 12:33–37.

• O le a se mea e faaalia mai ia i tatou e upu tatou te tautatala ai? Aisea na matuai faatauaina ai e Iesu ia upu tatou te tautatala ai? O a nisi o faataitaiga o “upu faatauvaa”? (O tali e mafai ona aofia ai le faatausuai, faitala, pepelo, upu leaga, le mafaufau.) E mafai faapefea ona tatou faamalosia la tatou tautinoga ina ia tautala i auala lelei?

3. Gaoioiga a le autalavou

Ia saunia se fasi pepa e i ai le paso lenei mo tagata uma o le vasega. A maea ona e faitauina ma talanoaina ia mau faitauina, ona tufa atu lea o kopi o le paso. Fai atu i tagata o le vasega e sue upu e talafeagai i le lesona o loo nanaina i le paso. O upu e mafai ona laina i luga ma lalo po o autafa, po o le faalava i le tulimanu. Afai e moomia e tagata o le vasega le fesoasoani pe a mavae ni nai minute, ona latou toe faitauina lea o fuaiupu na o loo i ai upu natia (Mataio 11:28–30: avega, mafatia, amo; Mataio 12:1–13: Sapati, malolo; Luka 7:36–50: faataoto, nono tupe, magalo).

P	M	A	V	E	G	A	M
N	O	N	O	T	U	P	E
M	A	L	O	L	O	S	U
L	S	A	P	A	T	I	M
F	A	A	T	A	O	T	O
M	A	G	A	L	O	I	F
A	M	O	T	O	F	G	I
M	A	F	A	T	I	A	U